1. Peb tau txais koob hmoov dabtsi?

 YOG ib txoj koob hmoov zoo kawg li uas peb tau nyob hauv Yehauvas lub koom txoos. Peb muaj kev kaj siab thiab kev zoo siab heev thaum peb teev tiam Yehauvas ua ke nrog peb cov kwvtij nkauj muam. Koj puas muaj ib tes haujlwm hauv lub koom txoos thiab?

2. Hauv tus tubtxib Paulus ob peb tsab ntawv, nws siv zaj lus piv txwv twg?

² Hauv tus tubtxib Paulus ob peb tsab ntawv, nws muab lub koom txoos piv rau ib lub cev. Nws kuj muab cov neeg hauv lub koom txoos piv rau lub cev ntawd tej tes taw taubhau. (Loos 12:4-8; 1 Kauleethaus 12:12-27; Efexus 4:16) Peb yuav kawm tau ntau yam ntawm Paulus zaj lus piv txwv no tias peb muaj feem dabtsi hauv lub koom txoos.

3. Hauv zaj no peb yuav tham txog 3 lo lus nug twg?

³ Txawm hais tias peb yog haiv neeg twg, peb muaj peb pluag, thiab peb muaj kev kawm ntaub kawm ntawv thiab tsis muaj los peb txhua tus yeej muaj nuj nqis rau Yehauvas. Peb sawvdaws yeej muaj cuab kav txhawb tau lub koom txoos. Hauv zaj no, peb yuav kawm txog Paulus zaj lus piv txwv thiab teb cov lus nug no: (1) Vim li cas peb thiaj muaj nuj nqis hauv Yehauvas lub koom txoos? (2) Peb yuav ua li cas yog peb xav tias peb tsis tseem ceeb dabtsi hauv lub koom txoos? Thiab (3) vim li cas peb yuav tsum rau siab ntso ua tes haujlwm uas Yehauvas muab rau peb?

4. Loos 12:4, 5 qhia peb li cas?

⁴ Hauv Paulus zaj lus piv txwv, nws hais tias: “Peb lub cev yeej muaj ntau yam los koom ua ke, thiab txhua yam ntawd nyias ua nyias haujlwm. Ib yam nkaus li ntawd, txawm yog peb muaj coob leej los peb nrog Yexus Khetos koom ua ib lub cev, peb puavleej koom ib lub cev ib yam li peb lub cev muaj ntau yam sib koom.” (Loos 12:4, 5) Thawj yam uas peb kawm tau ntawm Paulus zaj lus piv txwv no mas yog tias txawm peb nyias muaj nyias haujlwm ua hauv lub koom txoos los peb yeej muaj nuj nqis ib yam nkaus hauv Yehauvas tsev neeg.

5. Yehauvas txhawb lub koom txoos li cas?

⁵ Thaum koj xav txog cov uas muaj haujlwm ua hauv lub koom txoos, koj xav txog leejtwg xwb? Tej zaum koj yuav xav txog cov kwvtij uas ntaus thawj. (1 Thexalaunikes 5:12; Henplais 13:17) Yehauvas cia Yexus pub cov kwvtij los pab Nws lub koom txoos. (Efexus 4:8, NWT ) Cov uas nws pub ntawd ib txhia yog Pab Uas Ntaus Thawj, cov uas pab Pab Uas Ntaus Thawj, cov uas Pab Saib Xyuas Ib Ceg, cov saib xyuas thaj tsam, cov uas qhia tej kev kawm Vajlugkub, cov txwj laus hauv lub koom txoos, thiab cov tub leg num. Cov kwvtij no puavleej yog lub hwj huam dawb huv xaiv tsa los saib xyuas Yehauvas cov neeg thiab txhawb lub koom txoos.​—1 Petus 5:2, 3.

