1-2. Ib tug txwj laus khaws tau li cas thaum tsa ncauj mus qhuab ntuas lwm tus?

 TAU ntau ntau lub xyoos dhau los lawm, muaj ob tug txwj laus txawm mus xyuas ib tug nkauj muam ntseeg uas ncua tau ib nyuag ntus tsis tuaj koom txoos lawm. Yog li ntawd, ob tug txwj laus ntawd ib tug nthuav ob peb nqe Vajlugkub los txhawb tus muam ntawd kom rov tuaj koom txoos. Tus txwj laus ntawd nws xav hais tias nws nyeem li no mas txhawb tau tus muam ntawd lub zog kawg nkaus li lawm. Tiamsis thaum nws thiab tus kwvtij uas nrog nws ntawd sawv kev mus, tus muam txawm tsa ncauj hlo hais rau nkawv tias: “Neb tuaj no, neb twb tsis paub txog kuv tej kev nyuaj siab ib nyuag qho li.” Thaum ob tug txwj laus nrog tus nkauj muam no tham, nkawv tsis nug qab taug hau xauv seb tus muam muaj kev nyuaj siab li cas. Tom qab nkawv mus txhawb nws tag los twb pab tsis tau nws dabtsi li.

² Tom qab no, tus txwj laus uas nyeem cov nqe Vajlugkub ntawd tau hais tias: “Thaum tus muam teb li ntawd rau wb mas ua rau kuv xav tias cas yuav tsis ris luag txiaj ntsig li! Kuv pheej muab xav mus xav los ces kuv thiaj li xam pom hais tias kuv tsuas nyeem tej niag phab tej niag pheev Vajlugkub, tiamsis kuv twb tsis nco nug nws ib los li. Xws li, nug hais tias, ‘Tau ntu no, koj nyob li cas lawm lossis puas muaj dabtsi kuv pab tau?’” Thaum muaj li no tas tus txwj laus paub zoo tias nws ua qhovtwg tsis yog lawm. Niaj hnub niam no, nws yuav nrog ib tug twg tham, nws yeej mam xav mam hais.

3. Leejtwg nyob hauv lub koom txoos thiaj li muaj cuab kav ntuas tau xwb?

 ³ Cov txwj laus zoo li cov tswv yug yaj. Lawv muaj tes haujlwm qhuab ntuas cov ntseeg li tsim nyog qhuab ntuas xwb. Tsis tas li ntawd, cov nyob hauv lub koom txoos los, yeej pab  qhuab ntuas tau lwm leej lwm tus tib yam nkaus. Xws li, muaj ib tug kwvtij lossis ib tus nkauj muam ho tau siv ib nqe Vajlugkub los txhawb lwm tus phoojywg. (Phau Ntawv Nkauj 141:5; Pajlug 25:12) Lossis cov nkauj muam laus ho pab ntuas cov nkauj muam hluas raws li Titus 2:3-5. Thiab tsis tas li ntawd, cov niam cov txiv los nco ntsoov ntuas lawv tej menyuam kom tsheej haj. Txawm hais tias zaj kawm no hais txog cov txwj laus hauv lub koom txoos xwb los, peb yeej khaws tau coj los ua neej tib yam nkaus kom txhua leej txhua tus muaj kev zoo siab.​—Pajlug 27:9, TT.

4. Nyob hauv zaj kawm no peb yuav piav txog dabtsi?

⁴ Nyob hauv zaj kawm no peb yuav mus piav txog 4 lub ntsiab lus: (1) Vim li cas peb ho qhuab ntuas? (2) Puas xoos qhuab ntuas? (3) Leejtwg thiaj qhuab ntuas tau? (4) Yuav ua li cas thiaj li txawj qhuab ntuas lwm tus?

