Revareva ta Roma Taudia Dekenai 8:1-39
-
Lauma helaga dainai, ura kwalimu bona mauri ia henia (1-11)
-
Lauma helaga ese Dirava ena natudia ia gwauraia hedinarai (12-17)
-
Havaraia gaudia be Dirava ena natudia edia ura kwalimu idia naria noho (18-25)
-
Dirava ena siahu amo heduru ita abia (26, 27)
-
Dirava ia abia hidi guna taudia (28-30)
-
Dirava ena lalokau dainai ita kwalimu (31-39)
8 Unai dainai, Keriso Iesu ida idia hakapua taudia be idia kerere lasi.
2 Badina lauma helaga ena taravatu ese Keriso Iesu ida idia hakapua taudia dekenai mauri ia henia, unai taravatu ese kara dika bona mase edia taravatu amo umui ia ruhaia.+
3 Taunimanima be idia goevadae lasi dainai, Taravatu* idia badinaia guguru diba lasi+ bona Taravatu ese idia ia hamauria diba lasi.+ Unai dainai Dirava ese ena Natuna ia siaia,+ kara dika taudia edia toana hegeregerena ai,+ kara dika ia kokia totona. Unai dala ai, ia ese tauanina ai ia noho kara dika ia gwauraia dika.
4 Unai bamona ia karaia, Taravatu ena hakaua hereva maoromaorodia ita hagugurua totona,+ bona ita be tauanina ena ura hegeregerena ita raka lasi, to lauma helaga ena ura hegeregerena ita raka.+
5 Badina tauanina ena ura hegeregerena idia kara taudia ese tauanina gaudia sibona idia laloa noho,+ to lauma helaga ena ura hegeregerena idia kara taudia ese lauma helaga ena gaudia sibona idia laloa noho.+
6 Tauanina ena ura gaudia laloa karana ese mase ia mailaia,+ to lauma helaga ena gaudia laloa karana ese mauri bona maino ia mailaia,+
7 badina tauanina ena ura gaudia laloa noho karana ese ta be Dirava ena inai tauna ai ia halaoa.+ Tauanina ena ura be Dirava ena taravatu henunai ia noho lasi, lasi bona lasi momokani.
8 Unai dainai tauanina ena ura hegeregerena idia kara taudia ese Dirava idia hamoalea diba lasi.
9 To bema Dirava ena lauma be momokani umui lalonai ia noho, umui be lauma helaga ena ura hegeregerena umui kara,+ to tauanina ena ura hegeregerena umui kara lasi. To bema ta be Keriso ena laloa dalana ia abia lasi, ia be Keriso ena lasi.
10 Kara dika dainai emui tauanina be idia mase vadaeni, to bema Keriso be umui ida ia hakapua,+ vadaeni lauma helaga ese umui dekenai mauri ia henia, badina Dirava ese umui ia gwauraia maoromaoro.
11 Dirava ena lauma ese Keriso Iesu ia hatorea isi lou,+ bona bema unai lauma be umui lalonai ia noho, Dirava ese unai lauma do ia gaukaralaia, emui mase diba tauanina danu ia hatorea isi lou totona.+
12 Tadikaka e, ita be mai iseda maduna gau ta ita karaia totona, to namo lasi tauanina ena ura ita badinaia,+
13 badina bema tauanina ena ura umui badinaia, umui be momokani do umui mase, to bema lauma helaga ena heduru amo tauanina ena kara umui hamasea,+ umui be do umui mauri.+
14 Badina Dirava ena lauma ese ia hakaua taudia ibounai be Dirava ena natudia.+
15 Dirava ena lauma ese igui hesiai taudia ai ita ia halaoa lasi bona ita ia hagaria lou lasi. To unai lauma amo Dirava ese ita be ena natudia ai ia halaoa, bona unai lauma ese ita ia hauraia bena ita boiboi: “Abba,* Tamana!”+
16 Dirava ena lauma bona iseda laloa dalana idia gwauraia hedinarai+ ita be Dirava ena natudia.+
17 Bema ita be natudia, ita be Dirava amo ahuna do ita abia, Keriso ida ahuna do ita abia hebou,+ bema Keriso ida ita hisihisi hebou,+ vadaeni ia ida hanamoa do ita abia hebou danu.+
18 Lau laloa hari ita abia hisihisi be bada lasi, bema ita dekenai do ia hedinarai hairaina ida ita hahegeregerea.+
19 Badina Dirava ese ia havaraia gaudia ibounai be mai edia ura bada ida, Dirava ena natudia edia hairai do ia hedinarai negana idia naria noho.+
20 Dirava ese ia havaraia gaudia ibounai be anina lasi maurina idia abia,+ unai be sibodia edia ura dainai lasi, to Dirava ena ura dainai, to unai neganai danu helaro ia henia,
21 vadaeni Dirava ese ia havaraia gaudia ibounai be dika ena igui amo do ia ruhadia,+ bona Dirava ena natudia edia ura kwalimu hereadaena do idia abia.