6. Raws li 1 Thexalaunikes 2:6-8, cov kwvtij uas lub hwj huam xaiv tsa rau siab ua dabtsi xwb?

⁶ Lub hwj huam dawb huv xaiv tsa cov kwvtij ib leeg los ua ib txoj haujlwm hauv lub koom txoos. Zoo ib yam li lub cev muaj tes taw taubhau los sib koom ua haujlwm pab lub cev, cov kwvtij uas lub hwj huam dawb huv xaiv tsa sib zog ua haujlwm pab lub koom txoos ib yam li ntawd. Lawv rau siab ua lawv tes haujlwm tsis yog kom lwm tus qhuas lawv tiamsis kom lawv txhawb tau cov kwvtij nkauj muam xwb. (Nyeem 1 Thexalaunikes 2:6-8.) Peb ua Yehauvas tsaug uas cov kwvtij no zoo siab hlo pab peb, tsis khuv xim lawv lub zog li.

7. Cov uas ua haujlwm puv ntoob rau Yehauvas tau txais koob hmoov li cas?

⁷ Cov kwvtij nkauj muam hauv lub koom txoos ib txhia yog cov tubtxib tshaj tawm txawv tebchaws, cov tho kev tshwj xeeb, lossis cov tho kev. Kuj muaj cov kwvtij nkauj muam thoob plaws ntiajteb uas ua haujlwm puv ntoob rau Yehauvas uas mus tshaj tawm thiab coj tibneeg los ua Yexus cov thwjtim. Vim lawv ua li no lawv thiaj pab tau tibneeg coob coob los ua Yexus cov thwjtim. Txawm cov uas ua haujlwm puv ntoob rau Yehauvas tsis muaj nyiaj muaj txiaj thiab qhov txhia chaw li luag tej los Yehauvas yeej foom koob hmoov rau lawv. (Malakaus 10:29, 30) Peb hlub cov kwvtij nkauj muam no heev thiab peb zoo siab tias lawv nyob hauv lub koom txoos!

8. Ua cas txhua tus uas mus tshaj tawm ho muaj nuj nqis rau Yehauvas?

⁸ Puas yog cov kwvtij uas lub hwj huam xaiv tsa thiab cov uas ua haujlwm pub ntoob rau Yehauvas thiaj tseem ceeb hauv lub koom txoos xwb? Tsis yog! Txhua tus uas tshaj tawm txoj xov zoo yeej muaj nuj nqis rau Yehauvas thiab lub koom txoos huv tibsi. (Loos 10:15; 1 Kauleethaus 3:6-9) Lub hom phiaj tseem ceeb tshaj plaws rau lub koom txoos yog mus coj neeg los ua peb tus Tswv Yexus Khetos cov thwjtim. (Mathais 28:19, 20; 1 Timautes 2:4) Tsis hais cov tshaj tawm uas twb ua kevcai raus dej lawm los tsis tau, puavleej rau siab ntso muab tes haujlwm no tso ua ntej hauv lawv lub neej.​—Mathais 24:14.

9. Vim li cas peb thiaj li saib cov nkauj muam hauv lub koom txoos muaj nqis?

 ⁹ Yehauvas yeej saib cov nkauj muam hauv lub koom txoos muaj nqis heev tsis hais cov muaj txiv los tsis muaj, cov niam thiab cov poj ntsuam los Yehauvas muab haujlwm rau lawv sawvdaws ua. Phau Vajlugkub tham txog ntau tus pojniam uas ua haum Vajtswv siab tias lawv muaj laj lim tswvyim, muaj kev ntseeg, kub siab lug mus tshaj tawm, siab tawv, siab dawb siab zoo, thiab ua haujlwm zoo. (Lukas 8:2, 3; Tes Haujlwm 16:14, 15; Loos 16:3, 6; Filipis 4:3; Henplais 11:11, 31, 35) Peb ua Yehauvas tsaug uas muaj cov nkauj muam Khixatia zoo li no hauv peb lub koom txoos.