5. Vim li cas tibneeg kheev mloog tus txwj laus uas muaj kev hlub thaum nws tsa ncauj ntuas lwm tus? (1 Kauleethaus 13:4, 7)

⁵ Tag nrho cov txwj laus yeej hmov tshua cov kwvtij nkauj muam ntseeg. Yog tias lawv pom ib tug qaij mus rau sab xis lossis qaij mus rau sab laug lawm, lawv yeej yuav rub nws los rau hauv plawv kev. (Kalatias 6:1) Ua ntej yuav mus ntuas ib tug twg, cov txwj laus yeej muab Paulus tej lus xav mus xav los kom thiaj txawj hlub tshua lwm leej lwm tus. Xws li, “tus uas muaj kev hlub, nws ua taus siab ntev, nws muaj lub siab dawb siab zoo; . . . Nws nyiaj taus txhua tsav yam, muab siab rau ntseeg, cia siab thiab ua siab ntev mus li.” (Nyeem 1 Kauleethaus 13:4, 7.) Thaum cov txwj laus zaum tsaws ua tib zoo xav txog cov nqe Vajlugkub no, lawv yuav txawj ntuas lwm tus rau qhov zoo qhov yog. Thaum tus uas raug ntuas ntawd pom tias cov txwj laus hmov tshua nws tiag tiag, ces nws yuav cuab pob ntseg los mloog lawv tej lus ntuas.​—Loos 12:10.

6. Tus tubtxib Paulus coj tau tus yam ntxwv zoo li cas?

⁶ Tus tubtxib Paulus yog ib tug txwj laus uas coj tau zoo kawg nkaus li. Paulus txawj qhuab ntuas. Ua ntej nws yuav qhuab ntuas ib tug twg, nws xub hais txog luag qhov zoo ua ntej, nws mam li tsa ncauj los ntuas lawv tom qab. Xws li, thaum Paulus ntuas cov ntseeg nyob hauv lub nroog Thexalaunikes, nws yeej qhuas txog lawv tes haujlwm. Lawv sib zog ua haujlwm li cas los, lawv tsis khuvxim. Txawm lawv yuav raug kev txom nyem nyuaj siab li cas los, lawv yeej ua taus siab ntev. Nws kuj xav txog lawv lub neej thiab, vim nws paub hais tias lawv lub neej yeej tsis yoojyim kiag li. Txawm lawv raug kev tsim txom npaum li cas los, lawv yeej ua siab ntev thev. (1 Thexalaunikes 1:3; 2 Thexalaunikes 1:4) Tsis tas li ntawd, nws tseem qhuas cov kwvtij ntawd tias lawv ua yam ntxwv zoo kawg li rau lwm cov ntseeg xyaum. (1 Thexalaunikes 1:8, 9) Lawv txhua leej txhua tus txaus siab rau Paulus tej lus tiag tiag li. Qhov no kuj qhia tau tias Paulus hmov tshua cov kwvtij txhua leej txhua tus thiab. Twb yog muaj li ntawd, cov ntseeg nyob hauv lub nroog Thexalaunikes thiaj mloog nws cov lus thaum nws sau tsab ntawv mus ntuas lawv.​—1 Thexalaunikes 4:1, 3-5, 11; 2 Thexalaunikes 3:11, 12.

7. Vim li cas muaj tej co lus ntuas tsiv tsiv mloog?

⁷ Yuav muaj li cas yog tias peb tsis mam xav mam hais ua ntej qhuab ntuas lwm tus? Muaj ib tug ua txwj laus tau ntev loo lawm tau hais li no: “Ib txhia chim thaum luag lwm tus qhuab ntuas vim tsis yog cov lus ntuas, tiamsis yog vim tus hais tsis txawj hais.” Yog li ntawd, nco ntsoov txuag luag ntsej muag thaum yuav ntuas ib tug twg.

