Iehova ese Ieremia ia abia hidi, Iuda taudia totona peroveta gaukara do ia karaia. Ieremia ia hamaoroa taunimanima ia haroro henia bona hadibaia edia kara dikadia idia rakatania totona. Ieremia ia gwau: ‘To Iehova e, lau be mero matamata sibona. Lau be hereva dalana lau diba lasi.’ Iehova ese ia hamaoroa: ‘Oi gari lasi. Do oi herevalaia gaudia be oi do lau hadibaia. Oi do lau durua.’

Iehova ese Ieremia ia hamaoroa edia tau badadia oi haboua bona idia vairanai uro oi hamakohia, bona oi gwau: ‘Ierusalema be inai bamona do idia hadikaia.’ Ieremia ese Iehova ia gwauraia gauna ia karaia neganai, tau badadia idia badu. Hahelaga tauna Pasahuru ese Ieremia ia botaia bona ena imana, aena bona aiona be au metaudia amo ia lokaia. Hanuaboi lalonai, Ieremia ia marere diba lasi. Daba ai Pasahuru ese ia ruhaia. Ieremia ia gwau: ‘Dirava do lau herevalaia lou lasi. Do lau haroro lasi.’ To unai ia karaia, a? Lasi. Ieremia be unai ia laloa noho neganai, ia gwau: ‘Egu kudouna ai Iehova ena hereva be lahi bamona ia araia noho. Bona lau koua diba lasi.’ Ieremia be ia do haroro noho.

Lagani idia hanaia, bona Iuda ai king matamata ta ia lohia. Hahelaga taudia bona koikoi peroveta taudia be Ieremia ena hereva idia ura henia lasi. Lohia taudia idia hamaoroa: ‘Inai tauna ia mase be namo.’ Ieremia ia gwau: ‘Bema lau oi hamasea, umui be kerere lasi tauna do umui hamasea. Lau be Iehova ena hereva lau harorolaia, lauegu hereva lasi.’ Lohia taudia be unai idia kamonai neganai, idia gwau: ‘Inai tauna umui hamasea lasi be namo.’

 Ieremia ia haroro noho bona, lohia taudia idia badu dikadika. Ieremia hamasea totona King idia noia. King ese idia dekenai gwaumaoro ia henia. Ieremia idia dogoatao bona guri mai ena kopukopu lalonai idia negea diho, idia laloa unuseniai do ia mase. Ieremia be kopukopu lalonai ia diho matamaia.

Gabeai ofesa tauna badana Ebede-meleke ese king ia hamaoroa: ‘Lohia taudia ese guri lalonai Ieremia idia negea diho! Bema unuseniai ita rakatania, do ia mase.’ King ese Ebede-meleke ia hamaoroa tatau 30 do ia abia bona Ieremia idia veria daekau. Ieremia bamona, ita ura lasi gau ta ese iseda haroro gaukara ia koua, ani?