Phau Vajlugkub txhawb kom peb ua siab dawb siab zoo pub rau luag. Yog ua li no peb thiab lwm tus thiaj muaj kev kaj siab. (Pajlug 11:25; Lukas 6: 38) Yexus hais tias: “Thaum yus pub rau luag yus zoo siab heev dua thaum yus tau luag li.”​—Tes Haujlwm 20:35.

•  Vajtswv pom zoo koj pub li cas?

•  Vajtswv tsis pom zoo koj pub li cas?

•  Vajlugkub tej hauv paus ntsiab lus

 Vajtswv nyiam tus uas zoo siab hlo pub rau luag. Phau Vajlugkub qhia tias: “Txhua tus nyias yuav tsum muab raws li nyias twb xav tseg hauv lub siab lawm, tsis yog yuav khuvxim lossis raug yuam muab, rau qhov Vajtswv hlub tus uas xyiv fab muab.”​—2 Kauleethaus 9:7, Vajtswv Txojlus Txhais Tshiab Xyoo 2004 (HMOWSV).

 Qhov uas peb ua siab dawb pub rau lwm tus yog ib “txoj kevcai” uas Vajtswv pom zoo. (Yakaunpaus 1:27) Tus uas muaj lub siab dav pub rau cov pluag nrog Vajtswv sib koom siab ua ke rau qhov nws tabtom qev rau Vajtswv. (Pajlug 19:17) Phau Vajlugkub qhia tias Vajtswv yuav them nqe zog rau tus ntawd.​—Lukas 14:12-14.

 Pub vim xam pom peb tus kheej xwb. Xws li:

•   Xav kom luag qhuas.​—Mathais 6:2.

•   Xav tau nqe zog.​—Lukas 14:12-14.

•   Xav kom Vajtswv cawm dim.​—Phau Ntawv Nkauj 49:6, 7.

 Yog tias yam uas koj pub txhawb yam Vajtswv tsis pom zoo. Xws li, pub nyiaj rau tus uas twv txiaj yuam pov, tus haus yeeb haus tshuaj lossis quav dej quav cawv. (1 Kauleethaus 6:9, 10; 2 Kauleethaus 7:1) Tsis tas li ntawd, Vajtswv kuj tsis pom zoo rau peb pub rau tus tub nkeeg uas tsis kam mus khwv noj khwv haus.​—2 Thexalaunikes 3:10.

 Yog tias tsim teeb meem rau peb tsev neeg vim muab pub rau lwm tus. Phau Vajlugkub hais tias tus txiv tsev yuav tsum yug nws tsev neeg (1 Timautes 5:8) Yog li ntawd, txawm tias tus txiv tsev xav pub rau lwm tus los, yog yuav tsim teeb meem rau nws tsev neeg, ntshe tsis zoo rau tus txiv tsev coj li ntawd. Yexus tsis txaus siab rau tus uas tsis saib xyuas nws niam nws txiv uas twb laus lawm thiab ho hais tias nws tej qhov txhia chaw huvsi “twb muab rau Vajtswv lawm.”​—Malakaus 7:9-13.