A C D F H K L M N NC NR P PH QH R S T TSH TX U V X Y

A

• Axias.

  Hauv Cov Nqe Vajlugkub Kilis, Axias yog ib lub xeev uas thaum ub Loos kav. Thaum ntawd lub tuam ceeb yog Efexaus. Nim no lub xeev ntawd yog teb chaws Rhawkis sab hnub poob, nrog rau tej koog pov txwv xws li Xamaus thiab Pamaus.​—THL 20:16; Tsh 1:4.

C

• Caij nyoog.

  Mus saib SIM CEEB.

D

• Dab.

  Lawv yog plig thiab tib neeg qhov muag pom tsis tau. Dab muaj hwj chim dua neeg. Chiv Keeb 6:2 muab lawv hu ua Vajtswv cov tub, thiab Yudas 6 muab lawv hu ua cov tub txib saum ntuj. Vajtswv tsim lawv zoo kawg nkaus tiam sis lub caij Nau-as nyob, lawv ntxeev siab rau Vajtswv mus tuaj Xatas tog. Lawv thiaj ua Vajtswv cov yeeb ncuab lawm.​—KC 32:17; Lk 8:30; THL 16:16; Ykn 2:19.

• Damas.

  Hauv cov Nqe Vajlugkub Kilis, damas yog ib lub nyiaj Kilis. Thaum ntawd lub nyiaj damas hnyav li 3.4 nkas.​—Mth 17:24, taw ntawv.

• Dawb huv.

  Cov dawb huv yog cov uas ua qhov ncaj qhov yog. Thiab kuj yog hais txog cov uas Vajtswv xaiv los ua nws tes hauj lwm. Cov ntseeg Yexus muab cov uas Vajtswv xaiv tshwj xeeb los nrog nws sib raug zoo hu ua cov dawb huv. Cov ntawd yog cov uas cia siab tias lawv yuav mus saum ntuj, tau nrog Yexus Khetos kav 1,000 xyoo.​—Tsh 20:4, 6.

• Denalias.

  Yog ib lub txiaj nyiag Loos uas hnyav li 3.85 nkas. Luag muab Xixas lub ntsej muag txaug rau ib sab. Lub caij Yexus nyob yuav tsum ua zog ib hnub tsaus ntuj mam khwv tau ib denalias. Cov Loos sau ib tug Yudais ib denalias se.​—Mth 17:25, taw ntawv; Lk 20:24.

• Deev luag poj luag txiv.

  Hauv phau Vajlugkub, lo lus no yog hais rau ib tug uas muaj poj niam muaj txiv lawm los tseem mus deev lwm tus.​—KhD 20:14; Mth 5:27; 19:9.

• Falixais.

  Ib pab ntseeg Kev Cai Yudais uas nto moo heev nyob thawj 100 xyoo tom qab Yexus. Lawv tsis yog caj ces pov thawj, tiam sis lawv coj Mauxes Txoj Kev Cai nruj heev. Lawv kuj coj Yudais tej kev lig kev cai nruj ib yam nkaus. (Mth. 23:23) Lawv tawm tsam Kilis tej kev coj noj coj ua heev. Lawv muaj hwj chim tswj cov Yudais vim lawv yog cov kawm Mauxes Txoj Kev Cai thiab Yudais tej kev cai tob tshaj lwm pab. (Mth 23:2-6) Lawv ib txhia kuj koom lub rooj Xahenrees thiab. Lawv ib sij tawm tsam Yexus txog hnub Xanpataus, tej kev lig kev cai, thiab qhov uas Yexus nrog cov neeg muaj txim thiab neeg sau se koom tsum. Tiam sis tej txhia kuj los ntseeg Yexus, ib yam li Xolaus uas yog neeg Thaxas.​—Mth 9:11; 12:14; Mak 7:5; Lk 6:2; THL 26:5.

H

• Hedis.

  Mus saib QHOV TUAG.

• Helauj.

