1. Raws li Tej Lus Qhia 7:20, Vaj Ntxwv Xalaumoos qhia li cas rau peb?

 VAJ NTXWV Xalaumoos tau sau tseg li no hais tias: “Nyob hauv lub ntiajteb no yeej tsis muaj ib tug ua zoo txhua lub sijhawm lossis tsis ua txhaum li.” (Tej Lus Qhia 7:20) Yeej muaj tseeb raws li nws tau hais tiag. Peb txhua tus yeej yog noob txaug neeg txhaum. (1 Yauhas 1:8) Yog li ntawd, Vajtswv thiab tib neeg yuav tau zam peb lub txim tas li.

2. Peb puas zoo siab thaum peb ib tug phooj ywg kwv luag zam peb lub txim?

² Thaum peb tau ua rau peb ib tug phooj ywg kwv luag tu siab, yeej npub rawv peb lub siab. Peb thiaj tau thov kom nws zam txim vim peb xav kom txoj kev sib raug zoo rov qab du dais li qhov qub. Thaum nws zam peb lub txim, peb lub ntsej muag yeej luag qas ntxhi.

3. Nyob rau hauv zaj kawm no yuav piav txog dab tsi?

³ Peb yeej xav nrog Yehauvas sib raug zoo txhua lub sij hawm tiam sis muaj tej zaud peb yuav hais tau qho yam los sis ua tau qho yam tsis haum nws siab. Ua li cas peb ho paub tseeb tias Yehauvas tos tsis hnyu yuav zam peb lub txim? Qhov uas peb zam ib tug thiab Yehauvas zam ib tug sib txawv txav li cas, thiab Yehauvas ho zam leej twg?

4. Ua li cas peb ho paub tseeb tias Yehauvas tos tsis hnyu zam txim?

⁴ Vajtswv Txoj Lus sau tseg lawm hais tias nws yeej tos tsis  hnyu zam txim. Thaum Mauxes nyob saum Roob Xinais, Yehauvas xav kom Mauxes paub tseeb tseeb tias nws zoo li cas. Yog li ntawd, nws thiaj li txib ib tug tub txib saum ntuj los hais tias: “Kuv yog [Yehauvas], Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees. Kuv txojkev hlub yuav nyob nrog ntau txhiab tiam neeg, thiab zam txim rau tej neeg ua phem thiab muaj txim.” (Khiav Dim 34:6, 7) Yog li ntawd, Yehauvas yeej siab dawb siab zoo, hmov tshua thiab tos tsis hnyu zam tus neeg uas tso nws tej kev txhaum tseg.​—Nehemis 9:17; Phau Ntawv Nkauj 86:15.

5. Raws li Phau Ntawv Nkauj 103:13, 14, vim Yehauvas paub txhua yam txog peb nws thiaj ua li cas xwb?

⁵ Yehauvas yog tus Tswv Tsim ces nws yeej paub txhua yam txog txhua tus tib neeg uas nyob hauv ntiaj teb no. (Phau Ntawv Nkauj 139:15-17) Yog li ntawd, ib tiam tag ib tiam tuaj los nws yeej paub hais tias peb yeej muaj kev txaug kev txhaum. Ntxiv ntawd, nws paub hais tias tos peb coj li peb coj hauv peb lub neej los twb yog vim tej peb raug yav tag los lawm. Yehauvas paub peb yam li no, nws thiaj hmov tshua peb txhua leej txhua tus.​—Phau Ntawv Nkauj 78:39; nyeem Phau Ntawv Nkauj 103:13, 14.

6. Yehauvas qhia li cas tias nws tos tsis hnyu yuav zam peb lub txim?

⁶ Yehauvas paub ntsoov hais tias tim thawj tug txiv neej uas yog Adas, peb thiaj li muaj kev txaug kev txhaum thiab poob rau txoj kev tuag. (Loos 5:12) Tsis muaj ib yam uas peb tib neeg yuav siv tau los mus daws peb tej kev txhaum thiab txhaws txoj kev tuag uas Adas tau ua. (Phau Ntawv Nkauj 49:7-9) Yog li ntawd, Vajtswv Yehauvas thiaj li npaj siab los daws kom peb dim. Nyob rau hauv Yauhas 3:16 thiaj li hais tias Yehauvas txib nws tib Leeg Tub los tuag theej peb lub txhoj. (Mathais 20:28; Loos 5:19) Yexus uas yog nws Leej Tub thiaj li los tuag txhaws peb txoj kev txhaum xwv txhua tus uas ntseeg Yexus thiaj dim. (Henplais 2:9) Mob Yehauvas siab kawg nkaus li thaum nws pom nws Leej Tub los tuag txom nyem ntsuav li no thiab luag saib tsis taus. Yog Yehauvas tsis kam zam peb lub txim ces nws yeej tsis tso nws tus Tub los tuag li. Tej no qhia peb tias Yehauvas tos tsis hnyu yuav zam peb lub txim.

