Phau Vajlugkub tsis hais tsis ntsees txog yuthanezias (euthanasia) lossis kev txo txojsia. a Phau Vajlugkub qhia tias tua neeg yeej txhaum. Tiamsis yog ib tug neeg ho muaj txiab xeeb hnyav heev es nws yuav tsis nquag li ces nyob ntawm nws seb nws puas xav tso pa yug xwb.

 Phau Vajlugkub qhia tias Vajtswv yog tus Tswv Tsim, nws yog “txoj hauv paus siav.” (Ntawv Nkauj 36:9; Tubtxib Tes Haujlwm 17:28) Vajtswv saib txojsia muaj nqe heev. Yog peb txo peb txojsia lossis lwm tus txojsia yeej txhaum Vajtswv. (Khiav Dim 20:13; 1 Yauhas 3:15) Vajtswv xav kom peb saib txojsia muaj nqes thiab. Yog li ntawd, peb yuav tsum xyuam xim tsis txhob lam phov siav mus ua tej yam uas yuav puas peb txojsia.​—Kevcai 22:8.

Yog ib tug mob hnyav heev es kho tsis tau, puas txhaum rau nws txo nws txojsia?

 Txawm ib tug mob hnyav uas kho kawg kev lawm los phau Vajlugkub qhia tias tseem txhaum yog nws rov txo nws txojsia. Xa-u yog haiv neeg Yixayee tus Vajntxwv. Thaum Xa-u mus ua rog es raug mob hnyav heev, nws thov kom nws tus tub rog xuas ntaj tua nws. (1 Xamuyee 31:3, 4) Tiamsis Xa-u tus tub rog tsis kam. Tom qab ntawd, muaj ib tug txivneej dag rau Davi tias nws yog tus tua Xa-u. Davi saib txojsia muaj nqes ib yam li Vajtswv saib, nws thiaj suav tias tus txivneej ntawd ua txhaum. Nws thiaj muab tus txivneej ntawd tua vim nws yuav tsum ris Xa-u cov ntshav.​—2 Xamuyee 1:6-16.

Phau Vajlugkub puas qhia kom nrhiav txhua txojke los yug txojsia?

 Tus uas saib txojsia muaj nqes yeej nrhiav kev los kho nws tus mob. Tiamsis yog nws paub tias kho tsis tau lawd, es nws tsis xav noj tshuaj ntxiv lossis tsis xav tso pa yug nws txojsia los phau Vajlugkub kuj tsis txwv thiab. Phau Vajlugkub qhia tias kev tuag yog peb tus yeeb ncuab uas peb khiav tsis dim li. Peb txawj tuag vim peb yog neeg txhaum. (1 Khaulee 15:26; Loos 5:12) Txawm peb tsis xav tuag los peb tsis tas ntshai, vim Vajtswv cog lus tias nws yuav tsa cov tuag sawv rov los.​—Yauhas 6:39, 40.

Vajtswv puas zam txim rau tus uas rov tua nws tus kheej?

 Phau Vajlugkub qhia tias yog ib qho txhaum loj rau ib tug neeg rov tua nws tus kheej, tiamsis tsis muaj ib nqes uas qhia hlo tias Vajtswv yuav tsis zam nws lub txim. b Thaum tibneeg rov tua lawv tus kheej Vajtswv yeej paub lawv lub siab. Nws paub tias tej zaum lawv ua li ntawd vim lawv ntxhov siab ntau yam, lawv muaj tus mob nyuaj siab, lossis yog tim lawv tej roj tej ntshav (genetics). (Ntawv Nkauj 103:13, 14) Vajtswv siv phau Vajlugkub los nplig cov txom nyem quaj ntsuag. Phau Vajlugkub hais tias “cov ncaj ncees thiab cov tsis ncaj puavleej yuav sawv hauv qhov tuag rov los.” (Tubtxib Tes Haujlwm 24:15) Qhov no qhia tias tus uas tua nws tus kheej tseem muaj vam tias Vajtswv yuav tsa nws sawv rov qab los thiab.