  Tsev neeg uas Loos tsa los kav cov Yudais. Helauj Tus Loj yog thawj tug uas sawv kav. Nws nto npe heev vim nws yog tus kho lub tuam tsev hauv Yeluxalees, thiab yog tus sam hwm kom muab cov me nyuam tub tua pov tseg tag nrho kom tua tau Yexus. (Mth 2:16; Lk 1:5) Nws ob tug tub yog Helauj Akhilaus thiab Helauj Atipas. Loos muab nkawd txiv thaj tsam faib rau nkawd kav. (Mth 2:22) Atipas tsuas yog ib tug tswv xeev xwb tiam sis luag muab nws hu ua vaj ntxwv. Nws yog tus kav rau peb lub xyoos uas Yexus Khetos tshaj tawm txoj xov zoo. Nws kav mus txog ntua lub sij hawm uas phau Tes Hauj Lwm tshooj 12 tau hais txog. (Mak 6:14-17; Lk 3:1, 19, 20; 13:31, 32; 23:6-15; THL 4:27; 13:1) Tom qab ntawd, Helauj Akipas Ib uas yog Helauj Tus Loj li xeeb ntxwv ho los kav. Tsis ntev xwb ib tug tub txib saum ntuj muab nws tua tuag lawm. (THL 12:1-6, 18-23) Ces Helauj Akipas Ob mam sawv kav. Nws kav mus txog ntua thaum cov Yudais sawv tawm tsam cov Loos.​—THL 23:35; 25:13, 22-27; 26:1, 2, 19-32.

• Helauj cov neeg.

  Lawv yog pab uas txhawb Helauj tsev neeg nyob rau lub sij hawm cov Loos kav. Cov Xadukais ib txhia kuj txhawb Helauj tsev neeg thiab. Helauj cov neeg nrog cov Falixais ua ib nqag tawm tsam Yexus.​—Mak 3:6.

K

• Kauj ntawv.

  Cov ntawv thaum ub yog xuas tauj deg los sis tawv tsiaj los ua. Lawv muab ua tej daig ntev ntev thiab tsuas sau ntawv rau ib sab xwb. Ntau zaus lawv muab kauv ib tug pas ua ib thooj ntawv. Luag sau thiab theej Vajtswv Txoj Lus rau tej kauj ntawv no. Tiam ntawd feem coob siv cov kauj ntawv zoo li no xwb.​—Lk 4:17-20; 2Tm 4:13.

• Kehenas.

  Thaum ub lub Hav Hinoos ntawm lub nroog Yeluxalees muaj lub npe Kilis hu ua Kehenas. (Ylm 7:31) Cov cev Vajtswv lus qhia tseg tias yuav muaj tej cev tuag pov pawg lug rau hauv. (Ylm 7:32; 19:6) Tsis muaj keeb kwm qhia tias luag muab tsiaj los sis tib neeg hlawv ciaj rau hauv Kehenas. Yog li ntawd, Kehenas tsis yog ib lub ntuj tawg uas muab neeg hlawv ciaj mus ib txhis. Tiam sis Yexus thiab nws cov thwj tim muab Kehenas ua piv txwv txog txoj kev tuag zaum ob uas yog kev puas tsuaj mus ib txhis.​—Mth 5:22; 10:28; Tsh 20:14.

• Kev Cai.

  Thaum muab sau tus tsiaj ntawv txiv loj li no, “Kev Cai” yog hais txog tag nrho Mauxes Txoj Kev Cai los sis yog thawj tsib phau ntawv hauv phau Vajlugkub. Yog pom sau tus tsiaj ntawv txiv me li no, “txoj kev cai” los sis “txoj cai” yog hais txog ib txoj kev cai twg hauv Mauxes Txoj Kev Cai, los sis ib lub hauv paus ntsiab lus twg xwb.​—TNp 15:16; KC 4:8; Mth 7:12; Klt 3:24.

• Kev Cai Noj Ncuav Tsis Xyaw Keeb.

  Txhua xyoo cov Ixayees muaj peb lub koob tsheej uas tshwj xeeb, thawj lub yog ua Kev Cai Noj Ncuav Tsis Xyaw Keeb. Lawv pib ua rau hnub Nixas 15, tom qab ua Kev Cai Hla Dhau, thiab ua xya hnub txwm nkaus. Lub sij hawm ntawd tsuas pub noj ncuav tsis xyaw keeb xwb. Cov Ixayees ua li no los nco txog lub sij hawm lawv khiav tawm hauv Iyiv teb.​—KhD 23:15; Mak 14:1.

