1. Peb yuav nrhiav tswvyim li cas, thiab tswvyim pab tau peb li cas?

 YEHAUVAS zoo siab hlo pub tswvyim rau peb. Yakaunpau 1:5 hais tias: “Yog nej cov leejtwg tsis muaj tswvyim, cia tus ntawd thov Vajtswv uas muaj lub siab dav pub rau txhua tus tsis thuam leejtwg li.” Yog peb mloog Vajtswv tej lus qhuab ntuas, yuav pab tau peb muaj tswvyim. Qhov no yuav tiv thaiv peb kom txhob mus ua tej yam phem thiab yuav pab peb kom nyob ze rau Yehauvas. (Paj Lug 2:10-12) Tsis tas li ntawd xwb, peb kuj yuav tau txojsia ib txhis tsis kawg.​—Yuda 21.

2. Yuav ua li cas thiaj pom tias Vajtswv tej lus qhuab ntuas yog ib qho zoo?

² Vim peb yog neeg txhaum lossis vim peb niam peb txiv tsis txawj tu peb tej thaud thiaj tsis yoojyim rau peb mloog lus qhuab ntuas lossis saib tias kev qhuab ntuas yog ib qho zoo. Tiamsis thaum peb pom tias Vajtswv tej lus qhuab ntuas yeej pab tau peb lub neej tiag, peb mam pom tias kev qhuab ntuas yog ib qho zoo thiab Vajtswv yeej hlub peb heev. Paj Lug 3:11, 12 hais tias: “Kuv tubʹe, tsis txhob saib tsis taus [Yehauvas] tej lus qhuab qhia . . . rau qhov [Yehauvas] qhuab ntuas tus uas nws hlub.” Yehauvas tsuas xav kom peb tau lub neej zoo xwb. (Nyeem Henplais 12: 5-11.) Nws paub tias peb yog tus neeg zoo li cas, nws paub tias peb tu ncua dabtsi, thiab nws paub tias yuav qhuab ntuas peb hnyav npaum cas. Hauv zaj no peb yuav kawm txog 4 lub ntsiab no: (1) qhuab ntuas yus tus kheej, (2) niam txiv qhuab ntuas menyuam, (3) cov txwj laus qhuab ntuas peb, thiab (4) tej yam uas yuav raug peb mob tshaj raug qhuab ntuas.

3. Yuav ua li cas menyuam thiaj txawj qhuab ntuas lawv tus kheej? Piav txog tus qauv.

³ Thaum peb paub tswj tej peb xav thiab tej peb ua ces twb yog peb txawj qhuab ntuas peb tus kheej. Tsis yog peb yug los es yuav cia li paub ntuas peb tus kheej, peb yuav tsum xyaum peb thiaj paub. Zoo li tus menyuam uas xyaum caij tsheb kauj vab. Nws niam nws txiv yuav tsum hwj nws thiaj tsis vau. Tiamsis thaum tus menyuam txawj caij zuj zus ces leej niam leej txiv kuj tso zuj zus. Thaum nkawd pom tias nws paub caij lawm, nkawd mam li tso nws caij nws. Ib yam li ntawd, thaum cov niam txiv ua siab ntev cob lawv cov menyuam “rau hauv [Yehauvas] tej lus qhuab qhia thiab nws tej lus ntuas,” twb yog lawv pab kom menyuam muaj tswvyim thiab txawj qhuab ntuas lawv tus kheej.​—Efexau 6:4.

4. Vim li cas peb yuav tsum qhuab ntuas peb tus kheej thiaj yog peb “muab tus neeg tshiab los hnav”?

⁴ Cov uas thaum laus lawd es mam los paub Yehauvas los yuav tau xyaum li no thiab. Txawm lawv twb paub qhuab ntuas lawv tus kheej lawm los, lawv tseem tsis tau yog ib tug Khixatia uas paub tab. Tiamsis thaum lawv pib “muab tus neeg tshiab los hnav” thiab xyaum Yexus, lawv yuav paub tab zuj zus. (Efexau 4:23, 24) Lawv yuav tau ntuas lawv tus kheej lawv thiaj tso tau “tej kev phem kev qias thiab tej kev ntshaw uas yog ntiajteb li tseg, thiab ua lub neej uas paub tswj lub siab thiab ua ncaj ncees thiab ua raws li Vajtswv txojkev hauv tiam neeg no.”​—Titau 2:12.

