1, 2. (1) Vim li cas peb thiaj tos ntsoov Amankedoos? (2) Hauv zaj no peb yuav kawm txog cov lus nug twg?

IB TXHIA neeg ntseeg hais tias ib ntsuj rog nus qhias (nuclear) lossis ib qho xwm txheej phem yuav los ua rau lub ntiajteb no puam tsuaj tag. Tiamsis phau Vajlugkub tsis qhia li ntawd. Phau Vajlugkub qhia tias tsis ntev tom ntej yuav muaj ib ntsuj rog uas yuav ua tau ntau yam zoo. Ntsuj rog no hu ua Amankedoos thiab tej uas phau Vajlugkub hais txog Amankedoos yuav ua rau peb zoo siab heev. (Tshwmsim 1:3) Ntsuj rog Amankedoos yuav tsis ua kom noob neej puam tsuaj mus, tiamsis yuav cawm lawv dim! Yuav ua li no li cas?

² Phau Vajlugkub qhia tias ntsuj rog Amankedoos yuav cawm tau noob neej. Yuav cawm tau noob neej li cas? Ntsuj rog Amankedoos yuav rhuav tshem tibneeg tej tseem fwv, cov neeg limhiam, thiab cov neeg uas ua rau lub ntiajteb puam tsuaj. Thaum kawg tsuas tshuav cov neeg ncaj ncees lawm xwb. (Tshwmsim 11:18) Cia peb kawm txog 4 lo lus nug uas yuav pab peb to taub txog tej no: Amankedoos yog dabtsi? Yuav muaj dabtsi tshwm sim ua ntej ntsuj rog Amankedoos? Yuav ua li cas peb thiaj dim Amankedoos? Peb yuav ua li cas peb txojkev ntseeg thiaj ruaj khov mus txog Amankedoos?

3. (1) Lo lus “Amankedoos” txhais li cas? (2) Raws li Tshwmsim 16:14, 16, vim li cas peb ho paub tias Amankedoos tsis yog ib qho tseem chaw tiag?

³ Nyeem Tshwmsim 16:14, 16. Phau Vajlugkub tsuas siv lo lus “Amankedoos” ib zaug xwb. Lo lus no yog ib lo lus Henplais uas txhais tias lub roob Menkidaus. (Tshwmsim 16:16) Puag thaum ub Menkidaus yog ib lub nroog hauv tebchaws Yixalayees. (Yausuas 17:11) Tiamsis Amankedoos tsis yog ib qho chaw tiag tiag nyob hauv ntiajteb no. Amankedoos tsuas hais txog lub sijhawm “txhua  tus vajntxwv uas nyob hauv ntiajteb no” sib sau ua ke tuaj tawm tsam Yehauvas xwb. (Tshwmsim 16:14) Tiamsis hauv zaj no, peb kuj yuav siv lo lus “Amankedoos” los hais txog ntsuj rog tom qab kiag cov vajntxwv sib sau ua ke thiab. Ua cas peb thiaj paub tias Amankedoos tsis yog ib qho tseem chaw tiag? Peb paub li ntawd rau qhov (1) tsis muaj ib lub roob hu ua Menkidaus nyob qhovtwg. (2) Nyob ib ncig ntawm lub nroog Menkidaus tsis muaj chaw dav txaus tag nrho cov vajntxwv hauv ntiajteb no, lawv cov tub rog, thiab lawv tej cuab yeej ua rog. (3) Ntsuj rog Amankedoos yuav pib thaum ntiajteb tej “vajntxwv” tawm tsam Vajtswv cov tibneeg uas nyob thoob plaws ntiajteb.

4. Thaum Yehauvas hais txog ntsuj rog kawg nkaus vim li cas nws ho hais txog Menkidaus?

⁴ Thaum Yehauvas hais txog ntsuj rog kawg nkaus vim li cas nws ho hais txog Menkidaus? Puag thaum ub cov Yixalayees ntaus ntau ntsuj rog rau hauv lub nroog Menkidaus thiab hauv lub Hav Yelelees. Tej thaud Yehauvas pab lawv ntaus yeej thiab. Xws li “ntawm tus dej Menkidaus,” Vajtswv pab cov Yixalayees tus thawj tswj Npalaj kov yeej Kana-as tus thawj tub rog Xixelas thiab nws cov tub rog. Npalaj thiab tus cev Vajtswv lus Denpaulas ua Yehauvas tsaug uas Nws ua txujci pab lawv yeej ntsuj rog ntawd. Nkawd hu ib zaj nkauj tias: “Tej hnubqub tua saum nruab ntug . . . tuaj tua Xixelas. Tus dej Kisoos huam los tshoob lawv mus povtseg lawm.”​—Cov Thawjtswj 5:19-21.

