1, 2. (1) Leejtwg tsim kom peb lub siab paub qhov zoo qhov phem? (2) Yog peb lub siab tsis txawj cais qhov zoo qhov phem, lub ntiajteb no yuav zoo li cas?

VAJTSWV YEHAUVAS tsim kom tibneeg muaj kev ywj pheej los txiav txim rau lawv tus kheej. Tiamsis Yehauvas xav kom peb paub txiav txim zoo, nws thiaj tsim kom peb muaj lub siab txawj cais qhov zoo qhov phem. Cuag li nws sau ib txojcai rau hauv peb lub siab. Thaum peb ua zoo peb lub siab thiaj txawj qhuas peb, thaum peb ua txhaum peb lub siab txawj nkaug peb. Yog peb cob peb lub siab tiag, ces peb yuav paub txiav txim zoo thiab zam tej yam phem. Twb yog Yehauvas hlub peb thiab xav kom peb tau zoo, nws thiaj tsim lub siab zoo li ntawd rau peb.

² Niaj hnub no ib txhia tsis paub Vajlugkub los lawv kuj paub cais qhov zoo qhov phem. (Nyeem Loos 2:14, 15.) Yog vim li cas? Vim muaj txojcai ntawd nyob rau hauv lawv lub siab thiab. Txhua leej txhua tus thiaj paub tias tsis zoo rau peb ua phem rau lwm tus. Yog tias tibneeg tsis muaj lub siab uas paub cais qhov zoo qhov phem, ces ntshe lub ntiajteb no tseem phem tshaj tamsim no ob peb npaug thiab! Peb zoo siab kawg li uas Yehauvas pub lub siab ntawd rau noob neej!

3. Lub siab uas paub cais qhov zoo qhov phem pab tau peb li cas hauv lub koom txoos?

 ³ Feem coob tsis tau xav tias lawv yuav tsum cob lawv lub siab. Tiamsis Yehauvas cov tibneeg xav cob lawv lub siab kom hajyam txawj cais qhov zoo qhov phem. Vim li cas? Vim tias yuav pab tau lub koom txoos thooj xeeb koom ntsws. Peb lub siab yuav tsum txawj ntxhi kom peb coj raws li phau Vajlugkub tej kevcai. Peb yuav cob peb lub siab li cas? Puas yog peb kawm Vajlugkub xwb ces tau lawd? Tsis yog. Peb yuav tsum nyiam Vajtswv txoj kevcai, thiab muaj kev ntseeg tias tej kevcai ntawd pab tau peb tiag. Povlauj thiaj qhia tias: “Qhov uas kuv nkaw lus li no yog xav kom lawv muaj kev sib hlub uas los ntawm lub siab dawb paug thiab lub siab uas paub qhov zoo thiab ntawm txojkev ntseeg tuaj nruab siab los.” (1 Timaute 1:5) Yog li ntawd, thaum peb cob peb lub siab thiab coj raws nraim li ntawd, ces peb yuav hlub Yehauvas thiab muaj kev ntseeg rau nws ntxiv. Yog peb xav nrog Yehauvas sib raug zoo, thiab xav ua haum nws lub siab tiag, peb yeej yuav cob peb lub siab. Peb lub siab qhia tias peb yog ib tug neeg zoo li cas tiag.

4. Peb yuav cob peb lub siab li cas?

⁴ Peb yuav cob peb lub siab li cas? Peb yuav tsum nyeem Vajlugkub tsis tu ncua, ua tib zoo xav txog tej uas peb nyeem, thiab thov Yehauvas pab peb coj raws li peb tau kawm lawd. Tsis yog peb lam cim ntsoov Vajtswv tej kevcai xwb. Peb kawm Vajlugkub kom peb thiaj paub Vajtswv Yehauvas zoo dua qhov qub. Peb xav paub seb Yehauvas yog ib tug Vajtswv zoo li cas, nws nyiam thiab ntxub yam twg. Yog peb rau siab kawm ntxiv txog Yehauvas ces peb yuav yimhuab txawj yoog thiab txawj xav li nws xwb.

