Qhov Zoo Qhov Phem: Peb Tso Siab Tau Rau Phau Vajlugkub
Peb tsis paub xyov peb lub neej yuav mus zoo li cas yog peb tsuas ua li peb xav los sis ua raws li luag tej ib txwm ua xwb. Phau Vajlugkub qhia tias peb yuav tsum ua dab tsi, peb thiaj yuav muaj kev zoo siab tiag.
CIA VAJTSWV COJ KOJ TXOJ HAU KEV
Nyob hauv phau Vajlugkub, Vajtswv Yehauvas a qhia tias nws tsim tib neeg kom vam khom nws thiab ua tus coj lawv txoj hau kev. (Yelemis 10:23) Nws hlub tib neeg heev thiab nws tsis xav kom peb ua tej yam uas yuav ua rau peb ntsib teeb meem, nws thiaj muab nws Txoj Lus uas yog phau Vajlugkub los pab peb ua neej. (2 Kevcai 5:29; 1 Yauhas 4:8) Ntxiv ntawd, Vajtswv muaj laj lim tswv yim thiab kev thoob tsib to nrog. Yog li, nws tej tswv yim yuav pab kom peb ua lub neej nto ntsis. (Phau Ntawv Nkauj 100:3; 104:24) Txawm li los, Vajtswv yeej tsis yuam ib leeg twg kom ua li nws hais.
Thaum Vajtswv Yehauvas xub tsim thawj nkawm niam txiv uas yog Adas thiab Evas, nws muab txhua yam rau nkawd kom nkawd muaj txhij muaj txhua thiab muaj kev zoo siab. (Chivkeeb 1:28, 29; 2:8, 15) Vajtswv tsuas yog hais kom nkawd txhob noj ib tsob txiv ntoo xwb. Tiam sis Nws cia rau nkawd xaiv seb nkawd yuav mloog nws lus los tsis mloog. (Chivkeeb 2:9, 16, 17) Tu siab kawg li uas Adas thiab Evas nkawd tsis mloog Vajtswv lus, nkawd ua li nkawd lub siab nyiam xwb. (Chivkeeb 3:6) Los txog niaj hnub nim no, peb pom muaj li cas xwb? Tib neeg lub neej puas zoo dua thaum lawv ua raws li lawv lub siab xav? Tsis zoo. Thaum tib neeg tsis mloog Vajtswv lus, lawv tsis muaj kev thaj yeeb thiab tsis muaj kev zoo siab.—Tej Lus Qhia 8:9.
Phau Vajlugkub yeej pab tau txhua leej txhua tus kom lawv txawj ua qhov zoo qhov yog. (2 Timautes 3:16, 17; saib lub ntsiab me “ Ib Phau Ntawv Uas Pab Tau Txhua Tus.”) Kawm seb phau Vajlugkub pab tau li cas.
Kawm ntxiv seb vim li cas phau Vajlugkub “yeej yog Vajtswv txoj [lus] tiag.”—1 Thexalaunikes 2:13. Saib zaj yeeb yaj kiab Lub Tswvyim Hauv Phau Vajlugkub, Yog Leejtwg Lub? hauv jw.org/hmn.
PHAU VAJLUGKUB QHIA TIAS VAJTSWV XAV KOM PEB COJ LI CAS
Hauv phau Vajlugkub, peb pom tias Vajtswv Yehauvas coj li cas rau li cas rau tib neeg. Thiab kuj qhia tias Vajtswv suav tias yam twg zoo thiab tsis zoo, yam twg pab tau peb thiab pab tsis tau. (Phau Ntawv Nkauj 19:7, 11) Tej yam nyob hauv phau Vajlugkub yeej muaj tseeb xwb thiab pab tau peb ua neeg zoo.
Xav txog cov lus hais nyob ntawm Pajlug 13:20 uas hais tias: ‘Yog koj nrog cov neeg txawj ntse ua ke koj thiaj yuav txawj ntse. Yog koj ua phooj ywg nrog cov neeg ruam, koj yuav raug kev puas tsuaj.’ Cov lus no los yeej tseem pab tau peb niaj hnub nim no thiab. Phau Vajlugkub tseem muaj ntau lub tswv yim pab tau peb ua neej.—Mus saib lub ntsiab me “ Phau Vajlugkub Yeej Tseem Pab Tau Peb Niaj Hnub Nim No.”
Tiam sis tej zaum koj yuav xav tias phau Vajlugkub puas yuav pab tau koj tiag. Zaj tom ntej yuav qhia txog tej tug uas phau Vajlugkub yeej pab tau lawv lub neej lawm tiag.
a Vajtswv lub npe hu ua Yehauvas.—Khiav Dim 3:14 cov lus hauv qab taw qhia hauv phau Txoj Moo Zoo Uas Yog Vajtswv Txojlus Phau Txhais Tshiab xyoo 2000 hais tias, “[Tus Tswv] lub npe ua lus Henplais hu ua Yaves (lossis Yehauvas).”
