INAI gorere tauna oi hebogahisi henia, a? Iena ladana be Iobu, bona inai hahine be ena adavana. Iobu dekenai ia gwauraia noho herevana oi diba, a? Ia gwau: ‘Dirava oi gwauraia dika bona oi mase.’ Unai bamona ia hereva ena badina bona Iobu ia abia hisihisi bada ena badina mani ita itaia.

Iobu be abidadama tauna bona Iehova ia kamonai henia. Ia be Kanana kahirakahira ia noho tanona, Usu dekenai ia noho. Iehova ese Iobu ia lalokau henia bada, to ta ese Iobu ia inai henia. Unai tauna oi diba, a?

Ia be Satani Diabolo. Laloatao, Satani be aneru dikana bona Iehova ia inai henia. Adamu bona Heva ia koia bena Iehova idia kamonai henia lasi bona ia laloa taunimanima ibounai ia koia diba Iehova idia kamonai henia lasi totona. To unai bamona ia karaia, a? Lasi. Guna ita dibaia abidadama tatau bona hahine momo mani oi laloa. Hida edia ladadia oi gwauraia diba?

Iakobo bona Iosepa be Aigupito dekenai idia mase murinai, Iobu ena abidadama Iehova dekenai ese tanobada ai idia noho taudia ibounai edia abidadama ia hanaia. Iehova ia ura Satani ia hadibaia, ia ese taunimanima ibounai ia koia diba lasi, unai dainai ia gwau: ‘Iobu oi itaia. Lau ia badinaia momokani.’

Satani ia gwau: ‘Oi ia badinaia noho badina ia oi hanamoa bona ena gau namodia be momo. To bema unai gaudia oi kokia, oi do ia gwauraia dika.’

Unai dainai Iehova ia gwau: ‘Oi kokidia. Iobu dekenai emu ura kara dikadia oi karaia. Do ita itaia bema lau do ia gwauraia dika eiava. To gau tamona, ia oi hamasea lasi.’

Gau ginigunana be, Satani ese taunimanima ia siaia Iobu ena boromakau bona kamelo idia henaoa bona ena mamoe ia hamasedia. Bena lai badana amo Iobu ena natudia 10 ia hamasedia. Gabeai, Satani ese Iobu dekenai inai gorere dikana ia havaraia. Iobu ia hisihisi bada. Unai dainai Iobu ena adavana be Iobu dekenai ia gwau: ‘Dirava oi gwauraia dika bona oi mase.’ To Iobu be unai bamona ia karaia lasi. Danu, turana koikoi toi idia mai bona ia idia hamaoroa ia kara dika. To Iobu ese Dirava ia abidadama henia.

Unai dainai Iehova ia moale bada, bona gabeai Iobu ia hanamoa, inai laulau dekenai oi itaia bamona. Iena gorere ia hanamoa. Iobu ese ma natuna hairaidia 10 ia abia, bona ena boromakau, mamoe bona kamelo edia namba gunana be nega rua amo ia habadaia.

Iobu bamona nega ibounai Iehova do oi abidadama henia, a? Bema unai bamona oi karaia, Dirava ese oi do ia hanamoa. Tanobada ibounai be Eden umana bamona gabu hairaina ai ia halaoa neganai, do oi mauri hanaihanai diba.