5. Ntsuj rog Amankedoos thiab ntsuj rog uas Npalaj tua ntawm Menkidaus sib txawv li cas?

⁵ Npalaj thiab Denpaulas nkawd xaus nkawd zaj nkauj li no: “[Yehauvas], thov kom cov yeebncuab tuag tas ib yam li ntawd ntag, tiamsis thov kom koj cov phoojywg ci ntsa iab ib yam li thaum lub hnub nyuam qhuav tawm tuaj!” (Cov Thawjtswj 5:31) Ib yam li ntawd, thaum txog ntsuj rog Amankedoos, Vajtswv cov yeeb ncuab yuav raug puam tsuaj thiab nws cov phoojywg yuav dim. Tiamsis 2 ntsuj rog no muaj ib qho txawv thiab. Ntsuj rog Amankedoos, Vajtswv cov tibneeg yuav tsis ua rog. Lawv yeej tsis nqa tej cuab yeej ua rog dabtsi li thiab! Lawv lub zog yog lawv ‘nyob twjywm thiab cia siab rau Vajtswv’ thiab nws cov tub rog saum ntuj.​—Yaxayas 30:15; Tshwmsim 19:11-15.

6. Thaum txog ntsuj rog Amankedoos Vajtswv yuav ua li cas kov yeej nws cov yeeb ncuab?

⁶ Thaum txog ntsuj rog Amankedoos Vajtswv yuav ua li cas kov yeej nws cov yeeb ncuab? Tej zaum nws yuav siv ntau yam xws li av qeeg, lawg, thiab xob laim. (Yauj 38:22, 23; Exekees 38:19-22) Tej zaum nws yuav ua kom nws cov yeeb ncuab ib tug tig rov tawm tsam ib tug thiab. (2 Xwmtxheej Vajntxwv 20:17, 22, 23) Lossis siv nws cov timtswv los yog tubtxib saum ntuj los tua cov neeg limhiam. (Yaxayas 37:36) Txawm Vajtswv yuav siv dabtsi los, nws yuav yog tus kov yeej. Cov tibneeg uas tawm tsam Vajtswv txhua tus yuav raug puam tsuaj thiab txhua tus ncaj ncees yuav dim.​—Pajlug 3:25, 26.

7, 8. (1) Raws li 1 Thexalaunikes 5:3, tej nom tswv yuav tshaj tawm ib yam txawv heev li cas? (2) Vim li cas tej uas nom tswv tshaj tawm ntawd ho yog lus dag xwb?

⁷ Tej nom tswv yuav tshaj tawm tias “Peb tau zoo noj thiab tau zoo nyob kawg li lawm.” Hauv 1 Thexalaunikes 5:2 (NWT), “Yehauvas hnub” yog hais txog “tej kev tsimtxom uas loj heev.” (Tshwmsim 7:14) Yuav ua li cas peb thiaj paub tias thaum twg tej kev tsim txom uas loj heev yuav pib? Phau Vajlugkub hais tias cov nom tswv yuav tshaj tawm ib yam uas txawv heev ces yuav pib thaum ntawd ntag.

⁸ Tej nom tswv yuav tshaj tawm tias “peb tau zoo noj thiab tau zoo nyob kawg li lawm.” Vim li cas lawv yuav hais li ntawd? Peb tsis paub tseeb. Ua li kev ntseeg cuav cov thawj coj puas yuav nrog lawv tshaj tawm thiab? Tej zaud. Txawm li cas los peb paub tseeb tias tej uas lawv hais tsuas yog lus dag los ntawm tej dab los xwb. Cov lus dag ntawd phem kawg li rau qhov yuav ua rau tibneeg xav tias tebchaws nyob tiaj tus lawm  tiamsis tiag mas tej kev tsim txom loj kawg nkaus uas tsis tau pom dua twb los txog lawm. “Tamsim ntawd lawv yuav raug kev puastsuaj. Lawv yuav khiav tsis dim ib yam li tus pojniam uas mob plab yuav yug menyuam.” Ua li Yehauvas cov tub qhe ne? Lawv tsis paub tias kev tsim txom yuav los rau thaum twg. Tiamsis thaum pib kiag lawv yuav tsis ntshai rau qhov lawv twb npaj tos lawm.

