Revareva ta Efeso Taudia Dekenai 3:1-21
3 Unai dainai lau Paulo be Keriso Iesu dainai, bona umui idau bese taudia durua totona, dibura ruma ai lau noho.+ . . .
2 Momokani, umui kamonai vadaeni, lau ese maduna+ lau abia umui do lau durua Dirava ena hebogahisi hereadaena amo namo umui abia totona.
3 Dirava ese lau dekenai hunia hereva helagana ia hahedinaraia, guna umui lau tore henia neganai, unai lau herevalaia sisina.
4 Unai dainai inai revareva umui duahia neganai, Keriso ena hunia hereva helagana+ dekenai lau abia laloparara do umui diba.
5 Uru ma haida dekenai, Dirava ese unai hunia herevana be taunimanima dekenai ia hahedinaraia lasi, to hari ena lauma helaga amo unai hunia herevana be ena helaga aposetolo taudia bona peroveta taudia dekenai ia hahedinaraia goevagoeva,+
6 unai be, idau bese taudia be ai ida ahuna tamona do idia abia bona orea tamona taudia ai do ai lao, bona Dirava ese ia gwauhamatalaia gauna do ai abia hebou.+ Unai ia vara badina sivarai namona dekena amo bona Keriso Iesu ida ai hakapua.
7 Dirava ena hebogahisi hereadaena dainai, lau be unai hunia herevana ena hesiai tauna ai lau lao. Lau dekenai ena siahu ia henia neganai, unai davana lasi harihari gauna lau abia.+
8 Helaga taudia ibounai huanai ia maragi tauna amo lau be maragi herea,+ to unai hebogahisi hereadaena be lau dekenai ia henia,+ vadaeni idau bese taudia dekenai Keriso ena dava bada gaudia edia sivarai namona lau gwauraia be namo, unai gaudia ibounai ita lalopararalaia diba lasi.
9 To lau ia gaukaralaia, taunimanima ese unai hunia hereva helagana ena gaukara haheaua dalana idia itaia totona,+ unai hunia hereva helagana be gau ibounai ia karaia Diravana ese nega daudau lalonai ia hunia.
10 Unai amo guba ai idia noho gavamanidia bona siahu taudia be kongrigeisen amo,+ Dirava ese dala idauidau ai ia hahedinaraia aonega be hari do idia diba.+
11 Unai be Dirava ena ura, gunaguna negana amo ia laloa vadaeni gauna hegeregerena, Keriso Iesu iseda Lohiabada amo unai ia karaia.+
12 Ia dainai, mai gari lasi ida ita hereva+ bona mai lalogoada ida Dirava kahirakahira ita lao diba, badina Iesu ita abidadama henia.
13 Unai dainai umui lau noia umui totona lau davaria hisihisi dainai umui lalomanoka lasi, badina lau davaria hisihisi ese umui dekenai hanamoa do ia henia.+
14 Unai dainai Tamana dekenai lau tui diho,
15 ia amo guba bona tanobada ai idia noho bese ibounai ese edia ladana idia abia.
16 Dirava lau noia iena hairai bada hegeregerena, ena lauma helaga amo umui dekenai siahu do ia henia, bona unai ese emui lalona do ia hagoadaia,+
17 bona emui abidadama dainai, Keriso be emui kudouna dekenai do ia noho bona lalokau danu be emui huanai do ia noho.+ Unai amo badina aukana latanai do umui gini goada,+ au ena ramuna ia goada hegeregerena.+
18 Vadaeni helaga taudia ida hereva momokani ena lababa, ena lata, ena ataiai, bona ena dobu do umui lalopararalaia momokani.
19 Bona Keriso ena lalokau do umui diba,+ unai lalokau ese diba ia hereaia, unai amo Dirava amo idia mai kara ibounai amo do umui honu.
20 Dirava ena siahu be iseda lalona ai ia gaukara noho,+ unai siahu amo Dirava ese ita noia eiava lalohadailaia gaudia sibona lasi, to unai gaudia idia hereaia gaudia ia henia diba.+
21 Vadaeni namona be kongrigeisen bona Keriso Iesu amo Dirava be hairai do ia abia, bona uru ibounai lalonai unai bamona do idia karaia ela bona hanaihanai. Amen.