5. Yog peb tau ua yuam kev, vim li cas peb yuav tsum tsis txhob poob siab?

⁵ Tiamsis peb txhua tus yog neeg txhaum. (Laj Lim Tswvyim 7:20) Yog peb tau ua yuam kev, puas yog peb tsis txawj qhuab ntuas peb tus kheej lossis yog ib tug neeg phem? Tsis yog. Paj Lug 24:26 hais tias: “Tus ncaj ncees txawm ntog xya zaus los tseem sawv los thiab.” Dabtsi yuav pab peb “sawv los”? Vajtswv lub hwj huam dawb huv. (Nyeem Filipi 4:13.) Yehauvas lub hwj huam dawb huv yuav pab kom peb paub tswj peb tus kheej. Qhov no kuj yog peb qhuab ntuas peb tus kheej thiab.

6. Yuav ua li cas peb thiaj muaj siab kawm Vajtswv Txojlus? Saib daim duab ntawm sab 27.

⁶ Yog peb thov Vajtswv, kawm Vajlugkub, thiab ua tib zoo xav txog tej uas peb kawm, peb yuav yimhuab txawj qhuab ntuas peb tus kheej. Koj puas nquag kawm Vajlugkub? Yog nyuaj rau koj kawm Vajlugkub, tsis txhob poob siab. Cia Yehauvas pab koj, koj thiaj “nqhis” nws Txojlus. (1 Petus 2:2, VTL) Thov kom Yehauvas pab koj tswj koj tus kheej kawm Vajlugkub. Tej zaum ib zaug twg koj tsuas kawm li 10 tawm feeb xwb. Ntev mus ntev tuaj, koj yuav muaj siab kawm ces yuav tsis nyuaj rau koj kawm Vajlugkub lawm. Thaum ntawd koj yuav tos ntsoov lub sijhawm uas koj tau zaum ntsiag to ua tib zoo xav txog Yehauvas.​—1 Timaute 4:15.

7. Yog peb qhuab ntuas peb tus kheej, yuav pab peb ncav cuag peb tej hom phiaj ua Yehauvas tes haujlwm li cas?

⁷ Yog peb qhuab ntuas peb tus kheej, peb yuav ncav cuag peb tej hom phiaj ua Yehauvas tes haujlwm. Tau muaj li no rau ib leej  txiv. Nws pom tias nws tsis kub siab mus qhia Vajlugkub lawm, nws thiaj txiav txim siab npaj ua ib tug tho kev. Nws tau ua li cas thiaj ncav cuag nws lub hom phiaj? Nws thov Vajtswv thiab mus nrhiav tej zaj uas tham txog tes haujlwm tho kev hauv peb tej ntaub ntawv. Thaum nws ua li no, nws txojkev sib raug zoo nrog Yehauvas hajyam ruaj khov tuaj. Thaum twg nws ua tau ib tug pab tho kev nws kuj ua thiab. Nws tsis cia ib yam dabtsi los tav nws txoj hau kev. Nws tsuas xav ntsoov txog nws lub hom phiaj xwb. Tsis ntev tom qab ntawd, nws thiaj ua ib tug tho kev lawm tiag.

8-10. Dabtsi yuav pab cov niam txiv tu lawv tej menyuam los teev tiam Yehauvas? Piav txog tus qauv.

⁸ Yehauvas muab tes haujlwm cob qhia menyuam rau cov niam txiv ua. Lawv yuav tsum “tu lawv rau hauv [Yehauvas] tej lus qhuab qhia thiab nws tej lus ntuas.” (Efexau 6:4) Tiam no tsis yoojyim tu menyuam li. (2 Timaute 3:1-5) Thaum menyuam yug los, lawv tsis paub cais qhov zoo qhov phem. Lawv yeej muaj lub siab paub qhov zoo qhov phem tiamsis yuav tsum muaj ib tug qhuab ntuas thiab cob qhia lawv. (Loos 2:14, 15)  Ib tug tshawb fawb phau Vajlugkub piav tias Kili lo lus “qhuab ntuas” kuj txhais tias “tu menyuam” lossis cob qhia kom menyuam ua neeg paub tab.

