Apokalupo—Ioane Ia Abia Herevana 3:1-22
3 “Sadi kongrigeisen ena aneru dekenai inai hereva do oi torea: Dirava ena lauma 7+ bona hisiu 7+ ia abia tauna ese ia gwauraia hereva be inai: ‘Oiemu kara lau diba, idia gwau oi be oi mauri noho, to oi mase vadaeni.+
2 Oi noga noho,+ bona kahirakahira idia mase gaudia oi hagoadaia, badina lau itaia egu Dirava vairanai oi karaia gaudia be oi do haorea lasi.
3 Unai dainai, oi abia gaudia bona oi kamonai gaudia do oi laloa noho, bona unai gaudia do oi badinaia noho bona oi helalo-kerehai.+ Momokani bema oi noga lasi, lau be henaoa tauna bamona do lau mai,+ bona do oi diba lasi momokani edena hora ai do lau mai.+
4 “‘To Sadi ai, oi ida idia noho taudia haida ese edia dabua idia hamiroa lasi,+ bona idia be mai dabua kurokuro ida lau danu do idia raka,+ badina idia hegeregere unai idia karaia totona.
5 Ia kwalimu tauna+ ese dabua kurokuro do ia karaia,+ bona lau ese iena ladana be mauri bukana amo do lau kokia lasi momokani,+ to egu Tamana ena vairanai, bona iena aneru edia vairanai, ena ladana do lau gwauraia hedinarai.+
6 Mai ena taiana tauna ese lauma helaga ena hereva kongrigeisen oreadia dekenai ia kamonai be namo.’
7 “Filadelefia kongrigeisen ena aneru dekenai inai hereva do oi torea: Ia helaga+ bona ia momokani tauna,+ ia dekenai Davida ena ki ia noho,+ ia kehoa gauna be ta ese do ia koua lasi, bona ia koua gauna be ta ese do ia kehoa lasi, ia ese ia gwauraia hereva be inai:
8 ‘Oiemu kara lau diba. Oi vairanai iduara ta lau kehoa,+ bona tau ta ese ia koua diba lasi. Bona lau diba oi be mai emu goada sisina, bona oi ese egu hereva oi badinaia, bona egu ladana oi dadaraia lasi.
9 Satani ena orea* amo haida be sibona idia gwauraia Iuda taudia, to idia be Iuda taudia lasi,+ idia koikoi. Lau ese idia do lau hakaua mai bona emu aena badinai do idia tui diho, bona do idia diba lau ese oi lau lalokau henia.
10 Lauegu haheauka karana oi tohotohoa dainai,+ lau ese hahetoho negana amo oi do lau gimaia danu,+ unai hahetoho be tanobada ibounai dekenai do ia vara, tanobada dekenai idia noho taudia tohoa totona.
11 Lau be do lau mai haraga.+ Oi dekenai ia noho gauna oi dogoatao auka noho, unai amo ta ese emu korona do ia abia lasi.+
12 “‘Lau ese ia kwalimu tauna be egu Dirava ena dubu helaga ena du ai do lau halaoa, bona unai gabu do ia rakatania lasi. Bona egu Dirava ena ladana bona egu Dirava ena siti ena ladana be ia latanai do lau torea.+ Unai siti be Ierusalema Matamata, ia be guba amo do ia diho mai, egu Dirava amo.+ Bona egu ladana matamatana be unai tauna latanai do lau torea danu.+
13 Mai ena taiana tauna ese lauma helaga ena hereva kongrigeisen oreadia dekenai ia kamonai be namo.’
14 “Laodikea+ kongrigeisen ena aneru dekenai inai hereva do oi torea: Amen,+ kamonai bona hereva hamomokania tauna korikorina,+ Dirava ese ia havaraia tauna ginigunana ese ia gwauraia herevana be inai:+
15 ‘Oiemu kara lau diba, oi be keru lasi bona siahu lasi. Lau ura oi keru, eiava oi siahu.
16 To oi siahu lasi eiava oi keru lasi,+ oi be siahu sisina dainai,+ egu uduna amo oi do lau mumutaia.
17 Oi be oi gwau: “Lau be lau taga+ bona kohu momo lau abia vadaeni bona gau ta dekenai lau dabu lasi.” To oi diba lasi oi be dika momokani, oi be hebogahisi gauna, oi ogogami, oi matakepulu bona kopina kavakava.
18 Unai dainai oi lau sisiba henia, lau amo lahi ese ia hagoevaia vadaeni golo do oi hoia, vadaeni do oi taga. Bona dabua kurokuro do oi hoia, oi karaia totona, dika ma haida idia itaia oi be kopina kavakava bona oi hemarai garina.+ Bona matana muramura do oi hoia, emu matana dekenai oi dahua totona,+ vadaeni gabu oi itaia diba.+
19 “‘Lau lalokau henia taudia ibounai lau sisiba henia bona lau matahakani henia.+ Unai dainai oi gaukara goada bona oi helalo-kerehai.+
20 Lau be iduara dekenai lau gini bona lau pidipidi noho. Bema ta ese egu gadona ia kamonai bona iduara ia kehoa, lau be iena ruma lalonai do lau vareai bona ia ida adorahi aniani do ai ania hebou.
21 Ia kwalimu tauna+ dekenai maoro do lau henia, lau ida egu terona latanai do ai helai,+ lau danu be lau kwalimu bona egu Tamana ida ena terona latanai lau helai hegeregerena.+
22 Mai ena taiana tauna ese lauma helaga ena hereva kongrigeisen ma haida dekenai ia kamonai be namo.’”
Futnout
^ Gr., “sinagoga.”
