Asuria basileia ese Israela ena iduhu 10 basileia ia abia. Hari Asuria ena king Senakeriba ia ura Iuda basileia ena iduhu rua danu ia abia. Ia ese Iuda ena siti ta ta ia abia matamaia. Bona ia ura henia siti be Ierusalema. To Senakeriba ia diba lasi Iehova ese Ierusalema ia gimaia noho.

Iuda ena king Hesekaia ese Senakeriba dekenai moni bada herea ia henia, unai amo Ierusalema do ia rakatania. To, Senakeriba be ena tuari orea goadana ia siaia Ierusalema tuari henia totona. Siti ai idia noho taudia idia gari badina Asuria taudia be idia mai noho. Bena Hesekaia ese idia ia hamaoroa: ‘Umui gari lasi. Asuria taudia idia goada, to Iehova ese ita dekenai goada bada do ia henia.’

Senakeriba ese ena gwaukau tauna Rabesake ia siaia, Ierusalema dekenai hevaseha herevadia ia gwauraia totona. Rabesake be siti murimuri ai ia gini bona ia boiboi: ‘Iehova ese umui ia durua diba lasi. Hesekaia be umui ia koia noho. Dirava ta ese ai amo umui do ia gimaia diba lasi.’

Hesekaia ese Iehova ia nanadaia dahaka do ia karaia. Iehova ia haere: ‘Rabesake ena hereva dainai oi gari lasi. Senakeriba ese Ierusalema do ia abia lasi.’ Bena Hesekaia ese Senakeriba amo revareva haida ia abia, ia gwau: ‘Umui hekwarahi kava. Iehova ese umui ia hamauria diba lasi.’ Hesekaia ia guriguri: ‘Iehova e, mani ai oi hamauria, unai amo idia diba oi be Dirava momokani tamona.’ Iehova ia gwau: ‘Asuria ena king be Ierusalema lalonai do ia vareai lasi. Egu siti do lau gimaia.’

Senakeriba ia mamia daudau lasi Ierusalema do ia abia. To hanuaboi tamona ai, Iehova ese aneru ta ia siaia bona siti murimuri ai idia kamepa tuari taudia 185,000 ia hamasea! King Senakeriba ena tuari taudia  goadadia idia mase ore. Ia be gau ta ia karaia diba lasi dainai ena hanua dekenai ia giroa. Iehova be ena gwauhamata hegeregerena Hesekaia bona Ierusalema ia gimaia. Bema oi be Ierusalema dekenai oi noho, Iehova do oi trast henia, a?