7. Muaj ib co tib neeg sau rau hauv phau Vajlugkub uas Yehauvas tau zam txim lawm yog leej twg?

 ⁷ Nyob rau hauv phau Vajlugkub yeej sau puv ntia cov uas Yehauvas tau zam lawv lub txim lawm. (Efexus 4:32) Ntshe peb yuav teb ntua tias yog Vaj Ntxwv Manaxes. Nws ua txhaum rau Yehauvas tag rov ua txhaum dua. Nws tseem ntaus thawj hlo mus pe dab qhuas, muab nws tej me nyuam tua txi rau tej dab mlom, thiab nws haj tseem muab ib tug mlom coj mus txawb rau hauv Yehauvas lub tuam tsev. Nyob hauv phau Vajlugkub thiaj sau hais tias: “Nws ua txhaum loj heev rau [Yehauvas], [Yehauvas] thiaj chim heev rau nws.” (2 Xwmtxheej Vajntxwv 33:2-7) Tiam sis thaum Manaxes thim xav thiab hloov lawd, Yehauvas kuj zam nws lub txim. Tsis tas li ntawd, Yehauvas kuj cia nws rov qab los ua vaj ntxwv li qub dua. (2 Xwmtxheej Vajntxwv 33:12, 13) Tsis li, ntshe peb ho xav txog Vaj Ntxwv Daviv. Nws ua txhaum Yehauvas loj kawg nkaus li, xws li deev luag poj luag sev thiab tua tib neeg. Tiam sis thaum Daviv lees nws tej kev txhaum thiab hloov dua siab lawd, Yehauvas kuj zam nws lub txim huv tib si. (2 Xamuyees 12:9, 10, 13, 14) Raws li hais tas los no, Yehauvas yeej tos tsis hnyu yuav zam peb lub txim. Txuas ntxiv no, peb yuav kawm seb Yehauvas thiab tib neeg txoj kev zam txim sib txawv txav li cas.

8. Vim li cas Yehauvas ho zam tau neeg lub txim zoo dua?

⁸ Yehauvas yog “tus uas txiav txim rau tej neeg ntiajteb tagnrho.” (Chivkeeb 18:25) Ib tug txiav txim yuav tsum paub txoj cai kom zoo. Yehauvas yog ib tug txiav txim, nws yeej paub tej kev cai tshab tshab vim nws yog tus rhawv tsim kom muaj kev cai. (Yaxayas 33:22) Tsis muaj ib tug twg yuav paub tau qhov yog thiab qhov tsis yog tob npaum li Yehauvas. Tsis tas li ntawd, ib tug txiav txim yuav tsum paub txhua fab ntawm rooj plaub ntawd ua ntej nws txiav txim. Yehauvas yog tus txiav txim tau ncaj tshaj vim nws paub txhua yam.

9. Yehauvas pom li cas nws thiaj zam tau neeg lub txim?

⁹ Yehauvas tsis zoo li tej neeg txiav txim. Nws paub txhua fab ntawm rooj plaub ntawd. (Chivkeeb 18:20, 21; Phau Ntawv Nkauj 90:8) Nws zoo tsis thooj yam li neeg es tsuas hnov thiab pom xwb. Nws paub hais tias tus neeg ntawd coj li cas rau li cas vim nws niam nws txiv cob qhia nws li ntawd, seb nws puas tau kawm ntaub kawm ntawv, nws nyob rau thaj chaw twg, thiab seb nws tej kev nyuaj siab ntxhov plawv yog li cas rau li cas. Tsis tas li ntawd, Yehauvas haj tseem paub tej nyob nraim nkoos hauv nws nruab siab. Ces thaum tus neeg ntawd ua ib yam twg, Yehauvas yeej paub tag. Tsis muaj ib yam dab tsi uas neeg yuav muab ntis tau tsis pub Vajtswv pom. (Henplais 4:13) Thaum Yehauvas zam txim rau ib tug twg, nws yeej paub txhua yam tag lawm.

10. Vim li cas peb ho hais tias Yehauvas txoj kev txiav txim yeej ncaj ncees tiag? (2 Kevcai 32:4)

¹⁰ Yehauvas txoj kev txiav txim ib txwm ncaj ncees. Nws tsis xaiv leej twg ntsej muag. Nws tsis yog zam txim vim tus neeg ntawd zoo nkauj zoo nraug, muaj txiag nplua nuj, muaj meej mom los sis txawj ua ub ua no. (1 Xamuyees 16:7; Yakaunpaus 2:1-4) Tsis muaj ib tug twg yuav yuam tau los sis xiab tau Yehauvas kom ua li lawv hais. (2 Xwmtxheej Vajntxwv 19:7) Nws tsis txiav txim rau ib tug twg vim nws ntxhov siab los sis pab tus ntawd tu siab. (Khiav Dim 34:7) Yog li ntawd, Yehauvas yeej nkag siab peb txhua leej txhua tus, nws thiaj tsim nyog yog tus txiav txim.​—Nyeem 2 Kevcai 32:4.

