Karoa 99

Ieriko Dekenai Ia Hadibadia

IESU bona ia ida idia laolao hebou taudia be Ieriko dekenai idia ginidae. Ieriko bona Ierusalem edia padana be dina tamona ena laolao bamona. Ieriko hanuana be mai ena kahana rua, Iuda taudia edia hanua gunana bona Roma taudia edia hanua matamatana. Edia padana be kilomita ta mai kahana. Hutuma ese hanua gunana idia rakatania bona hanua matamatana idia raka henia neganai, matakepulu taudia rua, noinoi taudia, ese edia regedia idia kamonai. Idia ta ena ladana be Batimeo.

Batimeo bona ena bamona be Iesu ia raka hanai sivaraina idia kamonai, unai dainai idia boiboi, idia gwau: “Lohiabada e, Davida ena natuna e, oi bogahisihisi ai dekenai.” Hutuma ese idia gwau henidia, do idia hereva lasi idia gwau, to idia boiboi lalo-dika, idia gwau lou: “Lohiabada e, Davida ena natuna e, oi bogahisihisi ai dekenai.”

Edia boiboi ia kamonai dainai, Iesu ia gini bona idia bamoa taudia ia hamaorodia do idia boiridia mai. Matakepulu taudia ruaosi dekediai idia lao, bena idia ta dekenai idia gwau: “Oi gari lasi, oi toreisi, ia boiboi oi dekenai.” Mai ena moale ida ena dabua ta ia negea, ia toreisi haraga, bena Iesu dekenai ia lao.

Iesu ese ia nanadaia, ia gwau: “Dahaka umui ura lau karaia umui dekenai?”

Idia ruaosi idia gwau: “Lohiabada e, ai ura aiemai matana oi kehoa.”

Iesu ese ia bogadia hisi, edia matadia ia daudia toho. Mareko ena sivarai hegeregerena, Iesu be idia ta dekenai ia gwau: “Oi lao, oiemu abidadama dainai mauri oi davaria vadaeni.” Nega tamona matakepulu taudia edia matadia idia kehoa, gau idia itaia diba, bena Dirava idia hanamoa. Unai kara idia itaia taudia iboudiai danu ese Dirava idia hanamoa. Bena Batimeo bona ena bamona be Iesu murinai idia raka.

Iesu be Ieriko amo ia raka hanai lalonai, hutuma be ia dekenai idia aru lao, badina idia ura matakepulu taudia ruaosi ia hamauridia tauna idia itaia. Idia be hutuma dainai, haida ese Iesu idia itaia diba lasi. Idia ta be Sakaio, Ieriko ena takisi gogoa taudia edia biaguna. Ia be tau kwadogi dainai ia itaia diba lasi.

Unai dainai Sakaio ia heau guna ia lao, sikamoa au badana ta dekenai ia daekau, Iesu do ia raka hanai neganai do ia itaia gwauraia. Hutuma be Iesu ida idia raka mai, bena Sakaio ia helai gabuna dekenai idia ginidae neganai, Iesu ese Sakaio ia itaia, ia hamaoroa, ia gwau: “Sakaio e, oi diho haraga, badina be hari dina oiemu ruma dekenai do lau noho.” Sakaio ia diho haragaharaga, bena mai ena moale ida ia lao ena ruma dekenai, gau haida ia hegaegaelaidia Iesu totona.

To idia itaia taudia iboudiai ese idia maumauraia. Idia laloa Iesu ese unai bamona tauna ia vadivadi henia be maoro lasi, badina Sakaio be ena takisi gogoa gaukarana dekenai moni momo be koikoi dalana amo ia abia dainai.

Taunimanima hutuma be Iesu murinai idia raka, bena Sakaio ena ruma lalonai ia vareai neganai, idia maumau, idia gwau: “Iesu be dika tauna dekenai ia vadivadi henia.” To Iesu ia laloa Sakaio do ia helalo-kerehai. Iena lalohadai be maoro, badina Sakaio ia gini tore, ia gwau: “Egu kohu haida be ogogami taudia dekenai do lau henia. Bona ena kohu lau abia kava tauna be nega 4 do lau henia lou.”

Unai amo Sakaio ese ia hahedinaraia ia helalo-kerehai momokani. Ena takisi pepadia amo ia diba moni hida be unai taudia edia amo ia abia kava. Unai dainai ia gwauhamata unai moni be nega 4 do ia henidia lou, Dirava ena taravatu hegeregerena. Unai taravatu be inai: ‘Bema tau ta ese mamoe ta ia henaoa, ia be davana do ia karaia: mamoe ta ena davana be mamoe 4 do ia henia.’

Iesu ese Sakaio ena gwauhamata ia moalelaia dainai, ia gwau: “Harihari hamauria be inai ruma dekenai ia ginidae vadaeni, badina be ia danu Aberahamo ena natuna. Badina be Taunimanima ena Natuna be idia boio taudia do ia tahua, bona do ia hamauria totona ia mai.”

Vanegai, Iesu ese ia boio merona ena parabole ia gwauraia neganai, “idia boio taudia” edia mauri dalana ia gwauraia unai. Sakaio be unai boio taudia ta, bona Iesu ese ia davaria. Ena be tomadiho gunalaia taudia bona edia orea taudia ese Iesu idia maumauraia badina Sakaio bamona taudia ia durudia, to Iesu ese Abraham ena natuna, idia boio taudia, ia tahudia noho bona ia hamauridia noho. Mataio 20:​29-34; Mareko 10:​46-52; Luka 18:35–19:10; Esodo 22:1.

▪ Iesu ese matakepulu taudia ruaosi edeseniai ia hedavari henidia, bona dahaka ia karaia idia dekenai?

▪ Sakaio be daika, bona dahaka dainai au ta dekenai ia daekau?

▪ Edena bamona Sakaio ia hamomokania ia helalo-kerehai vadaeni?

▪ Iesu ese Sakaio ia kara henia karana dainai dahaka ita diba?