1. Ruma bese hamoalea dalana be dahaka?

IEHOVA DIRAVA ia ura emu ruma bese taudia idia moale. Baibel lalonai Dirava ese ruma bese taudia hakaua totona heduru herevadia ia henia, bona do idia huaia maduna ta ta ia herevalaia. Ruma bese taudia ta ta ese Dirava ia henia sisiba hegeregerena edia maduna idia huaia neganai, namo bada do idia davaria. Iesu ia gwau: “Dirava ena hereva idia kamonaia bona idia badinaia taudia be idia moale bada.”​—Luka 11:28.

2. Ruma bese lalonai moale ia noho totona, dahaka ita abia dae be namo?

² Ruma bese lalonai moale ia noho totona, namona be ita abia dae Iehova be ruma bese havaraia tauna, Iesu ese Ia ia gwauraia, “Aiemai Tamana.” (Mataio 6:9) Iseda guba Tamana ese tanobada dekenai idia noho ruma bese ibounai ia havaraia, bona ruma bese hamoalea dalana ia diba. (Efeso 3:​14, 15) Baibel ese ruma bese taudia ta ta edia maduna be edena bamona ia herevalaia?

3. Ruma bese ia matamaia dalana be Baibel ese edena bamona ia gwauraia, bona dahaka dainai ita diba ia gwauraia gaudia be momokani?

³ Iehova ese Adamu bona Heva ia havaraia bona ia hakapudia tau bona hahine. Tanobada paradaiso hairaina​—Eden uma gabu​—dekenai ia atodia bona idia ia hamaoroa natudia idia havaraia  totona. Iehova ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho.” (Genese 1:​26-28; 2:​18, 21-24) Unai be sivarai eiava gori ta sibona lasi, badina Genese ese ruma bese ena matamana ia herevalaia dalana be Iesu ese ia hamomokania. (Mataio 19:​4, 5) Ena be hekwakwanai momo ita davaria bona hari ita noholaia maurina be Dirava ena ura hegeregerena lasi, to ruma bese lalonai moale ia vara diba daladia mani ita itaia.

4. (a) Edena dala ai ruma bese taudia ta ta ese moale idia havaraia diba? (b) Ruma bese lalonai moale ia noho totona, dahaka dainai Iesu ena mauri sivaraina ita stadilaia be mai anina bada?

⁴ Ruma bese taudia ta ta ese ruma bese lalonai moale idia havaraia diba, bema Dirava ese ia hahedinaraia lalokauna idia tohotohoa. (Efeso 5:​1, 2) To Dirava ita itaia diba lasi dainai, edena bamona ia ita tohotohoa diba? Iehova ena kara ita dibaia diba, badina ia ese ena vara guna Natuna be guba amo ia siaia diho mai tanobada dekenai. (Ioane 1:​14, 18) Tanobada ai, unai Natuna Iesu Keriso, ese ena guba Tamana ena kara ia tohotohoa dainai, taunimanima ese ia idia itaia bona ena hereva idia kamonai neganai, unai be hegeregere Iehova ida idia noho bona Ena hereva idia kamonai. (Ioane 14:9) Unai dainai, Iesu ese ma haida ia lalokau henia dalana ita dibaia bona ena haheitalai ita tohotohoa neganai, iseda ruma bese taudia ibounai idia moale diba.

5, 6. (a) Iesu ese kongrigeisen be edena bamona ia kara henia bona unai be haheitalai namona tatau dekenai? (b) Dirava ese tau ta ena dika ia gwauatao totona, dahaka ia karaia be namo?

⁵ Baibel ia gwau namona be tatau ese edia adavadia idia kara henia Iesu ese ena hahediba taudia ia kara henia hegeregerena. Baibel ia henia hakaua herevana be inai: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai. . . . Unai bamona danu, namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia  diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.”​—Efeso 5:​23, 25-29.

