Samuela Ginigunana 3:1-21
-
Samuela be peroveta tauna ai idia halaoa (1-21)
3 Inai mero Samuela be Eli ena hakaua henunai Iehova ena hesiai gaukara ia karaia noho,+ to unai nega lalodiai, Iehova ena hereva be idia kamonai momo lasi, bona matahanai+ danu idia herevalaidia lasi.
2 Eli ena matana be ia dibura vadaeni, bona gabu ia itaia namonamo lasi.+ Vadaeni dina ta, Eli be ena daiutu lalonai ia mahuta noho,
3 bona Dirava ena lamepa+ idia do habodoa lasi bona Samuela be Iehova ena dubu helaga lalonai ia hekure noho,+ unai be Dirava ena Maua ia noho gabuna ai, unai neganai
4 Iehova ese Samuela ia boiria. Bena Samuela ia haere: “Lau inai.”
5 Vadaeni Eli dekenai ia heau lao bona ia gwau: “Lauegu lohia e, oi ese lau oi boiria, a?” To ia gwau: “Lau ese oi lau boiria lasi. Oi giroa lou bona oi mahuta.” Vadaeni ia giroa lou bona ia mahuta.
6 Iehova ia boiboi lou: “Samuela e!” Unai neganai Samuela ia toreisi bona Eli dekenai ia lao bona ia gwau: “Lauegu lohia e, oi ese lau oi boiria, a?” To ia gwau: “Natugu e, oi lau boiria lasi. Oi giroa lou bona mahuta.”
7 (Samuela be Iehova ia do diba namonamo lasi, bona Iehova amo hereva ta ia do abia lasi.)+
8 Vadaeni Iehova be nega ihatoina ma ia boiboi: “Samuela e!” Unai neganai ia toreisi bona Eli dekenai ia lao bona ia gwau: “Lauegu lohia e, oi ese lau oi boiria, a?”
Bena Eli ia laloparara Iehova ese mero ia boiria noho.
9 Vadaeni Eli be Samuela dekenai ia gwau: “Oi lao bona mahuta, bona bema oi ia boiria lou, namona be oi gwau, ‘Iehova e, mani oi hereva, badina emu hesiai tauna be ia kamonai noho.’” Bona Samuela ia lao bona ena gabu ai ia mahuta.
10 Bena Iehova be ma ia boiboi lou: “Samuela e, Samuela e!” Unai neganai Samuela ia gwau: “Mani oi hereva, badina emu hesiai tauna be ia kamonai noho.”
11 Iehova be Samuela dekenai ia gwau: “Itaia, lau be Israela ai gau ta lau karaia noho, bema ta be unai ia kamonai do ia hoa bada.*+
12 Unai dina ai, Eli bona ena bese dekenai lau gwauraia hereva ibounai do lau hagugurua, matamana amo ela bona dokona.+
13 Namona be ia oi hamaoroa, inai kerere dainai lau ese ena bese do lau panisia hanaihanai,+ badina ia diba ena natudia ese edia kara amo Dirava idia gwauraia dika,+ to ia ese ia gwau henidia lasi.+
14 Unai dainai lau ese Eli ena bese dekenai inai gwauhamata lau karaia, Eli ena bese ena kara dika be boubou gaudia ese do ia kokia diba lasi.”+
15 Samuela be ia hekure ela bona dabai, bena Iehova ena ruma ena iduara ia kehodia. Samuela be ia gari, ia itaia matahanaina be Eli dekenai ia gwauraia totona.
16 To Eli ese Samuela ia boiria: “Natugu Samuela e!” Unai neganai Samuela ia gwau: “Lau inai.”
17 Eli ia henanadai: “Ia ese oi dekenai dahaka hereva ia gwauraia? Mani lau amo unai oi hunia lasi. Bema Dirava ese oi dekenai ia gwauraia hereva ta be lau amo oi hunia, namona be ia ese oi ia panisia bona emu panisi davana do ia habadaia.”
18 Vadaeni Samuela ese Eli dekenai gau ibounai ia gwauraia, bona ia amo gau ta ia hunia lasi. Eli ia gwau: “Unai be Iehova ena ura. Namona be ena ura hegeregerena ia kara.”
19 Samuela be ia tubu daekau noho, bona Iehova be ia ida+ bona Dirava ese Samuela dekenai ia gwauraia hereva ibounai ia hagugurua.
20 Israela ibounai, Dano amo ela bona Bere-sieba, idia kamonai Samuela idia abia hidi Iehova ena peroveta tauna ai ia lao totona.
21 Iehova be Silo ai Samuela dekenai ia hedinarai noho, badina Iehova be guna Silo ai Samuela dekenai ia hedinarai, bona unuseniai Iehova be Samuela dekenai ena ura ia hahedinaraia.+
Futnout
^ Heb., “ena taiana do ia hemaihemai.”
