Revareva ta Roma Taudia Dekenai 7:1-25
7 Tadikaka e, tau ta ia mauri noho lalonai, ia be Taravatu* ese ia biagua. Unai umui diba lasi, a? (Lau be taravatu idia diba taudia lau hereva henia.)
2 Hegeregere, taravatu ia gwau tau ia mauri noho lalonai, hahine be ena tau ida do ia noho. To bema ena tau ia mase, ia be unai taravatu henunai ia noho lasi.+
3 Bema iena tau ia mauri noho lalonai unai hahine ese tau ma ta ia adavaia, vadaeni ia do idia gwauraia heudahanai hahine.+ To bema tau ia mase, ia be tau ena taravatu henunai ia noho lasi, unai dainai bema ia ese tau ma ta ia adavaia, ia be ia heudahanai lasi.+
4 Unai dainai egu tadikaka e, Keriso ia bouboulaia tauanina amo umui be Taravatu amo ia ruhaia, unai amo umui be Keriso ena.+ Ia be mase amo ia toreisi lou,+ vadaeni ita havaraia huahua amo Dirava do ita hanamoa.+
5 Ita be tauanina ena ura hegeregerena ita noho neganai, iseda tauanina lalonai idia gaukara noho ura dikadia be Taravatu ese ia hahedinaraia, bona ita havaraia huahua ese mase dekenai ita ia hakaua lao.+
6 To hari ita be Taravatu ese ia guia noho lasi,+ badina ita ia dogoatao auka gauna dekenai ita mase vadaeni, unai amo ita be lauma helaga ese ia hakaua dala matamatana ena igui hesiai taudia+ bona guna idia torea taravatu ena igui hesiai taudia lasi.+
7 Vadaeni dahaka do ita gwau? Taravatu be kara dika, a? Lasi momokani! Bema Taravatu be lasi, kara dika do lau diba lasi.+ Hegeregere, do lau diba lasi ma haida edia gau ura henia dikadika karana be kerere, bema Taravatu ia gwau lasi, “Ma haida edia gau oi ura henia dikadika lasi.”+
8 To taravatu dainai, dala ia kehoa kara dika ese egu lalona ai, ma haida edia gau ura henia dikadika karadia idauidau ia havaraia totona, badina taravatu be lasi neganai, kara dika be ia mase.+
9 Oibe, taravatu be lasi neganai, lau mauri noho, to taravatu ia ginidae neganai, kara dika ia mauri lou, to lau be lau mase.+
10 Bona lau davaria, mauri dekenai taunimanima ia hakaua lao taravatu+ ese taunimanima be mase dekenai ia hakaua lao.
11 Taravatu dainai, dala ia kehoa kara dika ese egu lalona ia veria bona lau ia hamasea.
12 Unai dainai, Taravatu be helaga, bona ia lalonai idia noho herevadia be helaga, maoromaoro bona namo.+
13 To edena bamona? Gau namona ese lau ia hamasea, a? Lasi momokani! To kara dika ese lau ia hamasea. Gau namona ta amo kara dika ese lau dekenai mase ia mailaia,+ unai amo ia hahedinaraia kara dika be dahaka. Bona taravatu ese ia hahedinaraia, kara dika be dika momokani.+
14 Badina ita diba Taravatu be Dirava amo, to lau be taunimanima sibona, bona lau be kara dika ena igui hesiai tauna.*+
15 Lau karaia karadia lau lalopararalaia lasi. Badina lau ura karaia karadia lau karaia noho lasi, to lau inai henia karadia lau karaia.
16 To, bema lau ura lasi karadia lau karaia, vadaeni lau abia dae Taravatu be ia namo.
17 To, lau ese unai karadia lau karaia lasi, to egu lalona ai ia noho kara dika ese unai ia karaia noho.+
18 Badina lau diba egu tauanina lalonai, namo ta ia noho lasi. Kara namo karaia urana be egu lalona ai ia noho, to lau hegeregere lasi unai lau karaia totona.+
19 Lau ura karaia kara namona be lau karaia lasi, to lau ura lasi lau karaia kara dikana lau karaia.
20 Bema lau ura lasi karana lau karaia, unai be lau ese lau karaia lasi, to egu lalona ai ia noho kara dika ese ia havaraia.
21 Lau davaria, egu lalona ai ia noho taravatu be inai: Lau ura kara namona lau karaia neganai, kara dika be lau ida ia noho.+
22 Egu kudouna ai Dirava ena taravatu lau moalelaia momokani.+
23 To lau davaria, egu tauanina lalonai taravatu ma ta ia noho, bona unai taravatu be egu lalona ai ia noho taravatu ia tuari henia,+ bona inai kara dika ena taravatu ese igui hesiai tauna bamona lau ia hakaua.+
24 Lau madi o! Inai tauanina, egu mase do ia havaraia gauna amo daika ese lau ia hamauria diba?
25 Iesu Keriso, iseda Lohiabada amo Dirava lau tanikiu henia! Vadaeni egu lalona ai, lau be Dirava ena taravatu ena igui hesiai tauna, to egu tauanina ai, lau be kara dika ena taravatu ena igui hesiai tauna.+
Futnout
^ Unai be, Mose Ena Taravatu.
^ Inai Grik herevana ese ta be kara dika dekenai idia hoihoilaia karana ia herevalaia.