⁹ Txawm menyuam raug qhuab ntuas los, yog niam thiab txiv hlub menyuam ces menyuam yuav nyob tso siab plhuav. Lawv yuav pom tias kev ywj pheej tsis yog ua kom ywj yus siab xwb. Thiab lawv yuav pom tias tej uas lawv txiav txim siab ua yuav coj lawv mus ntsib qhov zoo lossis qhov phem. Yog li ntawd, tseem ceeb heev rau cov niam txiv Khixatia siv Yehauvas lub tswvyim los pab qhuab qhia lawv tej menyuam. Ib haiv neeg yeej tu menyuam txawv ib haiv thiab ib tiam kuj tu txawv ib tiam. Tiamsis cov niam txiv uas mloog Vajtswv lus yuav tsis tas nyuaj siab tias yuav muab tibneeg tej tswvyim twg los qhia menyuam thiaj zoo.

¹⁰ Cia peb kawm txog Nau-a. Thaum Yehauvas hais kom nws ua lub nkoj, nws tsis paub xyov yuav ua li cas. Nws yuav tsum siv Yehauvas lub tswvyim nws thiaj ua tau. Phau Vajlugkub hais tias nws “ua txhua yam raws li Vajtswv kom nws ua.” (Chiv Keeb 6:22) Tau muaj li cas xwb? Thaum kawg lub nkoj cawm tau Nau-a thiab nws tsev neeg dim! Tiam ua ntej dej dag nyab, yeej tsis yoojyim rau Nau-a ua qhov zoo qhov yog rau qhov muaj neeg phem coob heev. Tiamsis Nau-a yog ib leej txiv zoo. Yog vim li cas? Vim nws tso siab plhuav rau Vajtswv lub tswvyim. Nau-a txawj cob qhia nws cov menyuam thiab nws tso tus qauv zoo rau lawv xyaum.​—Chiv Keeb 6:5.

11. Vim li cas cov niam txiv yuav tsum siv zog cob qhia lawv tej menyuam?

¹¹ Yog koj yog ib leej niam leej txiv, koj yuav ua li cas thiaj ‘ua txhua yam raws li Vajtswv kom koj ua’? Koj yuav tsum mloog Vajtswv lus. Cia nws pab koj tu koj cov menyuam. Siv tej tswvyim hauv nws Txojlus thiab nws lub koom haum. Thaum koj cov menyuam loj lawd tej zaum lawv yuav ua koj tsaug thiab! Ib tug kwvtij hais tias: “Kuv nco kuv niam kuv txiv txiaj ntxig uas nkawd tau tu kuv loj hlob. Nkawd ua npaum li nkawd ua tau kom Vajtswv Txojlus poob rau hauv kuv nruab siab.” Nws hais ntxiv tias twb yog vim muaj nws niam nws txiv nws thiaj txav ze rau Yehauvas. Txawm koj siv zog npaum cas los, tej thaud menyuam tseem tso Yehauvas tseg lawm thiab. Tiamsis yog koj twb ua npaum li koj ua tau los cob qhia koj tus menyuam lawm tsis txhob cia koj lub siab pheej rov nkaug koj. Cia siab tias tej zaum muaj ib hnub koj tus menyuam yuav rov los cuag Yehauvas.

12, 13. (1) Yog menyuam raug rho tawm lawd, cov niam txiv yuav ua li cas qhia tias lawv mloog Vajtswv lus? (2) Vim ib leej niam leej txiv tau mloog Vajtswv lus, pab lawv tsev neeg li cas?

¹² Qhov uas yuav sim cov niam txiv ib txhia yog qhov uas menyuam raug rho tawm. Ib tug muam tus ntxhais raug rho tawm thiab nws tawm mus nyob nws lawm. Tus muam hais tias: “Kuv txhob txwm nyeem peb tej ntaub ntawv seb nrhiav puas tau kev los nrog kuv tus ntxhais thiab tus ntxhais xeeb ntxwv ua ke.” Tiamsis nws tus txiv ua tib zoo pab kom nws pom tias Yehauvas yog tus saib xyuas nkawd tus ntxhais lawm. Nkawd yuav tsum ua tib zoo tsam nkawd cheem qhov uas Vajtswv qhuab ntuas nkawd tus ntxhais.

