Tsis tau. Thaum muab piv rau cov kauj ntawv Vajlugkub txheej thaum ub, txawm tias twb tau ntau txhiab xyoo uas tib neeg muab phau Vajlugkub theej mus theej los rau hauv tej ntaub tej ntawv uas txawj lwj txawj ntuag los, phau Vajlugkub tseem tsis tau hloov li.

 Muaj tsheej txhiab kauj ntawv Vajlugkub txheej thaum ub uas tib neeg nrhiav tau. Muaj tej kauj ntawv, nyias kuj hais txawv nyias, ces qhov no txhais tias lawv kuj theej tau qho me ntsis yuam kev thiab. Txawm muaj li ntawd los, qhov no tsis hloov cov lus lub ntsiab. Tiam sis, kuj nrhiav tau tej qho uas tau muab cov ntsiab lus hloov lawm ntau heev. Tej qho, kuj yog tib neeg txhob txwm ntxiv lus rau kom hloov tau txoj xov hauv phau Vajlugkub. Cia peb tham txog ob qho no:

1.   Ntawm 1 Yauhas 5:7, cov phau Vajlugkub qub ib txhia muaj cov lus raws li nram no: “saum ntuj ceeb tsheej, Leej Txiv, Txoj Lus, thiab Vaj Ntsujplig: thiab lawv peb leeg puav leej yog tib tug.” Txawm li ntawd los, muaj lwm cov kauj ntawv Vajlugkub uas peb tso siab tau rau qhia meej tias cov lus no yog neeg muab sau ntxiv rau xwb tsis yog muaj nyob rau hauv cov kauj ntawv qub. a Vim li ntawd, cov Vajlugkub uas txhais rau tiam no uas peb tso siab tau rau thiaj muab cov lus ntawd tshem tawm mus lawm.

2.   Vajtswv lub npe kiag los muaj tshwm tsheej txhiab zaus nyob hauv cov kauj ntawv Vajlugkub txheej thaum ub. Txawm li ntawd los, muaj ntau phau Vajlugkub tau muab Vajtswv lub npe tshem tawm mus thiab muab lub npe meej mom xws li “Tus Tswv” los sis “Vajtswv” coj los hloov Vajtswv lub npe lawm.

 Los txog tam sim no, vim nrhiav tau cov kauj ntawv Vajlugkub ntau heev ces yeej yooj yim pom tej uas tau muab sau yuam kev dua li yam thaum ub. b Niaj hnub no, qhov uas muab cov kauj ntawv no los sib piv qhia puas tau tias yeej txhais tau phau Vajlugkub thwj kawg li lawm?

•   Thaum hais txog Cov Nqe Lus Henplais (kheev hu ua “Phau Qub”), ib tug kws tshawb fawb hu ua William H. Green tau hais tias: “Peb tso siab plhuav hais tau tias yeej tsis tau muaj ib tug twg txhais tau ib phau ntawv qub qub uas yuav thwj npaum li no dua li.”

•   Thaum hais txog Phau Tshiab los sis “Cov Nqe Vajlugkub Kilis”, ib tug kws tshawb fawb phau Vajlugkub hu ua Frederick F. Bruce, sau hais tias: “Muaj pov thawj nyob rau hauv Phau Tshiab ntau tshaj tej ntawv uas tib neeg sau qub qub thaum ub, txawm li los twb tsis muaj ib tug twg nug ib lo tias tej uas lawv sau txog ntawd puas muaj tseeb tiag tiag.”

•   Tus yawg Frederic Kenyon, uas yog ib tug thawj tshawb fawb phau Vajlugkub, hais tias “thaum ib tug twg tuav ib phau Vajlugkub hauv nws txhais tes, nws yeej tsis ntshai hais tias nws tuav Vajtswv Txoj Lus uas muaj qhov tseeb nyob rau hauv tiag. Thiab txawm yog ib tiam dhau ib tiam los Vajtswv tej hauv paus ntsiab lus tseem ceeb yeej tsis hloov li.”

•   Cov neeg Yudais thiab cov Khixatias thaum ub uas yog cov theej ntawv tseem muab tej uas Vajtswv cov neeg ua txhaum loj heev sau tseg cia rau peb paub thiab. c (Teev Npe 20:12; 2 Xamuyees 11:2-4; Kalatias 2:11-14) Ib yam li ntawd, lawv kuj sau tseg cia txog Vajtswv tej kev txiav txim rau haiv neeg Yudais vim lawv txoj kev tsis mloog lus. Thiab lawv nthuav tawm cov nqe Vajlugkub uas neeg tej tswv yim sau. (Hauxeyas 4:2; Malakis 2:8, 9; Mathais 23:8, 9; 1 Yauhas 5:21) Qhov uas lawv theej tau tej zaj ntawd thwj thwj, qhia tias peb tso siab tau rau lawv thiab peb pom tias lawv hwm Vajtswv Txoj Lus kawg li.

•   Vajtswv twb yog tus tshoov kom neeg sau phau Vajlugkub ces yeej tsim nyog tias tej uas tau muab sau tseg ntawd los kuj yuav tsum thwj thwj thiab. d (Yaxayas 40:8; 1 Petus 1:24, 25) Vajtswv tsis yog tshoov kom neeg sau Nws Txoj Lus los pab cov neeg thaum ub xwb tiam sis kom pab tau peb niaj hnub nim no thiab. (1 Kauleethaus 10:11) Tseeb tiag, “Txhua yam hauv Vajtswv Txoj Lus uas sau puag thaum ub los yog sau los qhuab qhia peb. Vajtswv Txoj Lus pab kom peb thev taus thiab txhawb tau peb lub zog, peb thiaj muaj chaw vam rau yav tom hauv ntej.”​—Loos 15:4.

•   Thaum Yexus thiab nws cov thwj tim hais txog cov nqe Vajlugkub Henplais, lawv yeej tsis txhawj ib zaug tias nyob tsam cov nqe Vajlugkub qub qub ntawd sau tau tsis raug.​—Lukas 4:16-21; Tes Haujlwm 17:1-3.