Txawm phau Vajlugkub tsis yog ib phau ntawv uas qhia txog kev tshawb txuj ci los thaum hais txog kev tshawb txuj yeej qhia tau meej. Cia peb mus tham txog tej kev tshawb txuj thiab seb phau Vajlugkub hais sib dho li cas. Phau Vajlugkub twb xub qhia txog tej yam uas tib neeg tsis tau paub txog li. Tom qab no cov neeg tshawb fawb mam tshawb pom li phau Vajlugkub qhia.

•   Lub qab ntuj khwb muaj qhov pib. (Chivkeeb 1:1) Yav thaum ub tib neeg hais tias lub qab ntuj khwb tsis yog tsim los, tiam sis nyob nyob lub qab ntuj khwb cia li tshwm los xwb. Cov neeg Npanpiloos ntseeg tias muaj ob tug tim tswv uas tawm hauv dej hiav txwv los tsim lub qab ntuj khwb. Lwm cov dab neeg qhia tias lub qab ntuj khwb tawm hauv ib lub qe loj loj los.

•   Lub qab ntuj khwb yeej muaj tej kev cai uas tswj txhua yam, tsis yog tswj los ntawm tej tim tswv. (Yauj 38:33; Yelemis 33:25) Tib neeg thoob qab ntuj piav dab neeg tias muaj tej tim tswv uas xav ua phem rau tib neeg los yeej tau, thiab tib neeg yeej pab tsis tau lawv tus kheej.

•   Lub ntiaj teb dai rau ib qho chaw uas nyob khoob ntshuv. (Yauj 26:7) Tej tib neeg thaum ub ntseeg tias, lub ntiaj teb tiaj tiaj thiab muaj tej tug tsiaj loj loj xws li tus twm los sis vaub kib txheem lub ntiaj teb.

•   Tej pa dej ncho hauv hiav txwv tuaj mus saum ntuj ua nag, ua daus thiab ua lawg poob los rau lub ntiaj teb, tej pas dej thiab hav dej thiaj li tsis paub nqhuab. (Yauj 36:27, 28; Tej Lus Qhia 1:7; Yaxayas 55:10; Amaus 9:6) Cov neeg Kilis txheej thaum ub ntseeg tias, tej hav dej tsis paub qhuav los yog vim muaj dej txhawv hauv av nruab tiv txwv tuaj. Qhov uas lawv xav li no nyob los txog ntua tiam 18.

•   Muaj tej roob tshwm tuaj thiab muaj tej roob ploj mus los, vim thaum ub tej roob nyob puag hauv qab tiv txwv. (Phau Ntawv Nkauj 104:6, 8) Tiam sis muaj tej dab neeg qhia tias, tos muaj tej roob los yog muaj tej tim tswv tsim.

•   Kev nyiam huv pab kom noj qab nyob zoo. Ib txoj kev cai uas Vajtswv muab rau haiv neeg Ixayees yog, kom ntxuav tes tom qab kov ib lub cev tuag, cais tus neeg muaj mob kis tau, thiab ua tib zoo muab tej uas tawm hauv neeg lub cev los coj mus pov tseg a. (Levis Kevcai 11:28; 13:1-5; 2 Kevcai 23:13) Tiam sis cov neeg Iyiv, thaum muaj nqaij to lawv siv tshuaj tov nrog quav los qhwv lub qhov nqaij.

 Yeej muaj pov thawj qhia tias phau Vajlugkub yeej tsis qhia yuam kev. Nram qab no yog tej yam uas qhia tias tib neeg to taub yuam kev txog qhov tseeb hauv phau Vajlugkub.

 Tej uas neeg xav: Vajtswv tsuas siv rau hnub uas ib hnub muaj 24 txoos teev los tsim lub qab ntuj khwb xwb.

 Qhov tseeb: Vajtswv tsim lub qab ntuj khwb, tiam sis tsis qhia tias pib thaum twg los. (Chivkeeb 1:1) Ntxiv ntawd, hauv Chivkeeb tshooj ib qhia tias Vajtswv siv rau hnub los tsim lub qab ntuj, tiam sis rau hnub ntawd, tsis qhia tias yog ib lub sij hawm ntev npaum li cas diam. Tsis tas li ntawd, tag nrho lub sij hawm uas Vajtswv siv los tsim lub qab ntuj thiab lub ntiaj teb huv si kuj muab suav hu ua ib “hnub.”​—Chivkeeb 2:4.

 Tej uas neeg xav: Phau Vajlugkub hais tias xub tsim tej nroj tsuag ua ntej tsim lub hnub.​—Chivkeeb 1:11, 16.

 Qhov tseeb: Phau Vajlugkub qhia tias Vajtswv xub tsim lub ntuj, ces yog li nws yeej xub tsim lub hnub ua ntej tsim tej nroj tsuag. (Chivkeeb 1:1) Thawj hnub, lub hnub ci nplim npliv tuaj rau lub ntiaj teb. Hnub peb, txheej huab uas thaiv lub ntiaj teb pib ka zuj zus, ces lub hnub thiaj ci tuaj yug tau tej nroj tsuag. (Chivkeeb 1:3-5, 12, 13) Ces tom qab ntawd, lub hnub mam ci kaj nrig tuaj rau lub ntiaj teb.​—Chivkeeb 1:16.

 Tej uas neeg xav: Phau Vajlugkub hais tias lub hnub khiav ncig lub ntiaj teb.

 Qhov tseeb: Tej Lus Qhia 1:5 hais tias: “Lub hnub txawj tawm tuaj thiab txawj rov qab mus rau ntawm qhov chaw uas nws tawm tuaj, thiab rov tawm tuaj dua.” Nqe no tsuas qhia raws li qhov uas neeg pom lub hnub tawm tuaj thiab lub hnub poob li cas xwb. Niaj hnub no, txawm tib neeg hais tias “lub hnub tuaj” thiab “lub hnub poob,” los lawv yeej paub tias lub ntiaj teb khiav ncig lub hnub.

 Tej uas neeg xav: Phau Vajlugkub hais tias lub ntiaj teb tiaj tiaj.

 Qhov tseeb: Phau Vajlugkub siv lo lus “txog qab ntuj kawg,” tiam sis lo no tsis txhais tias lub ntiaj teb tiaj tiaj los sis muaj npoo. (Tes Haujlwm 1:8; qab taw qhia) Tib yam li ntawd, lo lus hais tias “plaub ceg kaum ntuj” tsuas yog lus piv txwv hais txog tag nhro lub ntiaj teb no xwb. Niaj hnub no tib neeg kuj siv lub koob taw kev uas muaj plaub ceg los ua lus piv txwv qhia thiab.​—Yaxayas 11:12; Lukas 13:29.