MAI aonega ida oi hereva ena anina be ma haida oi kara henia lalonai edia lalona oi hahisia lasi. Anina be oi diba edena dala ai bona edena nega ai oi hereva. To kara maoromaoro oi badinaia noho bona hereva momokani oi hagagevaia lasi. Taunimanima oi gari henia lasi to mai aonega ida oi hereva.​—Aon. 29:25.

Lauma helaga ese ia havaraia karadia be mai aonega ida oi hereva ena badina namo hereana. Unai hegeregerena, lalokau dainai kara ta ia karaia tauna be ia ura lasi ma haida ia habadua; ia ura idia ia durua. Ia hebogahisi bona manau tauna be mai manada ida gau idauidau ia karaia. Maino tauna ia ura ma haida ida hetura karana namona ia havaraia dalana ia badinaia. Ena be taunimanima idia kara auka, to haheauka tauna ia dagedage lasi.​—Gal. 5:​22, 23.

To, herevana edena dala ai Baibel ena sivarai ita harorolaia, taunimanima haida idia badu. Aposetolo taudia edia negai idia noho Iuda taudia momo edia kudouna ia dika vadaeni dainai, idia dekenai Iesu Keriso be taunimanima hahekwakwanaia bona idia ia hamorua nadina bamona. (1 Pet. 2:​7, 8) Iesu ese ia karaia Basileia harorolaia gaukarana ia herevalaia neganai, ia gwau: “Lau be tanobada dekenai lahi araia totona lau mai.” (Luka 12:49) Bona Iehova ena Basileia ena sivarai, bona taunimanima ese edia Havaraia Tauna ena lohia siahuna idia abia dae be mai anina bada, be taunimanima ese idia hepapahuahulaia gauna badana. Nega sisina murinai Dirava ena Basileia ese inai tanobada dikana ena oromana do ia hadikaia ore sivaraina dekenai momo idia badu. To, ita be Dirava ita kamonai henia dainai ita haroro noho. Bona unai ita karaia lalonai, Baibel ena sisiba ita laloa noho, ia gwau: “Taunimanima danu mai maino danu do umui noho.”​—Roma 12:18.

Haroro Gaukara Lalonai mai Aonega ida Ita Hereva. Dala momo ai, ma haida dekenai iseda abidadama ita herevalaia. Momokani, ita ese haroro gaukara lalonai unai ita karaia, to varavara, gaukara turadia, bona sikuli turadia ida ita noho neganai danu, dala ita tahua unai ita karaia  totona. Unai nega iboudiai, mai aonega ida ita hereva be gau badana.

Bema Basileia ena sivarai ita harorolaia dalana dainai ma haida idia laloa idia ita sisiba henia, reana do idia kamonai lasi. Heduru totona idia noinoi lasi bona reana idia ura lasi heduru idia abia neganai, reana do idia badu bema ita hahedinaraia gau ta idia hamaoromaoroa be namo. Dahaka ita karaia diba unai lalohadai kererena idia abia lasi totona? Mai lalo-moale ida herevahereva dalana ita dibaia be namo.

Ta ida herevahereva oi hamatamaia neganai, ia ura gauna ta oi gwauraia toho. Bema ia be varavara, gaukara turana, eiava sikuli turana ta, reana ia ura gauna oi diba vadaeni. Eiava, ena be hari nega ginigunana ia oi davaria, reana niusi lalonai oi kamonai eiava niuspepa ai oi duahia gauna ta oi gwauraia diba. Nega momo taunimanima ese unai gaudia idia laloa. Ruma ta ruma ta dekenai oi gaukara neganai, oi laloa namonamo. Ruma hahairaia gaudia, gadara gaudia, tomadiho gaudia, bona ruma ena dala dekenai ia noho motuka ena stika haida be ruma tauna ese ia laloa bada gaudia idia hahedinaraia diba. Ruma tauna be iduara dekenai ia mai neganai, ena hereva oi kamonai namonamo. Iena hereva ese oiemu lalohadai ia laloa bada gaudia bona iena lalohadai dekenai do ia hamomokania eiava hamaoromaoroa bona ia oi haroro henia totona dahaka oi laloa be namo do ia hahedinaraia.

