HEREVA gwauraia lou karana be hadibaia namonamo karana ta. Mai anina herevana be nega rua eiava ma haida oi gwauraia neganai, kamonai taudia ese do idia laloatao diba. Bema lalohadai ta be dala sisina idauna ai oi gwauraia lou, reana do idia lalo-pararalaia namonamo danu.

Bema kamonai taudia ese emu hereva idia laloatao lasi, emu hereva ese idia abia dae gaudia eiava edia mauri dalana do ia haidaua lasi. To oi hahedinaraia namonamo herevadia do idia laloa noho.

Iehova, iseda Hadibaia Tauna Hereadaena, ese hereva gwauraia lou karana ia haheitalaia. Ia ese Israela besena dekenai Taravatu Ten ia henia. Aneru ta ena hereva amo, unai bese ese Sinai Ororona dekenai unai taravatu idia kamonai. Gabeai, Ia torea bona Mose dekenai ia henia. (Eso. 20:​1-17; 31:18; Deu. 5:22) Unai bese be Gwauhamata Tanona ai ia do vareai lasi neganai, Iehova ena oda dainai Mose ese idia dekenai taravatu ia gwauraia lou, bona lauma helaga ese ia hakaua dainai Mose ese Deuteronomi 5:​6-​21 ai unai sivarai ia torea. Israela besena ese ia abia taravatudia ta be mai edia kudouna, lauma, bona goada ibounai ida Iehova idia lalokau henia bona hesiai henia. Unai danu ia gwauraia loulou. (Deu. 6:5; 10:12; 11:13; 30:6) Dahaka dainai? Badina Iesu ia gwau hegeregerena, unai be “taravatu bada herea momokani.” (Mat. 22:​34-38) Peroveta tauna Ieremia amo, Iehova ese nega 20 bamona Iuda taudia ia hadibaia lou, Iehova ese ia henia taravatu iboudiai idia kamonai henia be gau badana. (Ier. 7:23; 11:4; 12:17; 19:15) Bona Esekiela amo, Dirava be nega 60 bamona ia gwau, bese iboudiai be ‘do idia diba ia be Iehova.’​—Ese. 6:10; 38:23.

Iesu ena haroro sivaraina lalonai hereva gwauraia lou karana gaukaralaia namonamo dalana ita itaia danu. Hegeregere, Evanelia Bukadia foa idia noho​—idia ta ta ese mai anina bada gaudia idia herevalaia bona unai Evanelia Bukadia ma ta eiava haida ese dala idaudia ai unai gaudia idia  gwauraia danu. Iesu ena hadibaia gaukarana lalonai, hadibaia hereva ta be nega ma haida dekenai ia gwauraia lou to dala idaudia ai ia gwauraia. (Mar. 9:​34-37; 10:​35-45; Ioa. 13:​2-17) Bona Iesu ena dina ginigabedia ta ai, Olive Ororona dekenai hereva gwauraia lou karana amo inai mai anina bada sisibana ia hahedinaraia, ia gwau: “Do umui naria, badina be umui emui Lohiabada do ia mai negana be umui diba lasi.”​—Mat. 24:42; 25:13.

Haroro Gaukara Lalonai. Taunimanima oi haroro henia neganai, oi ura oi herevalaia gaudia do idia laloatao. Hereva gwauraia lou karana be unai ia durua.

Hanaihanai, ta ida gau ta oi herevalaia neganai bema hereva ta oi gwauraia lou, do ia laloatao. Unai dainai, siri oi duahia murinai, reana mai anina herevana oi hahedinaraia bona oi henanadai, “Inai hereva oi itaia, a?”