• Kev Cai Nco Txog Cob Lub Tuam Tsev.

  Thaum ub Xilias tus vaj ntxwv hu ua Athi-aukes Epifanis tau ua rau lub tuam tsev qias tsis huv. Tiam sis tom qab no, cov Yudais txeeb tau lub tuam tsev rov los ces lawv rov qab muab cob rau Vajtswv Yehauvas xyoo 165 ua ntej Yexus. Lawv thiaj li niaj xyoo ua kev cai nco txog lub caij uas lawv muab lub tuam tsev kho dawb huv. Lawv ua kev cai yim hnub nkaus, pib lub hli Khiles tim 25.​—Yh 10:22.

• Kev Cai Nyob Tsev Pheeb Suab.

  Cov Henplais lub hli Ethanis tim 15 txog 21, lawv ua Kev Cai Nyob Tsev Pheeb Suab. Lawv ua kev zoo siab li no rau lub caij sau qoob loo. Lawv ua Vajtswv Yehauvas tsaug uas nws tau foom koob hmoov rau lawv tej qoob loo ntsu nplua mias. Thaum lawv ua kev cai li no, lawv ua tsev pheeb suab nyob xwv lawv thiaj nco txog lub caij uas lawv khiav dim Iyiv teb chaws. Ib xyoos twg, cov txiv neej Yudais yuav tsum mus ua peb txoj kev cai hauv Yeluxalees. Ib txoj kev cai ntawd yog txoj no.​—LKC 23:34; Exl 3:4; Yh 7:2.

• Kev cai txiav.

  Cov Yudais muab lawv tej tub ua kev cai txiav daim tawv noov. Anplahas thiab nws cov tub ib tiam dhau ib tiam yuav tsum ua kev cai txiav li no. Tom qab no, cov uas los ntseeg Yexus Khetos tsis tas ua kev cai txiav lawm. Hauv phau Vajlugkub, muaj tej thaud kev cai txiav yog lus piv txwv xwb.​—ChK 17:10; 1Kl 7:19; Flp 3:3.

• Keeb.

  Luag muab keeb los sis poov, thiab dej tov rau tej hmoov mog kom su tuaj los sis tov rau tej kua txiv kom ua tau cawv. Ntau zaus phau Vajlugkub muab keeb piv txog kev txhaum. Tej thaud kuj piv txog yam uas txawj huam tuaj, tiam sis tib neeg lub qhov muag tsis pom.​—KhD 12:20; Mth 13:33; Klt 5:9.

L

• Lanpis; Lanpaunis.

  Lub npe no txhais tias “xib hwb.” Ua ntej Yexus, cov Yudais pib muab cov uas lawv hwm thiab saib taus hu ua Lanpis uas kuj txhais tias yawg hlob los sis tus zoo kawg nkaus. Cov xib hwb kawm ntawv siab uas qhia Mauxes Txoj Kev Cai ib txhia tseev kom muab lawv hu ua Lanpis.​—Mth 23:6, 7, taw ntawv.

• Litas.

  Tiam uas sau Cov Nqe Vajlugkub Kilis, lub nyiaj litas yog cov neeg Yudais lub txiaj toog uas me tshaj thiab nqi tsawg tshaj. Ib txhia Vajlugkub muab txhais ua “maj.”​—Mak 12:42; Lk 21:2; taw ntawv.

• Livntseem.

  Cov neeg Loos thaum ub suav ib livntseem yog ib pab tub rog uas muaj 4,000 txog 6,000 leej. Hauv phau Vajlugkub lo lus no kuj txhais tias suav tsis txheeb los sis coob heev.​—Mth 26:53; Mak 5:9; Lk 8:30.

• Los.

  Mus saib ROV LOS.

M

• Mais.

  Hauv cov Nqe Vajlugkub Kilis thaum ub ntawm Mathais 5:41, tej zaum Yexus suav raws li cov Loos suav es ib mais deb li 4,854 taws (1,479.5 mev).

N

• Nees us.