9. Yehauvas puas yuav ua ib zaug rhuav tshem Xatas lub qab ntuj no? Piav seb.

⁹ Yehauvas yuav tsis ua ib zaug rhuav tshem Xatas lub qub ntuj no li Nau-es tiam uas nws tso dej los nyab ntiajteb. Tiamsis nws yuav ua ob zuag tshem. Yehauvas yuav xub rhuav tshem lub nroog Npanpiloos uas loj dua ntais uas yog tag nrho tej kev ntseeg cuav. Tag ntawd ces nws mam rhuav tshem Xatas lub qab ntuj kev nom tswv, kev tsov rog, thiab kev lag luam kom puam tsuaj tag. Cia peb ua tib zoo kawm seb 2 qho xwm txheej no yuav muaj li cas.

10. Raws li Tshwmsim 17:1, 6 thiab 18:24, vim li cas Yehauvas yuav ua kom kev ntseeg cuav puam tsuaj mus?

¹⁰ “Tus niamntiav uas phem kawg nkaus . . . yuav raug txim.” (Nyeem Tshwmsim 17:1, 6; 18:24.) Tus niam ntiav piv txwv txog kev ntseeg cuav. Tej kev ntseeg cuav ua kom tibneeg coob leej ntau tus saib tsis taus Yehauvas lub npe. Lawv hais lus dag txog Vajtswv. Lawv zoo li ib tug niam ntiav rau qhov lawv ntxeev siab rau Yehauvas es mus txhawb nqa tej nom tswv ntiajteb lawm. Kev ntseeg cuav caij tsuj lawv cov tswv cuab thiab huab lawv tej nyiaj txiag. Thiab lawv tau muab neeg coob coob tua pov tseg, tsis hais Vajtswv cov tub qhe tibsi. (Tshwmsim 19:2) Yehauvas yuav ua li cas kom kev ntseeg cuav puam tsuaj mus?

11. Tus “tsiaj liab ploog” yog dabtsi thiab Vajtswv yuav siv tus tsiaj no los tawm tsam tus niam ntiav li cas?

¹¹ Yehauvas yuav siv tus “tsiaj liab ploog” thiab nws “kaum tus kub” los rhuav tshem “tus niamntiav uas phem kawg nkaus.” Tus tsiaj liab ploog piv txwv txog lub koom haum ntiajteb UN (United Nations). Kaum tus kub piv txwv txog tag nrho tej tseem fwv uas txhawb lub koom haum UN. Thaum txog lub caij nyoog uas Vajtswv teem cia lawd, cov tseem fwv no yuav tawm tsam tus niam ntiav uas yog kev ntseeg cuav. “Lawv yuav  txeeb txhua yam uas nws muaj huv tibsi mus thiab cia nws nyob liabqab.” Qhov no txhais tias lawv yuav huab nws tej nyiaj txiag thiab nthuav nws lub qe, thaum ntawd sawvdaws yuav pom tias nws phem npaum li cas tiag. (Tshwmsim 17:3, 16) Lawv yuav muab nws rhuav tshem sai heev, zoo li ib hnub xwb. Thaum ntawd, cov uas ntseeg thiab txhawb nqa tus niam ntiav no yuav nyob rua ncauj u, xav tsis thoob li rau qhov nws ib txwm khav tias: “Kuv zaum ntawm no, kuv twb zoo ib yam li tus poj vajntxwv lawm! Kuv tsis yog pojntsuam. Kuv yuav tsis raug kev txomnyem ib zaug li!”​—Tshwmsim 18:7, 8.

