Yehauvas Cov Timkhawv ib txhia siv cov app no los nug moo thiab xa xov rau lawv tsev neeg thiab cov kwvtij nkauj muam. Tiamsis peb yuav tsum nco ntsoov cov lus qhuab ntuas no: “Tus neeg paub qabhau pom tej xwm uas yuav raug nws, nws txawm zam kev lawm, tiamsis tus neeg ruam too hau ntsoov mus rau qhov ntawd, thaum uas nws tau chaw ti nws mam li xeev xwm.”​—Pajlug 27:12.

Peb yeej paub tias Yehauvas xav tiv thaiv peb xwb peb thiaj tsis nrog cov neeg uas ua kom peb tsis muaj kev sib haum xeeb thiab cov uas raug rho tawm hauv lub koom txoos lawm lossis cov uas tsis qhia raws li Vajtswv Txojlus ua ke. (Loos 16:17; 1 Kauleethaus 5:11; 2 Yauhas 10, 11) Peb yeej ua zoo xaiv peb cov phoojywg hauv lub koom txoos rau qhov ib txhia tsis ua li phau Vajlugkub hais. (2 Timautes 2:20, 21) Tiamsis yuav nyuaj rau peb xaiv phoojywg hauv tej app uas peb siv no.

Yeej haj yam nyuaj rau peb paub seb lawv yog neeg zoo li cas yog peb nrog ib pab neeg coob coob hauv lub app tham. Yehauvas Cov Timkhawv ib txhia twb ntsib teeb meem lawm vim lawv ua li no. Yog hais tias cov neeg uas peb mus koom nrog ntawd muaj tsheej pua tsheej txhiab leej ces peb yuav ua li cas ceev faj tau? Peb yeej tsis muaj cuab kav paub tau tias cov neeg ntawd zoo li cas thiab lawv txojkev ntseeg puas ruaj khov. Phau Ntawv Nkauj 26:4, TT hais tias: “Kuv tsis nrog cov neeg dag zaum ua ke, kuv tsis nrog cov neeg ncauj lus zoo siab phem koom ib lub siab.” Nqi Vajlugkub no qhia rau peb tias zoo dua rau peb siv tej app hauv xov tooj los nrog cov neeg uas peb paub zoo tham xwb.

Txawm hais tias peb tsuas nrog ob peb tug xwb los peb yuav tsum tsis txhob siv tag nrho peb lub sijhawm los nrog lawv tham. Tsis txhob xav tias peb yuav tsum teb txhua tus. Paulus faj seeb rau Timautes txog cov ‘neeg taug xaiv, neeg thab plaub thiab hais tej lus uas tsis tsimnyog hais.’ (1 Timautes 5:13) Niaj hnub nimno los yog peb tsis ceev faj ces peb yuav siv tau peb cov app mus ua li ntawd thiab.

Yehauvas Cov Timkhawv uas paub tab yuav tsis mus tham txog lossis mus mloog luag tej thuam thiab hais tej lus uas tsis tsim nyog hais txog lwm tus. (Phau Ntawv Nkauj 15:3; Pajlug 20:19) Thiab yuav tsis mus mloog tej uas tsis txaus ntseeg thiab tsis muaj pov thawj qhia tias muaj tiag. (Efexus 4:25) Peb muaj tej ntaub ntawv Vajlugkub ntau heev thiab muaj tej xov xwm uas peb tso siab tau nyob hauv peb lub vej xaij jw.org thiab muaj tej lus tshaj tawm txhua lub hlis hauv JW Tshooj TV.

Yehauvas Cov Timkhawv ib txhia siv tej app no los ua lag ua luam thiab nrhiav neeg los ua haujlwm rau lawv. Tiamsis nco ntsoov tias tej no yog kev ua lag ua luam tsis yog kev teev tiam Yehauvas. Yog li ntawd cov Khixatia uas tsis qaug rau nyiaj rau kub yuav tsis muab cov kwvtij nkauj muam hauv lub koom txoos los ua lag ua luam.​—Henplais 13:5.

Yog li peb siv puas tau tej app no los thov nyiaj pab peb cov kwvtij nkauj muam uas cheem tsum kev pab lossis raug xwm txheej phem? Peb yeej hlub thiab xav pab peb cov kwvtij nkauj muam kawg. (Yakaunpaus 2:15, 16) Tiamsis yog peb ua li no ces yuav ua nyuaj rau Npe-ee lossis cov txwj laus hauv lub koom txoos pab lawv. (1 Timautes 5:3, 4, 9, 10, 16) Thiab peb tsis xav ua kom lwm tus xav tias peb raug xaiv los ua tes haujlwm pab cov kwvtij nkauj muam.

Peb sawvdaws xav ua kom Yehauvas tau koob meej xwb. (1 Kauleethaus 10:31) Yog li ntawd cia peb xyuam xim thaum peb siv tej app hauv xov tooj los nrog lwm tus tham.