  Tus tsiaj khoov pob muaj nyob rau tej teb chaws ntuj qhua teb nkig. Tib neeg siv cov tsiaj no los thauj nra. Tus nees us tuaj plaub tuab heev thiaj tiv taus tshav kub. Nws lub hauv nrob rog rog thiaj yug tau nws lub zog. Raws li Mauxes Txoj Kev Cai, tus tsiaj no tsis huv, Vajtswv thiaj txwv tsis pub cov Ixayees noj. (LKC 11:4; KC 14:17) Lawv muab tus nees us cov plaub ntos ua ntaub ua xov. Lawv kuj caij tus nees us mus rau ub rau no thiab. Yexus nyiam muab tus nees us los ua piv txwv qhia tib neeg.​—Mth 19:24; Mak 10:25; Lk 18:25.

• Nefe.

  Mus saib XAKIS.

• Numas.

  Lo lus Kilis numas thiab lo lus Henplais lu-as kheev muab txhais ua “plig.” Tiam sis ob los no kuj txhais tau ua lwm yam thiab. Xws li (1) cua, (2) txoj sia uas tib neeg thiab tsiaj txhu muaj, (3) lub siab uas ua rau tib neeg muaj tus yam ntxwv los sis tus cwj pwm, (4) tej lus uas hais nruab yeeb tuaj, (5) Vajtswv, cov tub txib saum ntuj, thiab cov dab. Thiab (6) Vajtswv lub hwj chim los sis lub hwj huam dawb huv. Txawm txhais li cas los, lo lus lu-as thiab numas yeej yog hais txog ib lub zog los sis ib lub hwj chim uas tib neeg qhov muag pom tsis tau tiam sis muaj pov thawj.​—KhD 35:21; NN 104:29; Mth 12:43; Lk 11:13.

NC

• Ncaj ncees.

  Hauv Vajtswv Txoj Lus, lo no yog hais rau yam uas yog thiab yam uas tsis yog raws li Vajtswv txoj kev cai.​—ChK 15:6; KC 6:25; Xfn 2:3; Mth 6:33.

• Ncej ntoo.

  Tus ncej ntoo uas luag muab tib neeg dai rau. Yav thaud muaj tej haiv neeg muab tib neeg tua rau saum tus ncej ntoo. Los sis lawv muab tej cev tuag dai rau saum tej ncej ntoo tab meeg sawv daws kom luag ntshai los sis kom rhuav tus neeg ntawd ntsej muag. Raws li cov Yudais txoj kev cai, yog leej twg ua txhaum tuam mom Vajtswv los sis teev dab teev mlom ces tus ntawd raug muab tua pov tseg, tej zaum xuas pob zeb ntaus. Tom qab ntawd lawv mam coj mus dai rau saum ib tug ncej ntoo, tiam sis tsuas dai ib hnub xwb. (KC 21:22, 23) Muaj tej thaud cov Loos ho muab tus neeg pav rau saum ib tug ncej ntoo kom dai txom nyem ntsuav ziab tshav ntuj. Ob peb hnub tom qab, tsis tau mov noj, tsis tau dej haus, nws mam tu siav. Tiam sis thaum lawv tua Yexus, lawv muab Yexus ntsia tes ntsia taw rau saum tus ncej ntoo kiag. (Mak 15:24; Yh 19:14-16; 20:25; THL 2:23, 36) Thaum xub sau phau Vajlugkub ua lus Kilis, lawv tsis siv lo lus “khaub lig ntoo.” Tus khaub lig ntoo yog ib lub cim uas cov neeg tsis ntseeg Vajtswv twb siv tau ntau pua xyoo ua ntej Khetos lawm. Phau Vajlugkub tsuas siv lo lus Kilis “ncej ntoo” xwb. Thaum Yexus los nws muab tus ncej ntoo ua piv txwv txog qhov uas nws cov thwj tim yuav raug tsim txom, raug txom nyem, thiab poob ntsej muag.​—Mth 16:24; Hnp 12:2.

• Nceeg Vaj.

  Mus saib VAJTSWV LUB NCEEG VAJ.

NR

• Nraug sam.

  Yog ib tug txiv neej uas raug sam. Cov uas luag muab sam li no mus ua tub qhe saib xyuas poj vaj ntxwv thiab tej hluas nkauj uas vaj ntxwv kav. Luag kuj muab cov txiv neej uas tuav hauj lwm rau vaj ntxwv hu ua nraug sam, tiam sis lawv tsis raug sam tiag. Tsis tas li ntawd, cov uas tsis nrhiav txij nkawm thiab siv lawv lub neej ua Vajtswv tes hauj lwm kuj muab piv ib yam li tus nraug sam thiab, ‘vim lawv txhawb Vajtswv txoj kev kav.’​—Mth 19:12; THL 8:27.

