Tahua gaukara ta amo idia davaria, America ai matamata taudia 80 pesen be idia guriguri, to idia amo kahana sibona be dina ta ta ai idia guriguri. Idia haida idia laloa: ‘Guriguri be egu hemami do ia hanamoa sibona, eiava lau do ia durua momokani?’

•  Guriguri be dahaka?

•  Dirava ia kamonai noho, a?

•  Dahaka totona do lau guriguri?

•  Emu turadia edia hereva

 Guriguri be gau ibounai ia Havaraia Diravana ida oi herevahereva karana. Unai be hoa gauna! Iehova be ita taunimanima ia hereaia momokani, to “ia be ita ta ta amo ia daudau lasi.” (Kara 17:27) Oibe, Baibel ia gwau: “Dirava kahirakahira umui lao, bona ia be umui kahirakahira do ia mai.”​—Iamesi 4:8.

 Edena dala ai dirava kahirakahira oi lao diba?

•   Dala ta be guriguri amo​​—unai dala ai Dirava oi hereva henia.

•   Dala ma ta be Baibel stadilaia karana amo​​—unai dala ai Dirava ese oi ia “hereva henia.”

 Unai bamona herevahereva karana, guriguri bona Baibel stadilaia karana ese emu hetura karana Dirava ida do ia hagoadaia.

 “Iehova ita guriguri henia, unai be Ataiai Momokani Diravana ida ita herevahereva karana, bona unai be ita taunimanima ese ita abia hahenamo badana ta.”​​—Jeremy.

 “Guriguri amo Iehova dekenai egu hemami lau gwauraia hedinarai karana ese Ia kahirakahira dekenai lau ia veria lao.”​​—Miranda.

 Ena be Dirava oi abidadama henia, bona ena be oi guriguri henia, to reana do oi daradara, ia ese emu guriguri ia kamonai henia noho eiava lasi. Baibel ia gwau, Iehova be “guriguri” ia kamonai henia Diravana. (Salamo 65:2) Ma ia gwau, emu “lalohekwarahi ibounai be ia dekenai [oi] negea.” Dahaka dainai? “Badina ia be [oi] ia laloa bada.”​​—1 Petero 5:7.

 Inai oi laloa: Oi be nega oi atoa emu tura namodia oi hereva henidia hanaihanai totona, ani? Dirava ida unai bamona oi karaia diba. Namona be nega ibounai ia oi guriguri henia bona iena ladana, Iehova, oi gaukaralaia. (Salamo 86:5-7; 88:9) Oibe, Baibel ia gwau, ‘nega ibounai do oi guriguri.’​​—1 Tesalonika 5:17.

 “Guriguri be lau bona egu guba Tamana emai herevahereva karana, unai dala amo egu lalona ai idia noho gaudia lau gwauraia hedinarai.”​​—Moises.

 “Iehova dekenai lau laloa gaudia ibounai lau gwauraia hedinarai, egu sinana eiava tura namona ta dekenai lau karaia hegeregerena.”​​—Karen.

 Baibel ia gwau: “Gau ibounai lalonai do umui guriguri bona noinoi goadagoada mai tanikiu ida, emui noinoi herevadia be Dirava dekenai do umui gwauraia hedinarai.”​​—Filipi 4:6.

 Unai anina be emu hekwakwanai oi gurigurilaia diba, a? Oibe! Baibel ia gwau: “Emu metau be Iehova dekenai oi negea lao, bona ia ese oi do ia durua.”​—Salamo 55:22.

 To, Dirava dekenai oi guriguri neganai, namo lasi emu hekwakwanai sibona oi herevalaia, to namona be ma gau haida oi gwauraia danu. Kekeni matamata ta ladana Chantelle, ia gwau: “Bema Iehova ena heduru sibona totona lau noinoi, unai be hetura karana namona lasi. Lau laloa Iehova tanikiu henia herevadia lau gwauraia guna be namo, bona lau tanikiu henia gaudia edia lista ia lata be namo.”

 Inai oi laloa: Emu mauri ai dahaka gaudia oi moalelaia? Dahaka gaudia toi dainai, Iehova oi tanikiu be namo?

 “Gau maragidia, hegeregere flaoaflaoa hairaina ta ita moalelaia dainai, Iehova dekenai tanikiu gurigurina ita gwauraia diba.”​​—Anita.

 “Dirava ese ia havaraia gaudia ta oi itaia bona oi moalelaia, o Baibel ai oi duahia siri ta ese emu kudouna ia hamarerea neganai, unai gaudia totona Iehova oi tanikiu henia diba.”​​—Brian.