Iosua 20:1-9
-
Heau mauri ena siti ibounai (1-9)
20 Bena Iehova be Iosua dekenai ia gwau:
2 “Israela taudia oi hamaoroa, ‘Umui sibona totona heau mauri siti do umui abia hidi,+ Mose amo umui dekenai lau hereva hegeregerena,
3 unai amo ia laloa lasi* bona ta ia alaia tauna be unuseniai ia heau lao diba. Bona unai siti be emui heau mauri gabudia ai do idia lao, rara davana haloua tauna amo.+
4 Namona be unai siti ta dekenai ia heau lao+ bona siti ena geiti ena vareai gabuna dekenai do ia gini+ bona ia vara gauna be unai siti ena tau badadia vairanai do ia gwauraia. Bena idia ese unai siti ai ia idia abia dae be namo, bona ia dekenai gabu ta idia henia bona idia ida do ia noho.
5 Bema rara davana haloua tauna be ia murinai ia heau lao, namo lasi tau badadia ese ala-ala tauna be unai tauna ena imana dekenai idia atoa, badina ia be ia laloa lasi* bona ena varavara ia alaia, ena be guna ia inai henia lasi.+
6 Ia be unai siti ai do ia noho ela bona idia kota henia guna,+ bona unuseniai ia noho ela bona unai nega ai ia noho hahelaga tauna badana ia mase.+ Bena ala-ala tauna be ena siti dekenai ia giroa lou, bona ena siti bona ena ruma lalonai ia vareai diba.’”+
7 Vadaeni inai siti be unai badina totona idia hahelagaia, Kedesi,+ ia be Galilea ai, Napatali ena ororo gabudia ai ia noho, Sekema,+ unai be Eparaima ena ororo gabudia ai ia noho, bona Kiriata-araba,+ unai be Heberona, Iuda ena ororo gabudia ai ia noho.
8 Ioridane ai, Ieriko ena ist kahana dekenai idia ese Besere idia abia hidi,+ Rubena iduhu ena tano ai ia noho taunimanima lasi gabuna, bona Gado iduhu ena tano ai be Ramoto,+ unai be Gileada ai ia noho, bona Manase iduhu ena tano ai be Golana,+ unai be Basana ai ia noho.+
9 Unai siti be Israela taudia ibounai bona idia huanai idia noho idau tano taudia totona idia abia hidi, unai amo bema ta be ia laloa lasi bona ta ia alaia, ia be unuseni ia heau lao diba,+ namo lasi rara davana haloua tauna ese ia alaia, idia do kota henia lasi neganai.+