Herevahereva ena sentens ginigabedia oi gaukaralaia namonamo diba danu. Hegeregere, reana oi gwau: “Lau ura eda herevahereva amo inai do oi laloatao, . . . ” Bena hereva kwadogina amo oi gwauraia lou. Reana inai bamona: “Dirava ia ura tanobada be paradaiso ai do ia lao. Iena ura be do ia guguru momokani.” Eiava reana oi gwau: “Baibel ese ia hahedinaraia goevagoeva ita be inai tanobada ena oromana ena nega dokona lalonai ita noho. Bema ita ura ia ore negana amo do ita roho mauri, Dirava ia ura dahaka ita karaia ita diba be gau badana.” Eiava reana oi gwau: “Ita itaia bamona, Baibel ese sisiba namona ia henia ruma bese ena hekwakwanai hanaia totona.” Reana nega haida Baibel siri ena hereva sibona oi gwauraidia lou, do ia laloatao totona. To momokani, unai ese namo ia havaraia totona oi laloa namonamo guna be namo.

Lou henia lalodiai, Baibel stadi lalodiai danu, reana hereva gwauraia lou karana ena anina be riviu henanadai haida oi henia.

Bema ta ese Baibel ena sisiba ia lalo-pararalaia eiava ia badinaia be auka, reana nega rua eiava ma haida unai gauna oi gwauraia be namo. Dala idauidau ai oi herevalaia toho. Oi herevalaia daudau lasi, to stiuden tauna oi hagoadaia unai gauna ia laloa noho. Oi laloatao, Iesu ena hahediba taudia ta ta idia ura idia bada lalohadaina idia dadaraia totona ia ese unai bamona hereva gwauraia lou karana ia gaukaralaia.​—Mat. 18:​1-6; 20:​20-28; Luka 22:​24-27.

Hereva Oi Henia Neganai. Bema platfom amo oi hereva, oi ura lasi  hadibaia hereva sibona oi gwauraia. Oi ura kamonai taudia ese unai hereva idia lalo-pararalaia, idia laloatao, bona idia badinaia. Unai ia vara totona, hereva gwauraia lou karana oi gaukaralaia namonamo.

To, bema mai anina herevadia be nega momo oi gwauraia loulou, reana kamonai taudia idia hesiku. Namona be do oi hahedinaraia gaudia oi abia hidi namonamo. Nega momo unai gaudia be emu hereva ena hereva badadia, to reana idia haida be kamonai taudia dekenai mai anina bada lalohadai ma haida.

Hereva do oi gwauraia lou totona, reana emu hamatamaia herevana lalonai hereva badadia oi gwauraia guna. Oi karaia neganai sentens kwadogidia amo do oi herevalaia gaudia oi gwauraia, henanadai haida oi henia, eiava hekwakwanai haida edia sivarai kwadogidia oi gwauraia. Reana oi hahedinaraia hereva badadia be hida bona edia namba hegeregerena oi gwauraia. Bena unai kahana ta ta be emu hereva lalonai oi herevalaia. Emu hereva lalonai hereva badana ma ta oi do gwauraia lasi neganai, oi herevalaia vadaeni hereva badana oi gwauraia lou, unai amo do ia hedinarai namonamo diba. Eiava unai hereva badana ena anina ia hahedinaraia haheitalai ta oi gwauraia. Bona emu hereva dokona lalonai unai hereva badadia oi gwauraia lou, idia amo idia idau gaudia oi gwauraia, oi henia henanadai edia haere oi gwauraia, eiava oi gwauraia hekwakwanai hanaia daladia oi henia neganai, emu hereva badadia idia hedinarai badabada.

Unai sibona lasi, ia manada hereva henia tauna ese kamonai taudia edia toana ia itaia namonamo danu. Bema idia haida ese lalohadai ta idia lalo-pararalaia be auka, hereva henia tauna be unai ia itaia. Bema unai be mai anina herevana, do ia herevalaia lou. To, ia gaukaralaia vadaeni herevadia ia gwauraia lou be reana ia durua lasi. Unai bamona hadibaia karana be hegeregere lasi. Namona be ena herevalaia dalana ia haidaua. Reana ena hereva lalonai, ia hegaegaelaia lasi gauna ta ia herevalaia sisina be namo. Unai bamona dala ai kamonai taudia durua karana oi dibaia neganai, oi do ia durua bada hadibaia namonamo tauna ai oi lao totona.