5. Peb yuav kawm dabtsi hauv zaj no?

⁵ Xav txog cov lus nug no: Lub siab uas paub cais qhov zoo qhov phem yuav pab peb txiav txim li cas? Peb yuav tsum saib taus peb cov kwvtij es cia lawv txiav txim rau lawv tus kheej li cas? Peb cob puas tau kom peb lub siab pab peb ua qhov zoo? Peb yuav tsum cob kom peb lub siab txawj txiav txim txog 3 yam no: (1) kev kho mob, (2) kev ua si, thiab (3) kev tshaj tawm. Cia peb kawm txog 3 yam no.

6. Thaum peb muaj mob, peb yuav xaiv txojkev kho mob zoo li cas?

⁶ Phau Vajlugkub qhia kom peb txav deb ntawm tej yam uas yuav ua rau peb raug mob raug nkeeg. Phau Vajlugkub txhawb kom peb noj haus hauj sim xwb. (Paj Lug 23:20; 2 Khaulee 7:1) Yog peb ua raws li phau Vajlugkub qhia ces peb yuav noj qab nyob zoo. Tiamsis peb yog neeg txhaum, peb txawj laus txawj mob txawj nkeeg. Thaum peb muaj mob, peb yuav xaiv txojkev kho mob zoo li cas? Hauv tej lub tebchaws, muaj 2 txojkev kho mob: (1) mus kho hauv tej tsev kho mob, lossis (2) nrhiav tshuaj cag hmab cag ntoo los kho. Cov kwvtij nkauj muam coob tus thiaj sau ntawv mus nug tej ceg Npe-ee seb Yehauvas cov tibneeg txais tau yam kev kho mob twg.

7. Peb yuav txiav txim li cas ntsig txog ntshav?

⁷ Ceg Npe-ee thiab cov txwj laus hauv lub koom txoos tsis muaj cai xaiv ib txojkev kho mob rau ib tug Khixatia twg. Txawm tus Khixatia ntawd thov kom cov txwj laus xaiv rau nws los, cov txwj laus yuav tsum cia nws xaiv nws xwb. (Kalatia 6:5) Tiamsis zoo rau cov txwj laus muab Yehauvas txojlus los pab kom tus Khixatia muaj tswvyim xaiv. Tej zaum lawv yuav qhia kom nws nco ntsoov txog Yehauvas lo lus sam hwm uas tsis pub ntxiv ntshav. (Tubtxib Tes Haujlwm 15:29) Lo lus sam hwm ntawd pab kom cov Khixatia to taub tias lawv yuav tsum tsis txhob txais tej kev kho mob uas muab ntshav ua tshuaj. Peb kuj tsis kam txais 4 feem ntshav loj thiab. Tiamsis kws kho mob txawj muab 4 feem ntshav loj faib ua tej feem me tshaj ntawd thiab. Ntsig txog tej feem me me ntawd, peb nyias yuav tsum txiav txim nyias seb peb yuav txais los tsis txais. * (Saib  cov lus hauv qab taw qhia.) Yog cov txwj laus qhia tus Khixatia txog tej no ces yuav pab tau nws txiav txim zoo, nws lub siab thiaj tsis nkaug nws. Ntsig txog lwm yam kev kho mob, phau Vajlugkub yuav pab tau peb li cas ntxiv thiab?