12. Yehauvas yuav tsis pub tej nom tswv ua dabtsi rau nws cov tibneeg, thiab yog vim li cas?

¹² Vajtswv yuav tsis pub tej nom tswv los ua kom nws cov tibneeg puam tsuaj tag. Vajtswv cov tibneeg zoo siab hlo ris nws lub npe thiab lawv mloog nws tej lus sam hwm kom tawm plaws hauv kev ntseeg cuav mus. (Tes Haujlwm 15:16, 17; Tshwmsim 18:4) Lawv kuj sib zog pab lwm tus khiav tawm ntawm kev ntseeg cuav thiab. Yog li ntawd, lawv yuav ‘tsis nrog kev ntseeg cuav raug txim!’ Txawm Yehauvas yuav tiv thaiv lawv thaum nws muab kev ntseeg cuav ua puam tsuaj tag los, lawv txojkev ntseeg yuav tsum ruaj khov lawv thiaj thev taus tej uas tseem yuav los.

13. (1) Nkos yog leejtwg? (2) Raws li Exekees 38:2, 8, 9, ntsuj rog Amankedoos yuav pib thaum twg?

¹³ Nkos yuav tawm tsam Vajtswv cov tibneeg. (Nyeem Exekees 38:2, 8, 9.) Tom qab Yehauvas ua kom kev ntseeg cuav puam tsuaj tag lawd, yuav tshuav tib txojkev ntseeg hauv ntiajteb lawm xwb. Txojkev ntseeg ntawd yog Yehauvas Cov Timkhawv. Xatas yuav npau taws heev. Nws yuav siv dab tej lus dag ntxias nom tswv los sib koom ua ke mus tawm tsam Yehauvas cov tub qhe. (Tshwmsim 16:13, 14) Pab nom tswv ntawd hu ua “Nkos . . . uas nyob hauv tebchaws Mankos.” Thaum pab nom tswv no pib tawm tsam Yehauvas cov tibneeg ces ntsuj rog Amankedoos pib thaum ntawd.​—Tshwmsim 16:16.

14. Nkos yuav paub li cas?

¹⁴ Cov nom tswv lossis Nkos yuav tso siab rau nws lub “zog neeg” uas yog nws cov tub rog. (2 Xwmtxheej Vajntxwv 32:8) Peb yuav tso siab rau peb tus Vajtswv Yehauvas. Nkos yuav xav tias  peb ruam heev. Vim li cas? Vim tias txawm tej kev ntseeg cuav muaj zog heev los, lawv tej vajtswv twb cawm tsis tau lawv ntawm tus “tsiaj liab ploog” thiab nws “kaum tus kub.” (Tshwmsim 17:16) Ces Nkos yuav xav tias yoojyim heev rau nws kov yeej peb thiab. Nws yuav tuaj ua rog rau Vajtswv cov tibneeg “ib yam li tauv huab laum nkaus lub tebchaws.” (Exekees 38:16, TT) Tiamsis nws yuav pom tias nws raug ntxiab lawm thiab khiav tsis dim. Nkos mam paub tias tus uas nws tawm tsam yog Yehauvas ntag ib yam li Falaus ntawm Hiavtxwv Liab.​—Khiav Dim 14:1-4; Exekees 38:3, 4, 18, 21-23.

15. Ntsuj rog Amankedoos Khetos yuav ua dabtsi?

¹⁵ Khetos thiab nws cov tub rog saum ntuj yuav tiv thaiv Vajtswv cov tibneeg thiab lawv yuav muab cov nom tswv thiab lawv tej tub rog ua puam tsuaj tag. (Tshwmsim 19:11, 14, 15) Tiamsis yuav ua li cas rau Xatas tus uas dag ntxias tej nom tswv kom lawv mus tawm tsam Vajtswv cov tibneeg rau thaum ntsuj rog Amankedoos? Yexus yuav muab Xatas thiab nws cov dab pov rau hauv ib lub qhov tob tob thiab muab ntsuas phoo xauv 1,000 xyoo.​—Tshwmsim 20:1-3.

16. (1) Peb yuav ua li cas thiaj yog peb paub Vajtswv? (2) Thaum ntsuj rog Amankedoos, yuav ua li cas rau cov uas paub Vajtswv?