8. Ua ntej ib tug txwj laus twg yuav mus qhuab ntuas lwm tus, nws yuav tau xav li cas tso?

⁸ Cov txwj laus yuav tau ua tib zoo xav tom ntej tom qab ua ntej qhuab ntuas lwm tus. Ua ntej ib tug txwj laus yuav qhuab ntuas lwm tus, nws yuav tau xav li no tso: ‘Puas tsim nyog kuv tsa ncauj hais ib lom? Ua li no, kuv puas paub tseeb hais tias tus tod ua tsis yog lawm tiag? Ua li, tus tod puas tau hla Vajtswv tej kevcai, lossis puas yog nws txojkev coj no coj ua txawv kuv txoj xwb?’ Cov txwj laus ib tug twg tsis txhob ua tus “hais lus tsis xav tom ntej tom qab.” (Pajlug 29:20) Yog ib tug txwj laus twg tsis paub tseeb hais tias yuav qhuab ntuas tus tod, nws cia li mus nug lwm tus txwj laus seb puas xoos ntuas tus tod lossis tsis xoos.​—2 Timautes 3:16, 17.

9. Peb khaws tau li cas los ntawm Paulus txog hnav tsoos tsho? (1 Timautes 2:9, 10)

⁹ Cia peb mus piav txog tus yam ntxwv no: Ib tug txwj laus txhawj txog ib tug ntseeg tej tsoos. Ua ntej nws yuav hais ib los twg, nws yuav tau xav seb, ‘Tus tod tej tsoos puas hla Vajtswv tej cai?’ Vim tus txwj laus no nws tsis xav hais raws li nws lub siab xav. Yog li no, nws thiaj li mus nug ib tug txwj laus lossis ib tug ntseeg uas paub tab seb nws ho xav li cas. Tom qab ntawd, nkawv mam li mus tshuaj seb Paulus hais li cas txog tej tsoos. (Nyeem 1 Timautes 2:9, 10.) Paulus tsuas piav tias kom hnav tej tsoos tsho uas nqa tau koob nto npe rau Yehauvas. Yog li ntawd, Paulus tsis phua cai rau ib tug twg coj seb nws yuav hnav li cas rau li cas. Nws paub hais tias cov kwvtij nkauj muam yuav hnav li cas los xij peem tsuav yog txhob hla Vajtswv tej lus nyob hauv phau Vajlugkub. Yog cov txwj laus tsis paub xyov yuav ntuas los tsis ntuas, lawv yuav tau ua tib zoo saib seb tus tod tej khaub ncaws puas raug ntsej muag los tsis raug.

10. Vim li cas peb txhob yuam lwm tus ua raws li peb lub siab xav?

¹⁰ Muaj ob tug kwvtij sawv ntsug ua ke ib tug hnav txawv ib tug, los txhob xav hais tias tus no hnav raug ntsej muag dua tus tod. Yog li ntawd, peb txhob yuam lwm tus kom ua raws li peb lub siab xav.​—Loos 14:10.

11-12. Yog ib tug txwj laus yuav tau ntuas ib tug twg, nws yuav tau xav txog cov lus nug twg thiab vim li cas?

¹¹ Yog hais tias cuaj kaum los yuav tau ntuas ib tug twg, leejtwg thiaj li yog tus uas tsim nyog los mus ntuas? Ua ntej ib tug txwj laus yuav ntuas ib tug niam tsev lossis ib tug menyuam, nws yuav tau mus nug tus txiv tsev nyob tsam tus txiv tsev ho xav ntuas ua ntej tso. b Lossis nyob tsam tus txiv tsev xav nyob ntawd thiab thaum tus txwj laus qhuab ntuas. Tsis tas li ntawd, raws li hais nyob  rau  nqe 3, muaj qho lub sijhawm zoo rau cov nkauj muam ntseeg uas laus taws qhuab ntuas cov uas tseem hluas.

