1, 2. (1) Raws li Yexus cov lus sam hwm hauv Mathai 28:18-20, lub koom txoos Khixatia lub luag haujlwm tseem ceeb tshaj plaws yog dabtsi? (2) Hauv zaj no peb yuav kawm txog 4 lo lus nug twg?

TOM QAB Yexus sawv hauv qhov tuag rov los nws hais kom nws cov tubtxib mus ntsib nws rau saum ib lub roob hauv Kalilais. Ntshe cov tubtxib zoo siab heev thaum lawv mus txog saum lub roob ntawd. (Mathai 28:16) Tej zaum lub sijhawm no yog thaum nws tshwm rau 500 tawm tus kwvtij pom. (1 Khaulee 15:6) Yexus muab ib teg haujlwm tseem ceeb heev rau lawv ua. Nws sam hwm lawv tias: “Cia li mus coj txhua haiv neeg los ua kuv li thwjtim.”​—Nyeem Mathai 28:18-20.

² Tom qab ntawd, cov thwjtim uas hnov Yexus cov lus los ua lub koom txoos Khixatia thawj 100 xyoo. Thaum ntawd lawv lub luag haujlwm yog mus coj neeg los ua Khetos cov thwjtim. * Niaj hnub no los, tsheej txhiab lub koom txoos Khixatia thoob ntiajteb kuj tseem muaj tib lub luag haujlwm no thiab. Hauv zaj no, peb yuav kawm txog 4 lo lus nug no: Vim li cas coj neeg los ua thwjtim tseem ceeb ua luaj? Peb yuav ua li cas thiaj coj tau neeg los ua thwjtim? Puas yog txhua tus Khixatia muaj feem ua tes haujlwm no? Vim li cas peb yuav tsum ua siab ntev thiaj coj tau neeg los ua thwjtim?

3. Raws li Yauhas 14:6 thiab 17:3, vim li cas coj neeg los ua thwjtim thiaj tseem ceeb ua luaj?

³ Vim li cas coj neeg los ua thwjtim tseem ceeb ua luaj? Rau qhov tsuas yog Khetos cov thwjtim xwb thiaj li nrog tau Vajtswv ua phoojywg. Tsis tas li ntawd xwb, cov uas ua li Yexus hais tau lub neej zoo dua tamsim no thiab yav tom hauv ntej lawv yuav tau txojsia ib txhis tsis kawg. (Nyeem Yauhas 14:6; 17:3.) Tes haujlwm uas Yexus muab rau peb yeej tseem ceeb heev, puas yog? Tiamsis tsis yog peb ua peb xwb. Tus tubtxib Povlauj hais txog nws thiab nws cov phoojywg tias: “Peb koom nrog Vajtswv ua haujlwm.” (1 Khaulee 3:9) Tes haujlwm no yog ib qho koob hmoov zoo heev uas Yehauvas thiab Khetos pub peb ua.

4. Isvee thiab Matide nkawd tus qauv qhia li cas rau peb?

⁴ Thaum peb mus coj neeg los ua Yexus cov thwjtim, yuav ua rau peb zoo siab heev. Xav txog Isvee (Ivan) thiab nws tus pojniam Matide (Matilde) nyob hauv tebchaws Khauloonpia (Colombia). Nkawd qhia Vajlugkub rau ib tug tub hluas hu ua Davi-es (Davier). Davi-es hais rau nkawd tias: “Kuv xav hloov kuv lub neej kawg, tiamsis nyuaj heev.” Nws ntaus nrig yuav nyiaj, haus yeeb haus tshuaj, haus dej haus cawv, thiab nrog nws tus hluas nkauj hu ua Elikam (Erika) nyob. Isvee hais tias: “Davi-es nyob hauv ib lub zos twj cuab deb heev. Wb caij tsheb kauj vab mus tej kev nkos nkos mam txog. Tsis ntev tom qab Davi-es txawm pib hloov nws tus cwj pwm zuj zus, thiaj ua rau Elikam xav kawm thiab.” Davi-es tseg tsis haus yeeb haus tshuaj, tsis haus dej haus cawv, thiab tsis ntaus nrig lawm. Elikam nkawd kuj sib yuav lawm thiab. Matide hais tias: “Thaum Davi-es thiab Elikam nkawd ua kevcai raus dej xyoo 2016, wb xav txog thaum wb nyuam qhuav ntsib Davi-es es nws hais tias ‘Kuv xav hloov kuv lub neej kawg, tiamsis nyuaj heev.’ Thaum ntawd ua rau wb zoo siab heev, wb cia li los kua muag.” Yeej ua rau peb zoo siab kawg li thaum peb coj tau neeg los ua Yexus cov thwjtim.

