1. (1) Cov nkauj muam ua haujlwm pab lub koom haum li cas? (2) Lawv ntsib teeb meem li cas? (Saib daim duab ntawm lub khaum.)

 PEB zoo siab heev tias peb muaj coob tus nkauj muam uas rau siab ua haujlwm hauv lub koom txoos. Lawv mus kev sib txoos thiab mus tshaj tawm txoj xov zoo. Muaj ib txhia nkauj muam pab tu lub Tsev Nceeg Vaj thiab pab cov kwvtij nkauj muam. Txawm li ntawd los lawv kuj ntsib teeb meem thiab kev nyuaj siab ntau yam. Muaj ib txhia tu lawv niam lawv txiv. Hos ib txhia, lawv tsev neeg tawm tsam lawv txojkev ntseeg. Thiab ib txhia, yog ib txhais yim neeg ces lawv yuav tau khwv heev los yug lawv cov menyuam.

2. Vim li cas peb yuav tsum pab txhawb cov nkauj muam hauv lub koom txoos?

² Peb yuav tsum pab txhawb cov nkauj muam hauv lub koom txoos rau qhov peb nyob rau lub ntiajteb uas tibneeg saib pojniam tsis muaj nuj nqis. Phau Vajlugkub los kuj hais kom peb pab cov nkauj muam thiab. Xws li thaum Paulus sau nws tsab ntawv mus rau lub koom txoos hauv Loos, nws thov kom lawv tos txais tus muam Fenpes thiab pab nws. (Loos 16:1, 2) Thaum Paulus tseem yog ib tug Falixais, nws nrog cov neeg uas saib pojniam tsis muaj nuj nqis dabtsi. Tiamsis thaum Paulus los ua ib tug Khixatia lawm, nws ua zoo rau cov pojniam thiab saib taus lawv ib yam li Yexus.​—1 Kauleethaus 11:1.

3. (1) Yexus saib pojniam zoo li cas? (2) Yexus saib cov pojniam uas ua li nws Txiv lub siab nyiam li cas?

³ Yexus saib taus pojniam, nws tsis zoo li cov Yudais cov thawj coj. (Yauhas 4:27) Muaj ib phau ntawv uas tham txog phau Vajlugkub hais tias: “Yeej tsis muaj ib zaug li uas Yexus hais lus saib tsis taus pojniam.” Yexus saib cov pojniam uas ua li nws Txiv lub siab nyiam rau nqi heev. Nws hu lawv ua nws cov nkauj cov muam. Thaum nws hais txog cov txivneej uas ua Vajtswv tes  haujlwm nws kuj tham txog cov pojniam thiab saib lawv sawvdaws li lawv yog nws tsev neeg.​—Mathais 12:50.

4. Zaj no peb yuav tham txog dabtsi?

⁴ Yexus yeej pab nws cov nkauj cov muam uas teev tiam Vajtswv. Nws saib lawv muaj nuj nqis thiab tiv thaiv lawv. Cia peb kawm seb peb yuav xyaum Yexus tus qauv li cas peb thiaj li xam pom peb cov nkauj muam.

5. Vim li cas tsis yoojyim rau peb cov nkauj muam ib txhia muaj phoojywg zoo uas txhawb tau lawv?

⁵ Peb cov kwvtij thiab nkauj muam txhua leej txhua tus yuav tsum muaj phoojywg zoo. Tiamsis muaj tej zaum tsis yoojyim rau peb cov nkauj muam muaj phoojywg zoo los txhawb lawv. Yog vim li cas? Ib tug muam hu ua Yaladee (Jordan) b hais tias: “Vim kuv tsis muaj txiv, zoo li kuv yog ib tug qhua xwb thiab muaj tej thaum kuv xav tias xyov kuv txhawb puas tau lub koom txoos.” Ib tug muam tho kev hu ua Kixatees (Kristen) tsiv mus rau ib qho chaw tshiab kom nws thiaj tau tshaj tawm ntau dua qub hais tias, “Thaum koj nyuam qhuav mus rau ib lub koom txoos tshiab koj tsis paub leejtwg li muaj tej thaud koj yuav xav tias muaj koj ib leeg xwb.” Tus uas nyob nrog nws tsev neeg uas tsis teev tiam Yehauvas tej zaum yuav kho siab vim nws txojkev sib raug zoo nrog nws tsev neeg tsis zoo li qub lawm thiab hauv lub koom txoos los nyuaj heev rau nws ncawg cov kwvtij nkauj muam. Muaj ib txhia nkauj muam tej zaum yuav kho siab vim lawv muaj mob thiab mus tsis taus qhovtwg hos muaj tej tug vim lawv yuav tau nyob tsev tu lawv ib tug neeg. Tus muam hu ua Aniv (Annette) hais tias: “Kuv tsis muaj sijhawm nrog cov kwvtij nkauj muam vim kuv yuav tsum nyob tsev tu kuv niam.”