8. Laj Lim Tswvyim 2:26 pab peb txiav txim txog kev kho mob li cas?

⁸ Paj Lug 14:15 qhia tias: “Tus neeg tsis thoob tsib ntseeg txhua yam, tiamsis tus uas paub qabhau ua tib zoo saib nws taug txojkev twg.” Niaj hnub no muaj ntau yam kev mob kev nkeeg uas tibneeg tsis muaj cuab kav kho tau. Yog li ntawd, peb yuav tsum ceev faj thaum lwm tus ntxias tias luag yuav kho tau peb, tiamsis twb tsis tau kho leejtwg zoo li. Phau Vajlugkub qhia tias Vajtswv yog tus “pub tswvyim thiab kev txawj ntse.” (Laj Lim Tswvyim 2:26) Yog tias peb yuav Vajtswv lub tswvyim, ces peb yuav txawj txiav txim zoo, thiab yuav tsis txhawj txog peb tus mob xwb. Tiamsis peb yuav tau hau ntsoov ua peb tes haujlwm rau Yehauvas. Yog peb niaj hnub txhawj txog peb tus mob xwb, ces peb yuav tsis xav txog lwm tus. (Filipi 2:4) Lub caij tamsim no yeej tsis muaj ib tug yuav noj qab nyob zoo tas li xwb. Yog li ntawd, tseem ceeb rau peb muab peb tes haujlwm rau Yehauvas tso ua ntej hauv peb lub neej.​—Nyeem Filipi 1:10.

9. (1) Loos 14:13, 19 pab peb xaiv tej kev kho mob zoo li cas? (2) Yog peb tsis ceev faj peb yuav ua rau peb cov kwvtij muaj teeb meem li cas?

⁹ Tus Khixatia uas muaj tswvyim yeej tsis yuam kom lwm tus ua raws li nws pom zoo xwb. Xav txog tus qauv no: Muaj ob niam txiv tau yaum kom cov kwvtij caiv zaub mov thiab yuav nkawd cov tshuaj noj. Cov kwvtij ib txhia kuj ua li ntawd thiab, tiamsis ib txhia tsis kam ua. Thaum kawg, cov tshuaj tsis ntxim li nkawd tau hais, coob tus thiaj npau taws rau nkawd. Tus qauv no pab tau peb li cas? Pab peb pom tias ob niam txiv ntawd tsuas muaj cai txiav txim rau nkawd xwb. Thaum ib tug Khixatia yuav xaiv kev kho mob, nws yuav tsum xav txog txojkev thaj yeeb hauv lub koom txoos. Cov Khixatia uas nyob hauv lub nroog Loos thaum ub, lawv nyias noj nyias ib yam, thiab nyias xav nyias lawm ib yam txog neeg tej kevcai. Povlauj thiaj hais li no rau lawv: “Ib tug hwm tias muaj ib hnub zoo dua li ib hnub, tiamsis muaj dua ib tug hwm tias txhua hnub zoo ib yam nkaus. Cia txhua tus nyias ruaj siab rau nyias qhov kev xav.” Yog li ntawd, cia peb tsis txhob yuam kom lwm tus ua raws li peb xav, thiab txhob ua rau lwm tus xav yuam kev rau peb.​—Nyeem Loos 14:5, 13, 15, 19, 20.

10. Vim li cas peb yuav tsum saib taus peb cov kwvtij es cia lawv txiav txim rau lawv tus kheej? (Saib daim duab ntawm sab 13.)

¹⁰ Muaj tej lub sijhawm cov kwvtij hauv lub koom txoos yuav txiav txim txawv ntawm peb. Peb yuav xav li cas xwb? Tsis txhob maj thuam nws lossis yuam kom nws hloov siab. Xav txog cov lus nug no: Puas yog nws txiav txim li ntawd rau qhov nws tsis tau cob nws lub siab txaus? Puas yog nws coj nruj zog lawm xwb? (1 Khaulee 8:11, 12) Tej zaum twb yog peb tsis tau paub tab txaus thiab. Txawm li cas los xij, tsis hais kev kho mob lossis lwm yam, peb  txhua tus nyias yuav tsum txiav txim rau nyias tus kheej thiab nyias ris nyias lub nra.

11, 12. Phau Vajlugkub pab peb xaiv tej kev lomzem ua si zoo li cas?

