HEREVA ta ta be herevahereva lalonai ita gaukaralaia tulu namodia. To eda hereva ese badina ta idia hagugurua totona, idia ita abia hidi namonamo be namo. Hereva ta be nega ta oi gaukaralaia neganai ia maoro, to ma nega idauna ta ai oi gaukaralaia neganai ia namo lasi. Kiri herevana ta ita gaukaralaia namonamo lasi neganai, lalohisihisi ia havaraia “hereva auka” ai ia lao diba. Unai bamona hereva ia gaukaralaia tauna be reana ia laloa namonamo lasi, bona ia hahedinaraia haida ia laloa bada lasi. Hereva haida edia anina be rua, anina ta ese taunimanima ia habadua eiava ia hahemaraia diba. (Aon. 12:18; 15:1) To, “hereva namodia”​—hagoadaia herevadia unai—ese kamonai tauna ena kudouna idia hamoalea. (Aon. 12:25) Hereva maorodia davaria be mai ena hekwarahi, aonega tauna dekenai danu. Baibel ese ita ia hamaoroa Solomona ia diba “hagoadaia herevadia” bona idia “momokani, bona maoromaoro” herevadia ia tahua be namo.​—Had. 12:10.

Gado haida ai, lagani bada taudia bona siahu taudia idia hereva henia neganai hereva haida idia gaukaralaia, bona lagani tamona taudia eiava lagani maragi taudia hereva henia neganai hereva ma haida idia gaukaralaia. Unai dala badinaia lasi karana idia gwauraia hemataurai lasi karana. Danu, namo lasi ma haida dekenai do idia gwauraia hemataurai herevadia be ta ese sibona ia herevalaia neganai ia gaukaralaia. Hemataurai hahedinaraia karana dekenai, Baibel ena taravatu ese gavamani ena taravatu eiava tano ta ena kastom ia hereaia. Keristani taudia ia hagoadaia: “Taunimanima ibounai do umui matauraia.” (1 Pet. 2:17) Mai edia kudouna ibounai ida unai idia badinaia taudia be lagani idauidau taudia idia hereva henia neganai hemataurai idia hahedinaraia.

Keristani momokani lasi taudia momo ese hemataurai lasi bona hemarai havaraia herevadia idia gaukaralaia. Idia laloa hereva dikadia ese edia hereva idia hagoadaia. Eiava ia hahedinaraia idia diba herevadia be momo lasi. Bema ta ese Iehova ena dala ia do diba lasi neganai unai bamona hereva  ia gaukaralaia, reana do ia davaria unai ia haidaua be auka. To, ia haidaua diba. Dirava ena lauma ese ta ia durua diba ena hereva dalana ia haidaua totona. To, namona be unai tauna ia ura hereva namodia​—durua bona hagoadaia herevadia​—ia diba bena do ia gaukaralaia hanaihanai.​—Roma 12:2; Efe. 4:29; Kol. 3:8.

Idia Lalo-Pararalaia Haraga Hereva. Hereva namona be idia lalo-pararalaia haraga hereva. (1 Kor. 14:9) Bema oi gaukaralaia herevadia be kamonai taudia idia lalo-pararalaia be auka, idia dekenai oi be gado idauna ai ia hereva tauna bamona.

Diba bada gaukarana ta idia karaia taudia huanai, hereva haida edia anina be idau. Reana idia ese unai bamona herevadia be dina ibounai idia gaukaralaia. To nega ma haida ai unai hereva oi gaukaralaia dainai, reana emu herevahereva karana idia hadikaia. Danu, ena be idia lalo-pararalaia haraga herevadia oi gaukaralaia, to bema gau maragimaragi momo oi herevalaia, reana kamonai taudia be gau ma haida do idia laloa matamaia.

Kamonai taudia ia laloa tauna be edukeisen badana idia abia lasi taudia danu ese idia lalo-pararalaia diba herevadia ia gaukaralaia. Ia ese Iehova ia tohotohoa dainai, “ogogami taudia” ia laloa danu. (Iobu 34:19) Bema hereva henia tauna ia laloa, momo idia diba lasi herevana ta do ia gaukaralaia be namo, namona be ena anina idia hahedinaraia sentens manokadia lalonai ia gaukaralaia.