6. Lukas 10:38-42 qhia tias Yexus pab Mathas thiab Malis nkawd li cas?

⁶ Yexus yog ib tug phoojywg zoo rau cov nkauj muam uas teev tiam Yehauvas thiab nws siv sijhawm nrog lawv ua ke. Xws li Yexus ua phoojywg zoo nrog Malis thiab Mathas nkawd txawm hais tias nkawd tsis muaj txiv. (Nyeem Lukas 10:38-42.) Yexus tus cwjpwm ua rau nkawd ncawg nws thiab zoo hais lus nrog nws. Malis tsis ntshai zaum ntawm Yexus kotaw thiab mloog Yexus qhia. c Thiab thaum Mathas npau taws vim Malis tsis pab nws npaj zaub mov los Mathas yeej tsis ntshai qhia Yexus tias nws xav li cas. Thaum ntawd Yexus pab nkawd pom tias dabtsi tseem ceeb dua. Yexus kuj nco ntsoov rov qab mus xyuas nkawd thiab nkawd tus nus Laxalus vim nws hlub thiab hmov tshua lawv. (Yauhas 12:1-3) Thaum Laxalus mob hnyav heev, Malis thiab Mathas paub tias Yexus yeej yuav pab lawv.​—Yauhas 11:3, 5.

7. Peb yuav txhawb peb cov nkauj muam li cas?

⁷ Rau ib txhia nkauj muam, lub sijhawm uas lawv tuaj kev sib txoos yog lub sijhawm rau lawv nrog cov kwvtij nkauj muam ua ke. Yog li ntawd peb yuav tsum siv lub sijhawm ntawd tos txais lawv, nrog lawv tham, thiab qhia rau lawv paub hais tias peb hlub tshua lawv. Tus Muam Yaladee hais tias, “Kuv zoo siab thaum cov kwvtij nkauj muam qhia kuv tias kuv teb tau zoo, thaum lawv yaum kuv nrog lawv mus tshaj tawm, lossis ua lwm yam nrog kuv.” Yog li ntawd, peb yuav tsum qhia peb cov nkauj muam paub hais tias lawv muaj nuj nqis heev rau peb. Kiab hais tias: “Thaum kuv mus tsis tau kev sib txoos es muaj neeg ntaus ntawv tuaj  nug kuv moo, kuv paub tias lawv hlub kuv heev.”

8. Peb yuav xyaum Yexus li cas?

⁸ Peb yuav tsum ua li Yexus thiab nrhiav sijhawm los nrog cov nkauj muam ua ke. Peb kuj caw lawv tuaj nrog peb noj ib pluag mov lossis nrog peb mus ua si. Thaum peb ua li no los peb yuav tsum nco ntsoov tham txog tej yam txhawb zog xwb. (Loos 1:11, 12) Cov txwj laus yuav tsum xav ib yam li Yexus. Yexus paub tias yeej tsis yoojyim rau ib txhia tsis yuav txij nkawm. Tiamsis nws hais tias txawm yog yus muaj txij nkawm thiab muaj tub ki los yuav tsis ua rau yus muaj kev zoo siab tas mus li. (Lukas 11:27, 28) Nws hais tias tus neeg uas muaj kev zoo siab tiag yog tus uas muab Yehauvas tes haujlwm tso ua ntej hauv nws lub neej.​—Mathais 19:12.

9. Cov txwj laus yuav ua li cas pab cov nkauj muam Khixatia?

⁹ Cov txwj laus yuav tsum saib cov nkauj muam Khixatia ib yam li yog lawv cov muam thiab lawv niam. (1 Timautes 5:1, 2) Cov txwj laus yuav tsum siv sijhawm ua ntej lossis tom qab kev sib txoos los nrog cov nkauj muam Khixatia tham. Tus Muam Kixatees hais tias: “Muaj ib tug txwj laus pom tias kuv khwv heev, nws thiaj xav paub seb kuv niaj hnub ua dabtsi. Kuv zoo siab heev tias nws txhawj txog kuv.” Thaum cov txwj laus nrhiav sijhawm los nrog cov nkauj muam Khixatia tham ces qhia tias  cov txwj laus hlub tshua lawv. d Tus Muam Aniv qhia tias vim li cas thiaj zoo rau peb nrog cov txwj laus tham. Nws hais tias: “Thaum kuv nrog lawv tham ua rau peb sib paub zoo dua. Thaum kuv muaj teeb meem dabtsi kuv thiaj tsis ntshai mus cuag lawv.”