• Nrog nyob.

  Mus saib PALUXIAS.

• Nruab a.​

  Mus saib QHOV TOB TOB.

P

• Paluxias.

  Lo lus Kilis paluxias txhais tias “nrog nyob.” Lub caij uas Yexus Khetos rov los, los sis paluxias, yog lub sij hawm uas Yexus Khetos pib ua Vaj Ntxwv kav saum ntuj mus txog thaum lub sim ceeb no xaus. Lub caij ntawd, zoo yam li nws rov los nrog noob neej nyob. Tsis yog nws yuav tshwm plaws los es txawm ncaim mus, tiam sis lo lus no hais txog ib ncua sij hawm ntev loo.​—Mth 24:3.

• Poov; Poov xab.

  Mus saib KEEB.

PH

• Phaladais.

  Lub phaladais yog ib lub vaj uas zoo nkauj heev. Yog li ntawd, thiaj muab txhais ua lub vaj kaj siab. Thawj lub vaj uas zoo nkauj li no yog lub vaj Edees uas Vajtswv tau tsim rau thawj nkawm niam txiv nyob. Yexus cov lus rau tus tub sab uas dai ntawm nws ib sab qhia tias Vajtswv yuav muab lub ntiaj teb kho ua ib lub vaj kaj siab. Lo lus “vaj kaj siab” no kuj nyob hauv 2 Kauleethaus 12:4 tiam sis yog lus piv txwv xwb. Thiab hauv Tshwm Sim 2:7 lo lus no ho piv txog qhov chaw Vajtswv nyob saum ntuj ceeb tsheej uas kaj siab lug.​—XZN 4:13; Lk 23:43.

• Phauni-as.

  Mus saib UA PLEES UA YI.

• Pheetekos.

  Txhua xyoo cov Ixayees muaj peb lub koob tsheej uas tshwj xeeb. Lub ob yog ua Kev Cai Pheetekos. Lo lus Pheetekos txhais tias “(Hnub) 50.” Cov Nqe Vajlugkub Kilis muab hu ua Kev Cai Sau Qoob Loo. Cov Nqe Vajlugkub Henplais muab hu ua Kev Cai Xya Lub Lim Tiam. Lawv ua kev cai Pheetekos nyob rau hnub 50 tom qab Nixas 16.​—KhD 23:16; 34:22; THL 2:1.

QH

• Qhov tob tob.

  Lo lus Kilis anpixos yog hais txog ib lub qhov tob tob uas tsis muaj qab thu. Hauv cov Nqe Vajlugkub Kilis, lo lus no piv txog kev nyob tsaus ntuj nti yam li raug kaw.

• Qhov tuag.

  Lo lus Henplais Se-aus, thiab lo lus Kilis Hedis tsis yog ib qho chaw tiag tiag, tiam sis yog ib qhov chaw piv txwv xwb. Lo lus “qhov tuag” txhais ib yam li ob lo lus ntawd. Hauv lub qhov tuag lawv tsis txawj xav, tsis txawj ua ib yam dab tsi li lawm.​—ChK 37:35; LT 9:10; Mth 27:26; THL 2:31.

R

• Rov los.

  Mus saib PALUXIAS.

S

• Sim ceeb.

  Lo lus no txhais tias “caij nyoog.” Tau muab lo lus Kilis ai-oos txhais ua sim ceeb. Ai-oos yog hais txog ib lub caij nyoog uas tau muaj xwm txheej loj. Lo lus ai-oos no kuj yog hais rau txoj kev xav thiab tus cwj pwm uas tib neeg coj rau ib lub caij lub nyoog twg.

T

• Talas.

  Thaum cov Henplais luj nyiaj, lawv suav tias talas yog qhov uas hnyav tshaj. Ib talas hnyav li 75.5 phaus (34.2 kilus). Tiam sis thaum cov Kilis luj nyiaj, lawv suav tias ib talas tsuas hnyav li 44.8 phaus (20.4 kilus) xwb.​—1VK 22:14; Mth 18:24.