Oi abia hidi namonamo bona idia auka lasi herevadia ese mai siahu ida lalohadai idia hahedinaraia. Auka lasi sentens kwadogidia idia lalo-pararalaia haraga. Sisina idia lata sentens ida oi gaukaralaidia be namo emu hereva ena heau dalana ia namo totona. To oi ura kamonai taudia ese do idia laloatao lalohadaina oi hahedinaraia totona, auka lasi herevadia bona sentens kwadogidia oi gaukaralaia.

Hereva Idauidau Bona Hereva Maorodia. Hereva namodia be momo. Hereva tamona oi gaukaralaia loulou lasi, to hereva idauidau oi gaukaralaia be namo. Unai neganai emu hereva do idia ura henia bona ia be mai ena anina. Edena dala ai hereva momo oi dibaia diba?

Hereva oi duahia neganai, oi lalo-pararalaia namonamo lasi herevadia oi makaia, bona bema emu gado ai diksenari ta ia noho unai dekenai oi itaia. Unai hereva haida oi abia hidi, bena nega maorona ai oi gaukaralaia toho. Idia oi gwauraia maoro bona idia hoalaia dalanai oi gaukaralaia lasi to idia lalo-pararalaia haraga dalanai oi gaukaralaia. Hereva idauidau oi  gaukaralaia neganai emu hereva ia hahairaia. To oi naria namonamo​—ta ese hereva ta ia gwauraia maoro lasi eiava ia gaukaralaia kerere neganai, reana ma haida do idia laloa ia herevalaia gauna ia diba namonamo lasi.

Hereva idauidau ita gaukaralaia ena badina be ita ura taunimanima ita hereva henidia, ita idia abia isi totona ita karaia lasi. Sentens latadia bona hereva latadia dainai reana taunimanima be hereva henia tauna idia laloa bada. Eda ura be kamonai taudia idia ura henia dalanai mai anina bada herevadia ita gwauraia. Baibel ena aonega herevana oi laloatao, ia gwau: “Aonega tauna ia hereva neganai, ia ese aonega bona diba ia habadaia noho.” (Aon. 15:2) Hereva namodia, idia maoro bona taunimanima idia lalo-pararalaia haraga herevadia, ita gaukaralaia neganai, kamonai taudia idia hesiku lasi to eda hereva amo idia ita hagoadaia.

Hereva idauidau bona momo oi dibaia lalonai, hereva maorodia gaukaralaia karana oi laloa namonamo. Reana hereva rua edia anina be hegeregere bamona to idia idau sisina danu, dala idauidau ai ita gaukaralaia totona. Bema unai oi lalo-pararalaia, emu hereva oi hanamoa diba bona ena anina do ia hedinarai goevagoeva bona kamonai taudia do oi habadua lasi. Idia hereva namonamo taudia edia hereva oi kamonai. Diksenari haida ese hereva ta ta henunai idia hegeregere herevadia (edia anina be hegeregere to tamona lasi) bona idia idau herevadia (edia anina be idau vaitani) idia hahedinaraia. Unai dala ai oi ese lalohadai tamona idia hahedinaraia hereva idauidau sibona lasi, to anina sisina idia idau herevadia danu oi davaria. Unai be heduru badana, bema oi ura hereva maorona ta oi davaria dala idauna ai oi gaukaralaia totona. Hereva ta oi do gaukaralaia matamaia lasi neganai, namona be ena anina, gwauraia dalana, bona gaukaralaia daladia maorodia oi diba namonamo.

