Aonega Herevadia 25:1-28
25 Inai danu be Solomona ena aonega herevadia,+ Iuda ena king, Hesekaia,+ ena hesiai tatau ese idia torea hanai:
2 Dirava ese gau haida ia hunia be ena hairai totona,+Bona king ese gau ta ena anina ia tahua namonamo neganai, ia idia hanamoa.
3 Guba be ataiai momokani bona tanobada ena lalona be dobu momokani hegeregerena,King taudia idia laloa gaudia ita davaria diba lasi.
4 Siliva ena momoru oi kokia neganai,Siliva do ia goeva momokani.+
5 King ena vairana amo kara dika tauna oi kokia,Bona kara maoromaoro ai king ena terona be do ia gini goada.+
6 King ena vairana ai sibona oi abia isi lasi,+Bona lada bada taudia huanai helai gabuna oi abia lasi,+
7 King sibona ese oi ia hamaoroa, “Iniseni oi daekau mai,” be namo,
To lada bada taudia vairanai oi ia hahemaraia be dika.+
8 Gau ta oi hamaoromaoroa totona, kota dekenai oi lao haraga lasi,Badina bema kota ai emu dekena tauna ese oi ia hahemaraia, dahaka do oi karaia?+
9 Emu dekena tauna ida emu lalohadai umui herevalaia hebou,+To oi sibona dekenai ia gwauraia herevadia be ma haida oi hamaoroa lasi,+
10 Badina unai sivarai ia kamonai tauna ese oi do ia hahemaraia,Bona oi gwauraia loaloa sivarai dikana be do ia idau diba lasi.
11 Ta ese nega maorona ai ia gwauraia herevana,Be siliva disi lalonai idia noho golo apolo bamona.+
12 Hereva kamonai tauna dekenai, mai aonega ida sisiba ia henia tauna ena hereva,Be golo taia gauna bona golo herahera gauna bamona.+
13 Gwaukau tauna namona be ia idia siaia taudia dekenai,Ia be aniani gogoa taudia edia lalona ia hanamoa ranu keruma* bamona,Badina ena biaguna ena lalona ia hanamoa.+
14 Bema tau ta ia gwauhamata harihari gauna ta do ia henia, to ia henia lasi,Ia be medu ia mailaia lasi ori bona lai bamona.+
15 Haheauka karana ese tuari biaguna ena lalona ia hamanadaia,Bona mai gado namo ida ia hereva tauna* ese ta ena turia ia makohia diba.+
16 Bema hani oi davaria, momo oi ania lasi,Badina bema oi ania badabada, do oi mumuta.+
17 Emu dekena tauna ena ruma lalonai oi vareai momo lasi,Unai amo oi dekenai do ia hesiku lasi bona oi do ia inai henia lasi.
18 Iena dekena tauna ia samania koikoi tauna,Be tuari auri bona tuari kaia bona diba mai matana bamona.+
19 Hekwakwanai negadia ai gaukara namonamo lasi tauna* oi abidadama henia karanaBe ia makohi isena eiava ia dika aena bamona.
20 Lalohisihisi tauna dekenai ane oi abia karanaBe ta ese keru negana ai ena kouti ia kokia bamona,Bona viniga be damena* ai oi atoa bamona.+
21 Bema emu inai tauna ia hitolo, aniani oi henia ia ania totona,Bema ia ranu mase, ranu oi henia ia inua totona.+
22 Unai amo oi ese lahi gidadia be iena kwarana ai oi haboua bamona,*+Bona Iehova ese oi dekenai davana namona do ia henia.
23 Not amo ia mai lai ese medu bada ia mailaia,Bona ia udu mauri malana ese ta ia habadua.+
24 Ta be ruma ena guhi ena kona ai ia noho be namo,To hepapahuahu momo* hahine ida ruma tamona ai ia noho be dika.+
25 Gabu daudau amo idia mailaia sivarai namonaBe ranu mase tauna ese ia inua ranu keruma bamona.+
26 Kara maoromaoro tauna be kara dika tauna ena dala ia badinaia neganai,Unai be kopukopu amo ia honu sinavai maragina bona ia dika ranu guri bamona.
27 Hani momo oi ania be namo lasi,+Unai hegeregerena, sibona totona hanamoa bada oi tahua be namo lasi.+
28 Iena badu ia biagua lasi taunaBe magu idia hadikaia vadaeni siti bamona.+
Futnout
^ Heb., “sinou ena keru.”
^ Heb., “malana manokana.”
^ Eiava reana, “koikoi tauna.”
^ Heberu ai idia gaukaralaia herevana ese muramura ta ladana souda ia herevalaia.
^ Unai be, ta hamanaua bona ena kara auka koua karana.
^ Eiava “hereva momo.”