• Tus Thawj.

  Tau muab Yexus Khetos hu ua “tus Thawj” rau qhov nws tau tes hauj lwm tseem ceeb uas tso cov neeg muab siab npuab Vajtswv dim kev txhaum thiab kev tuag. Thiab qhib kev rau noob neej tau txoj sia ib txhis tsis kawg.​—THL 3:15; 5:31; Hnp 2:10; 12:2.

• Twv pov.

  Thaum ub yog cov tib neeg yuav txiav txim siab txog ib yam twg, ib leeg muab ib lub pob zeb tso rau hauv ib lub tais thiab muab co mus co los. Lub pob zeb twg tawm, los sis lawv rho tau lub twg ces lawv xaiv tus ntawd. Ntau zaus lawv thov Vajtswv ua ntej lawv txiav txim li no.​—Mth 27:35; THL 1:26.

TSH

• Tsho.

  Poj niam txiv neej los yeej hnav ob lub tsho sib tshooj. Lub tsho sab hauv ntev txog hauv caug los sis ntev txog dab taws. Tiam sis lawv kuj hnav ib lub tsho npab luv sab nraud kom xoob thuav. Feem ntau lub sab nraud yog ib daim ntaub npua xwb.

TX

• Txoj kev hlub uas pub dawb.

  Vajtswv yog tus uas muaj txoj kev hlub uas pub dawb. Tej txhia ntaub ntawv piav tias txoj kev hlub uas pub dawb no muaj ob lub ntsiab. Ib lub ntsiab txhais tias Vajtswv siab dawb heev. Nws tsis tos leej twg qhuas nws los sis ua zoo pauj rov rau nws. Vajtswv muaj lub siab hlub thiab muaj lub siab dawb paug pub xwb. Ib lub ntsiab ho txhais tias Vajtswv ua zoo rau cov uas twb tsis tsim nyog. Twb yog li ntawd, nws thiaj zam txim rau noob txaug neeg txhaum. Nws xav kom tib neeg los ntseeg Yexus Khetos, lawv thiaj tau kev cawm dim.​—2Kl 6:1; Efx 1:7.

U

• Ua plees ua yi.

  Lo lus Kilis yog phauni-as. Lo lus no yog kev sib deev uas hla Vajtswv txoj kev cai, xws li cov uas muaj txij nkawm los tseem mus deev lwm tus, cov uas tsis tau sib yuav los sib daj sib dee, cov uas muag cev, cov txiv neej deev txiv neej poj niam deev poj niam, thiab cov uas deev tsiaj. Phau ntawv Tshwm Sim tham txog ib tug poj muag cev uas nrog tej nom tswv ua plees ua yi, vim nws ntshaw meej mom thiab nyiaj txiag. Tus poj muag cev no piv txog kev ntseeg cuav thiab hu ua lub nroog Npanpiloos uas loj kawg nkaus.​—Mth 5:32; THL 15:29; Klt 5:19; Tsh 14:8; 17:2; 18:3.

• Ua vuab tsuab tsis paub txaj muag.

  Lo lus no tsis yog hais txog tej kev txhaum me. Tiam sis yog tej kev txhaum loj uas hla Vajtswv tej kev cai. Tus ua txhaum li no muaj tus cwj pwm tsab hwj chim tsis paub txaj muag li, saib tsis taus luag lwm tus, ntxub tej kev cai thiab txhua tus uas coj.

V

• Vaj Kaj Siab.

  Mus saib PHALADAIS.

• Vajtswv lub Nceeg Vaj.

  Lo lus no yog hais txog Vajtswv txoj kev kav los sis nws lub tseem fwv. Vajtswv Yehauvas yog tus muaj hwj chim kav ib puas tsav yam. Nws tsa nws tus tub Yexus Khetos ua tus kav nws lub Nceeg Vaj.​—Mth 12:28; Lk 4:43; 1Kl 15:50.

X

• Xadukais.