⁶ Iesu ese kongrigeisen ia lalokau henia, unai amo tatau dekenai haheitalai namona ia hahedinaraia. Iesu ese idia ia “lalokau henidia, ia lao bona dokona,” idia dainai ena mauri ia bouboulaia, ena be idia be goevadae lasi taudia. (Ioane 13:1; 15:13) Unai hegeregerena, Baibel ese tatau ia hagoadaia: “Emui adavana do umui lalokau henia, idia do umui dagedage henia lasi.” (Kolose 3:19) Nega haida hahine be ia laloa namonamo lasi bena ia kara neganai, tau ese unai sisiba be edena bamona do ia badinaia? Namona be ia sibona ena kerere ia laloa bona kara haida ia karaia be namo Dirava ese ena kerere ia gwauatao totona. Dahaka ia karaia be namo? Namona be ia dekenai idia kara dika taudia edia dika ia gwauatao, iena adavana ena danu. Oibe, hahine danu be unai bamona ia kara be namo. (Mataio 6:​12, 14, 15) Unai dainai taunimanima haida idia gwau, headava namona lalonai, tau bona hahine idia gwauatao heheni.

7. Iesu be ena hahediba taudia dekenai dahaka ia diba, bona tatau dekenai unai be haheitalai namona?

⁷ Namona be tatau be inai idia diba, Iesu be nega ibounai ena hahediba taudia ia laloa bada. Ia diba gau momo idia karaia diba lasi badina edia goada be mai ena hetoana. Hegeregere, idia hesiku neganai, idia ia hamaoroa: “Umui mai, taunimanima noho lasi gabuna dekenai ita lao, ita laga-ani sisina.” (Mareko 6:​30-32) Tatau ese edia adavadia idia laloa bada be namo. Baibel ia gwau edia “tauanina be goada herea lasi,” bona tatau ese idia “matauraia” be namo. Dahaka dainai? Badina tau bona hahine ruaosi be “Dirava ena hariharibada . . . mauri hanaihanai idia davaria.” (1 Petero 3:7) Namona be tatau idia diba, Dirava ese ia idia abidadama henia taudia ia laloa bada, herevana idia be tau eiava hahine.​—Salamo 101:6.

8. (a) Edena dala ai ena “adavana ia lalokau henia tauna ese sibona ia lalokau henia noho”? (b) Tau bona hahine ruaosi be ‘tauanina tamona’ ai idia lao ena anina be dahaka?

⁸ Baibel ia gwau ena “adavana ia lalokau henia tauna ese sibona ia lalokau henia noho.” Badina tau bona ena adavana ‘be rua lasi, edia tauanina be tamona.’ (Mataio 19:6) Unai dainai idia  adavaia lasi tauna ta ida do idia mahuta hebou lasi. (Aonega Herevadia 5:​15-21; Heberu 13:4) Unai bamona idia karaia neganai, idia hahedinaraia idia ese sibodia edia ura idia tahua lasi, to ma ta ena ura idia laloa danu. (1 Korinto 7:​3-5) Inai oi laloa: “Tau ta ese sibona ena tauanina ia badu henia diba lasi. To ia ubua noho, bona ia naria noho.” Namona be tatau ese edia adavadia idia lalokau henia, idia sibodia idia lalokau henia bamona, badina edia kwarana, Iesu Keriso, ese edia kara hegeregerena idia do ia hahemaoro henia.​—Efeso 5:29; 1 Korinto 11:3.

9. Edena kara, Iesu ese ia hahedinaraia, be Filipi 1:8 ese ia gwauraia, bona dahaka dainai tatau ese edia adavadia dekenai unai kara idia hahedinaraia be namo?

⁹ Aposetolo Paulo ese “Keriso Iesu ena lalokau bada” ia herevalaia. (Filipi 1:8) Iesu ese ia hahedinaraia lalokauna ese momo ia hagoadaia, bona ena hahediba taudia ai idia lao hahine ese unai kara idia moalelaia. (Ioane 20:​1, 11-13, 16) Bona hahine idia ura bada edia adavadia ese unai bamona do idia lalokau henidia.