¹⁶ Txawm peb paub qhov tseeb tau ntev li cas los, yuav kom peb dim Amankedoos, peb lub neej yuav tsum qhia tias peb paub Vajtswv. Qhov uas peb paub Vajtswv yog peb “mloog Vajtswv lus” thiab “ntseeg Txojmoo Zoo uas hais txog peb tus Tswv Yexus.” (2 Thexalaunikes 1:7-9) Thaum peb paub tej uas Vajtswv nyiam thiab tsis nyiam thiab paub nws tej kevcai thiaj yog peb paub Vajtswv. Tsis tas li ntawd xwb, yog peb hlub nws thiab mloog nws lus thiab pe hawm nws tib leeg xwb, kuj yog peb paub nws thiab. (1 Yauhas 2:3-5; 5:3) Yog peb ua tej no ces Vajtswv yuav paub peb. Qhov uas Vajtswv paub peb yog qhov uas nws txaus siab rau peb. (1 Kauleethaus 8:3) Thaum kawg peb yuav dim ntsuj rog Amankedoos!

17. Mloog “Txojmoo Zoo uas hais txog peb tus Tswv Yexus” yog li cas?

¹⁷ “Txojmoo Zoo uas hais txog peb tus Tswv Yexus” yog tag nrho tej lus qhuab qhia uas Yexus  hais hauv phau Vajlugkub. Peb mloog Txojmoo Zoo thaum peb muab tej uas Yexus qhia coj los siv hauv peb lub neej, muab Yehauvas tes haujlwm tso ua ntej, thiab mus tshaj tawm txog Nws lub Nceeg Vaj. (Mathais 6:33; 24:14) Tsis tas li ntawd xwb, cov xaiv tseg tes haujlwm tseem ceeb heev, peb yuav tsum txhawb lawv thiab.​—Mathais 25:31-40.

18. Cov xaiv tseg yuav pauj txiaj ntsig rau lwm pab yaj li cas?

¹⁸ Lwm pab yaj tau pab cov xaiv tseg ntau heev. Tsis ntev xwb, cov xaiv tseg yuav pauj txiaj ntsig rau lawv. (Yauhas 10:16) Lawv yuav ua li no li cas? Ua ntej ntsuj rog Amankedoos pib, tag nrho 144,000 tus xaiv tseg twb mus ua tubtxib saum ntuj lawm thiab lawv yuav tsis txawj tuag. Thaum ntawd lawv sawvdaws yuav tiv thaiv Yehauvas cov “neeg coob coob suav tsis txheeb” thiab nrog cov tub rog saum ntuj muab Nkos ua kom puam tsuaj tas. (Tshwmsim 2:26, 27; 7:9, 10) Pab neeg coob coob yuav zoo siab heev tias thaum cov uas Yehauvas xaiv tseg tseem nyob hauv ntiajteb, lawv pab txhawb cov xaiv tseg tes haujlwm!

19, 20. Txawm peb muaj kev nyuaj siab li cas los, yuav ua li cas peb txojkev ntseeg thiaj ruaj khov mus txog Amankedoos?

¹⁹ Nyob rau tiam kawg no, Yehauvas cov tibneeg yeej raug ntau yam kev nyuaj siab. Txawm li ntawd los, peb tseem zoo siab nyiaj tiag. (Yakaunpaus 1:2-4) Ib qho uas pab tau peb yog qhov uas peb niaj hnub thov Vajtswv pab. (Lukas 21:36) Tsis tas li ntawd xwb, peb yuav tsum rau siab kawm Vajtswv Txojlus txhua hnub thiab ua tib zoo xav txog tej uas peb kawm, xws li tej lus faj lem uas yuav muaj tiav rau peb tiam. (Phau Ntawv Nkauj 77:12) Yog peb ua tej no thiab mus qhia Vajlugkub ces peb txojkev ntseeg thiab txojkev cia siab yuav ruaj khov!

²⁰ Sim xav seb koj yuav zoo siab npaum li cas thaum lub nroog Npanpiloos uas loj dua ntais raug puam tsuaj tag thiab ntsuj rog Amankedoos xaus lawm! Tsis tas li ntawd xwb, koj yuav zoo siab heev tias sawvdaws hwm Vajtswv lub npe thiab pom tias tsim nyog nws ua tus kav. (Exekees 38:23) Cov uas paub Vajtswv, mloog nws tus Tub tej lus, thiab thev mus txog thaum kawg yeej tos ntsoov Amankedoos.​—Mathais 24:13.