Elisabeta be mai ena varavara ta, ia be kekeni matamata, ena ladana be Maria, Galilea ena siti Nasareta ai ia noho. Maria be kapenta tauna Iosepa ida ia maoheni. Elisabeta be ia rogorogo bona hua 6 neganai, aneru Gabriela be Maria dekenai ia hedinarai. Aneru ia gwau: ‘Dina namona, Maria. Iehova ese oi ia lalonamo henia bada.’ Maria be Gabriela ena hereva ia lalopararalaia lasi. Gabriela ese ia hamaoroa: ‘Oi be do oi rogorogo bona natuna mero ta do oi havaraia bona iena ladana do oi hatoa Iesu. Ia be King ai do ia lao. Iena Basileia be do ia noho hanaihanai.’

Maria ia gwau: ‘Unai be edena bamona do ia vara, badina tau ta ida lau mahuta hebou lasi?’ Gabriela ia gwau: ‘Iehova ena hereva ibounai be do idia guguru. Lauma helaga be oi latanai do ia diho, bona natuna mero ta do oi havaraia. Emu varavara Elisabeta be ia rogorogo.’ Bena Maria ia gwau: ‘Lau be Iehova ena hesiai kekenina! Mani emu hereva hegeregerena lau dekenai do ia vara.’

 Maria be Elisabeta vadivadi henia totona ororo ai idia noho siti ta dekenai ia lao. Maria be hanamoa hereva ia gwauraia neganai, Elisabeta ena bogana ai ia noho beibi ia marere. Elisabeta be lauma helaga amo ia honu bona ia gwau: ‘Maria e, Iehova ese oi ia hanamoa. Inai be hahenamo badana, badina egu Lohiabada ena sinana be lau ia vadivadi henia.’ Maria ia gwau: ‘Iehova lau hanamoa mai kudouna ibounai ida.’ Maria be hua toi Elisabeta ida ia noho, bona ena hanua Nasareta dekenai ia giroa lou.

Maria ia rogorogo ena sivarai be Iosepa ese ia dibaia neganai, ia ura do idia divos. To nihi ai aneru ta ia gwau: ‘Ia adavaia totona oi gari lasi. Ia be kara dika ta ia karaia lasi.’ Unai dainai Iosepa ese Maria ia adavaia bona iena ruma dekenai ia abia lao.