Anina ta idia hahedinaraia goevagoeva herevadia ese lalohadai goevana idia havaraia. Hereva henia tauna ia gwau diba: “Unai nega ai, taunimanima momo idia gorere.” Eiava, ia gwau diba: “Tanobada Tuarina Ginigunana murinai, hua haida lalonai, taunimanima 21,000,000 be Spanish influenza dainai idia mase.” Hereva henia tauna ese “unai negana ai,” “taunimanima momo,” bona “idia gorere” edia anina ia gwauraia neganai anina ibounai ia hahedinaraia goevagoeva! Unai bamona oi hereva totona oi herevalaia gaudia oi diba namonamo bona hereva oi abia hidi namonamo be namo.

Danu, hereva maorona oi gaukaralaia neganai hereva momo oi gwauraia kava lasi. Hereva momo gwauraia karana amo lalohadai oi hunia. Hereva be momo lasi neganai, ma haida ese mai anina bada gaudia idia lalo-pararalaia haraga bona idia laloatao namonamo. Oi ia durua, diba maoromaoro oi hahedinaraia totona. Iesu Keriso ia hadibaia neganai hereva  momo ia gaukaralaia lasi. Ia amo diba oi abia. (Mataio 5:​3-12 bona Mareko 10:​17-21 ai idia noho haheitalai itaia.) Oi abia hidi namonamo herevadia haida amo lalohadai idauidau hahedinaraia karana oi tohoa loulou.

Hereva Idia Hamauria, Hemami Idia Havaraia, Bona Anina Idia Hahedinaraia Herevadia. Oi gaukaralaia herevadia edia momo oi habadaia neganai, hereva matamatadia sibona lasi to gau idauidau idia hahedinaraia namonamo herevadia oi laloa danu. Hegeregere, hereva idia hamauria herevadia (verb); anina idia hahedinaraia herevadia (adjective); bona hebogahisi, lalo-namo, bona ura bada idia hahedinaraia herevadia oi laloa.

Baibel be unai bamona anina idia hahedinaraia herevadia amo ia honu. Iehova be peroveta tauna Amosa amo ia gwau: “Kara namo do umui tahua, kara dika do umui tahua lasi. . . . Kara dika do umui ura henia lasi momokani, kara namo do umui ura henia noho.” (Amo. 5:​14, 15) Peroveta tauna Samuela ese King Saulo ia hamaoroa: “Lohiabada ese hari dina dekenai Israela basileia be oi dekena amo ia darea vadaeni.” (1 Sam. 15:28) Iehova ese Esekiela ia hamaoroa herevadia idia laloaboio haraga lasi, ia gwau: “Israela bese taudia . . . ibounai be dagedage, bona edia lalona be auka momokani.” (Ese. 3:7) Iehova ese Israela ena kara dika ena bada ia hahedinaraia neganai, ia henanadai: “Bema tau ta ese Dirava dekena amo do ia henaoa, inai be maoro, a? Lasi momokani! To umui ese inai bamona umui karaia noho.” (Mal. 3:8) Daniela ese Babulonia dekenai haida edia abidadama idia tohoa karana ia herevalaia neganai, ena hereva ia mauri, ia gwau “Nebukanesa ia badu dikadika momokani” badina Sataraka, Misaka, bona Abetenigo be ena kaivakuku idia tomadiho henia lasi, bona oda ia henia do idia guidia bona “lahi siahu herea lalonai do idia negea vareai.” Ita ese unai lahi ena siahu bada ita lalo-pararalaia totona Daniela ia gwau king ese ena hesiai taudia ia hamaoroa “unai lahi ena siahu ma do idia habadaia nega 7, guna idia hasiahua bamona lasi”​—bena siahu ia bada herea dainai, king ena hesiai taudia be lahi kahirakahira idia lao neganai idia mase. (Dan. 3:​19-22) Iesu idia do hamasea lasi dina gabedia lalonai, ia ese Ierusalema taudia ia herevalaia, bona mai hebogahisi bada ida ia gwau: “Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi! Inai, umui emui ruma be do ia noho kava anina lasi.”​—Mat. 23:​37, 38.