10. Peb yuav txhawb peb cov nkauj muam li cas?

¹⁰ Peb sawvdaws, tsis hais pojniam los txivneej, yeej zoo siab heev thaum luag hais rau peb tias peb ua haujlwm zoo. Tiamsis yog hais tias tsis muaj leejtwg pom tej peb ua thiab ris peb txiaj ntsig ces yuav ua rau peb qaug zog. Ib tug muam tho kev hu ua Anpinkayis uas tsis muaj txiv hais tias: “Tej thaum zoo li tsis muaj leejtwg paub kuv li. Lawv tsuas paub tias kuv yog tus ub tus no tus muam lossis tus ntxhais xwb.” Ib tug muam hu ua Paj uas tsis muaj txiv ua ib tug tubtxib tshaj tawm txawv tebchaws tau ntau xyoo tiamsis tom qab no nws rov los tsev los tu nws niam nws txiv. Nimno nws twb muaj 70 tawm xyoo lawm los nws tseem ua ib tug tho kev. Paj hais tias: “Qhov uas txhawb kuv zog tshaj plaws mas yog thaum cov kwvtij nkauj muam ris txiaj ntsig rau tej kuv ua.”

11. Yexus ris txiaj li cas rau cov pojniam uas pab nws?

¹¹ Yexus ris txiaj rau cov pojniam uas “muab lawv tej nyiaj thiab qhov txhia chaw pab Yexus thiab nws cov thwjtim.” (Lukas 8:1-3) Yexus tsis yog cia lawv los pab nws xwb tiamsis nws kuj qhia rau lawv txog tej uas yuav muaj tshwm sim. Xws li nws qhia rau lawv tias nws yuav tuag thiab yuav sawv rov qab los. (Lukas 24:5-8) Nws qhia tej uas nws yuav raug rau cov pojniam no ib yam li nws qhia nws cov tubtxib thiab. (Malakaus 9:30-32; 10:32-34) Thaum Yexus raug ntes, txawm tias cov tubtxib khiav tas lawm los tus puav pojniam uas ib txwm pab Yexus nrog nraim Yexus thaum luag muab nws ntsia rau saum tus ntoo.​—Mathais 26:56; Malakaus 15:40, 41.

12. Yexus muab haujlwm dabtsi rau pojniam ua?

¹² Yexus muab haujlwm tseem ceeb rau pojniam ua. Cov pojniam uas muab siab npuab Vajtswv yog cov uas xub pom Yexus thaum nws sawv rov los. Yexus hais kom lawv mus qhia cov tubtxib tias nws twb sawv hauv qhov tuag rov los lawm. (Mathais 28:5, 9, 10) Thaum Vajtswv pub nws lub hwj huam dawb huv rau cov thwjtim rau hnub Peetekos xyoo 33, tej zaum kuj muaj pojniam thiab. Yog li ntawd cov pojniam uas raug xaiv tseg no kuj tau txais txoj koob hmoov uas txawj hais lwm yam lus thiab mus qhia lwm tus txog “tej txujci tseemceeb uas Vajtswv tau ua lawm.”​—Tes Haujlwm 1:14; 2:2-4, 11.

13. (1) Cov nkauj muam Khixatia niaj hnub nimno ua dabtsi rau Yehauvas? (2) Puas muaj tej yam uas koj ua tau los pab peb cov nkauj muam no thiab?

¹³ Yeej tsim nyog peb qhuas peb cov nkauj muam uas sib zog ua haujlwm rau Yehauvas. Lawv pab kho thiab ua vaj ua tsev, kawm lwm yam lus mus pab tej pawg, pab ua haujlwm hauv Npe-ee, pab tej chaw uas raug xwm txheej phem, thiab pab txhais lus rau peb tej ntaub ntawv. Lawv kuj tho kev thiab ua tubtxib tshaj tawm txawv tebchaws. Lawv mus koom Kev Kawm Rau Cov Tho Kev, Kev Kawm Rau Cov Qhia Lub Nceeg Vaj, thiab Kev Kawm Vajlugkub Kile-a ib yam li cov kwvtij thiab. Tsis tas li ntawd xwb, cov txwj laus cov pojniam los yeej txhawb lawv cov txiv kawg, lawv cov txiv thiaj ua tau lawv tes haujlwm hauv lub koom txoos thiab lub koom haum. Cov txwj laus yog Vajtswv pub los saib xyuas lub koom txoos tiamsis yog lawv cov pojniam tsis txhawb lawv ces lawv yeej ua tsis tau lawv tes haujlwm zoo. (Efexus 4:8, NWT ) Puas muaj tej yam uas koj ua tau los txhawb cov nkauj cov muam no thiab?