11. Yehauvas txoj kev zam txim txawv neeg txoj li cas?

 ¹¹ Cov tib neeg uas sau Cov Nqe Vajlugkub Henplais yeej paub zoo tias Yehauvas txoj kev zam txim yeej txawv neeg txoj. Muaj ib phau ntawv uas tham txog phau Vajlugkub hais tias thaum lawv sau, muaj qee zaug lawv yeej siv tej lo lus Henplais “los piav txog Vajtswv txoj kev zam txim rau tus neeg tau ua txhaum. Lo lus lawv siv ntawd yeej tsis hais txog ib tug neeg zam ib tug neeg.” Tsuas yog Yehauvas tib leeg nkaus nkaus xwb, thiaj yuav zam tau ib tug neeg lub txim txhaum mus li. Ua li thaum Yehauvas ho zam peb lub txim, zoo li cas?

12-13. (1) Thaum Yehauvas zam ib tug neeg twg lub txim lawm, tus ntawd kaj siab npaum li cas? (2) Thaum Yehauvas zam ib tug twg lawm, nws puas rov qab muab coj los hais dua?

¹² Thaum peb pom hais tias Yehauvas zam peb lub txim lawm, yuav ua rau peb nyob kaj siab lug thiab peb lub siab yeej tsis nkaug peb ntxiv. Tos peb muaj txoj kev zoo siab no los yeeb vim yog Yehauvas ua tus zam txim. (Tes Haujlwm 3:19) Yehauvas cia peb rov qab nrog nws sib raug zoo dua yam li qub.

¹³ Thaum Yehauvas zam peb lub txim tag lawd, nws yeej tsis rov muab coj los rau txim dua. (Yaxayas 43:25; Yelemis 31:34) “Hnubtuaj deb hnubpoob npaum li cas, [Yehauvas] tshem peb tej kev txhaum mus povtseg deb npaum li ntawd.” (Phau Ntawv Nkauj 103:12) Peb ris Yehauvas txiaj ntsig tsis txawj tag, thaum peb zaum tsaws xav txog nws txoj kev zam txim. (Phau Ntawv Nkauj 130:4) Ua li tus twg thiaj li yuav txais Yehauvas txoj kev zam txim no?

14. Peb khaws tau li cas thaum Yehauvas txiav txim siab zam ib tug lub txim?

¹⁴ Raws li peb tau pom, thaum Yehauvas zam ib tug twg tsis yog nyob ntawm lub txim loj los sis lub txim yau. Thaum Yehauvas txiav txim siab hais tias nws yuav zam ib tug twg, nws yeej muab xav txhij xav txhua lawm. Yog li ntawd, puas muaj dab tsi ntxiv uas Yehauvas xav txog ua ntej nws zam txim?

15. Raws li Lukas 12:47, 48, muaj ib yam uas Yehauvas xav tag ua ntej nws mam zam txim yog dab tsi?

¹⁵ Muaj ib yam uas Yehauvas xav tag ua ntej nws mam zam txim yog seb tus neeg ntawd puas txhob txwm ua txhaum los yog nws tsis  paub es ho ua tau. Yexus hais meej tseeb nyob rau hauv Lukas 12:47, 48. (Nyeem.) Yog ib tug neeg twg xib tim ua phem thiab paub ntsoov hais tias tej nws ua ntawd yuav txhaum Yehauvas los haj tseem ua ces nws yeej ua txhaum loj kawg nkaus li lawm. Tej tug neeg zoo yam li no tej zaum Yehauvas yuav zam tsis taus nws lub txim. (Malakaus 3:29; Yauhas 9:41) Muaj qee zaug peb qho tug yeej paub tias peb ua txhaum Yehauvas lawm. Peb puas yuav muaj chaw tiag siab tias nws yuav zam tau peb lub txim? Nws yeej zam tau vim hais tias muaj ib yam ntxiv uas nws tseem xav txog thiab.

16. Ntxeev dua siab tshiab yog dab tsi thiab vim li cas ho tseem ceeb rau peb ua li ntawd yog peb xav kom Yehauvas zam peb lub txim?

