IEHOVA DIRAVA ese taunimanima edia harana ia havaraia namo herea dainai gau idauidau ita laloatao diba. Harana ia karaia mai anina bada gaudia haboua gabuna bamona, bona ia amo gau ta ita abia neganai idia noho gaudia idia boio lasi. Dirava ese harana ia karaia dalana be iena ura hegeregerena, ia ura taunimanima do idia mauri ela bona hanaihanai.​—⁠Sal. 139:14; Ioa. 17:⁠3.

To reana oi laloa oiemu lalona dekenai oi atoa gaudia momo herea idia boio. Oi ura abia neganai ia noho lasi. Emu laloatao karana oi hanamoa totona dahaka oi karaia diba?

Laloatao karana hanamoa lalonai laloa bada karana be mai anina bada. Bema gau idauidau ita itaia namonamo, taunimanima bona idia vara gaudia ita laloa bada, iseda lalona be ia gaukara. Bona mai anina bada gauna ta ita duahia eiava ita kamonai neganai, unai bamona do ita laloa bada danu.

Momo idia davaria taunimanima edia ladana idia laloatao be auka. To, ita Keristani taudia ita diba taunimanima be mai anina bada​—⁠hegeregere iseda Keristani tadikaka, ita haroro henia taudia, bona mauri lalonai ita davaria taudia. Dahaka ese ita ia durua diba, taunimanima edia ladana ita laloatao totona? Aposetolo Paulo ese ia tore henia kongregesen taudia 26 edia ladana ia gwauraia. Ia hedinarai idia ia laloa bada, badina edia ladana ia torea sibona lasi to idia momo ia herevalaia danu. (Roma 16:​3-16) Hari inai negai Iehova ena Witnes taudia edia sekit naria taudia haida ese ladana idia lalodiatao namonamo, ena be pura ta ta ibounai kongregesen idauna ta idia vadivadi henia. Dahaka ese idia ia durua? Reana nega ginigunana tau ta ida idia herevahereva neganai, nega momo ena ladana idia gwauraia. Idia hekwarahi unai tauna ena ladana bona ena vairana idia laloa hebou totona. Danu, taunimanima idauidau ida idia haroro bona idia aniani hebou totona nega idia atoa. Tau ta oi davaria neganai, iena ladana do oi laloatao, a? Matamanai, unai ladana oi laloatao ena badina namona oi laloa; bena ai gwauraia vadaeni gaudia oi tohoa.

 Oi duahia gaudia oi laloatao be mai anina bada danu. Dahaka ese oi ia durua diba, unai kara oi hanamoa totona? Laloa bada bona lalo-parara karadia be mai anina bada. Namona be oi duahia gauna oi laloa bada dainai mai emu lalona ibounai ida oi duahia. Bema oi duahia toho neganai gau ma ta oi laloa noho, oi duahia gauna do oi laloatao lasi. Oi duahia gauna be oi diba namonamo gauna eiava oi abia vadaeni dibana ida oi hakapua neganai, emu lalo-parara karana oi hanamoa. Oi sibona oi nanadaia: ‘Edena dala ai bona edena negai egu mauri lalonai inai gauna lau badinaia diba? Edena dala ai lau gaukaralaia diba, ma ta lau durua totona?’ Lalo-parara karana oi hanamoa danu, bema hereva ta ta lasi to hereva momo be nega tamona oi duahia. Unai dala ai lalohadai bona hereva badadia oi itaia haraga, bena do oi laloatao namonamo danu.

Hadibaia gaukarana idia diba namonamo taudia idia gwau laloa lou karana be mai anina bada. Tahua karana ta lalonai, koledi profesa ta ese ia hahedinaraia, maoromaoro miniti tamona lalonai gau ta idia laloa lou dainai idia laloatao diba gaudia edia momo idia habadaia nega rua. Unai dainai, oiemu duahiduahi​—⁠eiava ena kahana badana ta​—⁠oi haorea neganai, maoromaoro emu lalona ai ena hereva badadia oi laloa lou, gabeai do oi laloatao totona. Oi dibaia gaudia matamatadia be sibona emu hereva amo oi gwauraia daladia oi laloa. Lalohadai ta oi duahia ore bena maoromaoro oi laloa lou karana amo, unai lalohadai oi laloatao negana oi habadaia.

Bena dina haida sibona murinai, dala oi tahua tau ma ta ida oi duahia gauna oi herevalaia bona oi laloa lou totona. Reana ruma bese tauna ta, kongregesen tauna ta, gaukara turana ta, sikuli turana ta, dekena tauna ta, eiava haroro gaukara lalonai oi davaria tauna ta ida unai oi karaia diba. Namona be hereva badadia haida sibona lasi to idia hamomokanidia Baibel siridia oi gwauraia lou danu. Unai ese oi do ia durua, mai anina bada gaudia oi laloatao totona; bona ma haida ia durua danu.

Oi duahia gauna be oi laloa lou bona ma haida dekenai oi gwauraia sibona lasi, to do oi davaria oi dibaia gaudia mai anina bada oi lalohadailaia karana ese oi ia durua danu. Baibel torea taudia Asapa bona Davida be unai bamona idia karaia. Asapa ia gwau: “To Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou. Oiemu gaukara ibounai do lau laloa noho, bona oiemu siahu karadia danu do lau laloa.” (Sal. 77:​11, 12) Davida danu be unai bamona ia gwau: “Hanuaboi lalonai lau ese oi sibona dekenai lau laloa,” bona “oiemu kara gunadia  ibounai lau laloa noho.” (Sal. 63:6; 143:⁠5) Oi ese unai bamona oi karaia, a?