10. Iesu ese edena dala ai hahine dekenai haheitalai namona ia hahedinaraia?

¹⁰ Ruma bese be orea ta bamona, bona ia gaukara namonamo totona, gunalaia tauna ia noho be namo. Iesu danu be ena Tamana ena siahu henunai ia noho. “Keriso ena kwarana be Dirava,” unai hegeregerena “hahine edia kwarana be edia tau.” (1 Korinto 11:3) Iesu be Dirava ena kwara dagi siahuna henunai ia noho karana be haheitalai namona, badina ita ibounai be tau ta ena siahu henunai ita noho.

11. Hahine ese ena tau dekenai edena kara ia hahedinaraia be namo, bona unai ia karaia dainai dahaka ia vara diba?

¹¹ Ruma bese kwaradia be idia goevadae lasi dainai, nega haida ruma bese lalonai edia maduna idia huaia namonamo lasi. Unai dainai, hahine be dahaka ia karaia be namo? Namo lasi ena adavana ese ia karaia gaukarana ia laloa maragi eiava kwara dagina ia abia toho. Namona be hahine ia laloatao, Dirava ese lalomanau bona dagedage lasi karana ia laloa bada. (1 Petero 3:4) Unai bamona kara ia hahedinaraia neganai, do ia auka lasi ena adavana ena siahu henunai ia noho totona​—hekwakwanai  negadiai danu. Baibel ia gwau: “Hahine danu ese iena adavana do ia matauraia.” (Efeso 5:33) To bema tau ese Keriso ena Kwara dagina ia abia dae lasi, be edena bamona? Baibel ese hahine ia hadibaia: “Emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva, bona emui mataurai kara do idia itaia dainai.”​—1 Petero 3:​1, 2.

12. Dahaka dainai hahine ese ena lalohadai ia gwauraia be kerere lasi?

¹² Ena be ena adavana be Keristani tauna eiava lasi, to bema hahine ese ia gwauraia lalohadaina be ena adavana ena lalohadai hegeregerena lasi, unai ese hemataurai lasi karana ia hahedinaraia lasi. Reana hahine ena lalohadai be maoro, bona bema ena adavana ese ia kamonai henia, unai ese ruma bese taudia dekenai namo bada ia havaraia diba. Aberahamo ena adavana, Sara ese ena ruma bese ena hekwakwanai hamaoromaoroa dalana ta ia gwauraia, bona Aberahamo ese ena hereva ia abia dae lasi neganai, Dirava ese ia hamaoroa: “Sara ena ura do oi karaia.” (Genese 21:​9-12) To bema tau ese gau ta ia abia hidi, bona unai ese Dirava ena taravatu ia utua lasi, vadaeni ena adavana ese unai do ia abia dae bona durua.​—Kara 5:29; Efeso 5:24.

13. (a) Tito 2:​4, 5 ese hahine ia hagoadaia dahaka idia karaia totona? (b) Baibel ese headava ia parara bona headava hadokoa karana be edena bamona ia gwauraia?

¹³ Hahine ese ena maduna ia huaia neganai, gau momo ia karaia diba ruma bese ia naria totona. Hegeregere, Baibel ia gwau hahine ese “edia adavana bona natuna do idia lalokau henia. Bona do idia laloa maoromaoro, do idia noho namonamo, mai laloa goevagoeva danu, bona edia ruma lalonai do idia gaukara. Bogahisihisi karadia do idia karaia, bona edia adavana edia hereva do idia kamonai henia.” (Tito 2:​4, 5) Unai bamona ia karaia hahinena ena ruma bese taudia ese ia do idia lalokau henia bona matauraia. (Aonega Herevadia 31:​10, 28) Idia headava tau bona hahine be idia goevadae lasi, unai dainai idia huanai hekwakwanai badadia idia vara diba bona idia parara eiava edia  headava idia hadokoa diba. Baibel ese headava taudia idia parara ena badina haida ia gwauraia. To, namo lasi unai kara ita laloa maragi, badina Baibel ia gwau: “Hahine ese tau do ia rakatania lasi. . . . Tau danu ese iena adavana do ia rakatania lasi.” (1 Korinto 7:​10, 11) Bona bema idia ta ia heudahanai, Baibel ia gwau unai badina tamona dainai headava idia hadokoa diba.​—Mataio 19:9.