10. Vim li cas peb thiaj saib cov uas laus lawm hauv lub koom txoos muaj nqis?

¹⁰ Peb zoo siab tias peb muaj cov laus nrog peb hauv lub koom txoos thiab. Hauv tej lub koom txoos, muaj cov kwvtij nkauj muam laus lawm uas yeej ib txwm teev tiam Yehauvas hos muaj ib txhia nyuam qhuav los kawm paub qhov tseeb tsis ntev xwb. Txawm li cas los muaj coob tus muaj mob muaj nkeeg vim lawv hnub nyoog laus lawm, lawv thiaj ua tsis tau npaum li lawv lub siab xav hauv lub koom txoos thiab thaum mus tshaj tawm. Tiamsis lawv tseem mus tshaj tawm li lawv ua tau thiab siv lawv lub dag lub zog los txhawb thiab cob qhia lwm tus. Peb kawm tau ntau yam los ntawm lawv thiab lawv yeej muaj nqis heev rau Yehauvas thiab rau peb.​—Pajlug 16:31.

11, 12. Cov tub ntxhais hluas hauv lub koom txoos txhawb tau koj li cas?

¹¹ Cov tub ntxhais hluas hauv lub koom txoos los kuj muaj nuj nqis thiab. Lawv ntsib teeb meem ntau yam vim lawv loj hlob hauv lub qab ntuj uas Xatas yog tus kav thiab lawv kawm tau tej tswvyim uas tsis raws li Yehauvas txojkev xav. (1 Yauhas 5:19) Tiamsis yeej txhawb tau peb lub zog heev thaum peb pom cov hluas teb tom kev sib txoos, mus tshaj tawm, thiab ua siab tawv tiv thaiv lawv txojkev ntseeg. Cov hluas, nej yeej muaj nqis heev hauv Yehauvas lub koom txoos.​—Phau Ntawv Nkauj 8:2.

 ¹² Tiamsis peb cov kwvtij nkauj muam ib txhia tsis xav tias lawv muaj nuj nqis dabtsi hauv lub koom txoos. Yog peb xav li ntawd, puas muaj dabtsi pab tau peb? Cia peb kawm ntxiv.

13, 14. Vim li cas ib txhia thiaj xav tias lawv tsis muaj nuj nqis dabtsi hauv lub koom txoos?

¹³ Paulus hais tias: “Yog kotaw hais tias, ‘Kuv tsis yog tes, mas kuv tsis koom lub cev,’ txawm yog kotaw yuav hais li ntawd los nws yeej koom rawv lub cev. Yog pobntseg hais tias, ‘Kuv tsis yog qhovmuag, mas kuv tsis koom lub cev,’ txawm yog pobntseg yuav hais li ntawd los nws yeej koom rawv lub cev thiab.” (1 Kauleethaus 12:15, 16) Zoo ib yam li Paulus hais no, muaj coob tus niaj hnub nimno xav tias lawv tsis muaj nuj nqis dabtsi hauv lub koom txoos.

¹⁴ Yog koj pheej muab koj piv rau lwm tus hauv lub koom txoos ces tej zaum koj yuav pib xav tias koj tsis muaj nuj nqis dabtsi hauv lub koom txoos. Muaj ib txhia hauv lub koom txoos txawj qhuab qhia, txawj ua haujlwm zoo, lossis paub txhawb lwm tus lub zog. Tej zaum koj yuav xav tias koj ua tsis tau zoo npaum li lawv. Qhov no qhia tias koj yog ib tug neeg txo hwjchim. (Filipis 2:3) Tiamsis koj yuav tau ceev faj. Yog koj pheej muab koj piv rau cov uas txawj dua koj ces yeej yuav ua rau koj qaug zog. Koj yuav pib xav tias koj tsis muaj nuj nqis dabtsi hauv lub koom txoos li. Yuav ua li cas koj thiaj tsis xav li ntawd?