Umui herevahereva lalonai, Baibel bona Baibel idia herevalaia bukadia amo mai anina bada herevadia oi hahedinaraia. To namo lasi unai herevahereva lalonai oi sibona oi hereva. (Had. 3:7) Namona be ruma tauna oi hagoadaia, hereva haida ia gwauraia totona. Ena lalohadai oi kamonai mai emu ura ida. Unai amo reana lalohadai haida do oi abia bena mai aonega ida do oi hereva.

Oi do hereva lasi neganai, emu hereva ese ia dekenai do ia havaraia hemami oi laloa. Aonega Herevadia 12:8 ia hahedinaraia “mai aonega” tauna be do idia hanamoa. Unai siri ai idia gaukaralaia Heberu herevana be lalo-parara bona laloa maoromaoro hegeregerena. Unai dainai, aonega ena anina ta be oi hereva haraga lasi, to oi laloa namonamo guna. Unai Aonega Herevadia edia karoa tamona ai siri 18 ia gwau “hereva haraga tauna ena hereva, be tuari kaia ia gwadaia noho bamona.” Taunimanima ita habadua lasi dalanai, Baibel ena hereva momokani ita harorolaia diba.

Oi gaukaralaia herevadia be mai aonega ida oi abia hidi neganai, ta ena  lalona idia koua herevadia oi gwauraia lasi. Bema inai hereva “Baibel” dainai ta ese ena lalona ia koua, reana inai hereva “toretore helagadia” eiava “gado 2,000 mai kahana ai idia halasia bukana ta” oi gaukaralaia diba. Bema Baibel oi gwauraia, reana oi nanadaia iena lalohadai Baibel dekenai be dahaka, bena emui herevahereva lalonai ena lalohadai oi laloa.

Nega momo mai aonega ida oi hereva ena anina be nega maorona ai oi hereva. (Aon. 15:23) Reana oi hereva henia tauna ena hereva haida oi abia dae diba lasi, to ena lalohadai kereredia ibounai oi hakoikoia toho be anina lasi. Nega tamona ai, ruma tauna dekenai gau iboudiai oi herevalaia lasi. Iesu ese ena hahediba taudia ia hamaoroa: “Lauegu hereva momo idia noho, . . . to harihari umui be inai hereva do umui abia dae diba lasi.”​—Ioa. 16:12.

Bema hegeregere, mai momokani ida oi hereva henia taudia oi hanamoa. Ena be ruma tauna be hepapahuahu dalanai ia hereva, reana iena lalohadai ta dainai ia oi hanamoa diba. Aposetolo Paulo be Atena ai, Areo Ororona dekenai, aonega taudia ia hereva henia neganai unai ia karaia. Unai aonega taudia be “Paulo danu idia hepapahuahu.” Edena bamona idia ia habadua lasi dalanai idia ia hereva henia diba? Guna edia dirava idauidau dekenai idia karaia boubou patadia momo ia itaia. Atena taudia be edia kaivakuku tomadiho henia karana dainai ia gwauraia dika lasi, to ia diba tomadiho idia laloa bada bona unai dainai idia ia hanamoa. Ia gwau: “Lau itaia vadaeni, dirava idauidau momo umui laloa bada.” Unai hereva ese dala ia kehoa, Dirava momokani ena sivarai ia harorolaia totona. Unai dainai, haida be abidadama taudia ai idia lao.​—Kara 17:​18, 22, 34.

Koua herevadia idia gwauraia neganai, oi badu lasi. Oi lalo-maino noho. Oi laloa unai hereva be namo, badina ia amo ruma tauna ena lalohadai oi diba. Reana ia oi tanikiu henia badina ena lalohadai ia hahedinaraia. Bema karaharaga ia gwau “Lau be mai egu tomadiho ta” be edena bamona? Reana mai aonega ida oi henanadai diba: “Oi maragi negana amo tomadiho oi laloa bada, a?” Bena ia hereva murinai, ma oi gwau: “Oi laloa nega ta taunimanima ibounai be tomadiho tamona do idia badinaia, a?” Reana unai ese dala ia kehoa, umui herevahereva totona.