22 Badina ita diba, havaraia gaudia ibounai be idia taitai bona idia hisihisi hebou noho ema bona hari.
23 Bona unai sibona lasi, to iseda kudouna ai, ita danu be ita taitai noho. Ita ese Dirava ena lauma ita abia vadaeni, unai be gabeai do ita abia gaudia ena kahana ginigunana.* Oibe, ita be mai iseda ura bada ida,+ Dirava ese ita be ena natudia ai do ia halaoa negana bona iseda tauanina amo ita do ia ruhaia negana ita naria noho,+ unai be mauri davana amo do ia vara.
24 Dirava ese ita be kara dika amo ia hamauria neganai, ita naria noho gauna ita abia. To bema ta ese ia naria noho gauna ia itaia, vadaeni unai gauna ia naria noho be anina lasi, ani?
25 To bema ita itaia lasi gauna ita naria noho,+ mai ura bada bona haheauka ida unai gauna totona do ita naria noho.+
26 Danu, ita manoka neganai, Dirava ena siahu ese ita ia durua diba.+ Nega haida ita diba lasi, dahaka do ita gurigurilaia. Unai bamona negadia ai, ena be ita diba lasi dahaka do ita gwauraia, to Dirava ena siahu amo heduru ita abia.
27 Dirava ese taunimanima edia kudouna ia tahua+ bona lauma helaga amo idia vara herevadia edia anina ia lalopararalaia. Badina lauma helaga be Dirava ena ura hegeregerena ia noinoi bona unai bamona ia karaia helaga taudia durua totona.
28 Ita diba Dirava ese ena gaukara ibounai be dala maorona ai ia haheaua, Dirava idia lalokau henia taudia edia namo totona. Unai taudia be Dirava ese ena ura hegeregerena ia boiria.+
29 Badina Dirava ese ia laloa guna taudia be ia ese ia abia hidi guna danu, ena Natuna hegeregerena ai idia lao totona.+ Vadaeni tadikaka momo huanai+ unai Natuna be vara guna natuna.+
30 Danu ia abia hidi guna taudia+ be ia ese ia boiria.+ Bona ia boiria taudia be ia ese ia gwauraia maoromaoro.+ Bena ia gwauraia maoromaoro taudia be ia ese ia hanamoa danu.+
31 Vadaeni unai gaudia dainai dahaka do ita gwau? Bema Dirava be iseda kahanai, daika ese ita do ia tuari henia?+
32 Bema ia ese ena Natuna be hisihisi amo ia koua lasi, to ita ibounai totona ia henia,+ vadaeni ita diba Dirava bona ena Natuna ese mai moale ida ma gau ibounai be ita dekenai do idia henia danu.
33 Daika ese Dirava ena abia hidi taudia do ia samania?+ Dirava sibona be idia ia gwauraia maoromaoro.+
34 Daika ese idia do ia hahemaoro henia? Tau ta lasi, badina Keriso Iesu be ia mase bona ia toreisi lou bona ia be Dirava ena idiba kahanai,+ bona ita totona Dirava ia noinoi henia danu.+
35 Daika ese ita be Keriso ena lalokau amo do ia hapararaia?+ Hisihisi, eiava metau, eiava dagedage, eiava hitolo, eiava kopina kavakava, eiava dika, eiava tuari kaia ese, a?+
36 Toretore Helagadia ai idia torea bamona, ia gwau: “Ai be oiemu taunimanima dainai, nega ibounai mase be emai vairanai, bona ai be idia alaia gwauraia mamoe bamona idia laloa.”+
37 To ai ia lalokau henia tauna dainai, unai gaudia ibounai lalonai, ai be ai kwalimu momokani.+
38 Badina lau diba momokani, mase eiava mauri, eiava aneru, eiava gavamani, eiava hari idia noho gaudia, eiava gabeai do idia mai gaudia, eiava siahu gaudia,+
39 eiava ataiai gaudia, eiava dobu gaudia, eiava Dirava ese ia havaraia gaudia ma haida, unai gaudia ibounai ese ita be Dirava ena lalokau, Keriso Iesu iseda Lohiabada lalonai ia noho gauna amo, ita ia hapararaia diba lasi.
Futnout
^ Unai be, Mose Ena Taravatu.
^ Heberu eiava Aramia gado herevana, anina be “Tamana e!”
^ Eiava “uma ena huahua ginigunadia.”