15. Raws li 1 Kauleethaus 12:4-11, peb yuav tsum xav li cas txog qhov uas peb txawj?

¹⁵ Yav thaum ub Yehauvas pub nws lub hwj huam dawb huv rau cov Khixatia kom nyias txawj nyias ib yam. (Nyeem 1 Kauleethaus 12:4-11.) Txawm li ntawd los lawv muaj nuj nqis ib yam nkaus. Niaj hnub nimno Yehauvas tsis ua txujci li ntawd rau peb lawm. Tiamsis peb kawm tau li cas xwb? Peb kawm tau tias txawm peb nyias txawj nyias ib yam los peb yeej muaj nuj nqis ib yam nkaus rau Yehauvas.

16. Peb yuav tsum ua li tus tubtxib Paulus cov lus qhuab ntuas twg?

 ¹⁶ Peb yuav tsum tsis txhob muab peb piv rau lwm tus Khixatia tiamsis peb yuav tsum ua li tus tubtxib Paulus hais no: “Txhua tus nyias yuav tsum ua tib zoo xyuas nyias tes haujlwm saib zoo li cas tso. Yog leejtwg tes haujlwm zoo lawm, tus ntawd thiaj khav tau tsis tas nws yuav coj nws txoj haujlwm mus piv rau lwm tus txoj.”​—Kalatias 6:4.

17. Yog peb xyaum ua li Paulus hais ces yuav pab tau peb li cas?

¹⁷ Yog peb xyaum ua li Paulus cov lus thiab ua zoo tshuaj xyuas peb tes haujlwm ces peb yuav pom tias peb yeej txawj ua tej yam uas lwm tus tsis txawj thiab. Muab piv txwv li no: Tej zaum ib tug txwj laus tsis txawj cev lus qhuab qhia saum sam thiaj tiamsis nws ho txawj coj tibneeg los ua Yexus cov thwjtim. Lossis tej zaum nws tsis paub haujlwm zoo npaum li lwm tus tiamsis nws ho siab dawb siab zoo thiab cov kwvtij nkauj muam tsis ntshai mus cuag nws. Lossis tej zaum nws yog ib tug uas nyiam txais tos qhua heev. (Henplais 13:2, 16) Thaum peb paub hais tias peb ua tau dabtsi los pab lub koom txoos lawm ces yuav ua rau peb zoo siab. Thiab peb yuav tsis khib cov kwvtij uas txawj tej yam uas peb tsis txawj.

18. Yuav li cas peb thiaj txawj qhia ntxiv?

¹⁸ Txawm peb muaj haujlwm dabtsi ua hauv lub koom txoos los peb yuav tsum rau siab ntso ua kom peb ua tau zoo zuj zus ntxiv. Yehauvas siv nws lub koom haum los qhia peb kom peb txawj ua peb tes haujlwm zoo ntxiv. Xws li thaum peb mus Kev Sib Txoos 1, peb kawm seb peb yuav ua li cas peb thiaj txawj mus tshaj tawm. Yog li, koj puas xyaum ua li tej koj kawm thiab?

19. Koj yuav tsum ua li cas koj thiaj tau mus Kev Kawm Rau Cov Qhia Lub Nceeg Vaj?

¹⁹ Yehauvas lub koom haum muaj Kev Kawm Rau Cov Qhia Lub Nceeg Vaj rau cov kwvtij nkauj muam uas ua haujlwm puv ntoob rau Yehauvas uas muaj hnub nyoog 23 txog 65 xyoos. Tej zaum koj yuav xav tias txawm li cas los ntshe koj yuav tsis tau mus koom txojkev kawm no. Tiamsis tsis txhob xav li ntawd. Ua zoo xav seb yog vim li cas koj thiaj xav mus. Ces xav seb koj yuav tsum ua li cas koj thiaj tau mus. Yog koj rau siab thiab cia Yehauvas pab koj ces qhov uas koj xav tias koj ua tsis tau los koj yuav ua tau.