Unai bamona laloa dobu karana, Iehova ia karaia gaudia, ena kara, bona iena ura idia hahedinaraia herevadia oi laloa karana ese oi ia durua gau momokanidia oi laloatao totona sibona lasi. Bema unai bamona laloa karana oi manadalaia, mai anina bada gaudia be emu kudouna lalonai do idia vareai. Ia ese emu kara korikorina do ia hamaoromaoroa. Oi laloatao gaudia ese oiemu lalohadai korikoridia do idia hahedinaraia.​—⁠Sal. 119:⁠16.

Iehova ia karaia gaudia bona Iesu Keriso ese ia herevalaia gaudia idia hahedinaraia hereva momokanidia ita laloatao toho lalonai, ita sibona ita noho lasi. Iesu ia do mase lasi hanuaboina ai, ia murinai idia raka taudia ia hamaoroa: “Umui dekenai lau noho neganai, inai hereva lau gwauraia, to Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai, be ia ese umui emui lalona dekenai do ia hedinaraia lou.” (Ioa. 14:​25, 26) Unuseniai idia noho taudia rua be Mataio bona Ioane. Lauma helaga be unai bamona idia ia durua, a? Oibe! Lagani 8 bamona murinai, Mataio ese Keriso ena mauri sivaraina ginigunana ia torea haorea, ia laloatao bona ia torea gau namodia haida be Haroro Herevana Badana bona Keriso ena noho bona tanobada ena dokona edia toana. Lagani 65 idia hanaia Iesu ia mase murinai, aposetolo Ioane ese iena Evanelia Bukana ia torea, ia lalonai Lohiabada ese iena mauri ia do henia lasi hanuaboina ginigabena lalonai Iesu ia gwauraia herevadia ia hahedinaraia. Momokani, Mataio bona Ioane be Iesu ida idia noho neganai ia gwauraia herevadia bona karaia karadia idia laloatao namonamo, to lauma helaga ena gaukara be mai anina bada, Iehova ia ura iena Hereva lalonai do idia torea mai anina bada gaudia idia laloaboio lasi totona.

Lauma helaga ese hari inai negai Dirava ena hesiai taudia ia durua, a? Oibe! Momokani, lauma helaga ese iseda lalona dekenai guna ita dibaia lasi gaudia do ia atoa lasi, to ita ia durua guna ita stadilaia mai anina bada gaudia ita laloatao totona. (Luka 11:13; 1 Ioa. 5:14) Bena, ita ura gaukaralaia neganai, iseda lalona ia hagoadaia ‘peroveta helagadia ese gunaguna idia gwauraia hereva bona Lohiabada bona Hamauria Tauna ena taravatu do ita laloatao’ totona.​—⁠2 Pet. 3:​1, 2.

Iehova ese Israela taudia ia sisiba henia loulou: ‘Umui naria namonamo umui laloaboio garina.’ Ia laloa lasi gau iboudiai do idia laloatao goevadae. To, sibona edia gaukara idia laloa bada dainai, Iehova ia karaia gaukara idia  laloaboio be namo lasi. Aneru ta ese Aigupito taudia edia vara guna natudia ia hamasea neganai Iehova ese idia ia hamauria karana bona Iehova ese Davara Kakakakana ia kehoa bona ia koua, bona unai amo Farao bona ena tuari taudia ia hamasea, karadia idia laloatao namonamo be gau badana. Namona be Israela taudia do idia laloatao Dirava ese idia dekenai Sinai Ororona ai ena Taravatu ia henia bona tano gagaena dekenai idia ia hakaua ela bona Gwauhamata Tanona dekenai idia vareai. Idia laloaboio lasi ena anina be edia dina ta ta maurina lalonai unai idia laloatao gaudia ese idia hakaudia.​—⁠Deu. 4:​9, 10; 8:​10-18; Eso. 12:​24-27; Sal. 136:⁠15.

Namona be ita danu ita naria namonamo ita laloaboio garina. Mauri ena hekwarahi gaudia ita haheaukalaia lalonai, namona be Iehova ita laloaboio lasi. Ia be edena bamona Diravana bona iena Natuna be harihari gauna bamona, iseda kara dika kokia totona bona mauri goevadaena ita moalelaia hanaihanai totona, ia henia neganai ia hahedinaraia lalokauna ita laloatao noho be namo. (Sal. 103:​2, 8; 106:​7, 13; Ioa. 3:16; Roma 6:23) Hanaihanai Baibel ita duahia, kongregesen heboudia dekenai haere ita henia, bona haroro gaukara ita goadalaia neganai, unai dava bada hereva momokanidia be iseda lalona dekenai idia mauri noho.

Gau ta, badana eiava maragina, oi abia hidi neganai, namona be unai dava bada hereva momokanidia oi laloatao, bona idia ese emu laloa dalana idia biagua be namo. Do oi lalodiaboio lasi. Iehova dekenai oi tabekau. Tauanina dalanai sibona oi karaia gaudia oi laloa lasi bona ia goevadae lasi kudouna ena ura oi badinaia lasi, to namona be oi sibona oi nanadaia, ‘Dahaka sisiba eiava hakaua herevana Dirava ena Hereva amo be mai anina bada lau abia hidi gauna dekenai?’ (Aon. 3:​5-7; 28:26) Guna oi duahia lasi eiava kamonai lasi gaudia oi laloatao diba lasi. To oiemu diba maorona ia bada ia lao bona oiemu lalokau Iehova dekenai ia goada ia lao neganai, Dirava ena lauma ena heduru amo oi laloatao diba gaudia be momo, bona Iehova oi lalokau henia bada karana ese oi do ia hasiahua, oi laloatao dibana oi badinaia totona.