Belesasa be Babulonia ena king ai ia lao. Hanuaboi ta ai, ia ese aria ta dekenai dagi bada taudia momo ia boiria. Iena hesiai taudia ia oda henia Nebukanesa ese Ierusalema ena dubu helaga amo ia abia mai golo kapusi idia mailaia totona. Belesasa bona ena turadia be unai kapusi amo wain idia inua bona edia dirava idia hanamoa. Karaharaga aniani gabuna ai, haba dekenai tau ta ena imana ia hedinarai bona idia lalopararalaia lasi herevadia ia torea.

Belesasa ia gari. Iena meamea taudia ia boiria bona ia gwauhamata: ‘Bema ta ese inai hereva ena anina ia gwauraia hedinarai, ia be Babulonia ena lohia tauna ihatoina ai do ia lao.’ To idia ta be hegeregere lasi unai toretore ena anina idia gwauraia totona. Kwini ia mai bona ia gwau: ‘Tau ta ladana Daniela ia noho, ia ese Nebukanesa dekenai nihi edia anina ia gwauraia hedinarai. Ia ese oi dekenai unai hereva edia anina ia gwauraia diba.’

Daniela be king dekenai ia mai. Belesasa ese Daniela ia hamaoroa: ‘Bema oi ese inai hereva oi duahia bona anina oi gwauraia, golo ageva do lau henia bona oi be Babulonia ena lohia tauna ihatoina ai do oi lao.’ Daniela ia gwau: ‘Emu harihari gauna lau ura lasi, to inai hereva ena anina do lau gwauraia. Emu tamana Nebukanesa be ia hekokoroku, bona Iehova ese ia hamanaua. Unai sivarai oi diba to Iehova oi matauraia lasi bona ena dubu helaga ena golo kapusi oi gaukaralaia wain oi inua totona. Unai dainai Dirava ese unai hereva ia torea: Mene, Mene, Tekele, bona Parasini. Inai hereva ena anina be Media bona Parasa taudia ese Babulonia do idia abia, bona oi amo king ena dagi do idia kokia.’

Toana be Babulonia be bese ta ese do ia hadikaia diba lasi. Unai siti ena magu be badadia bona sinavai ese ia hagegea. To unai hanuaboi ai, Media bona Parasa taudia  idia vareai. Parasa ena King Kurese be sinavai ena heau dalana ia haidaua dainai tuari taudia be siti ena geiti dekenai idia lao diba. Idia ginidae neganai, geiti be idia kehoa noho! Vadaeni, tuari taudia idia vareai, siti idia hadikaia, bona king idia hamasea. Bena Kurese be Babulonia ena lohia tauna ai ia lao.

Lagani ta lalonai, Kurese ese hadibaia hereva ia gwauraia: ‘Iehova ese lau ia hamaoroa Ierusalema ai ena dubu do lau haginia lou. Bema ena taunimanima idia ura unai gaukara idia durua idia lao diba.’ Iehova ena gwauhamata hegeregerena, Ierusalema idia hadikaia bona lagani 70 murinai Iuda taudia be Ierusalema dekenai idia giroa lou. Kurese be dubu amo Nebukanesa ese ia abia mai golo bona siliva kapusi bona gau ma haida ia siaia giroa. Iehova ese ena taunimanima ia durua totona Kurese ia gaukaralaia dalana oi itaia, a?