Revareva ta Kolose Taudia Dekenai 1:1-29
1 Lau Paulo, Dirava ena ura dainai Keriso Iesu ena aposetolo tauna ai lau lao, bona iseda tadikaka Timoteo+
2 be umui, Kolose ai umui noho helaga taudia, bona Keriso umui badinaia bona ia ida umui hakapua tadikaka dekenai inai revareva ai torea:
Mani Dirava iseda Tamana amo hebogahisi hereadaena bona maino umui abia.
3 Umui totona ai guriguri neganai, iseda Lohiabada Iesu Keriso ena Tamana, Dirava ai tanikiu henia hanaihanai,
4 badina ai kamonai umui ese Keriso Iesu umui abidadama henia bona helaga taudia ibounai umui lalokau henia.
5 Unai bamona umui karaia badina umui be guba ai ia noho davana namona umui naria noho.+ Guna hereva momokani ena sivarai namona umui kamonai neganai, unai helaro umui dibaia.
6 Umui dekenai ia mai sivarai namona be tanobada ibounai dekenai huahua ia havaraia bona ia bada ia lao noho,+ umui huanai danu unai ia vara noho. Dirava ena hebogahisi hereadaena ena anina korikori umui kamonai bona dibaia namonamo dinana amo, unai ia vara.
7 Unai be emai lalokau hesiai tauna Epafra,+ ai ida ia gaukara hebou tauna amo umui kamonai. Ia be Keriso ena kamonai hesiai tauna bona ai ia durua tauna.
8 Ia ese emui lalokau, lauma helaga ese ia havaraia gauna unai, be ai dekenai ia gwauraia.
9 Unai dainai emui lalokau bona abidadama ena sivarai ai kamonai negana amo, umui totona guriguri ai hadokoa lasi.+ Ai noinoi umui be Dirava ena ura dekenai diba maoromaoro amo do umui honu,+ bona iena aonega ibounai bona ena lauma helaga ese ia henia laloparara do umui abia,+
10 unai amo Iehova* ena dala hegeregerena ai do umui raka bona gau ibounai dekenai ia do umui hamoalea. Bona danu gaukara namodia ibounai lalonai huahua do umui havaraia noho bona emui diba maoromaoro Dirava dekenai do ia bada ia lao.+
11 Bona mani Dirava ena siahu hereadaena dainai goada do umui abia,+ unai amo mai boga-auka bona moale ida gau ibounai umui haheaukalaia diba,
12 bona Dirava iseda Tamana do umui tanikiu henia. Ia dainai umui hegeregere diari lalonai idia noho helaga taudia edia ahuna umui abia totona.+
13 Dirava ese dibura ena siahu amo ita ia ruhaia+ bona ena lalokau Natuna ena basileia lalonai ita ia abia vareai.
14 Iena Natuna ese mauri davana ia henia karana amo ita ia ruhaia, anina be iseda kara dika ia gwauatao.+
15 Ia be ita itaia diba lasi Diravana ena toana hegeregerena,+ Dirava ese ia havaraia gaudia ibounai amo ia be ginigunana.*+
16 Badina ia amo Dirava ese gau ibounai guba ai bona tanobada ai ia havaraia, ita itaia diba bona ita itaia diba lasi gaudia,+ herevana idia be king taudia, lohia taudia, gavamani taudia, eiava siahu taudia. Gau ibounai be ia amo bona ia totona ia havaraia.+
17 Danu, gau ibounai idia do vara lasi neganai, ia be ia noho+ bona ia amo gau ibounai idia vara,
18 bona ia be tauanina ena kwarana, unai tauanina be kongrigeisen.+ Ia be gau ibounai edia matamana, ia be mase amo ia toreisi lou tauna ginigunana,+ unai amo gau ibounai lalonai ia be ginigunana.
19 Badina Dirava ia ura iena kara ibounai be Keriso lalonai ia honu momokani,+
20 bona ia ese hisihisi auna* ai ia bubua rarana amo Dirava ese ia sibona bona ma gau ibounai huanai maino ia karaia,+ herevana idia be guba gaudia eiava tanobada gaudia.
21 Oibe, guna umui be Dirava ena inai taudia bona ia amo umui daudau, badina emui lalona ai kara dikadia umui laloa.
22 To Dirava ese maino ia karaia, iena Natuna be tanobada tauanina ai ia mase amo unai ia karaia, unai amo Dirava vairanai do umui helaga bona goevagoeva, bona ta ese umui do ia samania koikoi lasi,+
23 bema umui abidadama noho,+ bona badina aukana latanai emui abidadama umui haginia+ bona umui gini goada,+ bona umui kamonai sivarai namona ena hahenamo naria karana umui rakatania lasi. Unai sivarai namona be tanobada hegegemadai idia harorolaia.+ Lau, Paulo, be unai sivarai namona ena hesiai tauna ai lau lao.+
24 Hari lau moale ena be umui totona hisihisi lau abia noho.+ Bona lau mamia egu tauanina ai Keriso dainai hisihisi lau do abia guguru lasi. Unai hisihisi ese Keriso ena tauanina do ia durua,+ unai tauanina be kongrigeisen.+
25 Lau be unai kongrigeisen ena hesiai tauna ai lau lao, bona emui namo totona Dirava ese lau dekenai unai maduna ia henia.+ Unai dainai Dirava ena hereva lau harorolaia guguru.
26 Nega oromana* gunana bona uru gunadia dekenai unai hunia hereva helagana+ be idia hedinarai lasi.+ To hari iena helaga taudia dekenai unai ia hahedinaraia.+
27 Dirava ese mai moale ida, idia dekenai unai hunia hereva helagana ena dava bada hairaina ia hahedinaraia, bona bese idauidau dekenai ia hahedinaraia danu. Unai hunia herevana be,+ Keriso be umui ida ia hakapua, anina be emui helaro be ia ida hairai do umui abia.+
28 Ai ese ia ai harorolaia, taunimanima ibounai ai sisiba henia bona mai aonega ibounai ida idia ai hadibaia, unai amo Keriso ida idia hakapua taudia ibounai be lo taudia bamona Dirava dekenai do ai henia.+
29 Unai totona lau gaukara goada noho, ia henia siahuna be egu lalona ai ia gaukara hegeregerena lau gaukara noho.+
