Noa Bona Abata Badana Ena Sivarai be Momokani Eiava Gori Sibona?

Baibel ena haere

Abata be ia vara momokani. Dirava ese kara dika taudia ia hadikaia ore totona abata ia havaraia. Bona Noa ia hamaoroa bouti badana ta do ia karaia kara namo taudia ia hamauria totona. (Genese 6:11-20) Ita diba Abata be ia vara momokani, badina unai be “Dirava ena siahu amo idia torea” bukana, Baibel, ese ia gwauraia.​—2 Timoteo 3:16.

Sivarai momokani eiava gori sibona?

Dahaka dainai Abata ia vara?

Taunimanima idia diba Abata do ia vara, a?

Noa ena bouti ena toana be edena bamona?

Noa ese lagani hida lalonai bouti ia haginia?

Abata badana ena sivarai, gori sivaraidia, bona sivarai gunadia

Sivarai momokani eiava gori sibona?

Baibel ese ia hahedinaraia Noa be ia noho tauna korikori bona Abata be ia vara momokani, ia be gori sivaraina lasi.

● Baibel idia torea taudia idia abia dae Noa be ia noho tauna korikori. Hegeregere, Baibel torea taudia Esera bona Luka be sivarai idia diba namonamo taudia dainai, Noa ena ladana be Israela besena ena lista ai idia torea. (1 Sivarai 1:4; Luka 3:36) Evanelia bukadia idia torea taudia Mataio bona Luka be Iesu ese Noa bona Abata ia herevalaia gaudia idia torea.​—Mataio 24:37-39; Luka 17:26, 27.

Danu, peroveta tauna Esekiela bona aposetolo Paulo idia gwau, Noa be abidadama bona kara maoromaoro ena haheitalai namona. (Esekiela 14:14, 20; Heberu 11:7) Bema unai toretore taudia idia diba tau ta be ia noho momokani lasi, ena haheitalai do idia torea lasi ita tohotohoa totona. Unai dainai, Noa bona abidadama tatau bona hahinedia edia haheitalai namona do ita tohotohoa badina idia be idia noho momokani taudia.​—Heberu 12:1; Iamesi 5:17.

● Baibel be Abata ena sivarai ia gwauraia namonamo. Baibel ese Abata ia vara ena lagani, hua, bona dina ia gwauraia. (Genese 7:11; 8:4, 13, 14) Danu Noa ese ia haginia bouti ena bada ia gwauraia. (Genese 6:15) Unai ese idia hahedinaraia Baibel be Abata ena sivarai momokani ia herevalaia, to gori sivaraina lasi.

Dahaka dainai Abata ia vara?

Baibel ia gwau Abata ia do vara lasi neganai, “taunimanima edia kara dika be bada herea.” (Genese 6:5) Ma ia gwau “Dirava momokani vairanai, tanobada be ia dika momokani” badina dagedage bona matabodaga karadia amo ia honu.​—Genese 6:11; Iuda 6, 7.

Baibel ia gwau unai hekwakwanai momo be aneru dikadia ese idia havaraia, idia be guba idia rakatania tanobada hahine ida idia mahuta hebou totona. Unai aneru dikadia ese idia havaraia natudia idia gwauraia Nefilim, idia ese unai nega ai idia noho taudia idia hahisia bada. (Genese 6:1, 2, 4) Unai dainai Dirava ese tanobada amo kara dika taudia ia kokia bona taunimanima namodia be tanobada idia noholaia.​—Genese 6:6, 7, 17.

Taunimanima idia diba Abata do ia vara, a?

Oibe. Dirava ese Noa dekenai do ia vara gauna ia gwauraia bona ia hadibaia ena famili bona animal haida ia hamauria totona bouti ta do ia karaia. (Genese 6:13, 14; 7:1-4) Noa ese taunimanima ia hadibaia dika badana do ia vara, to ena hereva idia kamonai henia lasi. (2 Petero 2:5) Baibel ia gwau: “Unai idia laloa bada lasi ela bona Abata ia mai bona idia ibounai ia abia lao.”​—Mataio 24:37-39.

Noa ena bouti ena toana be edena bamona?

Bouti be maua latana ta bamona, ena lata be 133 mita bamona, ena lababa be 22 mita, bona ena ataiai be 13 mita. a Bouti be saipresi audia amo idia karaia, bona ena lalona bona murimuri be pisi o tar koremadia amo idia koua. Bouti be mai ena sitori ginigunana, iharuana, bona ihatoina bona daiutu haida idia noho. Bouti ena kahana ta ai iduara ia noho bona ataiai windo ia noho. Guhi ena huanai be ia daekau sisina, unai amo ranu do ia noho lasi to do ia diho.​—Genese 6:14-16.

Noa ese lagani hida lalonai bouti ia haginia?

Baibel ia hahedinaraia lasi Noa be lagani hida lalonai bouti ia haginia, to toana be lagani momo lalonai ia haginia. Noa ena mauri lagani be 500 mai kahana bona ena natuna ginigunana ia vara, bona Abata ia vara neganai, ena mauri lagani be 600. b—Genese 5:32; 7:6.

Noa ena natudia memero toi idia bada bona headava murinai, reana lagani 50 eiava 60 idia hanaia vadaeni, bena Dirava ese Noa ia hamaoroa bouti badana ia karaia totona. (Genese 6:14, 18) Unai dainai ita gwau diba bouti badana be reana lagani 40 eiava 50 lalonai idia karaia.

Abata badana ena gori sivaraidia

Tanobada ibounai dekenai idia gwauraia abata sivaraidia be Baibel ena sivarai amo ia idau, to edia kahana haida be Baibel ena sivarai ida ia hegeregere. Noa ena bese ia bada bona tanobada ena kahana ibounai dekenai idia lao neganai, toana be unai Abata ena sivarai idia herevalaia loulou. To nega ia hanaia lalonai, abata ena sivarai idauidau idia vara. Haheitalai haida mani ita laloa.

Greek ena gori sivarai: Idia roho mauri tau bona hahine be edia murina dekenai nadi idia negea noho, unai amo nadi be tatau bona hahine taudia ai idia lao. Bena tanobada be taunimanima amo idia hahonua.

Hindu ena gori sivarai: Tau ta be gwarume ta ese ia hadibaia, tanobada be abata badana ta ese do ia hadikaia. Gwarume ese unai tauna ia hadibaia bouti badana ta ia haginia totona. Unai tauna be abata amo ia roho mauri badina gwarume ese bouti be gabu namona dekenai ia hakaua lao.

Babulonia ena gori sivarai: Abata amo idia roho mauri tau bona hahine be mase diba lasi maurina idia abia bona dirava haida ai idia lao.

Central America ena gori sivarai: Tau ta, ena adavana, bona natudia be abata amo idia roho mauri, to taunimanima ibounai be gwarume ai idia lao.

[FUTNOUT]