Revareva Ginigunana Korinto Taudia Dekenai 11:1-34
11 Namona be lau umui tohotohoa, lau ese Keriso lau tohotohoa bamona.+
2 Umui lau hanamoa, badina gau ibounai lalonai umui ese lau umui laloatao, bona umui dekenai lau henia hadibaia herevadia umui badinaia noho.
3 To lau ura umui diba, tatau ibounai edia kwarana be Keriso,+ hahine ena kwarana be tau,+ bona Keriso ena kwarana be Dirava.+
4 Bema tau ta ese ena kwarana ia koua bena ia guriguri eiava peroveta herevadia ia gwauraia, ia ese ena kwarana ia hahemaraia.
5 To bema hahine ta ese ena kwarana ia koua lasi bona ia guriguri eiava peroveta herevadia ia gwauraia,+ ia ese ena kwarana ia hahemaraia, badina ia be huina idia sevia hahinena bamona.
6 Bema hahine ta ese ena kwarana ia koua lasi, namona be ena huina ia utua, to bema ena huina ia utua eiava sevia be hemarai gauna, ena kwarana ia koua be namo.
7 Tau ese ena kwarana ia koua be namo lasi, badina ia be Dirava ena toana bamona+ bona hairai, to hahine be tau ena hairai.
8 Dirava ese tau be hahine amo ia karaia lasi, to ia ese hahine be tau amo ia karaia.+
9 Bona danu, Dirava ese tau be hahine totona ia karaia lasi, to ia ese hahine be tau totona ia karaia.+
10 Unai dainai hahine ese ena kwarana ia koua be namo, unai be toa ta bamona, ia hahedinaraia ia be ena tau henunai ia noho, bona aneru ese unai idia itaia.+
11 Lohiabada ena dala hegeregerena, hahine ia noho lasi bema tau be lasi, bona tau ia noho lasi bema hahine be lasi.
12 Dirava ese tau amo hahine ia karaia,+ bona tau be hahine amo ia vara. To gau ibounai be Dirava amo idia mai.+
13 Mani inai umui laloa: Hahine ese ena kwarana ia koua lasi bena Dirava ia guriguri henia be maoro, a?
14 Ita diba bema tau ta ena huina ia lata, unai be hemarai gauna,
15 to bema hahine ena huina ia lata, unai be iena hairai, ani? Badina Dirava ese ia dekenai huina ia henia, to kwarana koua gauna ia henia lasi.
16 Bema tau ta ia ura kastom ma haida dainai ia hepapahuahu, to ita diba ita dekenai kastom ma haida be lasi, Dirava ena kongrigeisen lalodiai danu be unai bamona.
17 To unai hadibaia herevadia lau henia noho lalonai, umui lau hanamoa lasi, badina emui hebou ese namo ta ia havaraia lasi, to dika sibona ia havaraia.
18 Mani umui laloa: Lau kamonai umui be kongrigeisen lalonai umui hebou neganai, umui huanai hapararaia karadia idia vara noho, bona lau laloa unai be momokani.
19 Oibe, umui huanai heiriheiri do idia vara,+ unai dala amo Dirava ese ia abia dae taudia be umui huanai do idia hedinarai.
20 Gabu tamona dekenai umui hebou neganai, umui be Lohiabada Ena Anibou ania totona umui hebou lasi.+
21 Lohiabada Ena Anibou ania negana ia ginidae neganai, umui haida be umui aniani vadaeni. Bona umui haida be umui hitolo bona haida be idia kekero.
22 Umui be mai emui ruma, unuseniai umui aniani bona inuinu diba, ani? Eiava Dirava ena kongrigeisen umui laloa maragi bona idia dabu taudia umui hahemaraia, a? Vadaeni, umui dekenai dahaka do lau gwau? Umui do lau hanamoa, a? Unai kara dainai umui do lau hanamoa lasi.
23 Lohiabada amo lau abia hereva be umui dekenai lau hadibaia. Gauna be inai: Lohiabada Iesu ena mase dalana do idia karaia hanuaboina ai,+ ia ese paraoa ia abia,
24 bona Dirava ia tanikiu henia murinai, ia makohia bona ia gwau: “Inai be egu tauanina ia laulaulaia,+ umui totona do lau henia. Inai do umui karaia noho lau umui laloatao totona.”+
25 Unai hegeregerena, idia aniani murinai, kapusi+ danu ia abia bona ia gwau: “Inai kapusi ese gwauhamata matamatana ia laulaulaia,+ unai be egu rara amo do lau hamomokania.+ Inai kapusi amo umui inua negadia ibounai, inai bamona do umui karaia noho lau umui laloatao totona.”+
26 Inai paraoa umui ania bona inai kapusi amo umui inua negadia ibounai, Lohiabada ena mase do umui gwauraia hedinarai noho, ela bona ia ginidae.
27 Unai dainai, kara maorona ia karaia lasi bona inai paraoa ia ania eiava Lohiabada ena kapusi amo ia inua tauna be mai ena kerere, Lohiabada ena tauanina bona ena rara dekenai.
28 Namona be tau ta ese sibona do ia tahua namonamo guna,+ unai murinai ia hegeregere paraoa do ia ania bona unai kapusi amo do ia inua.
29 Badina bema tau ta ia aniani bona ia inuinu to unai tauanina ese ia laulaulaia gauna ena anina ia diba lasi, ia ese sibona dekenai hahemaoro ia mailaia.
30 Unai dainai umui huanai momo be idia manoka bona idia gorere, bona haida be mase lalonai idia mahuta.*+
31 To bema ita sibona ita tahua namonamo guna bema ita be ita hegeregere, hahemaoro do ita abia lasi.
32 To, hahemaoro ita abia neganai, Iehova* ese ita ia matahakani henia,+ unai amo tanobada ida hahemaoro do ita abia hebou lasi.+
33 Unai dainai egu tadikaka e, inai aniani ania totona umui hebou neganai, namona be umui naria ibounai idia mai totona.
34 Bema ta be ia hitolo, namona be ena ruma dekenai ia aniani, unai amo umui hebou neganai, unai be hahemaoro abia totona lasi.+ To lau mai neganai, unai gaudia ma haida do lau hamaoromaoroa.