14. Raws li Phau Ntawv Nkauj 68:11 hais no, cov txwj laus uas paub tab yuav tau ua li cas?

 ¹⁴ Cov txwj laus uas paub tab pom tias peb cov nkauj muam mob siab ua lawv tes haujlwm thiab txawj tshaj tawm txoj xov zoo. (Nyeem Phau Ntawv Nkauj 68:11. e) Yog li ntawd lawv yuav tsum ua zoo xyuas seb lawv kawm tau li cas los ntawm cov nkauj muam no. Tus Muam Anpinkayis zoo siab thaum cov kwvtij nug nws tias nws ua li cas nws thiaj paub mus nrog tibneeg tham. Nws hais tias, “Thaum lawv nug kuv li no, zoo li Yehauvas qhia rau kuv tias yeej muaj haujlwm rau kuv ua hauv lub koom haum.” Cov txwj laus kuj pom tias cov nkauj muam uas paub tab yuav pab tau cov ntxhais hluas thaum lawv muaj teeb meem lossis muaj kev nyuaj siab. (Titus 2:3-5) Yog li ntawd, yeej tsim nyog peb hlub thiab ris peb cov nkauj muam txiaj ntsig!

15. Peb cov nkauj muam xav tau kev pab thaum twg?

¹⁵ Muaj tej thaud, peb cov nkauj muam xav tau kev pab thaum lawm ntsib teeb meem. (Yaxayas 1:17) Xws li, tus poj ntsuam lossis tus uas nrauj txiv lawd tej zaum xav kom muaj neeg pab nws ua tej haujlwm uas nws tus txiv niaj zaus ua. Cov muam uas laus lawd tej zaum xav kom muaj neeg pab lawv nrog kws kho mob tham. Tus muam uas tho kev thiab ua lwm yam haujlwm rau Yehauvas lub koom haum yuav mus tshaj tawm tsis tau ntau npaum li lwm cov uas tho kev. Yog ho muaj tej tug uas hais tsis zoo txog nws los yuav tsum muaj ib tug pab qhia rau lawv tias yog vim li cas nws thiaj mus tshaj tawm tsis tau ntau. Puas muaj lwm yam uas peb ua tau los pab peb cov nkauj muam thiab? Cia peb tham ntxiv txog Yexus tus qauv.

16. Hauv Malakaus 14:3-9 qhia tias Yexus tiv thaiv Malis li cas?

¹⁶ Thaum lwm tus xav yuam kev txog cov nkauj muam Khixatia, Yexus yeej tuaj hlo lawv tog tiv thaiv lawv. Xws li Yexus pab Malis thaum Mathas npau taws rau nws. (Lukas 10:38-42) Thiab Yexus tiv thaiv Malis thaum luag tej thuam nws. (Nyeem Malakaus 14:3-9.) Yexus paub tias Malis xav ua zoo xwb, nws qhuas Malis tias: “Qhov uas nws ua rau kuv ntawd yog ib qho zoo. . . . Tus pojniam no yeej ua raws li nws ua tau.” Yexus kuj hais ntxiv tias: “Qhov uas tus pojniam no ua yuav nrov ncha mus rau txhua qhov hauv qab ntuj uas muaj neeg mus qhia Txojmoo Zoo.” Yexus cov lus no txhawb tau Malis lub zog kawg li. Yeej yog ib qho zoo kawg uas Yexus hais tias thaum tibneeg hnov txoj xov zoo, lawv yuav hnov txog qhov uas Malis ua no thiab. Zoo ib yam li peb tabtom tham txog nws tamsim no.

