LAGANI rua idia hanaia bona Iosepa be dibura ruma ai ia do noho. Uaina bubua tauna ese Iosepa ia laloatao lasi. Bena hanuaboi ta ai Farao be nihi rua ia abia, bona ia ura edia anina ia diba. Laulau dekenai oi itaia diba, ia mahuta noho. Murina dinana ai, Farao ese ena aonega taudia ia boiria bona idia dekenai ena nihi ia gwauraia. To ena nihi ena anina idia gwauraia diba lasi.

Unai neganai, uaina bubua tauna ese Iosepa ia laloatao. Farao dekenai ia gwau: ‘Dibura ruma lalonai lau noho neganai, tau ta ia noho bona nihi edia anina ia gwauraia diba.’ Maoromaoro Farao ese Iosepa be dibura ruma amo ia boiria.

Farao ese ena nihi Iosepa dekenai ia gwauraia: ‘Lau ese mai hairai bona kopina bada boromakau 7 lau itaia. Bena kopina maragi boromakau 7 ma lau itaia. Bona kopina maragi boromakau ese kopina bada boromakau idia ania ore.

‘Egu nihi iharuana lalonai uiti tamona ia tubu mai ena anina namodia 7 lau itaia. Bena ma uiti ta ena anina 7 be maragi bona kakoro lau itaia. Bona uiti anina maragi 7 ese uiti anina bada 7 idia ania ore.’

Iosepa be Farao dekenai ia gwau: ‘Unai nihi rua edia anina be tamona. Kopina bada boromakau 7 bona uiti anina namodia 7 edia anina be lagani 7, bona kopina maragi boromakau 7 bona uiti anina maragi 7 edia anina be ma lagani 7. Lagani 7 lalonai aniani bada herea be Aigupito dekenai do ia tubu. Unai murinai lagani 7 lalodia aniani sisina sibona do ia tubu.’

Unai dainai Iosepa ese Farao ia hamaoroa: ‘Aonega tauna ta oi abia hidi bona lagani namodia 7 lalonai ia ese aniani haboua gaukara do ia naria. Unai amo taunimanima do idia hitolo mase lasi aniani sisina lagani 7 lalodiai.’

Farao be unai lalohadai ia ura henia. Bona ia ese Iosepa ia abia hidi aniani gogoa bona haboua totona. Aigupito dekenai Farao henunai Iosepa be ladana badana tauna ai ia lao.

Lagani 8 murinai, hitolo negana lalonai, Iosepa ese tatau haida ia itaia idia mai noho. Idia oi diba, a? Idia be ena kakadia 10! Edia tamana Iakobo ese Aigupito dekenai idia ia siaia badina Kanana dekenai aniani be bada lasi. Iosepa be ena kakadia ia diba, to idia be Iosepa idia diba lasi. Ena badina oi diba, a? Badina Iosepa ia bada vadaeni bona ia hahedokilaia dabuana be idau.

Iosepa ia laloatao ia mero neganai, ia nihi ena tadikaka be ia dekenai idia mai bona idia tui diho. Unai oi laloatao, a? Unai dainai Iosepa ia diba, Dirava ese badina namona ta dainai Aigupito dekenai ia Ia siaia. Oi laloa Iosepa be dahaka ia karaia? Mani ita itaia.