¹³ Ob peb xyoos tom qab ntawd, nkawd tus ntxhais rov los rau hauv lub koom txoos lawm. Leej niam hais tias: “Nimno nws hu xov tooj thiab ntaus ntawv tuaj rau kuv yuav luag txhua hnub! Thiab nws saib taus kuv thiab nws txiv wb vim nws paub tias wb mloog Vajtswv lus. Wb yeej muaj kev sib raug zoo kawg  li.” Yog koj tus tub tus ntxhais tau raug rho tawm lawm, koj puas yuav “tso siab plhuav rau [Yehauvas] kawg siab kawg ntsws”? Koj puas yuav qhia tias koj tsis “vam khom koj li kev txawj ntse” xwb? (Paj Lug 3:5, 6) Yehauvas muaj tswvyim thiab hlub peb heev zoo rau peb mloog nws tej lus qhuab ntuas. Nco ntsoov tias nws pub nws tib Leej Tub los txhiv noob neej, kuj yog txhiv koj tus tub tus ntxhais thiab. Vajtswv yeej tsis xav cia ib tug twg raug puam tsuaj li. (Nyeem 2 Petus 3:9.) Yog li ntawd, txawm yuav mob siab npaum li cas los, tso siab plhuav tias Yehauvas yeej qhuab ntuas thiab cob qhia mus rau qhov zoo xwb. Cia li mloog Vajtswv tej lus qhuab ntuas es tsis txhob tawm tsam nws.

14. “Tus tub qhe saib tsev uas ncaj” qhuab qhia thiab qhuab ntuas peb li cas?

¹⁴ Yehauvas cog lus tias nws yuav saib xyuas, tiv thaiv, thiab qhuab qhia lub koom txoos Khixatia. Nws ua li no li cas? Nws tsa nws tus Tub los saib xyuas lub koom txoos. Nws tus Tub ho txib “tus tub qhe saib tsev uas ncaj” los npaj zaub mov yug peb txojkev ntseeg thiab. (Luka 12:42) Tus “tub qhe” siv tej zaj lus qhuab qhia lossis tej zaj hauv peb tej ntaub ntawv los qhuab qhia thiab qhuab ntuas peb. Yog peb cia tej no hloov peb txojkev xav thiab tej uas peb ua, peb yuav zoo siab tias peb cia Yehauvas qhuab ntuas peb.​—Paj Lug 2:1-5.

15, 16. (1) Cov txwj laus tes haujlwm pab tau peb li cas? (2) Peb yuav ua li cas thiaj tsis ua nyuaj rau cov txwj laus?

¹⁵ Khetos kuj muab tes haujlwm saib xyuas lub koom txoos rau cov txwj laus thiab. Phau Vajlugkub muab lawv piv rau tej khoom pub uas Vajtswv tau muab rau nws cov tibneeg. Cov txwj laus tes haujlwm pab tau peb li cas? Peb xyaum tau lawv tus qauv thiab lawv txojkev ntseeg. Thaum lawv siv Vajlugkub los qhuab ntuas peb, peb kuj mloog lawv lus thiab. (Nyeem Henplais 13:7, 17.) Cov txwj laus hlub peb thiab xav kom peb txav ze rau Vajtswv. Yog lawv pom tias peb tsis tshua tuaj kev sib txoos lawm lossis peb tsis kub siab mus qhia Vajlugkub lawd, lawv yeej yuav pab peb tamsid. Lawv yuav ua tib zoo mloog peb, txhawb peb lub zog, thiab siv phau Vajlugkub tej lus ntuas los qhia peb. Thaum lawv pab koj li no, koj puas pom tias twb yog Yehauvas hlub koj heev nws thiaj txib lawv los pab koj?

¹⁶ Nco ntsoov tias tej zaum tsis yoojyim rau cov txwj laus ntuas peb. Koj xav, thaum Vajntxwv Davi muab nws qhov txhaum zais, puas yoojyim rau Nathas mus ntuas Davi? (2 Xamuyee 12:1-14) Thaum Petus muab cov Khixatia uas yog haiv neeg Yudai saib loj dua lwm cov, yeej nyuaj heev rau Povlauj ntuas nws. Petus yog Yexus 12 tug tubtxib ib tug, Povlauj yuav tau ua siab tuab ntuas nws. (Kalatia 2:11-14) Ua li, koj yuav ua li cas thiaj tsis nyuaj rau cov txwj laus los ntuas koj? Koj yuav tsum ua siab mos muag, txo hwjchim, thiab ris lawv txiaj ntsig. Nco ntsoov tias Vajtswv hlub koj, nws thiaj txib cov txwj laus los pab koj. Yog koj mloog lawv lus, yuav pab tau koj lub neej. Cov txwj laus kuj yuav kaj siab lug ua lawv tes haujlwm thiab.

