Lasi. Baibel ia hahedinaraia Iesu ena ladana amo, Dirava sibona ita guriguri henia be namo. Iesu ese ena hahediba taudia ia hamaoroa: “Inai bamona do umui guriguri: Aiemai Tamana e, guba dekenai oi noho, emu ladana do ai hahelagaia.” (Mataio 6:9, Buka Helaḡa) Ena hahediba taudia ia hamaorodia Dirava sibona do idia guriguri henia, seint, aneru, eiava tau ta do idia guriguri henia lasi.

 Danu Iesu ese ena hahediba taudia ia hamaoroa: “Dala be lau, hereva momokani be lau, bona mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6, BHḡ) Dirava ese Iesu sibona dekenai maoro ia henia ita totona do ia hereva.​—⁠Heberu 7:25.

Dirava dekenai lau guriguri bona seint danu lau guriguri henidia be edena bamona?

 Iesu be Satani ena hahetoho ta dekenai ia haere, ia gwau: “Lohiabada oiemu Dirava do oi tomadiho henia, ia sibona dekenai hesiai gaukara do ia karaia.” (Mataio 4:10, BHḡ) Dirava ia ura ia sibona do ita badinaia eiava tomadiho henia, danu guriguri be ia sibona dekenai do ita gwauraia.​—⁠Isaia 48:11.

 Dirava do ia lalohisihisi bema tau ta, seint eiava aneru helagadia ita guriguri henia. Aposetolo Ioane be aneru ta ia tomadiho henia gwauraia neganai, unai aneru ese ia koua ia gwau: “Unai bamona oi karaia lasi, lau danu be hesiai tauna. Lau be oiemu gaukara hebou tauna, bona . . . Iesu ena hereva idia gwauraia hedinarai bona badinaia taudia ibounai edia varavarana. Dirava sibona do oi tomadiho henia.”​—⁠Apokalupo 19:10, BHḡ.