Karoa 59

Iesu be Daika?

IESU mai ena hahediba taudia ida be Betesaida dekenai idia ginidae neganai, taunimanima ese matakepulu tauna ta Iesu dekenai idia hakaua lao, idia noia, ena imana ia atoa ia latanai ena matana hanamoa totona. Iesu ese hari tau ena imana ia abia bena hanua murimurinai ia hakaua lasi, ena matana dekenai ia kanudi, bena ia nanadaia, ia gwau: “Oi itaia dahaka?”

Tau ia gwau: “Lau itaia taunimanima, idia be au bamona, idia loaloa.” Iesu ese ena imana ia atoa lou ena matana dekenai, bena ena matana idia namo vadaeni, gau iboudiai ia itaia goevagoeva. Bena Iesu ese ia siaia lao ena ruma dekenai, ia hamaoroa hanua lalonai do ia vareai lasi.

Vadaeni, Iesu mai ena hahediba taudia ida ese Betesaida idia rakatania, idia lao Kaisarea Filipi, Palestine ena mirigini kahanai. Dina rua bamona idia raka lao, badina unai gabu edia padana be kilomita 50 bamona. Kaisarea Filipi be gabu mai hairaina ororo kahanai.

Edia laolao ai, Iesu ia raka siri ia guriguri totona. Ena hahediba taudia ia lalodia momo, badina hua 9 o 10 sibona idia do noho ela bona ena mase negana. Ia murinai idia raka taudia momo ese idia rakatania vadaeni. Ma haida idia daradara bona idia lalohisihisi, badina be taunimanima ese pavapava ai idia halaoa gwauraia neganai ia ura lasi, bona ena inai taudia idia hamaoroa guba amo toa ia henidia ena pavapava dagina hamomokania totona neganai, ta ia henidia lasi. Vadaeni, ena aposetolo idia laloa ia be daika? Ia guriguri gabuna dekenai idia lao neganai, Iesu ia nanadaidia, ia gwau: “Taunimanima be dahaka idia gwau, lau be daika?”

Idia gwau: “Haida be Ioane Bapatiso idia gwau, haida be Elia, haida be Ieremia, ma haida idia gwau oi be peroveta tauna ta.” Oibe, idia laloa Iesu be unai taudia ta, mase amo ia toreisi lou tauna!

Iesu ia nanadaidia, ia gwau: “To umui be dahaka umui gwau, lau be daika?”

Petro ia haere haraga, ia gwau: “Oi be Keriso, Mauri Diravana ena Natuna.”

Iesu ese Petro ia hanamoa ena haere dainai, bena ia hamaoroa, ia gwau: “Oi be Petero, nadi ta. Inai nadi latanai lauegu ekalesia do lau haginia, bona [Hade] ena siahu danu ese ekalesia do ia hadarerea diba lasi.” Anina be, ekalesia ta do ia haginia, bona ena ekalesia taudia mai edia kamonai be tanobada dekenai do idia mase murinai, mase ese do ia koudia hanaihanai lasi. Bena ia ese Petro ia hamaoroa, ia gwau: “Guba Basileia ena ki do lau henia oi.”

Unai amo Iesu ia hahedinaraia Petro ese dagi namona do ia abia. To aposetolo gunalaia dagina ia henia lasi, bona ekalesia ena badina ai ia halaoa lasi. Iesu be unai nadi, ia latanai ekalesia ia haginia nadina. To Petro ese ki toi do ia abidia, idia amo iduara do ia kehodia, orea idauidau taudia ese guba Basileiana lalonai do idia vareai totona.

Pentekoste 33 C.E. ai Petro ese ki ginigunana ia gaukaralaia. Idia helalo-kerehai Iuda taudia ia hamaorodia dahaka idia karaia be namo Dirava do ia hamauridia totona. Nega sisina murinai ki iharuana ia gaukaralaia, iduara ia kehoa, Samaria taudia mai edia kamonai be Dirava ena Basileia lalonai do idia vareai totona. Bena lagani 36 C.E. ai ki ihatoina ia gaukaralaia, iduara ia kehoa, kopina utua lasi idau bese taudia, Korenelio bona ena turadia edia.

Vadaeni, Iesu be ena aposetolo ida idia herevahereva noho. Idia lalohisihisi badina ia hamaorodia, nega sisina murinai Ierusalem dekenai hisihisi do ia ania bona do ia mase. Petro ia diba lasi Iesu be mase amo do ia toreisi lou bona guba dekenai do ia daekau, unai dainai Iesu ia hakaua siri, ia sisiba henia, ia gwau: “Lohiabada e, unai bamona lasi. Unai bamona do idia karaia lasi oi dekenai.” Iesu ese ena vairana ia giroa, Petro ia gwau henia, ia gwau: “Satani e, lauegu murina kahana oi lao. Lau [oi] hamorua totona oi hereva, badina oiemu laloa be Dirava ena lasi, to taunimanima edia.”

Aposetolo sibodia lasi, to ma haida danu be Iesu ida idia laolao. Ia boiridia mai, bena ia hamaorodia do idia gavaia be auka. Ia gwau: “Tau ta bema ia ura lauegu murina dekenai do ia mai, ia be sibona dekenai do ia laloa lasi, dina ibounai ena satauro do ia abia isi, lauegu murina dekenai do ia raka. Badina be ena mauri ia dogoatao tauna be ena mauri do ia abia lasi, to lau totona iena mauri do ia negea tauna be ena mauri do ia abia.”

Oibe, Iesu idia gavaia taudia be do ia lalo-namo henidia totona, namona be idia boga-auka bona sibodia dekenai idia laloa lasi. Iesu ia gwau: “Tau ta ese lau totona o egu hereva totona do ia hemarai, Taunimanima ena Natuna ese ia totona do ia hemarai, ia ena hairaina dekenai bona tamana ena hairaina dekenai bona aneru helagadia edia hairaina dekenai do ia mai neganai.” Mareko 8:​22-38; Mataio 16:​13-28; Luka 9:​18-27.

▪ Dahaka dainai Iesu ese ena hahediba taudia ia lalodia momo?

▪ Taunimanima idia laloa Iesu be daika?

▪ Petro ese edena ki ia abidia, bona dahaka totona ia gaukaralaidia?

▪ Iesu ese Petro edena bamona ia sisiba henia, bona dahaka dainai?