5. Yuav kom peb coj tau neeg los ua thwjtim, peb yuav tsum xub ua li cas?

⁵ Yuav kom peb coj tau neeg los ua thwjtim, peb yuav tsum xub mus nrhiav cov uas xav paub txog Yehauvas. (Mathai 10:11) Thaum peb siv zog ua li Yexus tau sam hwm es tshaj tawm txoj xov zoo rau txhua tus peb ntsib yuav qhia tias peb yog Yehauvas Cov Timkhawv thiab yog cov tseem Khixatia.

6. Peb yuav ua li cas tibneeg thiaj xav paub xav kawm qhov tseeb?

⁶ Thaum peb nrog tibneeg tham, yuav muaj ib txhia xav paub qhov tseeb ho ib txhia tsis xav paub. Peb yuav nrhiav kev li cas los pab cov uas tsis xav paub? Xaiv tej ntsiab lus uas ntxim lawv yuav nyiam thiab npaj seb yuav hais li cas thiaj raug lawv siab. Peb yuav tau npaj kom zoo peb thiaj txawj qhia Vajlugkub rau lawv.

7. Thaum peb nrog ib tug tham peb hais tau li cas? Vim li cas peb yuav tsum saib taus tus peb nrog tham thiab ua tib zoo mloog nws?

⁷ Tej zaum koj kuj hais tau li no: “Niaj hnub no, muaj cov niam txiv sib nrauj ntau zuj zus lawm xwb. Koj xav, cov niam txiv yuav tsum ua li cas lawv lub neej thiaj khov?” Tom qab ntawd koj mam li tham txog Mathai 7:12 lossis Khaulauxi 3:18, 19. Thaum koj xaiv ib lub ntsiab lus twg, ua tib zoo xav txog cov koj nrog tham. Xav seb lub ntsiab lus ntawd yuav  pab tau lawv li cas yog lawv kawm Vajlugkub. Thaum koj nrog lawv tham, nco ntsoov tias koj yuav tsum saib taus lawv thiab ua tib zoo mloog lawv. Yog koj ua li no, koj yuav to taub lawv zoo dua, lawv kuj yuav xav mloog koj dua thiab.

8. Vim li cas peb yuav tsum rov qab mus xyuas cov peb ntsib tsis tu ncua?

⁸ Yuav kom zaub loj hlob, yuav tsum nco ntsoov ywg dej tsis tu ncua. Ib yam li ntawd, yuav kom ib tug txojkev hlub rau Yehauvas thiab Khetos loj hlob, peb yuav tsum rov qab mus nrog lawv tham txog phau Vajlugkub tsis tu ncua. Ua ntej ib tug yuav kawm Vajlugkub tej zaum koj yuav tau rov mus xyuas nws ntau zaus. Yog vim li cas? Vim tias tsis yog txhua zaus koj mus, nws yuav khoom lossis nyob tsev. Tsis tas li ntawd xwb, tej thaud koj yuav tsum rov mus xyuas nws ob peb zaug kom nws paub koj zoo tso, nws mam kam kawm Vajlugkub.

9, 10. Vim li cas thiaj hais tau tias txhua tus Khixatia muaj feem coj neeg los ua thwjtim?

⁹ Txhua tus Khixatia muaj feem mus nrhiav cov uas xav paub txog Yehauvas. Zoo li thaum ib tug menyuam poob zoo lawd, yuav muaj neeg coob heev sib pab mus nrhiav nws. Tau muaj li no rau ib tug metub uas muaj 3 xyoos. Thaum nws poob zoo lawd, muaj li 500 leej tuaj sib pab nrhiav nws. Muaj li 20 txoos teev tom qab tus menyuam poob zoo, ib tug txivneej mam nrhiav tau tus menyuam ntawd hauv ib daim teb pob kws. Txawm nws yog tus nrhiav tau tus menyuam xwb los, nws tsis kam luag qhuas nws. Nws hais tias: “Muaj coob tus sib pab, peb thiaj nrhiav tau tus metub.”

