Phau Vajlugkub twb hais ua ntej lawm tias tiam kawg yuav muaj mob kis rau ntau qhov lossis thoob ntiajteb. (Lukas 21:11) Tej mob kis no tsis yog Vajtswv rau txim rau tibneeg. Tiamsis twb yog Vajtswv ntag, uas yuav muab tej mob kis lossis tej kab mob kev nkeeg rhuav tshem huvsi mus.

•  Phau Vajlugkub puas qhia tias lub ntiajteb muaj kab mob kis?

•  Vajtswv puas txeev muab tej kab mob los rau txim rau tibneeg?

•  Qhov uas muaj mob kis thoob ntiajteb niaj hnub no puas yog Vajtswv rau txim rau tibneeg?

•  Tus kab mob kis thoob ntiajteb puas yuav muaj hnub dua mus?

•  Cov nqe Vajlugkub uas hais txog kev mob nkeeg

 Phau Vajlugkub tsis hais tsi ntsees txog ib tug kab mob twg, xws li tus mob COVID-19, tus kab mob Ej (AIDS), lossis tus mob npaws Xapee (Spanish flu). Tiamsis phau Vajlugkub hais tias yuav muaj “mob kis rau ntau qhov” thiab tibneeg yuav tuag rau kev mob kev nkeeg. (Lukas 21:11; Tshwmsim 6:8) Tej xwm txheej kab mob kis no ua pov thawj tias peb nyob rau “tiam kawg” lossis lub sijhawm uas “lub ntiajteb yuav kawg” lawm.​—2 Timautes 3:​1, Vajtswv Txojlus Txhais Tshiab Xyoo 2004; Mathais 24:3

 Muaj zaum puav Vajlugkub qhia tias Vajtswv muab kab mob los rau txim rau tibneeg. Xws li, Vajtswv ua rau ib txhia mob ruas. (Teev Npe 12:​1-16; 2 Vajntxwv 5:​20-27; 2 Xwmtxheej Vajntxwv 26:​16-21) Txawm li ntawd los, Vajtswv tsuas rau txim rau tus uas txhob txwm hla Nws txoj cai xwb thiab tus mob ntawd tsis kis mus rau lwm tus.

 Tsis yog. Txawm ib txhia hais tias Vajtswv muab tej kab mob kis thiab kev mob nkeeg los rau txim rau tibneeg los phau Vajlugkub tsis qhia li ntawd. Yog vim li cas?

 Thawj qhov, Yehauvas cov tub qhe tsis hais yav thaum ub thiab niaj hnub no los puavleej txeev mob. Xws li, tus tubtxib Timautes kuj yog ib tug uas pheej muaj mob. (1 Timautes 5:23 NWT) Tiamsis qhov uas nws pheej muaj mob li ntawd, phau Vajlugkub qhia tias tsis yog Vajtswv tsis txaus siab rau nws. Vajtswv cov tub qhe niaj hnub nimno los kuj zoo ib yam nkaus. Lawv muaj mob thiab tau tus mob kis los feem ntau twb vim yog lawv mus tom thawj lub caij nyoog uas tsis zoo.​—Tej Lus Qhia 9:11.

 Tsis tas li ntawd, phau Vajlugkub kuj hais tias tseem tsis tau txog lub sijhawm uas Vajtswv los rhuav tshem cov neeg limhiam. Nimno peb nyob rau lub sijhawm uas yog hnub cawm dim. Vajtswv tab tom caw txhua leej txhua tus los cuag nws thiab txais yuav txojkev dim. (2 Kauleethaus 6:2) Niaj hnub no, Vajtswv txib nws cov tub qhe mus tshaj tawm txoj xov zoo mus caw tibneeg los paub txog nws “lub Nceeg Vaj.”​—Mathais 24:14, NWT.

 Phau Vajlugkub hais tias tsis ntev tom ntej no yuav tsis muaj leej twg muaj mob lawm. Thaum Vajtswv lub Nceeg Vaj kav, Nws yuav rhuav tshem tej kev mob kev nkeeg huvsi mus. (Yaxayas 33:24; 35:​5, 6) Yuav tsis muaj kev txom nyem, kev quaj ntsuag thiab kev ploj kev tuag li lawm. (Tshwmsim 21:4) Vajtswv yuav tsa cov uas tuag lawd ciaj sawv rov qab los tau ib lub cev ntaj ntsug uas zoo tiav log thiab tau nyob kaj siab lug hauv lub ntiajteb uas zoo nkauj thiab xis nyob heev.​—Phau Ntawv Nkauj 37:29; Tes Haujlwm 24:15.

 Tshwmsim 6:8: ‘Kuv saib dheev, kuv pom ib tug txiv nees txheeb tawm plaws los. Tus uas caij tus txiv nees txheeb ntawd lub npe hu ua Txojkev Tuag thiab qhov tuag raws nws qab los. Nkawd muaj hwjchim tua cov neeg uas nyob hauv ntiajteb no tuag . . . tsis hais tuag . . . rau kev mob kev nkeeg.’

 Qhov no txhais tias: Zaj lus faj lem txog plaub tug txivneej caij nees qhia rau peb tias yuav muaj mob kis rau peb tiam no.