Sivarai Iharuana 14:1-15
14 Bena Abaisa be ia mase,* bona Davida Ena Siti ai idia guria.+ Bona ena natuna Asa be king ai ia lao. Ena lohia negana ai, tano be lagani 10 lalonai ia laga-ani.
2 Asa be ena Dirava Iehova ena vairanai kara namo bona kara maorona ia karaia.
3 Ia ese idau tano taudia edia boubou patadia bona ataiai gabudia* ia kokia,+ nadi du helagadia ia hamakohia,+ bona au helagadia* ia utua.+
4 Ma danu, ia ese Iuda taudia ia hamaoroa edia sene taudia edia Dirava Iehova idia tahua bona ena Taravatu bona hahegani idia badinaia totona.
5 Vadaeni Iuda ena siti ibounai amo ia ese ataiai gabudia bona bonana namo muramura gabua patadia ia kokia,+ bona ena lohia henunai unai basileia be maino ai ia noho.
6 Ia ese Iuda ai siti mai magu aukadia ia haginia,+ badina unai tano taudia be maino ai idia noho bona unai laganidia lalonai haida ese idia tuari henia lasi, badina Iehova ese ia dekenai laga-ani ia henia.+
7 Ia ese Iuda taudia ia hamaoroa: “Namona be siti haida ita haginia bona magu bona kohoro,+ geiti bona auri latadia amo ita hagegea, badina inai be iseda tano. Unai tano ita abia ena badina be ita ese Iehova iseda Dirava ita tahua. Ia ita tahua, bona ia ese iseda inai taudia amo ita dekenai laga-ani ia henia.” Vadaeni edia haginia gaukara ibounai idia haorea.+
8 Asa be Iuda amo tuari tatau 300,000 ia abia, idia be mai edia kesi badadia bona io. Bona Beniamina ena iduhu amo tuari tatau goadadia 280,000 ia abia, idia be mai edia kesi maragidia* bona peva.+
9 Gabeai Etiopia tauna Sera be ena tuari tatau 1 milioni bona kariota 300 ida ia mai idia ia tuari henia totona.+ Ia be Maresaha dekenai ia ginidae neganai,+
10 Asa be ia tuari henia totona ia lao bona Maresaha ai Sepataha Kourana dekenai tuari totona idia gini hegaegae.
11 Bena Asa be ena Dirava Iehova dekenai ia noinoi+ bona ia gwau: “Iehova e, oi ese taunimanima momo eiava goada lasi taudia oi durua diba.+ Iehova emai Dirava e, ai oi durua, badina ai be oi dekenai ai tabekau noho,+ bona oiemu ladana totona ai be inai taunimanima hutuma ai tuari henia.+ Iehova e, oi be emai Dirava. Namo lasi taunimanima ese oi idia halusia.”+
12 Vadaeni Iehova ese Asa bona Iuda taudia edia vairanai Etiopia taudia ia halusia, bona Etiopia taudia idia heau.+
13 Asa bona ia ida idia noho taudia ese Etiopia taudia idia lulua lao ela bona Gerara dekenai,+ bona Etiopia taudia ta ia roho mauri lasi, badina Iehova bona Asa ena tuari oreana ese idia hamasea ore. Unai murinai Iuda taudia ese tuari amo gau momo herea idia abia lao.
14 Ma danu, idia ese Gerara ia hagegea siti ibounai idia hadikaia, badina unai siti taudia be Iehova dainai idia gari. Bona unai siti ibounai lalonai kohu be momo herea dainai, idia ese kohu momo idia abia.
15 Danu idia ese animal naria taudia edia palai ruma idia hadikadia, bona mamoe orea bona kamelo momo herea idia abidia, unai murinai Ierusalema dekenai idia giroa lou.
Futnout
^ Heb., “ena sene taudia ida ia hekure.”
^ Vaia peva bona diba idia gaukaralaia taudia ese idia dogoatao.