¹⁰ Tibneeg coob tus zoo li tus metub uas poob zoo ntawd. Lawv tsis pom qab yuav mus qhovtwg thiab tsis muaj kev vam kev cia  siab li. Tiamsis lawv yeej xav tau kev pab. (Efexau 2:12) Peb muaj tshaj li 8 plhom leej uas sib pab nrhiav cov neeg zoo li no. Tej zaum koj yuav nrhiav tsis tau ib tug uas xav kawm Vajlugkub. Tiamsis lwm tus uas mus qhia Vajlugkub hauv koj thaj tsam ho nrhiav tau. Thaum ib tug kwvtij lossis nkauj muam coj tau ib tug los ua Khetos tus thwjtim, txhua tus uas tau koom tes nrhiav yeej zoo siab heev.

11. Txawm koj tsis nrog ib tug kawm Vajlugkub los, koj muaj feem pab lwm tus li cas?

¹¹ Txawm koj tsis nrog ib tug kawm Vajlugkub tamsim no los, koj yeej muaj feem pab lwm tus los ua Yexus ib tug thwjtim. Xws li thaum koj zoo siab tos txais cov uas tuaj tshiab thiab ntaus phoojywg nrog lawv tom Tsev Nceeg Vaj. Yog koj ua li no, lawv yuav pom tias peb yog cov tseem Khixatia tiag. (Yauhas 13:34, 35) Tsis tas li ntawd xwb, thaum koj tsa tes teb es hais lo puav xwb los, koj cov lus mos lus muag thiab qhov uas koj hais lus saib taus lwm tus yuav ua tau ib tug qauv zoo rau tus tuaj tshiab xyaum. Koj kuj coj tau ib tug tshaj tawm tshiab nrog koj mus qhia Vajlugkub thiab qhia kom nws paub siv Vajlugkub. Yog koj ua li no, koj yuav pab nws xyaum li Khetos.​—Luka 10:25-28.

12. Puas yog tias peb yuav tsum txawj txawj ntse ntse peb thiaj coj tau neeg los ua thwjtim?

¹² Tsis yog tias peb yuav tsum txawj txawj ntse ntse es peb thiaj coj tau neeg los ua thwjtim. Vim li cas thiaj hais li no? Cia peb kawm txog Fauxitinam (Faustina) uas nyob tebchaws Npaulivias (Bolivia). Fauxitinam yog ib tug neeg tsis txawj ntawv tiamsis thaum nws pib kawm Vajlugkub nrog Yehauvas Cov Timkhawv nws mam li xyaum nyeem. Nimno nws twb ua kevcai raus dej lawm thiab nyiam qhia Vajlugkub heev. Nws qhia Vajlugkub rau 5 tug neeg txhua lub lim tiam. Txawm Fauxitinam tsis txawj ntawv npaum li cov uas nws qhia Vajlugkub rau los, nws twb pab tau 6 leej los ua kevcai raus dej lawm.​—Luka 10:21.

13. Txawm peb khwv heev los, yog peb lauj sijhawm mus coj neeg los ua thwjtim yuav pab tau peb li cas?

¹³ Cov Khixatia coob tus muaj haujlwm ntau thiab khwv heev. Txawm li ntawd los, lawv tseem lauj sijhawm mus qhia Vajlugkub rau lwm tus. Qhov no ua rau lawv zoo siab heev. Xws li Melanis (Melanie) uas yog ib txhais yim neeg nyob hauv xeev Alaxakas (Alaska). Nws ua haujlwm 5 hnub, nws muaj ib tug ntxhais 8 xyoo, thiab pab tu nws txiv uas mob kheeb xawm (cancer). Nws nyob hauv ib lub zos twj cuab deb heev. Hauv lub zos ntawd tsuas muaj nws tib leeg xwb thiaj yog Yehauvas ib tug Timkhawv. Txawm no heev los, nws thov Yehauvas pab nws mus qhia Vajlugkub kom nws nrhiav tau ib tug uas xav kawm. Tsis ntev xwb, nws txawm ntsib Xala. Xala zoo siab heev thaum nws kawm tias  Vajtswv muaj ib lub npe. Ib ntus tom qab, Xala thiaj pib kawm Vajlugkub lawm. Melanis hais tias: “Txawm kuv lim heev los, hmos 5 (Friday) kuv tus ntxhais wb ua tiag mus qhia Vajlugkub rau Xala. Qhov no pab tau wb heev. Wb nyiam tshawb nrhiav tej lus teb rau tej uas Xala nug txog. Thaum nws los ua Yehauvas ib tug phoojywg, ua rau wb zoo siab heev.” Txawm Xala tsev neeg thiab cov phoojywg tom tshawj (church) tawm tsam nws heev los nws ua siab loj siab tuab rho npe tawm ntawm lub tshawj thiab tom qab ntawd ua kevcai raus dej.

