Aposetolo Edia Kara 28:1-31
28 Ai be kone dekenai ai ginidae murinai, ai davaria unai motumotu ena ladana be Melita.+
2 Bona unai motumotu taudia* be ai dekenai hebogahisi bada idia hahedinaraia. Idia ese lahi idia karaia bona mai lalokau ida ai idia abia dae, badina medu ia diho bona gabu ia keru.
3 To Paulo be au ia gogoa bona lahi dekenai ia atoa neganai, lahi ena siahu dainai gaigai ta ia raka-lasi bona Paulo ena imana ia koria bona ia kamokau.
4 Unai motumotu taudia idia itaia unai gaigai be iena imana dekenai ia kamokau neganai, ta ta dekenai idia gwau: “Momokani inai tauna be ala-ala tauna, ena be davara ai dika ta ia davaria lasi, to inai Hahemaoro* ia abia be maoro, do ia mase.”
5 To Paulo ese ena imana ia hamarerea bena gaigai be lahi lalonai ia moru bona Paulo be dika ta ia davaria lasi.
6 To idia laloa iena imana do ia gudu eiava maoromaoro do ia moru bona do ia mase. Nega daudau idia naria bona idia itaia ia dekenai gau dikana ta ia vara lasi neganai, edia lalona idia haidaua bona idia gwau ia be dirava ta.
7 Unai gabu kahirakahira ai lohia tauna ta ena tano be momo. Ena ladana be Pobelio, ia ese ai ia abia dae bona dina toi lalonai ai ia naria namo herea.
8 To Pobelio ena tamana be bedi dekenai ia hekure, badina ia fiva bona ia rara kukuri. Bena Paulo be ia dekenai ia lao, ia guriguri, bona ena imana be ia latanai ia atoa bona ia hanamoa.+
9 Unai ia vara murinai, unai motumotu ai idia noho gorere taudia ma haida danu be ia dekenai idia mai bona ia hanamodia.+
10 Bona ai dekenai harihari gaudia momo idia henia bona sisima amo ai heau gwauraia neganai, emai dabu gaudia momo be sisima dekenai idia udaia.
11 Hua toi murinai, sisima ta dekenai ai guia, unai sisima dekenai “Dio* Ena Hekapa Memero Rua” edia maka ia noho. Unai sisima be Alesandria amo bona keru neganai unai motumotu dekenai ia noho.
12 Bena Surakusa ena haba dekenai ai ginidae neganai, unuseniai dina toi ai noho.
13 Unuseni amo ai heau bona Regio dekenai ai ginidae. Dina ta murinai, saut kahana amo lai ia toa bona dina iharuana ai, Puteoli dekenai ai ginidae.
14 Unuseniai tadikaka ai hedavari henidia bona ai idia noia idia ida dina 7 do ai noho. Bona unai gabu amo Roma dekenai ai lao.
15 Bona unuseniai tadikaka ese emai sivarai idia kamonai neganai, idia mai bona Laga-Ani Ruma Toi dekenai ai idia naria, to idia haida be idia mai ela bona Apia Ena Maketi dekenai ai idia hedavari henia totona. Bona Paulo ese idia ia itaia neganai, Dirava ia tanikiu henia bona goada ia abia.+
16 Vadaeni Roma dekenai ai ginidae neganai, Paulo dekenai gwaumaoro idia henia, ia be sibona do ia noho bona tuari tauna ta ese ia do ia gimaia.
17 To dina toi murinai, Paulo ese Iuda taudia edia dagi bada taudia ia boiria. Idia haboua neganai, idia dekenai ia gwau: “Tadikaka e, ena be iseda bese bona iseda sene taudia edia kastom lau hadikaia lasi,+ to lau be Ierusalema amo Roma taudia edia imana dekenai idia atoa, dibura tauna ta bamona.+
18 Bona idia ese egu sivarai idia kamonai murinai,+ idia ura lau idia ruhaia, badina lau idia hamasea ena badina ta idia davaria lasi.+
19 To Iuda taudia be unai idia abia dae lasi neganai, lau ura Kaisara ese egu kota herevana do ia kamonai,+ to egu bese taudia samania totona unai lau karaia lasi.
20 Unai dainai lau noinoi umui do lau itaia bona lau hereva henia totona, badina Israela ena helaro dainai inai seini amo lau idia guia.”+
21 Ia dekenai idia gwau: “Ai be Iuda amo oi ia sivarailaia revarevana ta ai abia lasi, bona unuseni amo idia mai tadikaka danu be oi dainai sivarai dikana ta idia gwauraia lasi.
22 To ai laloa do ia namo bema oiemu lalohadai ai kamonai, badina ai diba momokani,+ gabu ibounai dekenai taunimanima ese inai tomadiho oreana idia gwauraia dika.”+
23 Vadaeni dina ta idia abia hidi, ia ida idia hebou totona. Bona idia momo be ia noho rumana dekenai idia mai. Bona daba amo ela bona hanuaboi, idia dekenai gau ibounai ia herevalaia namonamo, oibe, ia ese Dirava ena Basileia ia gwauraia guguru. Bona Mose ena Taravatu+ bona Peroveta Taudia+ edia toretore amo edia lalona ia veria Iesu idia abia dae totona.+
24 Haida ese Paulo ia herevalaia gaudia idia abidadama henia, to ma haida be idia abidadama lasi.
25 Vadaeni idia lalotamona lasi dainai, unai gabu idia rakatania neganai, Paulo ese inai hereva tamona ia gwauraia:
“Lauma helaga be peroveta tauna Isaia amo emui sene taudia ia hereva henia,
26 ia gwau, ‘Inai taunimanima dekenai oi lao bona oi gwau: “Do umui kamonai, to do umui laloparara lasi, bona do umui itaia, to gau ta do umui lalopararalaia lasi.+
27 Inai taudia edia lalona* ia auka dainai, edia taiana amo idia kamonai, to kara ta idia karaia lasi. Bona edia matana idia koua vadaeni, dika edia matana be gau ta ia itaia. Bona idia ura lasi edia taiana amo hereva idia kamonai, dika edia lalona ia kehoa bena idia helalo-kerehai bona idia lau hanamoa.”’+
28 Unai dainai namona be umui diba, Dirava ese hahemauri ia mailaia dalana ena sivarai be idau bese taudia dekenai idia harorolaia.+ Bona idia be unai hereva do idia kamonai henia.”+
29 * ——
30 Vadaeni lagani rua lalonai Paulo be ia rentaia rumana ai ia noho,+ bona ia dekenai idia mai taudia ibounai be mai moale ida ia abia dae,
31 idia dekenai Dirava ena Basileia ia harorolaia, bona mai gari lasi ida Lohiabada Iesu Keriso ena sivarai ia hadibaia,+ bona gau ta ese ia koua lasi.
Futnout
^ Grik gado idia diba lasi taudia.
^ Gr., Di’ke, reana hahemaoro ia karaia dirava hahinena ia herevalaia.
^ Gr., “kudouna.”
