Mani ita piksaia, ita be Ieriko ai ita noho. Unai siti be Kanana tanona ai ia noho, bona unai hanua taudia be Iehova idia abidadama henia lasi. Hahine ta ladana Rahaba be unuseniai ia noho.

Rahaba be kekeni matamata neganai, Mose ese Davara Kakakana ia hapararaia bona Israela taudia be Aigupito amo ia hamauridia sivaraina ia kamonai. Danu, ia kamonai Iehova ese Israela taudia ia durua edia inai taudia idia halusia totona. Bona hari ia kamonai, Israela taudia be Ieriko kahirakahira idia kamepa!

Hanuaboi ta Israela taudia rua be Ieriko siti idia spai totona idia lao. Idia be Rahaba ena ruma dekenai idia lao. Idia ia boiria unuseniai idia noho totona. Unai hanuaboi ai, Ieriko ena King ia kamonai spai taudia rua be siti lalonai idia vareai bona Rahaba ena ruma dekenai idia lao. Unai dainai, King ese tatau haida ia siaia unai spai taudia idia dogoatao totona. Rahaba ese unai spai taudia rua be ena ruma guhi dekenai ia hunidia, bona King ena hesiai taudia ia hamaorodia: ‘Unai tatau be lau dekenai idia mai, to idia be siti idia rakatania vadaeni. Bema umui lao haraga, idia do umui dogoatao diba!’ Oi diba dahaka dainai Rahaba ese unai spai taudia ia hunia, a?— Badina ia be Iehova ia abidadama henia, bona ia diba Iehova ese Kanana tanona be Israela taudia dekenai do ia henia.

Spai taudia be Rahaba ena ruma idia do rakatania lasi neganai, idia gwauhamata bema Iehova ese Ieriko ia hadikaia neganai, ia bona ena famili be do idia roho mauri. Oi diba Rahaba idia hamaoroa dahaka do ia karaia, a?— Idia gwau: ‘Inai varo kakakakana oi abia bona emu windo dekenai oi kwatua. Bema unai bamona oi karaia, emu ruma taudia ibounai be do idia roho mauri.’ Rahaba be spai taudia edia hereva hegeregerena ia karaia. Oi diba dahaka ia vara, a?—

Dina haida murinai, Israela taudia be mai regerege lasi ida Ieriko idia raka hagegea. Dina 6 lalodiai unai bamona idia karaia. Unai dina ta ta lalonai, nega tamona sibona Ieriko idia raka hagegea. To dina namba 7 ai, nega 7 Ieriko idia raka hagegea. Bena idia ibounai idia boiboi badabada.  Iehova ese Ieriko idia hagegea magu ibounai ia hamorudia. To windo ai varo kakakakana ia noho rumana be ia moru lasi! Laulau ai unai ruma oi itaia, a?— Rahaba bona ena famili be idia roho mauri!

Rahaba ena sivarai amo dahaka oi diba?— Rahaba be Iehova ia abidadama henia badina Iehova ese ia karaia gau namodia momo ia diba. Oi danu be Iehova ese ia karaia gau namodia momo oi dibaia noho. Rahaba bamona, oi danu be Iehova oi abidadama henia, a?— Ai diba oi be unai bamona oi karaia!