¹⁶ Muaj ib qho ntxiv uas Yehauvas muab ua zoo xav yog seb tus neeg ntawd puas ntxeev dua siab tshiab. Ntxeev dua siab tshiab yog li cas tiag? Tus neeg ntawd yuav tsum “hloov laj lim plab plaw, cwj pwm los sis tej nws ua.” Xws li tus neeg ntawd tu siab txog tej yam nws tau ua phem los sis tu siab tias ua cas nws ho tsis ua qhov zoo qhov yog. Tsis tas li ntawd, vim nws saib nws txoj kev sib raug zoo nrog Yehauvas tsis muaj nuj nqis, nws thiaj mus ua tau tej yam phem li no. Nco ntsoov tias Vaj Ntxwv Manaxes thiab Daviv nkawv ua txhaum Yehauvas loj heev los thaum nkawv ntxeev dua siab tshiab, Yehauvas haj tseem zam nkawv ob lub txim txhaum. (1 Vajntxwv 14:8) Yog li ntawd, Yehauvas yuav tsum tau pom hais tias peb ntxeev dua siab tshiab lawm ua ntej nws zam txim, tsis yog lam lees ntawm lub ncauj tias peb tau ua txhaum lawm. Peb yuav tsum tau hloov tiag tiag. * Cia peb mam li mus tham txuas ntxiv txog qhov no.

17. Yuav kom peb tsis txhob rov mus ua txhaum, peb yuav tau ua li cas? (Yaxayas 55:7)

¹⁷ Ib yam uas Yehauvas ua zoo xav yog seb peb puas tig rov qab los cuag nws. Tus neeg ntawd yuav tsum tso tseg tsis ua phem ntxiv thiab coj lub neej raws li Yehauvas lub siab nyiam. (Nyeem Yaxayas 55:7.) Nws yuav tau xav tib yam li Yehauvas xav. (Loos 12:2; Efexus 4:23) Nws yuav tau tswj nws lub siab tiag  tiag tsis txhob rov ua txhaum ntxiv. (Kaulauxais 3:7-10) Yog peb tig ntiag rov qab los lawm tiag, Yehauvas thiaj li yuav zam tau peb lub txim yeeb vim yog Yexus tus nqe theej txhoj.​—1 Yauhas 1:7.

18. Peb khaws tau Yehauvas txoj kev zam txim li cas?

¹⁸ Cia peb rov qab mus tham dua seb peb khaws tau li cas. Peb khaws tau tias Yehauvas yog tus Vajtswv uas zam tau neeg lub txim loj tshaj plaws. Tos peb hais li no los (1) nws yeej tos tsis hnyu yuav zam, (2) nws paub txhua tsav txhua yam txog peb lub neej. Tsis tas li ntawd, nws paub tias peb xeeb txawm tau los li cas nws thiaj li paub hais tias yuav txiav txim li cas rau peb. Thiab (3) thaum Yehauvas zam txim lawd, nws yeej muab ntxuav dawb paug cuag li daus lawm tiag. Nws ua li no pab tau kom peb lub siab tsis txhob rov qab nkaug peb thiab kom peb rov qab muaj txoj kev sib raug zoo nrog nws yam li qub.

19. Peb yog noob txaug neeg txhaum thiab pheej ua qhov txhaum tas zaj tas zog, vim li cas peb ho muaj taus kev zoo siab?

¹⁹ Peb yog noob txaug neeg txhaum ces ua zaj twg tsav twg los yeej txhaum. Peb zoo siab kawg nkaus li uas Yehauvas haj tseem hmov tshua thiab paub hais tias nws cov tib neeg yeej ua tsis tau txhua yam zoo. Yog li ntawd, tsis tas peb yuav ntxhov ntxhov siab ua tsis tsheej dab tsi vim peb yog neeg txhaum thiab pheej ua tsis tau qhov zoo qhov yog. (Phau Ntawv Nkauj 103:8-14; 130:3) Yog peb twb ua npaum li peb ua tau kom haum Yehauvas siab ces cia li kav tsij kaj siab. (Filipis 4:4-6; 1 Yauhas 3:19-22; mus saib phau ntawv hu ua Insight on the Scriptures, Volume 2, sab 771 ua lus Askiv) Thaum peb tau hnov cov lus no mas tuaj zog kawg nkaus li.

20. Zaj kawm txuas ntxiv tom ntej no yuav piav txog dab tsi?

²⁰ Peb ris Yehauvas txiaj ntsig kawg nkaus li uas nws zam peb lub txim thaum peb lees peb tej kev txhaum. Nyob rau zaj txuas ntxiv tom ntej no, yuav piav txog cov ntsiab lus no: Peb yuav khaws Yehauvas txoj kev zam txim no coj mus coj li cas? Peb txoj kev zam txim thiab Yehauvas txoj kev zam txim zoo sib xws li cas, thiab ho txawv txav li cas? Vim li cas ho tseem ceeb rau peb nkag siab qhov txawv txav ntawd?