20. Peb kawm tau li cas los ntawm Paulus cov lus hauv Loos 12:6-8?

²⁰ Peb kawm tau li cas los ntawm Paulus zaj lus piv txwv hauv Loos 12:6-8? (Nyeem.) Paulus qhia tias txhua tus hauv lub koom txoos nyias txawj nyias ib yam. Tiamsis zaum no nws hais tias peb yuav tsum siv qhov uas peb txawj ntawd los txhawb lub koom txoos.

21, 22. Peb kawm tau li cas ntawm Lanpaw thiab Felitshe?

²¹ Cia peb tham txog ib tug kwvtij hu ua Lanpaw. b Thaum nws tseem ua ib tug tshaj tawm nyob lwm lub tebchaws nws raug hu los ua haujlwm rau hauv lub Npe-ee hauv nws tebchaws. Txawm cov kwvtij hais rau nws tias tsis yog nws ua haujlwm tsis zoo es lawv thiaj muab nws hloov haujlwm los Lanpaw hais tias: “Tau ntau lub hlis kuv tsis kaj siab li vim kuv pheej xav tias ntshe yog kuv ua kuv tes haujlwm tsis zoo. Muaj ntau zaus kuv xav tias kuv yuav tso tseg tsis ua haujlwm hauv Npe-ee lawm.” Ua li cas nws thiaj rov muaj kev kaj siab? Ib tug txwj laus hais rau nws tias txhua txoj haujlwm uas peb ua tas los lawd twb yog Yehauvas cob qhia kom peb txawj  ua peb tes haujlwm tamsim no xwb. Lanpaw mam li ras tias nws yuav tsum tsis txhob pheej xav txog nws lub neej yav tas los tiamsis nws yuav tsum xav txog qhov uas nws ua tau tamsim no xwb.

²² Kwvtij Felitshe Epixikapaus (Felice Episcopo) los ntsib ib yam li Lanpaw thiab. Nws thiab nws tus pojniam kawm tiav kev kawm Kile-a xyoo 1956 thiab nkawd ua tes haujlwm saib xyuas thaj tsam hauv tebchaws Npaulivias (Bolivia). Xyoo 1964 nkawd yug tau ib tug tub. Kwvtij Felitshe hais tias: “Yeej nyuaj heev rau wb tso tes haujlwm uas wb nyiam tseg. Kuv hais ncaj tias kuv nkim 1 lub xyoos nkaus rau qhov uas kuv pheej chim rau kuv tus kheej. Tiamsis vim muaj Yehauvas pab kuv, kuv thiaj li hloov tau kuv txojkev xav thiab ua zoo xav seb kuv yuav ua li cas kuv thiaj ua tau ib leej txiv zoo rau kuv tus tub.” Koj puas tau xav ib yam li Lanpaw thiab Felitshe dua li? Koj puas tu siab tias nimno koj tsis tau ua tej haujlwm uas koj ua yav tas los lawm? Yog koj xav li no ces ua zoo xav txog tej uas koj ua tau tamsim no los teev tiam Yehauvas thiab pab koj cov kwvtij nkauj muam. Rau siab ntso ua haujlwm rau Yehauvas thiab siv qhov uas koj txawj los pab lwm tus. Yog koj ua li no ces koj yuav muaj kev zoo siab dua thiab koj yuav txhawb tau lub koom txoos.

23. (1) Peb yuav tsum ua zoo xav txog dabtsi? (2) Zaj tom ntej peb yuav tham txog dabtsi?

²³ Peb sawvdaws muaj nuj nqis rau Yehauvas thiab nws xav kom peb yog nws tsev neeg. Yog peb ua zoo xav txog tej uas peb txawj ua los txhawb peb cov kwvtij nkauj muam thiab rau siab ntso ua li ntawd ces peb yuav tsis xav tias peb tsis muaj nuj nqis dabtsi hauv lub koom txoos. Yog li, peb yuav saib cov nyob hauv lub koom txoos zoo li cas? Peb yuav ua li cas lawv thiaj paub tias peb hlub thiab saib taus lawv? Zaj tom ntej peb yuav tham txog 2 lo lus nug no.