14. (1) Ua cas tes haujlwm mus coj neeg ua thwjtim thiab tes haujlwm mus ntaus ntses ho zoo ib yam? (2) Koj xav li cas txog Povlauj cov lus hauv 2 Timaute 4:1, 2?

¹⁴ Txawm tias koj tseem nrhiav tsis tau ib tug los ua thwjtim los kav tsij rau siab ntso mus nrhiav. Yexus muab tes haujlwm coj neeg los ua thwjtim piv rau tes haujlwm ntaus ntses. Cov neeg ntaus ntses siv sijhawm ntev heev thiaj li ntaus tau ntses. Tej zaum lawv mus tsheej tag hmo mam los tsev hos tej zaum tsis tau kaj ntug lawv twb mus lawm. Tej thaud lawv tseem yuav tau caij nkoj mus deb heev thiab. (Luka 5:5) Ib yam li ntawd, cov Khixatia uas mus nrhiav neeg los ua thwjtim kuj yuav tau sawv ntxov lossis nyob lig kom thiaj nrhiav tau cov xav kawm. Tej thaud lawv tseem yuav tau mus nrhiav qhov txhia chaw thiab. Yog peb rau siab ntso ua li no ces peb yuav nrhiav tau cov uas xav kawm coob tus dua. Koj puas kam mus tshaj tawm rau lub sijhawm lossis rau tej qhov chaw uas yuav ntsib neeg coob dua?​—Nyeem 2 Timaute 4:1, 2.

15. Vim li cas peb yuav tsum ua siab ntev qhia Vajlugkub rau lwm tus?

 ¹⁵ Vim li cas peb yuav tsum ua siab ntev qhia Vajlugkub rau lwm tus? Tsis yog peb qhia Vajlugkub rau lawv xwb, tiamsis peb yuav tsum pab kom lawv nyiam tej uas lawv kawm thiab. Tsis tas li ntawd, Yehauvas yog tus tshoov neeg sau phau Vajlugkub, peb yuav tsum qhia kom lawv paub hlub nws thiab. Thaum peb qhia lawv txog Yexus tej lus sam hwm rau nws cov thwjtim, peb yuav tsum qhia kom lawv paub muab tej lus sam hwm ntawd coj los siv hauv nws lub neej thiab. Yuav tsis yoojyim thiab yuav siv sijhawm ntev heev lawv mam xyaum ua li phau Vajlugkub tej hauv paus ntsiab lus. Yog li ntawd, peb yuav tsum ua siab ntev pab lawv. Muaj tej tug, ob peb hlis xwb twb hloov tau ntau lawm, lwm tus tej zaum yuav ntev heev mam li hloov tau.

16. La-us tus qauv qhia koj li cas?

¹⁶ Ib tug tubtxib tshaj tawm txawv tebchaws hauv Pelus (Peru) ua siab ntev, nws thiaj pab tau ib tug txivneej los ntseeg. Nws hais tias: “Kuv qhia Vajlugkub rau La-us (Raul). Wb kawm tas 2 phau ntawv los tseem nyuaj heev rau nws hloov nws lub neej. Nws thiab nws pojniam nkawd tsis sib haum, nws nyiam hais lus phem heev, thiab nws cov menyuam tsis hwm nws li. Tiamsis nws yeej tuaj peb tej kev sib txoos tsis tu ncua, kuv thiaj li rau siab rov mus xyuas nws thiab pab nws tsev neeg. Twb tau li 3 xyoos tom qab ntawd, nws mam li hloov tau nws lub neej los ua kevcai raus dej.”

17. Zaj tom ntej peb yuav kawm txog dabtsi?

¹⁷ Yexus sam hwm kom peb ‘mus coj txhua haiv neeg los ua nws li thwjtim.’ Ntau zaus peb yuav ntsib cov uas txojkev ntseeg txawv peb li. Peb yuav ntsib tej tug uas tsis mus tshawj thiab tej tus uas tsis ntseeg Vajtswv. Zaj tom ntej peb yuav kawm seb peb yuav coj txoj xov zoo mus qhia rau lawv li cas.