  Ib pab ntseeg Kev Cai Yudais uas nto moo thiab nplua nuj heev. Lawv muaj hwj chim tswj hwm thiab saib xyuas txhua yam hauj lwm hauv lub tuam tsev. Lawv tsis coj tej kev lig kev cai uas cov Falixais coj, thiab tsis ntseeg txhua yam uas cov Falixais ntseeg. Lawv tsis ntseeg tias cov tuag ciaj tau sawv rov los, tsis ntseeg tias muaj tub txib saum ntuj thiab tsis ntseeg tias muaj tej plig. Lawv tawm tsam Yexus.​—Mth 16:1; THL 23:8.

• Xahenrees.

  Cov Yudais rooj txiav txim qib siab nyob hauv lub nroog Yeluxalees. Lub sij hawm Yexus nyob, rooj txiav txim no muaj 71 leeg. Cov uas muaj feem tuav hauj lwm hauv lub rooj txiav txim yog tus tuam pov thawj hlob, cov uas twb tuav hauj lwm ua tuam pov thawj hlob dua lawd, cov pov thawj tsev neeg, cov txwj laus, cov thawj coj hauv tej xeem thiab tej cum, thiab cov xib hwb.​—Mak 15:1; THL 5:34; 23:1, 6.

• Xakis.

  Ntau zaus tau muab lo lus Henplais nefe thiab lo lus Kilis xakis txhais ua “txoj sia.” Ob lo lus no tshwm hauv phau Vajlugkub tshaj li 800 zaus. Thaum ua tib zoo tshawb nrhiav phau Vajlugkub, pom tias ob lo lus no yog hais txog (1) tib neeg, (2) tsiaj txhu, thiab (3) txoj sia uas tib neeg thiab tsiaj txhu muaj. (ChK 1:20; 2:7; TNp 31:28; 1Pt 3:20, taw ntawv) Muaj ntau yam lus muab nefe thiab xakis txhais yuam kev ua ntsuj plig. Tiam sis ob lo lus no tsis yog hais txog ib yam uas ciaj sia tom qab tib neeg tuag. Yog li ntawd, hauv phau Vajlugkub no, tau muab lo lus nefe thiab xakis txhais raws li lub ntsiab xwb. Tej thaud yog txhais ua “txoj sia,” “tsiaj txhu,” “tib neeg,” los sis “kuv.” (Mth 26:38; Lk 10:27) Muaj tej nqe muab nefe thiab xakis txhais ua yam uas neeg lub siab ntshaw los sis nqhis. Muaj tej nqe kuj siv ob lo lus no los hais txog lub cev tuag.​—TNp 6:6; PL 23:2; Hk 2:13.

• Xamalis.

  Yog kaum xeem Ixayees sab qaum teb lub tuam ceeb nroog muaj li 200 xyoo. Lub nroog nyob saum ib lub roob hu ua Xamalis. Cheeb tsam ntawd kuj hu ua Xamalis ib yam. Lub sij hawm Yexus nyob, Xamalis yog cheeb tsam uas Loos kav, txij ntawm Yudias mus txog pem Kalilais. Feem ntau Yexus tsis tshaj tawm hauv cheeb tsam no, tiam sis tej lub sij hawm nws kuj mus dhau Xamalis thiab tau nrog cov tib neeg tham. Thaum cov Xamalis txais lub hwj huam dawb huv ces twb yog Petus siv tus yuam sij ob rau lub Nceeg Vaj. (1VN 16:24; Yh 4:7; THL 8:14) Cov neeg Xamalis tsuas yog neeg Ixayees xwb, tiam sis tom qab Axilias txeeb tau lub nroog Xamalis xyoo 740 ua ntej Yexus, lwm haiv neeg thiaj los txuam nrog haiv neeg Ixayees lawm. Lub sij hawm Yexus nyob, lub npe Xamalis tsis yog hais rau ib haiv neeg los sis ib lub teb chaws. Feem ntau yog hais rau ib pab ntseeg nyob ze ob lub nroog txheej thaud hu ua Sekhees thiab Xamalis. Pab ntseeg ntawd coj kev cai txawv Kev Cai Yudais.​—Yh 8:48.

• Xalaumoos Zaj Qab Khav.

  Nyob rau Yexus tiam zaj qab khav no nyob hauv lub tuam tsev ntawm lub tshav puam sab nraud, npuab sab hnub tuaj. Feem coob ntseeg tias zaj qab khav no yog zaj uas thaud Xalaumoos ua ntag. Thaum “lub caij ntuj no” Yexus taug kev hauv zaj qab khav no. (Yh 10:22, 23) Cov Khixatias nyob thawj 100 xyoo txeev tuaj sib txoos pe hawm Vajtswv ntawm no thiab.​—THL 5:12.