¹² Muaj qho yam uas cov txwj laus yuav tau ua zoo xav ua ntej. Xws li, ‘Puas tsim nyog kuv mus ntuas tus neeg ntawd, lossis zoo dua rau lwm leej lwm tus ntuas nws?’ Muab ua piv txwv li no. Yog tias ib tug nws saib nws tsis muaj nuj nqis dabtsi, ces kuj zoo rau ib tug txwj laus uas thaum ub nws xav tib yam li ntawd mus nrog tus ntawd tham. Yuav yoojyim rau tus ntawd mloog dua vim tus txwj laus nkawv tau taug tib txojkev dua los lawm. Txawm tsis muaj cov txwj laus zoo li ntawd los, nco ntsoov tias cov txwj laus lub luag haujlwm yog los mus qhuab ntuas cov kwvtij nkauj muam ntseeg raws li phau Vajlugkub qhia. Txawm zoo li cas los xij peem, qhov tseem ceeb yog ntuas lwm tus.

13-14. Vim li cas tseem ceeb rau ib tug txwj laus mloog ua ntej nws ntuas?

¹³ Ua tib zoo mloog. Thaum ib tug txwj laus twg nws yuav mus qhuab ntuas lwm tus, nws yuav tau zaum tsaws xav txog li no: ‘Ua li, tus kwvtij ntawd tej teeb meem yog li cas tiag? Muaj dabtsi los raug nws lub neej? Puas tshuav qho yam teeb meem uas kuv tsis paub txog thiab? Tamsim no nws xav tau kev pab li cas tiag?’

¹⁴ Raws li Yakaunpaus 1:19, cov uas yuav mus ntuas ib tug twg yuav tau coj li no. Yakaunpaus sau li no: “Nej yuav tsum nco ntsoov hais tias txhua tus yuav tsum kub siab lug mloog, tiamsis tsis txhob maj hais thiab tsis txhob chim sai.” Muaj tej tug txwj laus xav hais tias nws paub ib puas tsav yam tas lawm, tiamsis ua li nws puas paub tiag tiag? Nyob rau hauv Pajlug 18:13 hais li no: “Ua tib zoo mloog ua ntej tso koj mam teb. Yog koj tsis ua tib zoo mloog, ces koj yog tus neeg ruam thiab raug luag thuam ntag.” Qhov zoo mas tus txwj laus mus nug kiag tus neeg ntawd tso, nws thiaj paub tseeb tias muaj li cas tiag. Yog li, tus txwj laus yuav tau mloog ua ntej nws ntuas. Nco ntsoov txog tus txwj laus thaum peb pib zaj no, nws piav txog nws zaj. Nws xam pom hais tias tsis yog cia li hais raws li yus twb npaj tseg lawm, tiamsis yuav tau nug saib tus muam noj li cas nyob li cas. Xws li, nws yuav tau nug hais tias: “Tau ntu no koj nyob li cas lawm lossis puas muaj dabtsi kuv pab tau?” Yog hais tias txhua tus txwj laus lauj sijhawm los nug qhov tseeb ces lawv yuav txhawb tau txhua tus kwvtij nkauj muam ntseeg.

15. Raws li Pajlug 27:23, cov txwj laus yuav tau muab cov lus no coj los siv li cas rau hauv lub koom txoos?

¹⁵ Cov txwj laus yuav tau saib xyuas cov ntseeg tam li paj yaj. Zoo tib yam li thaum peb nyuam qhuav pib tham nyob rau hauv zaj kawm no uas hais txog tias tsis yog yuav cia li nyeem tej niag phab tej niag pheev nqe Vajlugkub los ntuas lawv, tiamsis yuav tau ua tib zoo hais kom raug lawv siab. Peb cov kwvtij  nkauj muam yuav tsum paub hais tias cov txwj laus hlub thiab hmov tshua lawv tiag tiag. (Nyeem Pajlug 27:23.) Cov txwj laus yuav tau ua npaum li lawv ua tau los mus nrog cov kwvtij nkauj muam ntseeg sib raug zoo.