¹¹ Yehauvas tsim peb txhua tus kom nyiam nrhiav caij so los siav. Kev ua si yeej pab tau peb. Xalaumoo thiaj sau tias “muaj caij luag . . . muaj caij seev cev zoo siab.” (Laj Lim Tswvyim 3:4) Tiamsis tsis yog txhua yam kev ua si yuav pab kom peb tau so los siav. Peb yuav tsum ntsuas peb lub sijhawm zoo, txhob ua si heev dhau lawm thiab. Lub siab uas paub cais qhov zoo qhov phem, yuav pab peb nrhiav tej kev lomzem uas haum Yehauvas siab li cas?

¹² Phau Vajlugkub ceeb toom kom peb ceev faj “nqaij tawv li haujlwm.” Nqaij tawv tes haujlwm yog dabtsi? Yog kev “ua nkauj ua nraug, ua phem ua qias, ua vuab tsuab, pe dab mlom, ua khawv koob, ua yeeb ncuab, sib cav sib ceg, sib khib, sib chim, sib txeeb, sib cam, tawg ua pab ua pawg, ntshaw luag tug, qaug dej qaug cawv, ua nqaj ua nqug thiab dua lwm yam zoo li no.” Povlauj thiaj sau tias “cov uas ua tej no yuav tsis muaj feem tau Vajtswv lub tebchaws [Nceeg Vaj] kiag li.” (Kalatia 5:19-21) Muaj tej kev lomzem ua si uas txhawb kom peb sib ntaus, ua nruj ua tsiv, sib tw sib khib, lossis khav txog peb haiv neeg. Ua li peb lub siab puas ceeb toom kom peb txhob koom nrog tej no? Kuj muaj tej yeeb yaj kiab uas tso kev sib daj sib dee, lossis txhawb kom peb ua phem ua qias, quav dej quav cawv, lossis teev dab teev mlom. Yog peb xav saib tej ntawd, peb lub siab puas nkaug peb?

13. Cov hauv paus ntsiab lus ntawm 1 Timaute 4:8 thiab Paj Lug 13:20 pab peb xaiv tej kev lomzem ua si zoo li cas?

¹³ Phau Vajlugkub tej hauv paus ntsiab lus pab kom peb cob peb lub siab, xwv peb thiaj txawj xaiv tej kev lomzem uas zoo xwb. Xav txog lub hauv paus ntsiab lus no: “Qhov uas muab lub cev xyaum twb muaj qabhau mentsis lawm.” (1 Timaute 4:8) Raws li nqe no, yog peb dhia ua si lossis nqa kab mentsis kuj pab peb muaj zog thiab noj qab nyob zoo. Tiamsis yog peb ho xav mus nrog lwm tus dhia lossis nqa kab, peb yuav nrog cov neeg zoo li cas ua ke xwb? Paj Lug 13:20 qhia tias: “Tus uas nrog nraim tus txawj ntse nws kuj yuav txawj ntse, tiamsis tus uas nrog cov neeg ruam ua phoojywg yuav raug kev liamsim.” Yog li ntawd, thaum peb xaiv tej kev lomzem ua si, tseem ceeb rau peb cob kom peb lub siab paub cais qhov zoo qhov phem raws li phau Vajlugkub qhia.

14. Ib tse neeg tau xyaum raws li Loos 14:2-4 li cas?

¹⁴ Christian [khi·xa·tia] thiab Daniela [da·ni·ee·la] muaj 2 tug ntxhais. Christian hais tias: “Thaum peb tsev neeg pe hawm Vajtswv  ua ke, peb tau tham txog tej kev lomzem ua si. Peb pom tias muaj tej yam kev lomzem uas zoo thiab phem tibsi. Peb thiaj tham seb yuav tsum nrog cov neeg zoo li cas ua ke. Wb ib tug ntxhais yws tias hauv tsev kawm ntawv, cov Timkhawv ib txhia ua rau nws tsis pom qab xav li. Lawv ua rau nws xav tias nws yuav tsum coj ib yam li lawv thiab. Wb thiaj piav rau nws tias peb txhua tus, nyias muaj nyias ib lub siab uas paub cais qhov zoo qhov phem. Lub siab ntawd mam li pab peb txhua tus txiav txim seb peb yuav ua dabtsi, thiab nrog leejtwg ua ke xwb.”​—Nyeem Loos 14:2-4.