• Xib hwb qhia Vajtswv kev cai.

  Tiam Yexus nyob, cov neeg no yog cov uas theej tawm cov Nqe Vajlugkub Henplais. Lawv yog cov uas teev ntawv thiab lawv kuj yog cov uas kawm paub Mauxes Txoj Kev Cai thiab qhia txoj kev cai ntawd rau sawv daws. Tiam sis lawv ho tawm tsam Yexus.​—Mak 12:38, 39; 14:1.

Y

• Yehauvas.

  Hauv phau Vajlugkub Vajtswv Txoj Lus Rau Cov Nyob Lub Qab Ntuj Tshiab, Vajtswv lub npe Yehauvas tshwm txog 241 zaug hauv cov Nqe Vajlugkub Kilis. Muaj plaub nqes uas tau muab Yehauvas lub npe sau luv luv xwb. Tiam sis hauv phau Vajlugkub no tau muab lub npe luv sau hlo ua “Yehauvas.” (Tsh 19:1, 3, 4, 6, taw ntawv) Raws li cov ntsiab lus nram no, yeej tsim nyog lub npe Yehauvas nyob rau hauv cov Nqe Vajlugkub Kilis.

  1. 1. Nyob rau Yexus thiab nws cov tub txib tiam, tib neeg nyeem cov Nqe Vajlugkub Henplais uas muaj Vajtswv lub npe nyob rau hauv thoob plaws. (Lawv siv plaub tug tsiaj ntawv txiv Henplais li no יהוה los sau Vajtswv lub npe.‏)

  2. 2. Nyob rau Yexus thiab cov tub txib tiam, kuj muaj cov Nqe Vajlugkub Henplais uas tau muab txhais ua lus Kilis. Cov nqe Vajlugkub ntawd yeej muaj Vajtswv lub npe sau ua plaub tug tsiaj ntawv nyob rau hauv.

  3. 3. Hauv cov Nqe Vajlugkub Kilis, muaj ntau zaus uas Yexus tham txog Vajtswv lub npe thiab qhia kom sawv daws paub lub npe ntawd.​—Yh 17:6, 11, 12, 26.

  4. 4. Vajtswv yog tus tshoov neeg sau cov Nqe Vajlugkub Kilis los ntxiv rau cov Nqe Vajlugkub Henplais. Yog twb muaj Vajtswv lub npe nyob rau hauv cov Nqe Vajlugkub Henplais ces yuav tsum muaj nyob rau hauv cov Nqe Vajlugkub Kilis thiab.

  5. 5. Raws li cov Yudais tej ntaub ntawv txheej thaum ub, cov Yudais uas ntseeg Yexus yeej sau Vajtswv lub npe rau hauv lawv tej ntaub ntawv.

  6. 6. Cov uas sau tej Nqe Vajlugkub Kilis kuj rov hais tib co lus hauv tej Nqe Vajlugkub Henplais thiab. Tej thaud cov nqe Henplais no yeej muaj Vajtswv lub npe. Yog li, cov neeg tshawb fawb Vajlugkub thiaj hais tias cov Nqe Vajlugkub Kilis yuav tsum muaj Vajtswv lub npe thiab.

  7. 7. Muaj tshaj li 100 yam lus uas tau txhais phau Vajlugkub. Cov Nqe Vajlugkub Kilis uas lawv tau txhais yeej muaj Vajtswv lub npe nyob rau hauv.

  Yog li ntawd, tej no ua pov thawj tias yeej tsim nyog muab Vajtswv lub npe Yehauvas rov tso rau hauv cov Nqe Vajlugkub Kilis. Cov uas txhais phau Vajlugkub Vajtswv Txoj Lus Rau Cov Nyob Lub Qab Ntuj Tshiab thiaj ua li ntawd vim lawv hwm Vajtswv lub npe heev. Lawv paub ntshai Vajtswv thiab tsis xav kom cov lus uas Vajtswv tshoov neeg sau txheej thaum ub poob ib los li.​—Tsh 22:18, 19.