Hadibaia Tauna 2:1-26
2 Bena egu lalona* dekenai lau gwau: “Mani lau ese moale karadia lau tohoa bona do lau itaia dahaka namo do ia havaraia.” To itaia, unai danu be anina lasi momokani!
2 Lau gwau: “Kiri be kavakava karana!”Ma sibona lau nanadaia: “Moale karadia ese taunimanima dekenai dahaka namo do idia havaraia?”
3 Wain moalelaia karana ena namo lau diba totona, wain lau inua,+ to mai aonega ida unai lau karaia. Lau ese kavakava karadia lau karaia danu, badina lau ura diba taunimanima edia mauri kwadogina lalonai dahaka kara ese idia do ia durua.
4 Gaukara badadia lau karaia.+ Lau sibona totona ruma momo lau haginia,+ bona vain uma momo lau karaia.+
5 Lau sibona totona uma gabu badadia mai hairaidia lau karaia, bona au bona flaoaflaoa momo lau hadoa.
6 Lau sibona totona gohu lau karadia, idia tubu au matamatadia dekenai ranu lau henia totona.
7 Hesiai taudia, tatau bona hahine lau haboua,+ bona egu ruma ai hesiai taudia* idia vara. Animal momo lau haboua danu, boromakau bona mamoe,+ guna Ierusalema dekenai idia lohia taudia edia lau hereaia.
8 Siliva bona golo lau haboua,+ unai be king bona provinsi idauidau edia taga.+ Lau sibona totona ane abia tatau bona hahine lau haboua, bona hahine momo danu, oibe, tatau ese idia moalelaia bada gauna.
9 Vadaeni egu kohu be idia bada herea, guna Ierusalema ai idia noho taudia edia kohu lau hereaia.+ Bona egu aonega be lau ida ia noho.
10 Lau ura* gaudia ibounai lau karaia sibona.+ Moale karadia ibounai lau karaia. Danu, lau karaia gaukara ibounai dainai, lau moale. Unai be egu gaukara ibounai ena ahuna.+
11 To egu imana ese ia karaia gaukara ibounai bona unai gaukara ibounai hagugurua totona lau karaia hekwarahi lau laloa lou neganai,+ lau laloparara idia ibounai be anina lasi momokani, lai lau lulua bamona.+ Oibe, tanobada dekenai* lau karaia gaudia ibounai be anina lasi.+
12 Bona aonega, kavakava karadia, bona anina lasi karadia lau stadilaia, bena lau laloa,+ “King murinai do ia lohia tauna be dahaka do ia karaia? Haida ese idia karaia vadaeni gaudia sibona.”
13 Bona lau itaia, aonega ese kavakava karadia ia hereaia,+ diari ese dibura ia hereaia bamona.
14 Aonega tauna ena matana be ena kwarana dekenai ia noho,*+ to kavakava tauna be dibura lalonai ia raka noho.+ Danu, lau laloparara idia ibounai edia dokona be tamona.+
15 Bena egu lalona* dekenai lau gwau: “Kavakava tauna dekenai ia vara gauna be lau dekenai do ia vara danu.”+ Vadaeni, aonega bada lau abia karana amo dahaka namo lau davaria? Unai dainai egu lalona dekenai lau gwau: “Inai danu be anina lasi momokani.”
16 Badina aonega tauna eiava kavakava tauna be taunimanima ese do idia laloatao lasi.+ Idia mai noho dinadia lalonai, idia ibounai do idia laloaboio. Bona aonega tauna ia mase hegeregerena, kavakava tauna danu do ia mase.+
17 Unai dainai mauri lau inai henia,+ badina tanobada dekenai idia karaia gaudia ibounai ese egu lalona idia hahisia, badina ibounai be anina lasi momokani,+ lai idia lulua bamona.+
18 Tanobada dekenai lau gaukara goadagoada bona lau abia gaudia ibounai lau inai henia,+ badina egu murinai do ia lohia tauna dekenai do lau rakatania.+
19 Bona lau diba lasi ia be do ia aonega eiava ia be kavakava tauna ai do ia lao.+ To ia ese tanobada dekenai egu hekwarahi bona egu aonega amo lau abia gaudia ibounai do ia biagua. Unai danu be anina lasi momokani.
20 Vadaeni tanobada dekenai lau karaia gaukara ibounai dainai lau lalohisihisi.
21 Tau ta be mai ena aonega bona diba ida ia gaukara goadagoada, to iena ahuna* be ia hekwarahi lasi tauna dekenai do ia henia.+ Unai danu be anina lasi momokani bona lalohisihisi gauna.
22 Tanobada dekenai tau ta be ia hekwarahi bada bona ia gaukara goadagoada, to dahaka namo ia davaria?+
23 Iena mauri dinadia ibounai lalonai, iena gaukara ese hisihisi bona lalohekwarahi ia havaraia,+ bona danu hanuaboi ai ia mahuta namonamo lasi.+ Unai danu be anina lasi momokani.
24 Namona be tau ta ia aniani, ia inuinu bona iena hekwarahi amo ia abia gaudia do ia moalelaia.+ Lau laloparara unai be Dirava momokanina ena imana amo,+
25 badina daika be lau hegeregerena, aniani namodia ia ania bona wain* namodia ia inua diba?+
26 Dirava momokanina ese ia lalonamo henia tauna dekenai aonega, diba, bona moale ia henia.+ To kara dika tauna dekenai kohu gogoa bona haboua gaukarana ia henia, unai kohu be Dirava ia hamoalea tauna dekenai ia henia totona.+ Unai danu be anina lasi momokani, lai idia lulua bamona.
Futnout
^ Heb., “kudouna.”
^ Heb., “natudia memero.”
^ Heb., “egu matana ese ia ura henia.”
^ Heb., “dina henunai.”
^ Eiava “ena matana be ia kehoa.”
^ Siri 1 ena futnout itaia.
^ Eiava “gau ibounai.”
^ Eiava “inuinu gaudia.”