14. Iesu ese edena dala ai maragidia ia kara henia, bona tama sina be natudia dekenai dahaka idia karaia be namo?

¹⁴ Iesu ese natudia ia kara henia dalana amo, tama sina dekenai haheitalai namona ia hahedinaraia. Haida ese natudia idia koua neganai, Iesu ese idia ia hamaoroa: “Lau ura maragi idia mai lau dekenai, umui lulua lasi.” Baibel ia gwau, ia ese “maragidia ia rosia, bona iena imana ia atoa edia latanai, ia hanamoa.” (Mareko 10:​13-16) Iesu ese nega ia atoa natudia ia bamoa totona, unai dainai namona be umui emui natudia dekenai unai bamona umui karaia danu. Namona be nega bada umui atoa emui natudia umui bamoa totona. Nega oi atoa idia oi hadibaia totona, badina unai maduna be Iehova ese tama sina dekenai ia henia.​—Deuteronomi 6:​4-9.

15. Tama sina ese edia natudia idia gimaia totona, dahaka idia karaia be namo?

 ¹⁵ Inai tanobada ena kara be ia dika ia lao noho, unai dainai tama sina ese edia natudia idia gimaia be namo, unai amo taunimanima dikadia ese do idia hadikadia lasi. Iesu ese ena hahediba taudia​—ia gwauraidia “natudia”​—ia gimaia totona ia karaia karadia mani ita laloa. Iesu idia dogoatao bona idia alaia gwauraia neganai, dala ia karaia ena hahediba taudia idia heau mauri totona. (Ioane 13:33; 18:​7-9) Tama eiava sina e, namona be Diabolo ese emui natudia hadikaia totona ia ura karaia gaudia dekenai umui naria namonamo. Idia dekenai hadibaia hereva umui henia guna. * (1 Petero 5:8) Hari natudia be tauanina bona lauma dalanai dika idia davaria diba, bona kara maoromaoro  badinaia karana dekenai hahetoho momo idia noho, guna bamona lasi.

16. Iesu ese ena hahediba taudia huanai ia vara hepapahuahu ia hamaoromaoroa dalana dekenai, tama sina be dahaka idia dibaia?

¹⁶ Iesu ia do mase lasi hanuaboina ai, iena hahediba taudia be daika ia bada idia hepapahuahulaia. Iesu ese idia ia gwau henia lasi, to mai lalokau ida ena hereva bona haheitalai amo idia ia hadibaia. (Luka 22:​24-27; Ioane 13:​3-8) Bema oi be tama eiava sina ta, emu natudia oi matahakani henidia neganai, Iesu ena haheitalai oi tohotohoa diba, a? Momokani, idia oi matahakani henia be namo, to edia “dika ena davana korikori” hegeregerena bona umui habadudia lasi. Namo lasi oi laloa namonamo lasi bona oi hereva kava, “tuari kaia ia gwadaia noho bamona.” (Ieremia 30:11; Aonega Herevadia 12:18) Namona be dala namona ai emu natuna oi matahakani henia, unai amo gabeai do ia laloparara ia abia matahakanina ese namo ia havaraia.​—Efeso 6:4; Heberu 12:​9-11.

17. Edena dala ai Iesu ese haheitalai namona ia hahedinaraia natudia dekenai?

¹⁷ Natudia be Iesu amo gau haida idia dibaia diba, a? Oibe! Iesu be ena kara amo ia hahedinaraia, natudia ese edia tama sina idia kamonai henia be namo. Ia gwau: “Tamana ese lau dekenai ia hadibaia hegeregerena lau hereva. . . . Iena ura be nega ibounai lau karaia.” (Ioane 8:​28, 29) Iesu ese ena guba Tamana ia kamonai henia, bona Baibel ese natudia ia hamaoroa edia tama sina idia kamonai henia totona. (Efeso 6:​1-3) Ena be Iesu be goevadae natuna, to ia ese ena goevadae lasi tama sina, Maria bona Iosepa, ia kamonai henia. Unai dainai Iesu ena ruma bese taudia ibounai idia moale!​—Luka 2:​4, 5, 51, 52.

