Hanuaboi ta ai, Nebukanesa be ia itaia nihi dainai ia gari. Ia ese ena aonega taudia ia boiria mai nihi ena anina idia gwauraia totona. To idia ta ese unai nihi ena anina idia gwauraia hedinarai diba lasi. Bena king ese Daniela ia hereva henia.

Nebukanesa ese Daniela ia hamaoroa: ‘Nihi lalonai, au ta lau itaia. Inai au ia tubu bona ia daekau lao guba dekenai. Tanobada taudia ibounai ese idia itaia diba. Ena raurau be mai ena hairai, bona huahua be momo herea. Animal idauidau be unai au ena ikerukeru henunai idia noho, bona manu idauidau be au ena rigidia ai idia helai. Bena guba amo aneru ta ia diho mai. Ia boiboi: “Au utua diho, bona ena rigidia utua. To au ena badina bona ramuna be tano amo kokia lasi, au ena badina be auri bona kopa amo idia karaia gauna amo hagegea. Au ena kudouna be do ia idau bona animal edia kudouna bamona ai do ia lao, bona unai bamona do ia noho ela bona lagani 7 idia ore. Unai amo taunimanima ibounai do idia diba Dirava be Lohia Tauna bona ia ese basileia be ia ura tauna dekenai do ia henia.”’

Iehova ese Daniela dekenai nihi ena anina ia hahedinaraia. Daniela be nihi ena anina ia lalopararalaia neganai ia gari. Ia gwau: ‘King e, unai nihi be oi idia inai henia taudia ia herevalaia be namo, to unai be oi dekenai do ia vara. Idia utua au badana be oi. Oi ese emu basileia do oi haboioa, bona animal ta bamona rei do oi ania. To aneru ia gwau au ena ramuna be tano amo ia kokia lasi badina oi be king ai do oi lao lou.’

Lagani ta murinai, Nebukanesa be ena ruma ena guhi ai ia raka loaloa bona Babulonia ena hairai ia moalelaia. Ia gwau: ‘Lau haginia siti hairaina umui itaia. Egu goada amo unai lau karaia!’ Ia hereva noho neganai, guba amo gadona ta ia hereva: ‘Nebukanesa! Hari basileia be oi amo ia boio vadaeni.’

Unai nega ai, Nebukanesa ia kavakava bona uda animal bamona ai ia lao. Iena ruma amo ia idia lulua bona uda animal ida ia noho. Nebukanesa ena huina be ia lata ia lao ugava ena huina bamona, bona ena ima koukou be manu edia koukou bamona.

 Lagani 7 idia ore murinai, Nebukanesa ia namo lou bona Iehova ese Babulonia ena king ai ia halaoa lou. Bena Nebukanesa ia gwau: ‘Iehova, guba ena King lau hanamoa. Hari lau diba Iehova be Lohia Tauna. Ia ese hekokoroku taudia ia hamanaua, bona ia ese basileia be ia ura tauna dekenai do ia henia.’