15. Mathai 6:33 yuav pab peb xaiv tej kev lomzem ua si zoo li cas?

¹⁵ Xav seb koj siv sijhawm ntau npaum li cas mus ua si. Puas yog koj mus kev sib txoos, mus tshaj tawm thiab kawm Vajlugkub tas, koj mam li mus ua si? Los yog koj huas ntshis kev lom zem xwb? Yam twg tseem ceeb tshaj rau koj? Yexus hais tias: “Nej yuav tsum xub nrhiav Vajtswv lub tebchaws [Nceeg Vaj] thiab nws txojkev ncaj ncees ua ntej, mas yuav muab tej no huvsi tsav ntxiv rau nej.” (Mathai 6:33) Ua ntej koj siv sijhawm mus ua ib yam dabtsi, koj lub siab puas ua rau koj xav txog Yexus cov lus no?

16. Peb lub siab ua rau peb mus tshaj tawm txoj xov zoo li cas?

¹⁶ Lub siab uas paub cais qhov zoo qhov phem pab kom peb txav deb ntawm tej yam phem. Tiamsis lub siab ntawd kuj pab kom peb ua tej yam zoo thiab, xws li mus qhia Vajlugkub ib lub tsev rau ib lub, lossis qhia txhua tus uas peb ntsib. Povlauj tau ua li ntawd. Nws hais tias: “Kuv yeej yuav tsum ua. Yog kuv tsis piav txoj xov zoo kuv kuj raug txom nyem.” (1 Khaulee 9:16) Ib yam li Povlauj, yog peb mus tshaj tawm txoj xov zoo ces peb lub siab yuav qhuas peb. Tsis tas li ntawd xwb, thaum peb tshaj tawm txoj xov zoo yuav ua rau tibneeg muaj lub siab xav los teev tiam Yehauvas. Povlauj thiaj hais tias: “Peb nthuav kiag qhov tseeb thiaj qhia peb tus kheej rau sawvdaws lub siab tshuaj saib tab meeg Vajtswv lub xubntiag.”​—2 Khaulee 4:2.

17. Ib tug ntxhais hluas lub siab tau rub nws los ua dabtsi?

¹⁷ Thaum Jacqueline [ntsa·ki·lee] muaj 16 xyoo, hauv tsev kawm ntawv nws kawm tias tibneeg txia ntawm tsiaj los xwb. Nws thiaj hais li no: “Kuv niaj zaus nrog sawvdaws tham ua ke zoo siab hlo, tiamsis zaum no kuv lub siab tsis kheev kuv tsa tes teb li qub. Kuv tsis xav txhawb lub tswvyim uas qhia tias tibneeg txia ntawm tsiaj los xwb. Kuv thiaj mus hais kuv tus xibhwb tias kuv tsis ntseeg li ntawd. Ua ciav kuv tus xibhwb tsis chim rau kuv, tiamsis nws tseem cia kuv qhia cov tub kawm ntawv tias muaj ib tug tswv tsim.” Jacqueline lub siab rub kom nws muaj peevxwm nrog nws tus xibhwb tham. Thaum kawg nws lub siab qhuas nws vim nws ua tau zoo. Ua li, koj lub siab puas pab koj ua li ntawd thiab?

18. Ua li cas peb ho xav cob peb lub siab?

¹⁸ Ua li cas peb ho xav cob peb lub siab? Twb yog peb xav coj peb lub neej raws li Yehauvas tej hauv paus ntsiab lus, thiab nws tej kevcai. Yog li ntawd, peb yuav tsum kawm Vajtswv Txojlus, ua tib zoo xav txog tej uas peb tau kawm, thiab xyaum coj raws nraim li ntawd. Yog peb cob tau peb lub siab lawd, ces peb yuav txawj cais qhov zoo qhov phem tiag.