18. Dahaka dainai nega ibounai Iesu ese ena guba Tamana ia kamonai henia, bona natudia ese edia tama sina idia kamonai henia neganai, daika ia moale?

¹⁸ Natudia be edena dala idauidau ai Iesu ena haheitalai idia tohotohoa bona edia tama sina idia hamoalea diba, a? Momokani, nega haida matamata taudia idia laloa edia tama sina idia kamonai henia be auka, to Dirava ia ura natudia ese unai idia  karaia. (Aonega Herevadia 1:8; 6:20) Nega ibounai Iesu ese ena guba Tamana ia kamonai henia, nega aukadia dekenai danu. Nega ta, Dirava ese Iesu dekenai gaukara aukana ta ia henia, to Iesu ia gwau: “Inai kapusi [maduna ta] be lau dekena amo do oi kokia.” To, Iesu ese Dirava ena ura gauna ia karaia, badina ia laloparara ena Tamana be gau ibounai ia diba. (Luka 22:42) Natudia ese hereva kamonai henia karana idia dibaia neganai, edia tama sina bona edia guba Tamana do idia hamoalea bada. *​—Aonega Herevadia 23:​22-25.

19. (a) Satani ese edena dala ai natudia ia dibagania? (b) Natudia idia karaia matabodaga karana dainai tama sina be dahaka idia mamia?

¹⁹ Diabolo ese Iesu ia dibagania, bona ita diba, ia ese matamata taudia do ia dibagania kara kererena idia karaia totona. (Mataio 4:​1-10) Satani Diabolo ese turadia edia laloani karadia ia gaukaralaia, bona unai idia dadaraia be auka. Unai dainai gau badana be natudia ese kara kerere idia karaia taudia idia bamoa lasi! (1 Korinto 15:33) Iakobo ena natuna kekeni Daina, be Iehova idia tomadiho henia lasi taudia ia bamodia bona unai ese hekwakwanai momo ia havaraia. (Genese 34:​1, 2) Bema ruma bese tauna ta be matabodaga karana ia karaia, ruma bese taudia idia lalohisihisi bada!​—Aonega Herevadia 17:​21, 25.

20. Ruma bese hamoalea totona, ruma bese taudia ta ta be dahaka idia karaia be namo?

²⁰ Ruma bese taudia ese Baibel ena sisiba idia badinaia neganai,  ruma bese lalonai idia vara hekwakwanai idia hanaia diba. Unai sisiba badinaia karana ese ruma bese ia hamoalea. Unai dainai tatau e, emui adavadia do umui lalokau henia, bona Iesu ese kongrigeisen eiava ena hahediba taudia ia kara henia hegeregerena, idia umui kara henia. Hahine e, emui adavana ena kwara dagina henunai umui noho, bona Aonega Herevadia 31:​10-31 ese ia gwauraia hahine namona ena kara umui badinaia. Tama sina e, emui natudia do umui hadibadia. (Aonega Herevadia 22:6) Tama e, emui ‘ruma taudia, adavana bona natuna do oi biagua namonamo.’ (1 Timoteo 3:​4, 5; 5:8) Bona natudia e, emui tama sina do umui kamonai henia. (Kolose 3:20) Ruma bese taudia ibounai be idia goevadae lasi, bona ibounai ese kerere idia karaia. Unai dainai namona be oi manau bona ta ta emui dika umui gwauatao.

21. Vaira negai dahaka do ia vara, bona hari edena dala ai iseda ruma bese ia moale diba?

²¹ Momokani, Baibel lalonai sisiba namodia momo idia noho ruma bese taudia durua totona. Bona Baibel ese ita ia hadibaia Dirava ese tanobada matamatana do ia mailaia. Unai gabu be Iehova idia tomadiho henia moale taudia ese do idia hahonua. (Apokalupo 21:​3, 4) Unai be vaira nega namo hereana! Hari danu, iseda ruma bese ia moale diba, bema Dirava ena sisiba Baibel dekenai ita badinaia.