Oi abia hidi namonamo herevadia ese kamonai taudia edia lalona ai laulau idia hahedinaraia goevagoeva. Bema edia lalona idia veria herevadia oi gaukaralaia, kamonai taudia ese oi herevalaia gaudia idia “itaia” bona “dogoatao,” oi gwauraia aniani idia “mamia” bona “bonaia,” bona oi herevalaia gaudia edia rege bona taunimanima edia gadona idia “kamonai.”  Kamonai taudia ese oi herevalaia gaudia do idia laloa namonamo badina idia oi durua dainai unai gaudia be oiemu bona idia edia lalona ai idia mauri bamona.

Lalohadai idia hahedinaraia goevagoeva herevadia dainai taunimanima do idia kiri eiava tai. Unai bamona herevadia ese helaro idia havaraia, lalohisihisi tauna idia hagoadaia dainai ia ura ia mauri bona mai ena kudouna ibounai ida Havaraia Tauna ia lalokau henia. Baibel siridia, hegeregere Salamo 37:​10, 11, 34; Ioane 3:16; bona Apokalupo 21:​4, 5, edia hereva ese idia hahedinaraia helarona be tanobada hegegemadai taunimanima edia mauri ia haidaua.

Baibel bona “hesiai tauna mai ena kamonai, bona mai ena kara maoromaoro” ia halasia bukadia oi duahia neganai, hereva idauidau momo herea oi itaia. (Mat. 24:45) Unai hereva oi duahia sibona lasi. Oi idia hamoalea herevadia oi abia hidi, bona dina ta ta ai do oi gaukaralaia.

Grama Ena Taravatu Ia Badinaia Hereva. Taunimanima haida idia itaia nega momo edia hereva lalonai grama ena taravatu idia badinaia lasi. To dahaka idia karaia diba?

Bema sikuli dekenai oi do noho, oi dekenai ia do kehoa noho dalana oi gaukaralaia bona grama namona bona hereva abia hidi namonamo karana oi dibaia. Bema grama ena taravatu ta dainai oi daradara, emu tisa tauna oi nanadaia. Unai be sikuli dekenai oi kwalimu sibona totona oi karaia lasi. Ura ma ta ese oi ia hagoadaia, to stiuden taudia ma haida be unai bamona lasi. Oi ura sivarai namona harorolaia namonamo tauna ai oi lao.

To edena bamona bema oi bada vadaeni bona hari oi gaukaralaia gado be oi maragi neganai oi dibaia gauna lasi? Eiava reana sibona emu gado ai edukeisen bada oi abia lasi. Oi lalohisihisi lasi. To, sivarai namona dainai mai momokani ida emu gado oi hanamoa toho. Grama ena taravatu momo be ma haida edia hereva ita kamonai neganai ita dibaia. Unai dainai, hereva henia taudia namodia edia hereva oi kamonai namonamo. Baibel bona Baibel idia herevalaia bukadia oi duahia neganai, sentens idia torea dalana, idia gaukaralaia hebou herevadia, bona idia gaukaralaia daladia oi itaia. Unai haheitalai namodia bamona oi hereva toho.

Reana taunimanima idia hamoalea taudia bona ane idia abia taudia edia hereva lalonai grama ena taravatu idia badinaia lasi. Nega momo taunimanima ese unai bamona taudia idia tohotohoa. Nega momo drag idia hoihoilaia taudia bona edia mauri lalonai kara dika bona matabodaga daladia idia badinaia taudia ma haida be mai edia hereva dalana idauna, hereva idauidau dekenai anina idauna idia henia. Keristani taudia ese unai taudia idia tohotohoa be aonega karana lasi. Bema idia ita tohotohoa, toana be  ita be unai tanobada taudia bamona bona edia mauri dalana ita badinaia.​—Ioa. 17:16.

Namona be dina ta ta ai emu hereva ia namo. Bema dina ta ta ai emu hereva dalana ia namo lasi, oi laloa lasi mai anina bada herevana oi henia neganai emu hereva be do ia namo. To bema nega ibounai emu hereva ia namo, platfom amo oi hereva eiava ma haida dekenai hereva momokani oi harorolaia neganai, emu hereva ia namo danu.