Karoa 14

Iesu ena Hahediba Taudia Ginigunadia

IESU be dina 40 tano gagaena dekenai ia noho, bena Ioane Bapatiso dekenai ia lou lao. Ia raka kahirakahira neganai, Ioane ese ia poinia, ia gwau: “Itaia, Dirava ena Mamoe Natuna ia mai inai, ia be tanobada ena dika kokia tauna. Guna lau gwauraia tauna be inai. Lau gwau, ‘Tau ta be lauegu murinai do ia mai, lau be maragi to ia be bada, badina lau do vara lasi neganai ia be ia mauri noho.’ ” Ena be Ioane ia vara guna bena ena tadina lahaina Iesu be gabeai ia vara, to ia diba gunaguna Iesu be lauma ta guba ai.

To, pura haida gunanai, Iesu be Ioane dekenai ia lao bapatiso abia totona neganai, Ioane ia diba momokani lasi Iesu be Mesia ai do ia lao. Ioane ia gwau: “Lau be lau diba lasi ia, to inai tau Israela dekenai do ia hedinaraia totona, taunimanima lau bapatiso henidia ranu dekenai.”

Bena Ioane ese Iesu ia bapatisoa neganai ia vara gauna ia gwauraia hedinarai, ia gwau: “Lauma Helaga lau itaia vadaeni, guba dekena amo ia diho, pune bamona, ia latanai ia kamokau. Lau be lau diba lasi ia, to Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona ia latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ . . . Lau ese lau itaia vadaeni, bona lau gwauraia hedinarai vadaeni, ia be Dirava ena Natuna.”

Kerukeru, Ioane be ena hahediba taudia rua ida idia gini. Bena Iesu ia raka kahirakahira neganai, Ioane ia gwau lou: “Umui itaia, Dirava ena Mamoe Natuna be inai.” Ioane ena hahediba taudia ruaosi be iena hereva idia kamonai neganai, Iesu idia gavaia. Idia ta be Andrea, bona ta be inai sivarai ia torea tauna, Ioane. Hari Ioane danu be Iesu ena varavarana ta, Maria ena tadikakana Salome ena natuna.

Iesu ese ena vairana ia giroa, idia gavaia taudia ruaosi Andrea bona Ioane ia itadia, bena ia nanadaidia, ia gwau: “Dahaka umui tahua?”

Idia haere, idia gwau: “Rabi e, oi be edeseni oi noho?”

Iesu ia gwau: “Umui mai itaia.”

Hora be 4 okoloka adorahi neganai, bona Andrea bona Ioane ese Iesu idia bamoa ela bona hanuaboi. Gabeai, Andrea ia moale bada dainai kara haraga ena kakana Petro ia tahua, bena ia davaria neganai ia hamaoroa, ia gwau: “Ai be Mesia ai davaria vadaeni.” Bena Petro ia hakaua lao Iesu dekenai. Reana unai negai Ioane ese ena tadina Iakobo ia tahua bena Iesu dekenai ia hakaua lao, to vaia ena kara hegeregerena, sibona ena sivarai be iena Evanelia bukana lalonai ia torea lasi.

Kerukeru, Iesu ese Filipo ia davaria bena ia hereva henia, ia gwau: “Lauegu murinai oi raka mai.” Filipo be Betesaida tauna, Andrea bona Petro edia hanua tauna.

Filipo ese Natanael, ena ladana ta Batolomeo, ia davaria, ia hamaoroa, ia gwau: “Mose ena taravatu lalonai bona peroveta taudia edia buka lalonai idia herevalaia tauna ai davaria vadaeni. Ia be Iesu, Nasareta tauna, Iosepa ena natuna.” Natanael ia daradara, ia gwau: “Nasareta dekena amo gau namona ta do ia mai diba, a?”

Filipo ia gwau: “Oi mai itaia.” Iesu dekenai idia mai neganai, Iesu ese Natanael ia herevalaia, ia gwau: “Israela tauna korikori be inai, ia be koikoi diba lasi momokani tauna.”

Natanael ese ia nanadaia, ia gwau: “Edena bamona oi diba lau?”

Iesu ia gwau: “Filipo ese oi do ia boiria lasi, fig au henunai oi noho neganai lau itaia oi.”

Natanael ia hoa, ia gwau: “Rabi e, oi be Dirava ena Natuna, oi be Israela ena king.”

Iesu ia gwau: “Oi lau hamaoroa vadaeni, lau gwau, ‘Fig au henunai oi lau itaia,’ dainai lau oi abidadama henia, a? Inai kara idia hanaia karadia be do oi itaia.” Bena ia gwauhamata henia, ia gwau: “Momokani umui lau hamaoroa, guba do umui itaia, do ia kehoa, bona Dirava ena aneru do umui itaia, Taunimanima ena Natuna latanai do idia daekau, do idia diho.”

Nega sisina murinai, Iesu mai ena hahediba taudia matamatadia ida ese Ioridane Kourana idia rakatania bona Galilea dekenai idia lao. Ioane 1:​29-51.

▪ Daika daika be Iesu ena hahediba taudia ginigunadia?

▪ Edena bamona Petro, bona reana Iakobo danu, be Iesu ida idia hedavari?

▪ Dahaka dainai Natanael ia laloa Iesu be Dirava ena Natuna?