Sibona ita laloa maoro neganai mai aonega ida do ita hereva. Ita diba momokani Iehova ena dala be maoro bona ena Hereva be momokani. Ita be mai lalo-goada ida unai gaudia ita herevalaia. To sibona eda kara maoromaoro ita laloa bada lasi. (Had. 7:​15, 16) Ita tanikiu badina hereva momokani ita diba bona Iehova ena hahenamo ita moalelaia, to ita diba  goevagoeva ia ese ita ia lalo-namo henia ena badina be sibona eda kara maoromaoro dainai lasi to iena hariharibada karana bona Keriso ita abidadama henia dainai. (Efe. 2:​8, 9) Ita diba gau badana be ‘sibona eda kara ita tahua, bona eda mauri ita tohoa, ita be abidadama korikori taudia o lasi.’ (2 Kor. 13:5) Unai dainai, taunimanima ita hadibaia Dirava ena taravatu idia badinaia be namo neganai, mai manau ida ita abia dae Baibel ena sisiba ita badinaia danu be namo. Taunimanima hahemaoro henia gaukarana ita karaia lasi. Iehova ese “kota henia ena siahu ibounai iena Natuna dekenai ia henia,” bona iena kota vairanai sibona eda kara ena badina do ita gwauraia.​—Ioa. 5:22; 2 Kor. 5:10.

Ruma Bese Taudia Bona Keristani Tadikaka Ida. Namo lasi haroro gaukara lalonai sibona mai aonega ida ita hereva. Mai aonega ida ita hereva karana be Dirava ena lauma ese ia havaraia karadia amo ia vara dainai, namona be ruma ai mai aonega ida ruma bese taudia ita hereva henidia danu be namo. Lalokau ese ita ia veria ma haida edia hemami ita laloa. Kwini Eseta ena adavana be Iehova tomadiho henia tauna lasi, to ia ese ena tau ia matauraia bona ena tau dekenai Iehova ena hesiai taudia ia herevalaia neganai mai laloa kehoa ida ia hereva. (Eseta, karoa 3-8) Nega haida, mai aonega ida Witnes lasi ruma bese taudia ita kara henia ena anina be ita abia dae hahediba herevadia ita herevalaia momo lasi, to eda kara amo ita hahedinaraia hereva momokani ena dala be hereadae.​—1 Pet. 3:​1, 2.

Unai hegeregerena, ena be kongregesen taudia ita diba namonamo, to namo lasi idia ita hereva auka henia eiava kara auka henia. Namo lasi ita laloa idia be lo taudia dainai unai do idia haheaukalaia. Bona eda kerere ita hamaragia totona ita gwau lasi: “Lau be unai bamona, egu kara lau haidaua diba lasi.” Bema ita itaia eda hereva dalana amo ma haida edia lalona ita hadikaia, namona be eda kara ita haidaua. Namona be ‘ita ta ta dekenai ita lalokau henia mai eda lalona ibounai’ karana ese ita ia hagoadaia “Keriso ena abidadama henia taudia do ita durua bada herea.”​—1 Pet. 4:​8, 15; Gal. 6:10.

Platfom amo Oi Hereva Neganai. Platfom amo idia hereva taudia danu be mai aonega ida idia hereva be namo. Kamonai taudia edia bese bona noho daladia be idauidau. Lauma dalanai edia goada be idauidau. Reana haida be nega ginigunana Kingdom Hall dekenai idia mai. Reana ma haida edia mauri lalonai gau ta idia lalo-hekwarahilaia bona hereva henia tauna be unai ia diba lasi. Dahaka ese hereva henia tauna ia durua, kamonai taudia edia lalona ia hahisia lasi totona?

Aposetolo Paulo ese Tito ia sisiba henia hegeregerena, namona be emu  tahua gauna be “tau ta do [oi] gwauraia dika lasi, bona . . . do [oi] manau. Nega ibounai taunimanima ibounai dekenai manada kara do [oi] karaia.” (Tito 3:2) Tanobada taudia ese kopina idau, gado idau, bona bese idau taudia hadikaia totona idia gaukaralaia herevadia oi dadaraia. (Apok. 7:​9, 10) Iehova ena ura, bona idia ita badinaia ena namo oi hadibaia maoromaoro; to Iehova ena dala idia do badinaia namonamo lasi taudia hadikaia herevadia oi gwauraia lasi. To, iboudiai oi hagoadaia, Dirava ena ura idia lalo-pararalaia bona ia idia hamoalea karadia idia karaia. Sisiba herevadia ida hanamoa hereva oi henia mai momokani ida. Namona be oi hereva dalana bona emu gado regena ena mamina amo, ita ibounai dekenai mai anina bada Keristani tadikaka lalokau henia karana oi hahedinaraia.​—1 Tes. 4:​1-12; 1 Pet. 3:8.