Tibneeg yeej kho tsis tau kom thoob ntiajteb muaj kev sib haum xeeb, tsuas yog Vajtswv lub Nceeg Vaj xwb thiaj ua tau li ntawd. Vajtswv lub Nceeg Vaj yog ib lub tseem fwv saum ntuj ceeb tsheej, Yexus Khetos yog tus Vajntxwv kav lub Nceeg Vaj ntawd. Thaum Vajtswv lub Nceeg Vaj kav lub ntiajteb yuav muaj tej yam zoo twg?

1.   Vajtswv yuav “ua rau tej kev tsov kev rog hauv ntiajteb no tiaj tus,” thiab yuav ua kom nws cov lus cog tseg no muaj tiav: “Cov neeg uas nyob hauv ntiajteb txhua tus uas ua haum Vajtswv siab tau nyob kaj siab lug!”​—Phau Ntawv Nkauj 46:9; Lukas 2:14.

2.   Vajtswv lub Nceeg Vaj yuav kav saum ntuj ceeb tsheej tuaj thoob plaws hauv lub ntiajteb. (Daniyees 7:14) Vim lub tseem fwv no kav thoob plaws ntiajteb, thiaj yuav rhuav tshem tau txojkev uas nyias khav tias nyias lub tebchaws zoo dua, uas yog lub hauv paus keeb tsim kev kub ntxhov.

3.   Yexus tus uas kav lub Nceeg Vaj tau lub npe tias “Vajntxwv tus uas muaj kev thajyeeb.” Qhov no qhia tias nws yuav ua kom “kev thajyeeb yuav muaj tsis paub kawg.”​—Yaxayas 9:6, 7.

4.   Cov neeg uas pheej ua nruj ua tsiv yuav tsis tau nyob hauv lub Nceeg Vaj, rau qhov “[Vajtswv] ntxub cov neeg uas nyiam ua nruj ua tsiv kawg li.”​—Phau Ntawv Nkauj 11:5; Pajlug 2:22.

5.   Vajtswv yuav cob qhia nws cov pejxeem kom paub nrog luag nyob sib haum xeeb. Phau Vajlugkub hais tias: “Lawv yuav muab lawv tej ntaj thiab riam los ntaus ua liag. Ntau haivneeg yuav tsis ua tsov ua rog thiab yuav tsis muaj leejtwg npaj cuabyeej sib nkaug sib tua ntxiv li lawm.”​—Yaxayas 2:3, 4.

 Niaj hnub no, Yehauvas Cov Timkhawv tsheej plhom leej thoob ntiajteb tabtom kawm Vajtswv Txojlus seb yuav ua li cas thiaj muaj kev sib haum xeeb. (Mathais 5:9) Txawm peb muaj ntau haivneeg thiab nyob 240 lub tebchaws los, peb tsis tuav ntaj tuav riam sawv tawm tsawm lwm tus.