17. Cov txwj laus tau pab ib tug muam li cas?

¹⁷ Ib tug muam tau raug ntau yam kev nyuaj siab, nws thiaj hais tias nyuaj heev rau nws hlub Yehauvas. Nws paub tias nws yuav tsum mus nrog cov txwj laus tham. Thaum nws mus ntsib lawv tas, nws hais tias: “Lawv tsis cem lossis thuam kuv, lawv txhawb kuv lub zog xwb. Tom qab txhua txojkev sib txoos, txawm lawv muaj haujlwm ntau heev los,  lawv ib tug yeej los nug seb kuv puas noj qab nyob zoo. Tej uas los raug kuv ua rau kuv xav tias Vajtswv yeej hlub tsis tau kuv li. Tiamsis Yehauvas siv lub koom txoos thiab cov txwj laus los qhia kuv tias nws yeej hlub tshua kuv. Kuv thov Yehauvas pab kom kuv tsis txhob tso nws tseg.”

18, 19. Dabtsi raug peb mob tshaj raug qhuab ntuas? Piav 2 tug qauv.

¹⁸ Thaum peb raug qhuab ntuas yeej mob peb siab heev, tiamsis yog peb tsis mloog tej lus ntuas ntawd, tseem yuav raug peb mob tshaj qhov uas raug ntuas thiab. (Henplais 12:11) Khayee thiab Vajntxwv Xedekhiya nkawd 2 tug qauv phem yuav pab tau peb. Thaum Vajtswv pom tias Khayee ntxub nws tus kwv thiab xav muab nws tua, Nws ceeb toom Khayee tias: “Ua cas koj chim? Ua cas koj ntsej muag o wv? Yog koj ua zoo, kuv yuav txais koj los tsis yog? Yog koj ua tsis zoo, lub txim pliab lua zov ntawm qhov rooj xav tom koj, tiamsis koj yuav tsum kov yeej lub txim ntawd.” (Chiv Keeb 4:6, 7) Khayee tsis kam mloog Vajtswv lus, nws muab nws tus kwv tua tuag, nws thiaj raug ntau yam kev nyuaj siab mus tas nws sim neej. (Chiv Keeb 4:11, 12) Yog tias Khayee mloog Vajtswv lus, nws yeej tsis raug tej kev nyuaj siab ntau npaum ntawd.

¹⁹ Xedekhiya yog ib tug vajntxwv phem thiab tais caus heev. Thaum nws ua vajntxwv kav, cov uas nyob hauv Yeluxalees txom nyem kawg nkaus li. Yelemi uas yog ib tug cev Vajtswv lus thiaj ceeb toom Xedekhiya tias nws yuav tsum hloov. Tiamsis nws tsis kam mloog Vajtswv tej lus qhuab ntuas li, thaum kawg nws thiaj raug kev liam sim. (Yelemi 52:8-11) Yehauvas yeej tsis xav kom peb raug kev txom nyem li no!​—Nyeem Yaxaya 48:17, 18.

20. Yuav ua li cas rau cov uas mloog Vajtswv tej lus qhuab ntuas thiab cov uas tsis mloog?

²⁰ Niaj hnub no, coob tus hauv lub qab ntuj no saib tsis taus thiab tsis kam mloog Vajtswv tej lus qhuab ntuas. Tiamsis tsis ntev xwb, cov uas tsis kam mloog Vajtswv tej lus qhuab ntuas yuav tau saws raws li tej uas lawv ua. (Paj Lug 1:24-31) Yog li, “cia li mloog lus qhuab qhia, cia li txawj ntse.” Paj Lug 4:13 hais tias, “cia li tuav rawv tej lus qhuab qhia ua neej, tsis txhob muab tso tseg, cia li muab tej lus qhia ceev cia rau qhov tej lus ntawd yog koj txojsia.”