17. Piav seb thaum twg peb yuav tau pab ib tug nkauj muam Khixatia.

¹⁷ Yog koj hnov lwm tus hais tsis zoo txog ib tug nkauj muam Khixatia, koj puas yuav pab nws? Piv xam tias muaj ib tug muam uas nws tus txiv tsis yog Yehauvas ib tug Timkhawv niaj zaus tuaj kev sib txoos lig thiab kev sib txoos tag nrho xwb nws twb mus tsev lawm. Tsis tas li ntawd xwb nws tsis tshua coj nws cov menyuam nrog nws tuaj kev sib txoos. Muaj ib txhia kwvtij nkauj muam xav tias ua cas nws tsis hais nws tus txiv kom cia nws coj nws cov menyuam tuaj. Tiamsis qhov tseeb tiag, tus muam ntawd twb ua li nws ua tau lawm. Nws tuaj tsis tau kev sib txoos thiab coj tsis tau cov menyuam nrog nws tuaj raws li nws lub siab xav. Yog koj hnov lwm tus hais tsis zoo thiab thuam nws, koj yuav ua li cas xwb? Yog koj hais lus zoo txog tus muam no thiab qhuas nws, yuav pab tau kom lwm tus txhob thuam nws.

18. Puas muaj lwm yam uas peb ua tau los pab peb cov nkauj muam Khixatia thiab?

¹⁸ Thaum peb pab peb cov nkauj muam, lawv  yuav pom tias peb hlub tshua lawv. (1 Yauhas 3:18) Tus Muam Aniv uas tu nws niam hais tias: “Muaj ib co kwvtij nkauj muam tuaj pab kuv tu kuv niam kom kuv thiaj tau tes ua lwm yam. Muaj tej thaud lawv kuj nqa zaub mov tuaj thiab. Tej lawv ua no qhia kuv tias lawv hlub kuv heev thiab kuv yeej muaj nqis hauv lub koom txoos.” Cov kwvtij nkauj muam kuj pab tus Muam Yaladee thiab. Muaj ib tug kwvtij qhia kom nws paub kho nws lub tsheb. Nws hais tias: “Kuv zoo siab heev uas kuv cov kwvtij nkauj muam txhawj txog kuv thiab tsis xav kom kuv raug mob thaum kuv tsav tsheb.”

19. Cov txwj laus yuav pab tau cov nkauj muam li cas ntxiv thiab?

¹⁹ Cov txwj laus los ua tib zoo xyuas seb cov nkauj muam xav tau kev pab li cas. Lawv paub tias Yehauvas xav kom lawv saib xyuas cov nkauj muam kom zoo. (Yakaunpaus 1:27) Lawv thiaj xyaum Yexus tus qauv thiab tsis muab cai los ua nyuaj rau cov nkauj muam tiamsis lawv ua zoo xav txog lawv thiab ua siab ntev rau lawv. (Mathais 15:22-28) Thaum cov txwj laus mob siab pab cov nkauj muam ces lawv yuav pom tias Yehauvas thiab nws lub koom haum hlub tshua lawv. Thaum tus kwvtij uas saib xyuas Kiab pawg paub tias Kiab yuav tsiv tsev, nws txawm mus nrhiav neeg tuaj pab. Kiab hais tias: “Qhov no pab tau kuv kawg li thiab ua rau kuv tsis txhawj. Vim cov txwj laus hais lus txhawb zog rau kuv thiab pab kuv, kuv thiaj pom tias kuv yeej muaj nuj nqis rau lub koom txoos thiab thaum kuv raug kev nyuaj siab los yuav muaj tus pab kuv.”

20, 21. Peb yuav ua li cas qhia tias peb saib cov nkauj muam Khixatia muaj nuj nqis?

²⁰ Peb muaj cov nkauj muam Khixatia coob tus hauv peb lub koom txoos uas mob siab ua Yehauvas tes haujlwm. Yeej tsim nyog peb pab lawv thiab txhawb lawv zog. Peb kawm tau ntawm Yexus tias peb yuav tsum nrhiav sijhawm los nrog lawv ua ke kom paub lawv zoo. Peb kuj ris txiaj ntsig rau tes haujlwm uas lawv ua rau Yehauvas. Thaum muaj lwm tus xav yuam kev txog lawv los peb yuav tsum tuaj lawv tog thiab tiv thaiv lawv.

²¹ Thaum tus tubtxib Paulus xaus nws tsab ntawv rau lub koom txoos hauv Loos muaj 9 tug pojniam uas Paulus hais tuav npe nkaus. (Loos 16:1, 3, 6, 12, 13, 15) Cov pojniam no yeej zoo siab heev thaum lawv hnov lawv lub npe thiab tej uas Paulus qhuas txog lawv. Peb yuav tsum txhawb peb cov nkauj muam hauv lub koom txoos thiab. Thaum peb ua li no, peb qhia rau lawv tias peb hlub lawv li lawv yog peb tsev neeg.