Sivarai Iharuana 1:1-17
1 Davida ena natuna Solomona ena king siahuna ia goada ia lao, bona ena Dirava Iehova be ia ida ia noho bona ena ladana ia habadaia.+
2 Solomona ese Israela taudia ibounai, tuari orea 1,000 ta ta bona tuari orea 100 ta ta edia gunalaia taudia, hahemaoro taudia, bona Israela ena gunalaia taudia ibounai, bona bese kwarana taudia ia boiria.
3 Bena Solomona bona idia hebou taudia ibounai be Gibeona ena ataiai gabuna* dekenai idia lao,+ badina unuseniai Dirava momokanina ena palai dubu ia noho, unai palai dubu be guna Iehova ena hesiai tauna Mose ese tano kaukauna ai ia karaia.
4 To, Davida ese Kiriata-iearimi amo Dirava momokanina ena Maua ia abia+ bona ia hegaegaelaia gabuna dekenai ia abia lao. Ia ese Ierusalema ai unai Maua totona palai rumana ta ia haginia.+
5 Bona Uri ena natuna Besalele,+ Huru ena tubuna mero, ese ia karaia kopa boubou patana+ be Iehova ena palai dubu vairanai idia atoa. Bona Solomona bona idia hebou taudia ibounai be unai pata vairanai idia guriguri.*
6 Vadaeni Solomona ese Iehova dekenai boubou gaudia ia henia, bona ia ese palai dubu, hebou dubu unai, ena kopa boubou patana latanai gabua boubou 1,000 ia henia.+
7 Unai hanuaboi ai Dirava be nihi ta amo Solomona dekenai ia hedinarai bona ia hamaoroa: “Oi ura gauna mani oi noia bona oi dekenai do lau henia.”+
8 Unai neganai Solomona be Dirava dekenai ia gwau: “Oi ese egu tamana Davida oi lalokau* henia bada,+ bona ena gabu ai lau be king ai oi halaoa.+
9 Iehova Dirava e, emu gwauhamata egu tamana Davida dekenai mani oi hagugurua,+ badina taunimanima momo herea, tano ena miri bamona, edia king ai lau oi halaoa vadaeni.+
10 Mani lau dekenai aonega bona diba oi henia+ inai taunimanima lau hakaua totona, badina daika be ia hegeregere emu taunimanima hutuma ia hahemaoro henia totona?”+
11 Bena Dirava be Solomona dekenai ia gwau: “Badina inai be emu kudouna amo oi ura gauna, to oi ese kohu, taga, bona ladana bada eiava emu inai taudia hamasea totona oi noinoi lasi. Danu oi mauri daudau totona oi noinoi lasi, to aonega bona diba totona oi noinoi, unai amo egu taunimanima, oi lohiaia taudia unai, oi hahemaoro henia diba,+
12 unai dainai aonega bona diba be oi dekenai do lau henia, to danu kohu bona taga bona ladana bada do lau henia, guna idia lohia king bona emu murinai do idia lohia king ta dekenai unai bamona do ia vara lasi.”+
13 Bena Solomona be Gibeona ai ia noho ataiai gabuna,*+ hebou dubu ia noho gabuna unai, amo Ierusalema dekenai ia lao. Bona Israela ia lohiaia.
14 Solomona ese kariota bona hosi ia haboudia noho. Iena kariota be 1,400 bona hosi be 12,000,+ bona ia ese unai kariota bona hosi be kariota bona hosi guia taudia edia siti dekenai ia atodia+ bona king kahirakahira idia noho, Ierusalema ai.+
15 King ese Ierusalema ai siliva bona golo momo herea ia karaia, nadi edia momo hegeregerena,+ bona Sepala ai sida au momo herea ia hadoa, sikamoa au edia momo hegeregerena.+
16 Solomona ena hosi be Aigupito amo idia mailaia,+ bona king ena hoihoi taudia ese hosi ena orea ta ta be davana tamona amo idia hoia.+
17 Aigupito amo idia hoia kariota ta ena davana be siliva moni 600, bona hosi ta ena davana be siliva moni 150. Bona unai gaudia be Hiti ena king taudia bona Suria ena king taudia ibounai dekenai idia hoihoilaia.
Futnout
^ Eiava “unuseniai Dirava ena lalohadai idia tahua.”