16. Ua li cas cov txwj laus thiaj txawj qhuab ntuas?

¹⁶ Cov txwj laus yuav tau sib txuas lus nrog cov kwvtij nkauj muam ntseeg kom lawv thiaj tsis xav tias thaum twg cov txwj laus nrog lawv tham yog lawv ua txhaum xwb. Yog li ntawd, thaum cov txwj laus sib txuas lus nrog cov ntseeg tsis tseg tsis tu, thiaj qhia tau tias cov txwj laus txhawj xeeb txog lawv thaum lawv muaj teeb meem. Muaj ib tug ua txwj laus tau ntev loo lawm tau hais li no: “Yog cov txwj laus thiab cov ntseeg sib paub siab lawm, tus ntuas los yuav ntuas tau.” Tsis tas li ntawd, tus mloog los thiaj li xav mloog.

17. Lub caij twg zoo rau cov txwj laus ua siab ntev thiab siab zoo?

¹⁷ Ua siab zoo thiab ua siab ntev. Thaum muaj ib tug twg cov nyom tej uas phau Vajlugkub qhia, cov txwj laus yuav tau rub siab ntev thiab ua siab zoo. Yog ib tug kwvtij nkauj muam twg tsis mloog tus txwj laus, los nws tsis txhob ua npau taws vog. Nyob hauv phau Vajlugkub, piav txog Yexus li no: “Tus tauj iab uas po lawm, nws yuav tsis muab lov, lossis lub teeb uas twb yuav tuag, nws yuav tsis tshuab kom tuag.” (Mathais 12:20) Tom qab ntawd, tus txwj laus kuj thov tau Yehauvas kom pab tus ntawd thiab. Tsis tas li ntawd, cia lub sijhawm ncua rau tus kwvtij ntawd ua tib zoo xav txog tej yam uas tau ntuas nws lawm. Yog tus txwj laus ua zoo hais thiab ua siab ntev ntuas ces yuav yoojyim rau tus kwvtij ntawd mloog nws tej lus ntuas. Nco ntsoov muab Vajtswv Txojlus los ntuas.

18. (1) Thaum yuav qhuab ntuas ib tug twg, peb yuav tau nco ntsoov li cas? (2) Raws li daim duab nyob hauv lub ntsiab me, ob niam txiv no tham txog dabtsi?

¹⁸ Ua tag txhob rov ua dua. Vim peb yog noob txaug neeg txhaum, peb yuav coj tsis tau txhua txhua nqe li hauv zaj kawm no hais. (Yakaunpaus 3:2) Peb yeej yuav ua qho yam  yuam kev tiamsis nco ntsoov txhob rov ua dua. Yog cov kwvtij nkauj muam paub hais tias peb hlub lawv, ces yuav yoojyim rau lawv zam peb thaum peb hais tau qho yam siab lawv.​—Mus saib lub ntsiab “ Peb Xav Tshaj Xo Rau Cov Niam Txiv Paub.”

19. Yuav ua li cas peb cov kwvtij nkauj muam thiaj li yuav muaj kev zoo siab?

¹⁹ Zoo nkaus li peb tau kawm tas los no, yeej tsis yoojyim tsa ncauj qhuab ntuas lwm tus kiag li. Peb thiab cov peb qhuab ntuas puav leej yog noob txaug neeg txhaum. Nco ntsoov tej uas peb twb kawm tag los lawm nyob hauv zaj kawm no. Thaum yuav qhuab ntuas ib tug twg, los ua zoo xav tso. Tsis tas li ntawd, seb puas xoos qhuab ntuas thiab seb puas tsim nyog peb yog tus ntuas. Ua ntej peb yuav qhuab ntuas ib tug twg ua tib zoo nug thiab ua tib zoo mloog, peb thiaj li paub seb nws tej teeb meem yog li cas rau li cas. Muab xav li no: Yog peb ho yog nws, peb ho xav li cas? Cia li ua siab ntev thiab siab zoo, peb thiaj nrog tau peb cov kwvtij nkauj muam sib raug zoo. Nco ntsoov li no: Peb xav kom peb tej lus ntuas raug lwm tus lub siab thiab ua rau lawv “zoo siab.”​—Pajlug 27:9, TT.