Apokalupo—Ioane Ia Abia Herevana 7:1-17
7 Unai murinai, aneru 4 lau itaia, tanobada ena kona 4 dekenai idia gini. Idia ese tanobada ena lai 4 idia dogoatao auka, unai amo lai be tanobada eiava davara ai do ia toa lasi, eiava au ta do ia hamarerea lasi.
2 Bona aneru ma ta lau itaia, dina daekau* kahana amo ia daekau mai, ia ese mauri Diravana ena maka karaia gauna ia dogoatao. Bona aneru 4 dekenai ia boiboi badabada, unai aneru 4 ese siahu idia abia tanobada bona davara idia hadikaia totona,
3 ia gwau: “Tanobada, eiava davara, eiava au do umui hadikaia lasi, ela bona iseda Dirava ena hesiai taudia edia baguna ai maka ai atoa.”+
4 Vadaeni maka idia abia taudia edia namba lau kamonai, idia ibounai be 144,000,+ Israela ena iduhu ibounai amo idia makaia:+
5 Iuda iduhu amo be 12,000,Rubena iduhu amo be 12,000,Gado iduhu amo be 12,000,
6 Asere iduhu amo be 12,000,Napatali iduhu amo be 12,000,Manase+ iduhu amo be 12,000,
7 Simeona iduhu amo be 12,000,Levi iduhu amo be 12,000,Isakara iduhu amo be 12,000,
8 Sebuluno iduhu amo be 12,000,Iosepa iduhu amo be 12,000,Beniamina iduhu amo be 12,000.
9 Unai murinai hutuma bada lau itaia, ta ese idia ia duahia diba lasi, idia be bese ibounai, iduhu ibounai, taunimanima bona gado idauidau amo,+ idia be terona vairanai bona Mamoe Natuna vairanai idia gini, dabua kurokuro idia karaia+ bona edia imana dekenai pama au rauraudia idia dogoatao.+
10 Bona idia boiboi badabada noho, idia gwau: “Hahemauri be emai Dirava, terona ai ia helai Diravana amo+ bona Mamoe Natuna amo.”+
11 Aneru ibounai ese terona, tau badadia, bona mauri gaudia 4 idia gini hagegea,+ bona terona vairanai idia tui diho bona Dirava idia tomadiho henia,
12 idia gwau: “Amen! Namona be iseda Dirava dekenai hahenamo, hairai, aonega, tanikiu, hemataurai, siahu bona goada do idia noho ela bona hanaihanai.+ Amen.”
13 Tau badadia amo ta be lau dekenai ia gwau: “Inai dabua kurokuro idia karaia+ taudia be daidia, bona edeseni amo idia mai?”
14 Vadaeni maoromaoro ia dekenai lau gwau: “Egu lohiabada e, oi be oi diba.” Bona ia be lau dekenai ia gwau: “Inai taudia be hisihisi badana amo idia hanaia mai taudia,+ bona Mamoe Natuna ena rara lalonai edia dabua idia huria bona idia kurokuro vadaeni.+
15 Unai dainai idia be Dirava ena terona vairanai idia gini, bona ena dubu helaga lalonai dina bona hanuaboi iena hesiai gaukara helagana idia karaia. Bona terona latanai ia helai Diravana+ ese iena palai rumana amo idia do ia koua.+
16 Idia be do idia hitolo lou lasi bona do idia ranu mase lou lasi, bona dina ena siahu eiava siahu gauna ma ta ese idia do ia araia lasi,+
17 badina Mamoe Natuna,+ terona badinai ia gini tauna ese idia do ia naria+ bona idia lohilohi mauri ranu dekenai idia do ia hakaua lao.+ Bona Dirava ese edia matana amo mata ranu ibounai do ia dahua ore.”+
Futnout
^ Eiava “ist.”
